Nɔ flín bo nɔ xo ɖɛ dó mɛ ɖěvo lɛ́ tamɛ

1. Nɛ̌ mǐ ka wa gbɔn bo tuun ɖɔ ɖɛ mǐtɔn lɛ́ ɖo tají nú Jexóva?

NǓJÍWǓ ɖé wɛ ɖɛ nyí. Lin tamɛ dó nǔ élɔ́ wú: Jexóva sɔ́ azɔ̌ ɖé lɛ́ dó así nú wɛnsagun lɛ́. (Ðɛh. 91:11) É lɛ́ sɔ́ azɔ̌ kpinkpɛn lɛ́ d’así nú Vǐ súnnu tɔn. (Mat. 28:18) Amɔ̌, mɛ̌ é ka sɔ́ ɖɛ lɛ́ sise ɔ sín azɔ̌ jó ná? Azɔ̌ ɖé wɛ bɔ Jexóva wá gbeta ɔ kɔn bo ná nɔ wa éɖésúnɔ. Jexóva, Mɛ e “nɔ se ɖɛ” é ɖésúnɔ wɛ nɔ ɖótó mǐ.—Ðɛh. 65:3.

2. Kpɔ́ndéwú tɛ́ mɛsɛ́dó Pɔ́lu ka sɔ́ ɖ’ayǐ ɖo ɖɛ xixo dó mɛ ɖěvo lɛ́ tamɛ kpáxwé?

² Nǔgbó wɛ ɖɔ mǐ sixú sɛkpɔ́ Jexóva faa bo ɖɔ xó n’i dó nǔ e ɖo ayi mɛ ɖu nú mǐ wɛ lɛ́ é wú, amɔ̌, mǐ ɖó ná nɔ lɛ́ xo ɖɛ dó mɛ ɖěvo lɛ́ tamɛ. Mɛsɛ́dó Pɔ́lu wa mɔ̌. Ði kpɔ́ndéwú ɔ, é wlán nǔ élɔ́ sɛ́dó agun e ɖo Efɛ́zi é: “Un kpo ɖo ɖɛ xo dó ta mitɔn mɛ wɛ.” (Efɛ́. 1:16) Pɔ́lu nɔ lɛ́ xo ɖɛ dó mɛ ɖokpó ɖokpó sín tamɛ. Ði kpɔ́ndéwú ɔ, é ɖɔ nú Timɔtée ɖɔ: “Un nɔ dó kú nú Mawu, . . . bo nɔ lɛ́ flín we hwebǐnu ɖo vo e un nɔ sa nú Mawu zǎn kéze lɛ́ é mɛ.” (2 Tim. 1:3) Pɔ́lu ɖó adohu adohu éɖésúnɔ tɔn lɛ́ bo ɖó ná nɔ xo ɖɛ d’é wú. (2 Kɔ. 11:23; 12:7, 8) É ɖo mɔ̌ có, é nɔ ba hwenu bo nɔ xo ɖɛ dó mɛ ɖěvo lɛ́ tamɛ.

3. Étɛ́wú mǐ ka sixú wɔn bo gɔn ɖɛ xo dó mɛ ɖěvo lɛ́ tamɛ?

³ Mǐ sixú wɔn bo gɔn ɖɛ xo dó mɛ ɖěvo lɛ́ tamɛ hweɖélɛ́nu. Étɛ́wú? Nɔví nyɔ̌nu e nɔ nyí Sabrinaa é ɖ’ayi hwɛjijɔ lɛ́ ɖokpó wú. É ɖɔ: “Gbɛ ninɔ ɖo gbɛ élɔ́ mɛ vɛ́ wǔ tawun. Tagba mǐtɔn lɛ́ sixú nɔ fɛ́ ayi mǐtɔn sɔmɔ̌ bɔ mǐ ná nɔ xo ɖɛ dó hudó mǐɖésúnɔ tɔn lɛ́ kɛ́ɖɛ́ wú.” Nǔ mɔ̌hun nɔ xá hwi lɔ wɛ a? Ényí mɔ̌ wɛ ɔ, xóta élɔ́ sixú d’alɔ we. É ná (1) tínmɛ nǔ e wú é ɖo tají ɖɔ è ní nɔ xo ɖɛ dó mɛ ɖěvo lɛ́ tamɛ é, (2) bo ná lɛ́ ɖe wě tawun tawun lɛ́ xá we dó lěe a sixú wa mɔ̌ gbɔn é wú.

ÉTƐ́WÚ È KA ÐÓ NÁ NƆ XO ÐƐ DÓ MƐ ÐĚVO LƐ́ TAMƐ?

4-5. Nɛ̌ ɖɛ e mǐ nɔ xo dó mɛ ɖěvo lɛ́ tamɛ é ka sixú “w’azɔ̌ tawun” gbɔn? (Jaki 5:16)

⁴ Ðɛ e è nɔ xo dó mɛ ɖěvo lɛ́ tamɛ é “nɔ w’azɔ̌ tawun.” (Xa Jaki 5:16.) Ðɛ xixo dó mɛ ɖěvo lɛ́ tamɛ sixú zɔ́n bɔ ninɔmɛ ɖé húzú nǔgbó dóó a? Ganjí, nǔ sixú nyí mɔ̌. Jezu tuun ɖɔ mɛsɛ́dó Piyɛ́ɛ ná gbɛ́ émí zaanɖé có, é ɖɔ: “Un sa vo dó ta towe mɛ bónú nǔɖiɖi towe ní ma vɔ́ da ó.” (Luk. 22:32) Pɔ́lu ɖésú tuun ɖɔ ɖɛ sixú zɔ́n bɔ ninɔmɛ ɖé húzú. Hwenu e è sú Pɔ́lu dó gan mɛ d’acɛ jí ɖo Hlɔ̌ma é ɔ, é wlán nǔ élɔ́ sɛ́dó Filemɔ́ɔ: “Un ɖo nukún ɖó wɛ ɖɔ ɖɛ mitɔn lɛ́ ná zɔ́n, bɔ è ná ɖe mì nyi te nú mi.” (File. 22) Wǎgbɔ tɔn ɔ, é sɔ́ lín cóbónú è ɖe Pɔ́lu nyi te ǎ, bɔ é lɛ́ bɛ́ wɛnjíjlázɔ́ tɔn.

⁵ É ɖo wɛn ɖɔ, tínmɛ énɛ́ tɔn kún nyí ɖɔ mǐ sixú dó cɔcɔ nú Jexóva gbɔn ɖɛ xixo gblamɛ ó. É nɔ ɖ’ayi nǔ e ɖo ayi mɛ ɖu nú mɛsɛntɔ́ tɔn lɛ́ wɛ é wú, bo nɔ wá gbeta ɔ kɔn hweɖélɛ́nu bo nɔ wa nǔ sɔgbe xá nǔ e yě byɔ́ ɛ é. Énɛ́ tuuntuun sixú d’alɔ mǐ bɔ mǐ ná xo ɖɛ vívɛ́ sɛ́dó Jexóva dó ninɔmɛ ɖé wú, bo jó xó ɔ dó nyi alɔ mɛ n’i kpó jiɖiɖe kpó.—Ðɛh. 37:5; kpɔ́n 2 Kɔlɛ́ntinu lɛ́ 1:11 kpó tínmɛ e Biblu nǔkplɔ́nkplɔ́n tɔn ná d’é jí é kpó.

6. Nɛ̌ ɖɛ xixo dó mɛ ɖěvo lɛ́ takúnmɛ ka nɔ kunkplá lěe nǔ nɔ cí nú mǐ dó yě wú é gbɔn? (1 Piyɛ́ɛ 3:8)

⁶ Ðɛ xixo dó mɛ ɖěvo lɛ́ tamɛ nɔ d’alɔ mǐ bɔ mǐ nɔ ɖó “nǔbláwǔkúnúmɛ e gɔ́ngɔ́n é.” (Xa 1 Piyɛ́ɛ 3:8.) Nǔbláwǔkúnúmɛ wɛ nyí ɖɔ è ní tuun wǔvɛ́ e mɛ gbɔn wɛ mɛ ɖěvo ɖe é, bo ba ná d’alɔ bónú é ná mɔ kɔ dó sa fún. (Mak. 1:40, 41) Mɛxó agun tɔn ɖé nɔ nyí Michael bo ɖɔ: “Ényí un xo ɖɛ dó hudó mɛ ɖěvo lɛ́ tɔn tamɛ ɔ, un nɔ tuun nǔ e ɖí xwi xá wɛ yě ɖe lɛ́ é hú gǎn, bɔ énɛ́ nɔ zɔ́n bɔ wǎn e un yí nú yě é nɔ gɔ́ngɔ́n d’é jí. Un nɔ mɔ ɖɔ un sɛkpɔ́ yě d’é jí ényí yědɛɛ lɛ́ ná bo ma tlɛ tuun mɔ̌ ǎ ɔ nɛ́.” Mɛxó agun tɔn ɖé nɔ nyí Richard, bo ɖɔ le ɖěvo xó. É ɖɔ: “Ényí mǐ xo ɖɛ dó mɛɖé tamɛ ɔ, mǐ nɔ ba hú gǎn bo ná wa nǔɖé dó d’alɔ ɛ.” É ɖɔ gɔ́ ná ɖɔ: “Ényí mǐ wa nǔ tawun ɖé dó d’alɔ mɛ e tamɛ mǐ xo ɖɛ dó é ɔ, ɖo ali ɖé nu ɔ, alɔ dó wɛ mǐ ɖe bónú ɖɛ e mǐ xo dó ta tɔn mɛ é ná cɛ nɛ́.”

7. Nɛ̌ ɖɛ xixo dó mɛ ɖěvo lɛ́ tamɛ ka sixú d’alɔ mǐ bɔ mǐ ná ɖó linlin e ɖo jlɛ̌ jí é dó tagba mǐtɔn lɛ́ wú gbɔn? (Filípunu lɛ́ 2:3, 4) (Kpɔ́n ɖiɖe lɛ́ lɔmɔ̌.)

⁷ Ðɛ xixo dó mɛ ɖěvo lɛ́ tamɛ nɔ d’alɔ mǐ bɔ mǐ nɔ ɖó linlin e ɖo jlɛ̌ jí é dó tagba mǐɖésúnɔ tɔn lɛ́ wú. (Xa Filípunu lɛ́ 2:3, 4.) Gbɛ élɔ́ e ɖo Awǒvi sín acɛ mɛ é zɔ́n bɔ mǐ mɛ ɖokpó ɖokpó ɖo wǔvɛ́ ɖé lɛ́ mɔ wɛ. (1 Jaan 5:19; Nǔɖe. 12:12) Ényí mǐ ɖó walɔ ɔ bo nɔ xo ɖɛ dó mɛ ɖěvo lɛ́ tamɛ ɔ, mǐ nɔ flín ɖɔ “kplékplé nɔví lɛ́ tɔn [mǐtɔn] e ɖo gbɛ ɔ mɛ é lɔ ɖo wǔvɛ́ ɖokpó ɔ lɛ́ se wɛ.” (1 Pi. 5:9) Gběxosín-alijítɔ́ ɖé nɔ nyí Katherine bo ɖɔ: “Ðɛ xixo dó mɛ ɖěvo lɛ́ tamɛ nɔ flín mì ɖɔ mɛ ɖěvo lɛ́ lɔ ɖo xwi ɖí xá tagba lɛ́ wɛ. Énɛ́ nɔ zɔ́n bɔ un sɔ́ nɔ sɔ́ ayi ɖó tagba ce lɛ́ jí zɛ xwé wú ǎ.”

YĚ ÐÓ HUDÓ ÐƐ MǏTƆN LƐ́ TƆN

8. Nǎ kpɔ́ndéwú mɛ ɖěɖěe takúnmɛ a sixú xo ɖɛ dó é tɔn ɖé lɛ́.

⁸ Mɛ ɖětɛ́ lɛ́ takúnmɛ mǐ ka sixú nɔ xo ɖɛ dó? Mǐ sixú xo ɖɛ dó gbɛtɔ́ gbɛ̌nu ɖé lɛ́ tamɛ, ɖi kpɔ́ndéwú ɔ, mɛ ɖěɖěe lanmɛ yětɔn ma ɖo ganjí ǎ lɛ́ é, mɛ wínnyáwínnyá ɖěɖěe gbɛ̌ yětɔn lɛ́ nɔ cá ko, alǒ nɔ gbídí kɔ ná ɖo wěmaxɔmɛ lɛ́ é, abǐ mɛ ɖěɖěe ɖo didɛ ɖo mɛxóxwe sín wǔvɛ́ lɛ́ nu wɛ é. Gěgé nǔɖitɔ́ hǎtɔ́ mǐtɔn lɛ́ tɔn ɖo didɛ ɖo gbeklánxámɛ nu wɛ, bóyá é sixú nyí hǎgbɛ́ xwédo yětɔn lɛ́ tɔn, alǒ acɛkpikpa lɛ́ tɔn. (Mat. 10:18, 36; Mɛ. 12:5) Nɔví mǐtɔn ɖé lɛ́ jó xwé yětɔn lɛ́ dó ɖó hunnyahunnya toxóɖiɖɔ tɔn lɛ́ wú. Adla wɛ wa nǔ dó mɛ ɖěvo lɛ́ wú. Mǐ sixú nɔ ma tuun nɔví súnnu kpó nɔví nyɔ̌nu kpó énɛ́ lɛ́ tlɔlɔ. Amɔ̌, ényí mǐ nɔ xo ɖɛ dó ta yětɔn mɛ ɔ, mǐ nɔ xlɛ́ ɖɔ mǐ nɔ xwedó gbeɖiɖe Jezu tɔn e ɖɔ ɖɔ mǐ ní nɔ “yí wǎn nú [mǐɖée] lɛ́” é.—Jaan 13:34.

9. Étɛ́wú mǐ ka ɖó ná nɔ xo ɖɛ dó mɛ ɖěɖěe nɔ nɔ nukɔn nú nǔ lɛ́ ɖo tutoblónúnǔ Jexóva tɔn mɛ lɛ́ é kpó asi yětɔn lɛ́ kpó tamɛ?

⁹ Mǐ sixú lɛ́ xo ɖɛ dó mɛ ɖěɖěe ɖo nukɔn nú nǔ lɛ́ ɖo tutoblónúnǔ Jexóva tɔn mɛ lɛ́ é tamɛ. Mɛ énɛ́ lɛ́ wɛ nyí Hǎgbɛ́ alixlɛ́mɛtɔ́ ɔ kpó alɔgɔ́tɔ́ tɔn lɛ́ kpó, wěɖegbɛ́ alaxɔ tɔn lɛ́, nukúnkpénǔwútɔ́ azɔ̌xɔsá e ɖo alaxɔ mɛ lɛ́ é tɔn lɛ́, nukúnkpénǔwútɔ́ lɛ̌dó tɔn lɛ́, mɛxó agun tɔn lɛ́ kpó mɛsɛntɔ́ agun tɔn lɛ́ kpó. Gěgé nɔví énɛ́ lɛ́ tɔn wɛ ɖo xwi ɖí xá adohu adohu yěɖésúnɔ tɔn lɛ́ wɛ, cóbó ka lɛ́ kpo ɖo azɔ̌ syɛ́nsyɛ́n wa dó ta mǐtɔn mɛ wɛ. (2 Kɔ. 12:15) Ði kpɔ́ndéwú ɔ, nukúnkpénǔwútɔ́ lɛ̌dó tɔn ɖé nɔ nyí Mark bo ɖɔ: “Nǔ e nɔ vɛ́ wǔ nú mì hú gǎn lɛ́ é ɖokpó wɛ nyí ɖɔ má nɔ zɔ nú mɛjitɔ́ ce e ko kpo lɛ́ é. Yě mɛ we lɛ́ ɖě sín lanmɛ sɔ́ ɖo ganjí ǎ. Nɔví nyɔ̌nu ce kpó asú tɔn kpó nɔ kpé nukún dó hudó yětɔn lɛ́ wú có, é nɔ vɛ́ nú mì ɖɔ un kún sixú ɖo fínɛ́ bo d’alɔ yě hú mɔ̌ ó.” Ényí mǐ tuun adohu adohu e ɖí xwi xá wɛ nɔví azɔ̌syɛ́nsyɛ́nwatɔ́ énɛ́ lɛ́ ɖe é kpó mǐ gbɔ kpó ɔ, é ná nyɔ́ ɖɔ mǐ ní nɔ flín yě ɖo ɖɛ mǐtɔn lɛ́ mɛ. (1 Tɛ. 5:12, 13) Mǐ sixú lɛ́ xo ɖɛ dó nɔví súnnu énɛ́ lɛ́ sín asi lɛ́ tamɛ, ɖó gǔdo e yě nɔ nɔ nú asú yětɔn lɛ́ kpó gbejíninɔ kpó é nɔ d’alɔ yě bɔ yě nɔ kpo ɖo azɔ̌ yětɔn lɛ́ wa wɛ.

10-11. Ðɛ e mǐ nɔ xo dó nɔví súnnu kpó nɔví nyɔ̌nu kpó mǐtɔn lɛ́ bǐ tamɛ é ka nɔ nyɔ́ Jexóva nukúnmɛ a? Tínmɛ.

¹⁰ Lěe mi ko ɖɔ gbɔn wá yi é ɔ, mǐ nɔ xo ɖɛ hwɛhwɛ dó nɔví súnnu lɛ́ kpó nɔví nyɔ̌nu lɛ́ kpó sín gbɛ̌nu vovo lɛ́ tamɛ. Ði kpɔ́ndéwú ɔ, ényí mǐ ma tlɛ ɖó mɛɖé lě tawun ɖo ayi mɛ ǎ ɔ, mǐ sixú byɔ́ Jexóva ɖɔ é ní d’alɔ mɛ ɖěɖěe è wlí dó ganxó lɛ́ é, alǒ é ní dó gbɔ nú mɛ ɖěɖěe mɛvívɛ́ yětɔn ɖé kú é. Mɛxó agun tɔn ɖé nɔ nyí Donald bo ɖɔ: “Nɔví súnnu kpó nɔví nyɔ̌nu kpó mǐtɔn gěgé wɛ ɖo wǔvɛ́ mɛ gbɔn dín wɛ, bɔ mǐ nɔ gbɔ bo nɔ xo ɖɛ dó mɛ lɛ́ bǐ tamɛ hweɖélɛ́nu bá mɔ tɛn dó xwe mɛ ɖěɖěe ɖo wǔvɛ́ mɔ wɛ lɛ́ é bǐ dó ahwan ɔ mɛ.”

¹¹ Ðɛ mɔ̌hun lɛ́ ka nɔ nyɔ́ Jexóva nukúnmɛ a? Ganjí! È ná ɖɔ ɔ, mǐ nɔ tuun nǔ tawun tawun e sín hudó nǔɖitɔ́ hǎtɔ́ mǐtɔn lɛ́ bǐ nɔ ɖó lɛ́ é ǎ. Énɛ́ wú ɔ, é ná nyɔ́ ɖɔ mǐ ní nɔ xo ɖɛ dó nɔví súnnu kpó nɔví nyɔ̌nu kpó mǐtɔn lɛ́ bǐ tamɛ ɖo kpaa mɛ. (Jaan 17:20; Efɛ́. 6:18) Ðɛ énɛ́ lɛ́ nɔ xlɛ́ ɖɔ mǐ “yí wǎn nú kplékplé nɔví lɛ́ tɔn.”—1 Pi. 2:17.

HWENU E MǏ ÐO ÐƐ XO DÓ MƐ ÐOKPÓ ÐOKPÓ TAMƐ WƐ É

12. Nɛ̌ ayi ɖíɖó nǔ wú ka sixú d’alɔ mǐ bɔ mǐ ná nɔ nɔ tlɔlɔ hú gǎn ɖo ɖɛ mǐtɔn lɛ́ mɛ gbɔn?

¹² Nɔ ɖó ayi nǔ wú. Gbɔn vo nú ɖɛ xixo dó gbɛ̌nu nɔví súnnu lɛ́ kpó nɔví nyɔ̌nu lɛ́ kpó tɔn tamɛ ɔ, é lɛ́ nyɔ́ ɖɔ è ní nɔ ylɔ́ nyǐkɔ yě mɛ ɖokpó ɖokpó tɔn bo nɔ xo ɖɛ dó ta yětɔn mɛ. Mɛɖé ɖo agun towe mɛ bo ɖo xwi ɖí xá azɔn syɛ́nsyɛ́n ɖé wɛ wɛ a? Mɛ wínnyáwínnyá ɖé ɖo agun towe mɛ bɔ wǔ kú i, bóyá ɖó è ɖo kɔ gbídí n’i wɛ ɖo wěmaxɔmɛ wútu wɛ a? É ka ɖo wǔ vɛ́ nú mɛjitɔ́ goɖokpónɔ ɖé wɛ bónú é ná kplɔ́n vǐ ɖé “sɔgbe xá nǔgbódodó Jexóva tɔn lɛ́ kpó wěɖexámɛ tɔn lɛ́ kpó” wɛ wɛ a? (Efɛ́. 6:4) Ényí a nɔ ɖ’ayi nǔ wú ɔ, wǎn e a yí nú mɛ ɖěvo lɛ́ é kpó wǔvɛ́ e a nɔ se xá yě é kpó ná jɛjí, bɔ énɛ́ ná sísɛ́ we bɔ a ná nɔ xo ɖɛ dó ta yětɔn mɛ.b—Hlɔ̌. 12:15.

13. Nɛ̌ mǐ ka sixú xo ɖɛ dó mɛ ɖěɖěe mǐ ma tuun tlɔlɔ lě ǎ lɛ́ é tamɛ gbɔn?

¹³ Nɔ ylɔ́ mɛ ɖěvo lɛ́ sín nyǐkɔ bo nɔ xo ɖɛ dó ta yětɔn mɛ. Mǐ tlɛ sixú wa mɔ̌ dó mɛ ɖěɖěe mǐ ma xo go kpɔ́n ǎ lɛ́ é tamɛ. Ði kpɔ́ndéwú ɔ, lin tamɛ dó nɔví súnnu kpó nɔví nyɔ̌nu kpó mǐtɔn ɖěɖěe è sú dó gan mɛ ɖo Crimée, Érythrée, Russie kpó Singapour kpó lɛ́ é jí. A hɛn ɔ, a ná mɔ nyǐkɔ mɛ ɖěɖěe ɖo gan mɛ lɛ́ é tɔn ɖo jw.org jí.c Nukúnkpénǔwútɔ́ lɛ̌dó tɔn ɖé nɔ nyí Brian bo ɖɔ: “Un mɔ ɖɔ nyǐkɔ nǔɖitɔ́ hǎtɔ́ e ɖo gan mɛ é ɖé tɔn wínwlán ɖ’ayǐ, bo xa dó jǐ nɔ d’alɔ mì bɔ un nɔ flín mɛ ɔ, bo nɔ sɔ́ ɛ dó ɖɛ ce lɛ́ mɛ.”

14-15. Nɛ̌ mǐ ka sixú nɔ tlɔlɔ ɖo nǔ e byɔ́ wɛ mǐ ɖe lɛ́ é kpáxwé gbɔn?

¹⁴ Ðɔ nǔ e byɔ́ wɛ a ɖe lɛ́ é tlɔlɔ. Michael e xó mǐ ɖɔ wá yi é ɖɔ: “Ényí un ɖo tan nɔví e è sú dó gan mɛ lɛ́ é tɔn xa wɛ ɖo jw.org jí ɔ, un nɔ tɛ́n kpɔ́n bo nɔ dó nukún lěe nǔ ná ko cí nú mì ényí nyi wɛ ɖo ninɔmɛ yětɔn mɛ ɔ mɛ kpɔ́n. Un tuun ɖɔ ado ná hu mì dó asi ce wú bɔ un ná ba ná wa nǔ e wú un kpé é bǐ bɔ è ná kpé nukún dó wǔ tɔn. Énɛ́ zɔ́n bɔ un tuun nǔ tají e un ná sɔ́ dó ɖɛ ce lɛ́ mɛ hwenu e un ɖo ɖɛ xo dó nɔví ɖěɖěe wlí alɔ bo ɖo ganxó lɛ́ é tamɛ wɛ é ɖé.”—Ebl. 13:3, tínmɛ e ɖo do é.

¹⁵ Ényí mǐ nɔ lin tamɛ dó lěe gbɛzínzán gbe bǐ gbe tɔn nɔví mǐtɔn e ɖo ganxó lɛ́ é tɔn ɖó ná ko cí é jí ɔ, mǐ sixú lɛ́ mɔ ali ɖěvo ɖěɖěe nu mǐ sixú lɛ́ nɔ tlɔlɔ ɖo ɖɛ mǐtɔn lɛ́ mɛ ɖe lɛ́ é. Ði kpɔ́ndéwú ɔ, mǐ sixú xo ɖɛ ɖɔ gantɔ́cɔ́tɔ́ lɛ́ ní nyɔ́ xomɛ dó nɔví mǐtɔn lɛ́ wú, bónú mɛ ɖěɖěe ɖo tɛn acɛkpikpa tɔn mɛ lɛ́ é ní ná gbe nɔví mǐtɔn lɛ́ bónú yě ní vo bo sɛn Mawu. (1 Tim. 2:1, 2) Mǐ sixú xo ɖɛ ɖɔ kpɔ́ndéwú gbejíninɔ tɔn nɔví súnnu e è wlí dó gan mɛ é tɔn ní dó wǔsyɛ́n lanmɛ nú nɔví e ɖo agun e mɛ é ɖe lɛ́ é, alǒ nǔmaɖitɔ́ lɛ́ ní ɖó ayi walɔ tɔn ɖagbe ɔ wú bo ɖótó wɛn mǐtɔn. (1 Pi. 2:12) É ɖo wɛn ɖɔ nǔgbódodó ɖokpó ɔ lɛ́ ná lɛ́ d’alɔ mǐ ɖo ɖɛ e mǐ nɔ xo dó nɔví súnnu kpó nɔví nyɔ̌nu kpó ɖěɖěe ɖo didɛ ɖo tagba ɖěvo lɛ́ nu wɛ lɛ́ é tamɛ é kpáxwé. Gbɔn ayi ɖíɖó nǔ wú, nyǐkɔ mɛ ɖěvo lɛ́ tɔn yíylɔ́ bo xo ɖɛ dó ta yětɔn mɛ kpó tlɔlɔ ninɔ ɖo nǔ e byɔ́ wɛ mǐ ɖe lɛ́ é kpáxwé kpó gblamɛ ɔ, mǐ sixú xlɛ́ ɖɔ ‘wǎnyíyí e mǐ ɖó nú mǐɖée lɛ́ é túnflá.’—1 Tɛ. 3:12.

LINLIN E ÐO JLƐ̌ JÍ É ÐÍÐÓ DÓ ÐƐ MǏTƆN LƐ́ WÚ

16. Nɛ̌ mǐ ka sixú kpo ɖo linlin e ɖo jlɛ̌ jí é ɖó dó ɖɛ mǐtɔn lɛ́ wú wɛ gbɔn? (Matíe 6:8)

¹⁶ Lěe mǐ ko mɔ gbɔn é ɔ, ɖɛ mǐtɔn lɛ́ sixú zɔ́n bɔ ninɔmɛ ɖé húzú. É ɖo mɔ̌ có, é byɔ́ ɖɔ mǐ ní nɔ ɖó linlin e ɖo jlɛ̌ jí é. Ényí mǐ ɖo ɖɛ xo wɛ ɔ, é nyí nǔ e Jexóva ma ko tuun ǎ é ɖé wɛ mǐ nɔ ɖɔ n’i ǎ; mǐ ka ɖó ná lɛ́ ɖe wě xá ɛ dó ali ɖagbe hú gǎn e nu é ɖó ná ɖe ɖɛ ninɔmɛ ɖé ɖe é wú ǎ. Jexóva nɔ tuun nǔ e hudó mɛsɛntɔ́ tɔn lɛ́ é cóbɔ yě, alǒ mǐdɛɛ lɛ́ tlɛ nɔ wá ɖ’ayi wú. (Xa Matíe 6:8.) Bɔ étɛ́wú mǐ ka ɖó ná nɔ xo ɖɛ dó mɛ ɖěvo lɛ́ tamɛ lo? Gbɔn vo nú hwɛjijɔ ɖěɖěe jí mǐ ko ɖɔ xó dó ɖo xóta élɔ́ mɛ lɛ́ é ɔ, mɔ̌ wiwa nɔ lɛ́ xlɛ́ ɖɔ nǔ mɛ ɖěvo lɛ́ tɔn nɔ ɖu ayi mɛ nú mǐ. Wǎnyíyí nɔ sísɛ́ mǐ bɔ mǐ nɔ xo ɖɛ dó mǐɖée lɛ́ tamɛ. Bɔ é nɔ hun xomɛ nú Jexóva ɖɔ mɛsɛntɔ́ tɔn lɛ́ nɔ xwedó wǎnyíyí tɔn sín kpɔ́ndéwú.

17-18. Étɛ́ wú è ka sixú sɔ́ ɖɛ e mǐ nɔ xo dó nǔɖitɔ́ hǎtɔ́ mǐtɔn lɛ́ tamɛ é jlɛ́ dó?

¹⁷ Ényí é tlɛ cí ɖɔ ɖɛ mǐtɔn lɛ́ kún zɔ́n bónú ninɔmɛ ɖé ɖyɔ́ ó ɖɔhun ɔ, yě ka nɔ ɖe wǎn e mǐ yí nú nɔví súnnu kpó nɔví nyɔ̌nu kpó mǐtɔn lɛ́ é xlɛ́, bɔ Jexóva nɔ ɖ’ayi énɛ́ wú. Mǐ sixú sɔ́ jlɛ́ dó nǔ élɔ́ wú: Mǐ ní ɖɔ ɖɔ xwédo ɖé ɖó vǐ we, súnnu ɖokpó nyɔ̌nu ɖokpó. Súnnuví ɔ ɖo azɔn jɛ wɛ. Nyɔ̌nuví ɔ sa vo nú tɔ́ tɔn ɖɔ: “Kɛnklɛ́n wa nǔɖé dó nɔví súnnu ce tamɛ. É ɖo azɔn jɛ wɛ tawun!” Tɔ́ ɔ ko ɖo nukún kpé dó ninɔmɛ ɔ wú wɛ; é yí wǎn nú vǐ súnnu tɔn, bo ɖo nukún kpé dó wǔ tɔn wɛ ganjí. Amɔ̌, dǒ nukún lě do xomɛ ná ko hun tɔ́ ɔ sɔ hwenu e é mɔ ɖɔ vǐ nyɔ̌nu tɔn ɖe xlɛ́ ɖɔ nɔví súnnu émítɔn sín nǔ ɖu ayi mɛ nú émí sɔmɔ̌ b’ɛ sa vo nú tɔ́ tɔn ɖɔ é ní d’alɔ ɛ é mɛ kpɔ́n.

¹⁸ Nǔ e Jexóva dó wǔsyɛ́n lanmɛ nú mǐ ɖɔ mǐ ní wa é nɛ́, é wɛ nyí ɖɔ nǔ mǐɖée lɛ́ tɔn ní nɔ ɖu ayi mɛ nú mǐ, bónú mǐ ní nɔ xo ɖɛ dó mǐɖée lɛ́ tamɛ. Ényí mǐ ɖo mɔ̌ wa wɛ ɔ, ɖɛ mǐtɔn lɛ́ nɔ ɖe lě do nǔ mɛ ɖěvo lɛ́ tɔn nɔ ɖu ayi mɛ nú mǐ nǔgbó nǔgbó sɔ é xlɛ́, bɔ Jexóva nɔ ɖ’ayi énɛ́ wú. (2 Tɛ. 1:3; Ebl. 6:10) Gɔ́ ná ɔ, lěe mǐ ko ɖɔ gbɔn wá yi é ɔ, ɖo ninɔmɛ ɖé lɛ́ mɛ ɔ, ɖɛ mǐtɔn lɛ́ tlɛ sixú zɔ́n bɔ ninɔmɛ ɖé húzú. Énɛ́ wú ɔ, ɖó hwɛjijɔ énɛ́ lɛ́ bǐ wú ɔ, mi nú mǐ ní nɔ flín bo nɔ xo ɖɛ dó mǐɖée lɛ́ tamɛ.