NǓKPLƆNKPLƆN 56
Gɔ̌ Sò nú Bǔninɔ Agun ɔ Tɔn
Nú mǐ ɖò nǔɖitɔ́ hatɔ́ lɛ tɛntin ɔ, lee nǔ cí nú Axɔ́su Davidi b’ɛ ɖɔ xó elɔ é wɛ é nɔ cí nú mǐ lɔ. É ɖɔ: “Nɔví nɔví lɛ ɖó gbè kpɔ́ ɔ, é nɔ nyɔ́, é nɔ víví mɛ nya!” (Ðɛhan 133:1) Bǔninɔ mǐtɔn nyí nǔkpédónǔnu ɖé ǎ. Mǐ mɛ ɖokpo ɖokpo ɖó na wà nǔɖe b’ɛ na kpò ɖò ayǐ.
1. Etɛ ka jiwǔ ɖò togun Mawu tɔn mɛ?
Nú a yì kplé agun tɔn mǐtɔn ɖé ɖò ayǐ ɖevo jí ɔ, a sixu gɔn gbè fí ɔ tɔn sè, amɔ̌, ɖò ali gegě nu ɔ, a na mɔ ɖɔ xwégbe wɛ emi wá. Etɛwu? Ðó mǐ nɔ zán wema ɖokpo ɔ lɛ ɖò fí lɛ bǐ dó kplɔ́n Biblu. Gɔ́ na ɔ, mǐ nɔ tɛ́n kpɔ́n bo nɔ yí wǎn nú mǐɖée lɛ. Mǐ na bo nɔ nɔ fí ɖebǔ ɔ, mǐ bǐ nɔ ‘ylɔ́ Jehovah sín nyikɔ bo nɔ ɖó gbè kpɔ́ bo nɔ sɛn ɛ.’—Sofoníi 3:9.
2. Nɛ̌ a ka sixu wà gbɔn bo gɔ́ sò nú bǔninɔ ɔ?
“Mi . . . yí wǎn ɖaxó nú miɖée kpo ayixa mitɔn bǐ kpo.” (1 Piyɛ́ɛ 1:22) Nɛ̌ a ka sixu xwedó wěɖexámɛ enɛ gbɔn? Ma nɔ sɔ́ ayi ɖó nǔwanyido mɛ ɖevo lɛ tɔn jí ó, é nyɔ́ wà hǔn, nɔ ɖ’ayi jijɔ ɖagbe yetɔn lɛ wu. Ma nɔ dó gbɛ̌ xá mɛ ɖěɖee yí wǎn nú nǔ ɖokpo ɔ lɛ hwiɖɔhun lɛ é kɛɖɛ ó, é nyɔ́ wà hǔn, tɛ́n kpɔ́n bo tuùn nɔví sunnu kpo nɔví nyɔnu kpo e gosin ayǐ vovo jí lɛ é lɔ. Mǐ ɖó na lɛ́ dó gǎn syɛnsyɛn, bo na ɖè wangbɛnúmɛ sín linlin ɖebǔ e mǐ sixu ko ɖó é síìn.—Xà 1 Piyɛ́ɛ 2:17.a
3. Nú gbemanɔkpɔ́ ɖé ɖò hwi kpo Klisanwun hatɔ́ ɖé kpo tɛntin ɔ, etɛ a ka na wà?
Mǐ ɖò bǔ, amɔ̌, mǐ lɛ́ nyí hwɛhutɔ́. Hweɖelɛnu ɔ, mǐ nɔ dó xomɛsin nú mǐɖée lɛ, alǒ tlɛ nɔ jɛ agɔ dó mǐɖée lɛ. Enɛ wu ɔ, Xó Mawu tɔn ɖɔ nú mǐ ɖɔ: “Mi nɔ . . . sɔ́ [hwɛ] kɛ miɖée.” É ɖɔ gɔ́ na ɖɔ: “Mi ɖó na nɔ sɔ́ hwɛ kɛ miɖée lee Aklunɔ sɔ́ kɛ mi é ɖɔhun.” (Xà Kolosinu lɛ 3:13.) Azɔn mɔ̌kpan wɛ mǐ nɔ jɛ agɔ dó Jehovah, é ɖò mɔ̌ có, é ka nɔ sɔ́ hwɛ kɛ mǐ. Enɛ wu ɔ, é nɔ ba ɖɔ mǐ ni nɔ sɔ́ hwɛ kɛ nɔví mǐtɔn lɛ. Nú a mɔ ɖɔ emi jɛ agɔ dó mɛɖé hǔn, ɖè afɔ nukɔntɔn ɔ bá dó ɖeɖɛ xó ɔ.—Xà Matie 5:23, 24.b
BA DÒ NÚ NǓ D’EJI
Mǐ ni kpɔ́n ali ɖěɖee nu a sixu gɔ́ sò nú bǔninɔ kpo fífá kpo agun ɔ tɔn ɖè lɛ é.
Etɛ a ka na wà dó xò fífá kan?
4. Ðu ɖò wangbɛnúmɛ jí
Mǐ jló na yí wǎn nú nɔví mǐtɔn lɛ bǐ. Amɔ̌, é sixu wá vɛwǔ nú mǐ bɔ mǐ na yí gbè bo na wà nǔ ɖó kpɔ́ xá mɛ e mǐ mɔ ɖɔ é gbɔn vo nú mǐ é ɖé. Etɛ ka sixu d’alɔ? Xà Mɛsɛ́dó 10:34, 35, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Jehovah nɔ yí gbè bɔ gbɛtɔ́ alɔkpa lɛ bǐ nɔ nyí Kúnnuɖetɔ́ tɔn lɛ. Kpo enɛ kpo ɔ, nukún tɛ a ka ɖó na nɔ dó kpɔ́n mɛ ɖěɖee gosin ayǐ ɖevo jí lɛ é?
Wangbɛnúmɛnú alɔkpa tɛ lɛ ka gbakpé xá e mɛ a ɖè é, bɔ a jló na nyi alɔ na?
Xà 2 Kɔlɛntinu lɛ 6:11-13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ a ka lin ɖɔ emi sixu wà, bo na sɛkpɔ́ nɔví sunnu kpo nɔví nyɔnu kpo ɖěɖee gosin ayǐ ɖevo jí lɛ é d’eji?
5. Nɔ sɔ́ hwɛ kɛ mɛ kpo jlǒ kpo, bo nɔ lɛ́ xò fífá kan
É na byɔ gbeɖé ɖɔ mǐdɛɛ lɛ ni sɔ́ hwɛ kɛ Jehovah ǎ có, éyɛ ka nɔ sɔ́ hwɛ kɛ mǐ kpo jlǒ kpo. Xà Ðɛhan 86:5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ wemafɔ enɛ ka ɖexlɛ́ dó Jehovah wu?
Etɛwu hwɛsɔ́kɛmɛ tɔn ka sù nukún towe mɛ?
Ninɔmɛ tɛ lɛ ka sixu zɔ́n b’ɛ na vɛwǔ nú mǐ, bɔ mǐ na nɔ fífá mɛ xá mɛ ɖevo lɛ?
Nɛ̌ mǐ ka sixu xwedó kpɔ́ndéwú Jehovah tɔn, bo na kpò ɖò bǔ xá nɔví sunnu kpo nɔví nyɔnu kpo mǐtɔn lɛ gbɔn? Xà Nǔnywɛxó 19:11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nú mɛɖé dó xomɛsin nú we, alǒ jɛ agɔ dó wɛ ɔ, etɛ a ka sixu wà bɔ ninɔmɛ ɔ na kpɔ́n te?
Hweɖelɛnu ɔ, mǐ nɔ jɛ agɔ dó mɛ ɖevo lɛ. Nú nǔ mɔ̌hun jɛ ɔ, etɛ mǐ ka ɖó na wà? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ðò video ɔ mɛ ɔ, etɛ nɔví nyɔnu ɔ ka wà dó xò fífá kan?
6. Nɔ kpɔ́n jijɔ ɖagbe e nɔví sunnu towe lɛ kpo nɔví nyɔnu towe lɛ kpo ɖó lɛ é
Nú mǐ vɛ́ kpo nɔví sunnu mǐtɔn lɛ kpo, kpo nɔví nyɔnu mǐtɔn lɛ kpo ganji ɔ, mǐ na mɔ nǔ jɛ jijɔ ɖagbe yetɔn lɛ kpo gǎnmaɖó yetɔn lɛ kpo wu. Nɛ̌ mǐ ka sixu sɔ́ ayi ɖó jijɔ ɖagbe yetɔn lɛ jí gbɔn? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Etɛ ka sixu d’alɔ we bɔ a na mɔ jijɔ ɖagbe nɔví sunnu towe lɛ kpo nɔví nyɔnu towe lɛ kpo tɔn lɛ?
Jijɔ ɖagbe mǐtɔn lɛ jí wɛ Jehovah nɔ sɔ́ ayi ɖó. Xà 2 Tan 16:9a, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Tuùn e a tuùn ɖɔ Jehovah nɔ sɔ́ ayi ɖó jijɔ towe ɖagbe lɛ jí é ɔ, nɛ̌ é ka cí nú we?
Diamáa ɖɛkpɛɖɛkpɛ ɖé ɖó blɔ̌, cobo ka kpò ɖò akwɛ xɔ wɛ. Mɔ̌ ɖokpo ɔ, nɔví sunnu mǐtɔn lɛ kpo nɔví nyɔnu mǐtɔn lɛ kpo bǐ wɛ ɖó blɔ̌, cobo ka xɔ akwɛ nú Jehovah
MƐÐÉ LƐ ÐƆ: “Cobonu un na sɔ́ hwɛ kɛ mɛɖé ɔ, mɛ ɔ ɖó na tó jɛxa hwɛsɔ́kɛmɛ ce hwɛ̌.”
Etɛwu mǐ ka ɖó na nɔ ɖò gbesisɔmɛ hwebǐnu bo na nɔ sɔ́ hwɛ kɛ mɛ?
ETƐ LƐ A KA KPLƆ́N?
Nǔ a nɔ sɔ́ hwɛ kɛ nɔví sunnu towe lɛ kpo nɔví nyɔnu towe lɛ kpo, bo nɔ ɖè wanyiyi xlɛ́ ye ɔ, sò gɔ́ nú bǔninɔ agun ɔ tɔn wɛ a ɖè nɛ.
Vɔ̌gbɔnji
Nɛ̌ a ka sixu ɖu ɖò wangbɛnúmɛ jí gbɔn?
Nú gbemanɔkpɔ́ ɖé ɖò hwi kpo Klisanwun hatɔ́ ɖé kpo tɛntin ɔ, etɛ a ka na wà?
Etɛwu a ka jló na xwedó kpɔ́ndéwú Jehovah tɔn e kúnkplá hwɛ sísɔ́ kɛ mɛ ɖevo lɛ é?
KÍJÉ
Kpɔ́n lee nǔjlɛdónǔwu Jezu tɔn lɛ ɖokpo sixu d’alɔ mǐ, bɔ mǐ na nyi alɔ nú hwɛ didá nú mɛ ɖevo lɛ gbɔn é.
Nú mǐ mɔ ɖɔ mǐ kún wà nǔɖe nyi dò ó ɔ, é byɔ ɖɔ mǐ ni dó kɛnklɛn wɛ à?
“Kɛnklɛn Didó: Wlɛnwín E È Na Zán Dó Xò Fífá Kan É Ðé” (Atɔxwɛ [Gungbe], 1er novembre 2002)
Kpɔ́n lěe mɛɖé lɛ kplɔ́n bo ma nɔ ɖè mɛɖé ɖó vo ɖò mɛɖé mɛ ǎ gbɔn é.
Ma Nɔ Zɔn Dó Lee Mɛɖé Ðè Ðò Wěxo É Jí Dó Dá Hwɛ N’i Ó (5:06)
Kpɔ́n ali ɖěɖee nu a sixu ɖeɖɛ gbemanɔkpɔ́ lɛ, bɔ ye ma na wá d’avaja fífá agun ɔ tɔn mɛ ǎ ɖè lɛ é.
a Tinmɛ E Ðò Vivɔnu É 6gɔ́ ɔ ɖɔ xó dó lee wanyiyi na sísɛ́ Klisanwun lɛ bɔ ye na nyi alɔ nú azɔn e è nɔ sɔ́ é didó mɛ ɖevo lɛ gbɔn é jí.
b Tinmɛ E Ðò Vivɔnu É 7gɔ́ ɔ ɖɔ xó dó lee è na ɖeɖɛ ajɔ̌xó lɛ kpo sɛ́nxó lɛ kpo gbɔn é wu.