Axɔ́suɖuto Mawu Tɔn ɔ, Ayi Towe Mɛ Wɛ É ka Ðè À?
Xósin e Biblu na é
Eǒ, Axɔ́suɖuto Mawu tɔn nyí nǔɖe kpowun bo ɖò ayi Klisanwun lɛ tɔn mɛ ǎ.a Hwenu e Biblu ɖɔ “axɔ́suɖuɖu [jixwé] tɔn” xó é ɔ, fí e é ɖè tawun é dó gesí wɛ é ɖè mɔ̌ nɛ. (Matie 4:17) Kpɔ́n lee Biblu xlɛ́ ɖɔ Axɔ́suɖuto Mawu tɔn nyí acɛkpikpa jɔ acɛkpikpa ɖé, bo ɖò acɛ kpa wɛ sín jixwé gbɔn é.
Axɔ́suɖuto Mawu tɔn ɖó acɛkpatɔ́ lɛ, toví lɛ, sɛ́n lɛ, bo lɛ́ ɖó azɔ̌ ɖé, é wɛ nyí ɖɔ é na bló bɔ jlǒ Mawu tɔn na nyí wiwa ɖò jixwé kpo ayikúngban ɔ jí kpo.—Matie 6:10; Nǔɖexlɛ́mɛ 5:10.
Axɔ́suɖuto Mawu tɔn alǒ acɛkpikpa tɔn na kp’acɛ dó “togun lɛ, akɔta lɛ kpodo gbɛtɔ́ e nɔ dó gbè alɔkpa alɔkpa lɛ kpo” bǐ jí ɖò ayikúngban ɔ jí. (Daniyɛli 7:13, 14) Gbɛtɔ́ lɛ wɛ na ɛ acɛ ǎ, loɔ, Mawu ɖesunɔ wɛ na ɛ tlɔlɔ.—Ðɛhan 2:4-6; Ezayíi 9:6.
Jezu ɖɔ nú mɛsɛ́dó tɔn gbejinɔtɔ́ lɛ ɖɔ ye na nɔ kpɔ́ xá emi ɖò Axɔ́suɖuto jixwé tɔn mɛ bo na “jinjɔn axɔ́suzinkpo jí.”—Luki 22:28, 30.
Axɔ́suɖuto ɔ ɖó kɛntɔ́ lɛ, bo na sú kún yetɔn dó.—Ðɛhan 2:1, 2, 8, 9; 110:1, 2; 1 Kɔlɛntinu lɛ 15:25, 26.
Biblu kplɔ́n mɛ ɖɔ Axɔ́suɖuto jixwé tɔn ɖò acɛ kpa wɛ ɖò ayi mɛɖé tɔn mɛ ǎ. É ɖò mɔ̌ có, é xlɛ́ ɖɔ “axɔ́suɖuɖu Mawu tɔn sín xó,” alǒ ‘Axɔ́suɖuto ɔ sín wɛn’ sixu byɔ ayi mǐtɔn mɛ, bo ka ɖó na wà mɔ̌.—Matie 13:19; 24:14.
Etɛ ka nyí tinmɛ “axɔ́suɖuɖu Mawu tɔn ko ɖò mi mɛ” ɔ tɔn?
Lee è lilɛ Luki 17:21 gbɔn ɖò lilɛdógbeɖevomɛ Biblu tɔn ɖé lɛ mɛ é zɔ́n bɔ fí e Axɔ́suɖuto ɔ ɖè é nɔ bú vo dó mɛɖé lɛ. Ði kpɔ́ndéwú ɔ, Mawuxówema ɔ ɖɔ ɖɔ “axɔ́suɖuɖu Mawu tɔn ko ɖò mi mɛ.” Bo na dó mɔ nǔ jɛ wemafɔ enɛ mɛ ganji ɔ, mǐ ɖó na gbéjé nǔ e lɛlɛ̌ dó wemafɔ ɔ lɛ é kpɔ́n.
Axɔ́suɖuto Mawu tɔn ɖò ayi syɛnsyɛn mɛ ɖěɖee klán gbè xá Jezu bo ɖò na hu i wɛ lɛ é tɔn mɛ ǎ
Falizyɛn lɛ ɖɔ xó na wɛ Jezu ɖè. Sinsɛngán lɛ sín gbɛ̌ta ɖé wɛ, bɔ ye klán gbè xá ɛ bo lɛ́ ɖò gbě bla wɛ bo na hu i. (Matie 12:14; Luki 17:20) É ka sɔgbe ɖɔ é ni lin ɖɔ Axɔ́suɖuto ɔ ɖò ayi syɛnsyɛn yetɔn lɛ mɛ à? Jezu ɖɔ: “Ayi mitɔn gɔ́ nú yɛmɛnúwiwa kpo nǔnyanyawiwa kpo.”—Matie 23:27, 28.
Lilɛdógbeɖevomɛ ɖevo lɛ lilɛ xó e Jezu ɖɔ ɖò Luki 17:21 mɛ lɛ é ganji b’ɛ zawě: “Axɔ́suɖuɖu Mawu tɔn ɖò fí kpo mi kpo.” (Wekwín e nya lɛ é ɔ, mǐdɛɛ lɛ wɛ sɔ́ ɖó mɔ̌; Contemporary English Version) “Axɔ́suɖuto Mawu tɔn ɖò tɛntin mitɔn.” (Lẹdogbedevomẹ Aihọn Yọyọ Tọn) Axɔ́suɖuto jixwé tɔn ɔ ɖò ‘kpɔ́ kpo Falizyɛn lɛ kpo’ alǒ ɖò “tɛntin” yetɔn, ɖó Jezu e Mawu sɔ́ Axɔ́su é ɖò nukɔn yetɔn.—Luki 1:32, 33.
a Sinsɛn Klisanwun tɔn gegě nɔ kplɔ́n mɛ ɖɔ Axɔ́suɖuto Mawu tɔn nyí nǔɖe bo ɖò ayi mɛtɔn mɛ. Ði kpɔ́ndéwú ɔ, ɖò États-Unis ɔ, Convention baptiste du Sud ɖɔ ɖɔ ɖò ali ɖé nu ɔ Axɔ́suɖuto Mawu tɔn nyí “acɛ e kpa wɛ Mawu ɖè ɖò ayi kpo gbɛzán kpo mɛ ɖokpo ɖokpo tɔn mɛ é.” Ðò ali ɖokpo ɔ nu ɔ, Papa Benoît XVI ɖɔ ɖò wema tɔn e nɔ nyí Jésus de Nazareth é mɛ ɖɔ “mɛ e nɔ setónú é sín ayi mɛ wɛ Axɔ́suɖuto Mawu tɔn nɔ nɔ.”