Ko honno Taguɗo on woni feɲɲinirde fodooje makko ɗe giggol ɗen ?

Gila ka fuɗɗoode taariika tagaaɗo, Taguɗo en on daalanayno yimɓe ɓen rewrude e malaa’ikaaɓe e annabaaɓe. E hoore ɗun, o suɓii fii yo konnguɗi makko ɗin e baraaji ɗi o fodi ɗin yo winnde. Ɗee fodooje Alla ko fii weltaare men fii ko aroyta. Jooni non, ko honto heɓeten fodooje Alla ɗen hannde ?

Ko Alla daalani en kon no e nder Binndi seniiɗi ɗin (2 Timotee 3:16). Ko honno Alla huutori annabaaɓe ɓen fii winndugol Daaluyee makko on ? Alla waɗi miijooji makko ɗin ka hakkille annabaaɓe ɓen fii yo ɓe winndu ɗi (2 Petruusu 1:21). E piide misal, si njulaajo huutorii sekereteerjo winndangol mo ɓataakuru, hiɗen anndi ko miijooji njulaajo on woni ka nder ɓataakuru. Ko wano non, hay si Alla huutorii annabaaɓe fii winndugol nelal makko ngal, ko miijo makko ngon woni ka nder Binndi seniiɗi.

DAALUYEE ALLA ON NO HEƁOO HEN FOW

Hakkee ko nelal Alla ngal hitti, himo faalaa yo yimɓe ɓen fow janngu e ɓe faama ngal. Hannde « Kibaaru Moƴƴo poomayankeejo » makko on no heɓoo « e kala leɲol e kala bolondaa e kala haala e kala jamaa » (Feɲɲinannde 14:6). Barki Alla, cenɗe Binndi seniiɗi ɗin maa ɗi fow no firaa e nder haalaaji ko ɓuri 3 000 ɓuri kala deftere goo e nder aduna on.