Nú A Hu Hwɛ Syɛnsyɛn ɖé ɔ, Etɛ A ka Ðó Na Wà?

A yí wǎn nú Jehovah tawun, bo nɔ dó gǎn syɛnsyɛn bo nɔ nyi alɔ nú nǔ ɖebǔ e na vɛ́ n’i é wiwa có, é sixu wá jɛ hweɖelɛnu bɔ a na wà nǔ nyi dò. É ɖò mɔ̌ có, hwɛhuhu ɖé lɛ nɔ syɛn tawun hú ɖevo lɛ. (1 Kɔlɛntinu lɛ 6:9, 10) Enyi a hu hwɛ syɛnsyɛn ɖé hǔn, ma lin ɖɔ Jehovah kún sɔ́ kpò ɖò wǎn yí nú emi wɛ ó; é ɖò gbesisɔmɛ bo na sɔ́ hwɛ kɛ we, bo na d’alɔ we.

1. Etɛ mǐ ka ɖó na wà bɔ Jehovah na sɔ́ hwɛ kɛ mǐ?

Nú mɛ ɖěɖee yí wǎn nú Jehovah lɛ é mɔ ɖɔ emi hu hwɛ syɛnsyɛn ɖé ɔ, wǔ nɔ kú ye tawun. Amɔ̌, akpá e Jehovah dó nú togun tɔn é nɔ dó gbɔ nú ye, é ɖɔ: “Enyi hwɛ mitɔn lɛ na bo mya cɛ́cɛ́ ɔ, ye na wé tété avɔkanfún ɖɔhun.” (Ezayíi 1:18) Nú mǐ lɛkɔ sín hwɛ mǐtɔn gudo nǔgbo nǔgbo ɔ, Jehovah na sɔ́ kɛ mǐ bǐ mlɛ́mlɛ́. Nɛ̌ mǐ ka nɔ lɛkɔ sín hwɛ mǐtɔn gudo gbɔn? Nǔ e mǐ wà nyi dò é nɔ vɛ́ nú mǐ tawun, bɔ mǐ sɔ́ nɔ bló ɖě ǎ, bo nɔ savo nú Jehovah ɖɔ é ni sɔ́ kɛ mǐ. Enɛ gudo ɔ, mǐ nɔ huzu linlin nyanya alǒ walɔ nyanya e sísɛ́ mǐ bɔ mǐ hu hwɛ ɔ é, bo nɔ tɛ́n kpɔ́n bo nɔ zán gbɛ̀ sɔgbe xá nǔgbododó mímɛ́ Jehovah tɔn lɛ.—Xà Ezayíi 55:6, 7.

2. Nɛ̌ Jehovah ka nɔ zán mɛxo agun tɔn lɛ dó d’alɔ mǐ, hwenu e mǐ hu hwɛ é gbɔn?

Nú mǐ hu hwɛ syɛnsyɛn ɖé ɔ, Jehovah ɖɔ nú mǐ ɖɔ mǐ ni “ylɔ́ agunmɛxo lɛ.” (Xà Jaki 5:14, 15.) Sunnu enɛ lɛ e è sɔ́ lɛ é yí wǎn nú Jehovah kpo lɛngbɔ̌ tɔn lɛ kpo. È ko kplɔ́n azɔ̌ ye bɔ ye na d’alɔ mǐ, bɔ mǐ na vɔ́ kancica e mǐ ɖó xá Jehovah é blóɖó.—Galatinu lɛ 6:1.

Nú mǐ hu hwɛ syɛnsyɛn ɖé ɔ, nɛ̌ mɛxo agun tɔn lɛ ka nɔ d’alɔ mǐ gbɔn? Mɛxo we alǒ atɔn na zán wěɖexámɛ Mawuxówema ɔ tɔn lɛ dó ɖè mǐ ɖó ali jí. Ye na lɛ́ ɖě we tawun tawun lɛ xá mǐ, bo na dó wusyɛn lanmɛ nú mǐ dó d’alɔ mǐ bɔ mǐ sɔ́ na hu hwɛ ɔ ɖevo ǎ. Nú mɛɖé hu hwɛ syɛnsyɛn bo ma ka lɛkɔ sín gudo ǎ ɔ, mɛxo agun tɔn lɛ na sɔ́ ɛ ɖó kɛ́n nú agun ɔ, bo na dó nya xɛ ɖò agun ɔ jí nú é ma wà nǔ dó agun ɔ wu ó.

BA DÒ NÚ NǓ D’EJI

3. Hwɛ e mǐ hu é ɖiɖɔ nɔ zɔ́n bɔ azɔn mǐtɔn nɔ gbɔ

Hwɛ ɖebǔ e mǐ hu é ɔ, é nɔ vɛ́ nú Jehovah, enɛ wu ɔ, mǐ ɖó na nɔ ɖɔ hwɛ e mǐ hu é nǔgbo tɔn n’i. Xà Ðɛhan 32:1-5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu é ka nyɔ́ ɖɔ mǐ ni nɔ ɖɔ hwɛ e mǐ hu lɛ é nú Jehovah, bo ma na nɔ tɛ́n kpɔ́n bo hwlá ye dó è ǎ?

VIDEO: “Mɛ E [Jehovah] Yí Wǎn Na ɔ Wɛ É Nɔ Kplɔ́n” (3:01)

• Ðò video ɔ mɛ ɔ, nɛ̌ mɛxo agun tɔn lɛ ka d’alɔ Canon b’ɛ lɛkɔ wá Jehovah gɔ́n gbɔn?

Mǐ ɖó na nɔ ɖɔ xomɛ, alǒ ɖɔ nǔgbo ɔ nú mɛxo agun tɔn lɛ nyi wɛn; ye ɖò finɛ bo na d’alɔ mǐ wɛ. Xà Jaki 5:16, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ nǔgbo ɔ ɖiɖɔ nú mɛxo lɛ nyi wɛn ka nɔ zɔ́n bɔ é nɔ bɔwǔ nú ye, bɔ ye nɔ d’alɔ mǐ gbɔn?

4. Jehovah nɔ kú nǔbláwǔ nú hwɛhutɔ́ lɛ́

Nú mɛ e hu hwɛ syɛnsyɛn ɖé é gbɛ́ ɖɔ emi kún na xwedó nǔgbododó Jehovah tɔn lɛ ó ɔ, è nɔ sɔ́ ɛ ɖó kɛ́n nú agun ɔ, bɔ mǐ sɔ́ nɔ dó gbɛ̌ xá ɛ ǎ. Xà 1 Kɔlɛntinu lɛ 5:6, 11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Lee tɔ́n, alǒ levɛ́ɛn sixu fɔ́n linfín nyinya gbɔn é ɔ, nɛ̌ gbɛ̌didó xá hwɛhutɔ́ e ma lɛkɔ sín hwɛ tɔn gudo ǎ é ɖé ka sixu wà nǔ dó agun ɔ wu gbɔn?

Nɛ̌ lee Jehovah nɔ wà nǔ xá hwɛhutɔ́ lɛ gbɔn é ka xlɛ́ ɖɔ é ɖò jlɛ̌ jí, nɔ kú nǔbláwǔ nú mɛ, bo nɔ lɛ́ yí wǎn nú mɛ gbɔn?

5. Nú mǐ lɛkɔ sín hwɛ mǐtɔn gudo ɔ, Jehovah nɔ sɔ́ kɛ mǐ

Jezu zán nǔjlɛdonǔwu ɖé b’ɛ d’alɔ mǐ bɔ mǐ mɔ nukúnnú jɛ lee nǔ nɔ cí nú Jehovah, hwenu e mɛɖé lɛkɔ sín hwɛ tɔn lɛ gudo é mɛ. Xà Luki 15:1-7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ nǔjlɛdonǔwu enɛ ka kplɔ́n we dó Jehovah wu?

Xà Ezekiyɛli 33:11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ ka ɖò taji bɔ mǐ na wà, bá dó xlɛ́ ɖɔ hwɛ mǐtɔn vɛ́ nú mǐ nǔgbo nǔgbo?

ETƐ LƐ A KA KPLƆ́N?

Nú mǐ hu hwɛ syɛnsyɛn ɖé, b’ɛ ka vɛ́ nú mǐ nǔgbo nǔgbo, lobɔ mǐ kánɖeji bo ma sɔ́ na lɛ́ vɔ́ nǔ ɖokpo ɔ wà nyi dò ɖě ǎ ɔ, Jehovah na sɔ́ kɛ mǐ.

Vɔ̌gbɔnji

• Etɛwu é ka nyɔ́ ɖɔ mǐ ni nɔ ɖɔ hwɛ mǐtɔn lɛ nú Jehovah?

• Etɛ mǐ ka ɖó na wà bɔ Jehovah na sɔ́ hwɛ mǐtɔn lɛ kɛ mǐ?

• Nú mǐ hu hwɛ syɛnsyɛn ɖé ɔ, etɛwu mǐ ka ɖó na yì ba alɔdó mɛxo agun tɔn lɛ tɔn?

KÍJÉ

Kpɔ́n lee nya ɖé ɖu nǔblawukúnúmɛ Jehovah tɔn e sín xó è ɖɔ ɖò Ezayíi 1:18 mɛ é sín lè gbɔn é.

Ma Xò Nǔ Kpɔ́n Dó Nǔblawukúnúmɛ Jehovah Tɔn Wu Gbeɖé Ó (5:02)

Nɛ̌ mɛxó agun tɔn lɛ́ ka nɔ tɛ́n kpɔ́n bo nɔ d’alɔ mɛ ɖěɖěe hu hwɛ syɛ́nsyɛ́n lɛ́ é gbɔn?

“Lěe mɛxó agun tɔn lɛ́ nɔ ɖe wǎnyíyí kpó nǔbláwǔkúnúmɛ kpó xlɛ́ hwɛhutɔ́ lɛ́ gbɔn é” (Atɔxwɛ, août 2024)

Kpɔ́n lěe è nɔ xlɛ́ ɖɔ è ɖó wǎnyíyí nú hwɛhutɔ́ e ma lɛ́ kɔ sín hwɛ yětɔn lɛ́ gúdo ǎ lɛ́ é, bo nɔ lɛ́ kú nǔbláwǔ nú yě gbɔn é.

“Lěe mɛxó agun tɔn lɛ́ sixú d’alɔ mɛ ɖěɖěe è sɔ́ ɖó kɛ́n nú agun ɔ lɛ́ é gbɔn é” (Atɔxwɛ, août 2024)

Ðò tan gbɛzán tɔn “É Byɔ Ðɔ Má Lɛkɔ Wá Jehovah Gɔn” mɛ ɔ, kpɔ́n nǔ e wu nya e jɛ zɔ nú nǔgbo ɔ é ɖé mɔ ɖɔ Jehovah wɛ lɛ́ dɔn emi wá nǔgbo ɔ mɛ é.

“Biblu Nɔ Huzu Gbɛzán Mɛtɔn” (Atɔxwɛ [Gungbe], 1^er avril 2012)