È Na Sú Kún Dó nú Ayikúngban ɔ Wɛ À?
Xósin e Biblu na é
Eǒ, è na sú kún dó nú planɛti e nɔ nyí Ayikúngban é, dó è zo, alǒ ɖyɔ ɛ gbeɖé ǎ. Biblu kplɔ́n mǐ ɖɔ Mawu dá ayikúngban ɔ bonu è na nɔ jí kaka sɔyi.
“[Ayikúngban] ɔ na nyí hwɛjijɔnɔ lɛ tɔn, bɔ ye na nɔ [jí] kaka sɔyi.”—Ðɛhan 37:29.
“[Mawu] ɖó ayikúngban ɔ ɖó dòdó tɔn jí, bɔ é na danwǔ gbeɖé ǎ.”—Ðɛhan 104:5.
“Ayikúngban ɔ ɖò ayǐ kaka sɔyi.”—Nùnywɛtɔ́xó 1:4, nwt.
“É wɛ ɖó ayikúngban ɔ. É wɛ . . . bló bɔ é syɛn; é ka ɖó è sɔ́ nyì vɔ̌ ǎ. Loɔ, é bló bɔ è na nɔ jí wɛ.—Ezayíi 45:18.
Gbɛtɔ́ lɛ ka na sú kún dó nú ayikúngban ɔ wɛ à?
Mawu na lɔn bɔ gbɛtɔ́ lɛ na sɔ́ nǔ kwijikwiji, ahwan alǒ nǔ ɖevo ɖebǔ dó sú kún dó nú ayikúngban ɔ bǐ mlɛ́mlɛ́ ǎ. É nyɔ́ wà ɔ, é na “viva mɛ e nɔ hɛn ayikúngban ɔ gblé lɛ sín kún dó.” (Nǔɖexlɛ́mɛ 11:18) Nɛ̌ é ka na wà enɛ gbɔn?
Mawu na sɔ́ Axɔsuɖuto tɔn jixwé tɔn e ma ɖó blɔ̌ ǎ é dó ɖyɔ acɛkpikpa gbɛtɔ́ tɔn e ma kpéwú bo cyɔn alɔ ayikúngban ɔ jí ǎ lɛ é. (Daniyɛli 2:44; Matie 6:9, 10) Axɔsuɖuto enɛ ɔ, Jezu Klisu e nyí Mawu ví ɔ é wɛ na kp’acɛ d’enu. (Ezayíi 9:5, 6) Hwenu e Jezu ɖò ayikúngban jí é ɔ, é zán hlɔnhlɔn jiwǔ e é ɖó é dó hwìhwɛ́ hlɔnhlɔn jɔwamɔ tɔn lɛ. (Maki 4:35-41) Ðó Jezu nyí Axɔsu nú Axɔsuɖuto Mawu tɔn wutu ɔ, é na ɖó acɛ bǐ mlɛ́mlɛ́ dó ayikúngban ɔ kpo nǔ e ɖ’eji lɛ é bǐ kpo jí. É na vɔ́ nǔ lɛ blóɖó ɖò ayikúngban ɔ jí bɔ ye na cí lee ye ɖè gbɔn ɖ’ayǐ ɖò jikpá Edɛni tɔn mɛ é ɖɔhun.—Matie 19:28; Luki 23:43, nwt.
Biblu ka kplɔ́n mɛ ɖɔ è na dó ayikúngban ɔ zo wɛ à?
Eǒ, é kplɔ́n mɔ̌ mɛ ǎ. Nukúnnú ma mɔ jɛ 2 Piyɛ́ɛ 3:7 mɛ wɛ zɔ́n bɔ mɛ lɛ nɔ ɖó linlin masɔgbe mɔhun hwɛhwɛ, é ɖɔ: “Mawu . . . zé jinukúnsin kpo ayikúngban dìn tɔn ɔ kpo ɖ’ayǐ, bo na wá zé myɔ dó vɔ ye na.” Nǔ taji wè ɖé lɛ ɖíe bo d’alɔ mǐ bɔ mǐ mɔ nǔ jɛ xógbe enɛ lɛ mɛ:
Biblu zán xókwin “jinukúnsin,” “ayikúngban,” kpo “myɔ” kpo dó dó gesí nǔ gègě. Ði kpɔ́ndéwú ɔ, Bǐbɛ̌mɛ 11:1 ɖɔ, “Ð’ayǐ ɔ, ayikúngban ɔ bǐ nɔ dó gbè ɖokpo ɔ.” (Lẹdogbedevomẹ Aihọn Yọyọ Tọn) Ðò fí ɔ, gbɛtɔ́ lɛ dó gesí wɛ “ayikúngban” ɔ ɖè.
Nǔ e lɛlɛ̌ dó 2 Piyɛ́ɛ 3:7 lɛ é xlɛ́ tinmɛ e jinukúnsin, ayikúngban kpo myɔ kpo ɖó ɖò fí é. Wemafɔ 5 kpo 6gɔ́ ɔ kpo ɖɔ xó dó Sinvɔgbɛ Nɔwée hwenu tɔn wu. È sú kún dó nú gbɛ̀ nyanya hwenɛnu tɔn, amɔ̌, ayikúngban mǐtɔn bú ǎ. É nyɔ́ wà ɔ, gbɛtɔ́ nyanya hwenɛnu tɔn lɛ e è ylɔ ɖɔ “ayikúngban” ɔ é wɛ Sinvɔgbɛ ɔ hu. (Bǐbɛ̌mɛ 6:11) É lɛ́ sú kún dó nú mɛ ɖěɖee nɔ kp’acɛ dó gbɛtɔ́ lɛ jí ɖò ayikúngban jí bo nɔte nú “jinukúnsin” lɛ é. Mɔ̌ mɛ ɔ, è sú kún dó nú gbɛtɔ́ nyanya lɛ, é nyí ayikúngban ɔ ǎ. Nɔwée kpo xwédo tɔn kpo xò kún súsú dó nú gbɛ̀ nyanya enɛ ɔ zlɛ́ bo nɔ ayikúngban ɔ jí ɖò Sinvɔgbɛ ɔ gudo.—Bǐbɛ̌mɛ 8:15-18.
Lee sìn ɔ bló gbɔn ɖò Sinvɔgbɛ ɔ hwenu é ɖɔhun ɔ, kún súsú dó nú nǔ, alǒ “myɔ” e xó 2 Piyɛ́ɛ 3:7 ɖɔ é na vívá gbɛtɔ́ nyanya e ɖò gbɛ̀ ɔ mɛ lɛ é, é nyí planɛti e nɔ nyí Ayikúngban é ǎ. Mawu “dó jinukúnsin yɔyɔ̌ kpo ayikúngban yɔyɔ̌ kpo sín akpá; finɛ wɛ è na nɔ wà nǔ kpodo hwɛjijɔ kpan ɖè.” (2 Piyɛ́ɛ 3:13) “Ayikúngban yɔyɔ̌” ɔ alǒ gbɛtɔ́ yɔyɔ̌ lɛ ɔ, “jinukúnsin yɔyɔ̌” ɔ alǒ acɛkpikpa yɔyɔ̌ e nyí Axɔsuɖuto Mawu tɔn é wɛ na ɖu gǎn dó ye nu. Ðò Axɔsuɖuto enɛ sín acɛkpikpa glɔ́ ɔ, ayikúngban ɔ na huzu palaɖisi e mɛ fífá ɖè é ɖé.—Nǔɖexlɛ́mɛ 21:1-4.