Deftere Alla nden ko nelal Alla e men

Yahuwah Alla waɗanii en dokkal timmungal : defte cewɗe 66 mooɓindiraaɗe e nder deftere wootere : Deftere Alla nden.a Kono no gasa hiɗon lanndoo : « Honno heɓirɗen nde ? Ko ka hommbo nde iwri ? » Fii jaabagol ɗee lanndaale, yewten honno nelal Alla ngal hewtiri en.

1. Si ko yimɓe winndi Deftere Alla nden, fii honɗun wi’anten ko ka Alla nde iwri ?

Ko yahata yimɓe 40 winndi Deftere Alla nden ko ɓuri duuɓi 1 600, gila 1513 ado saa’i men on haa e 98 saa’i men on. Winnduɓe Deftere Alla nden no serti e ko nokkeeli sertuɗi ɓe iwri. Hakkunde maɓɓe, hari no woodi ngaynaakooɓe, nanngooɓe liƴƴi e lamɓe. Kono hari hiɓe fotti e huunde wootere. Honno ɗun waɗiri ? Ko fii ko ka Alla nde iwri (janngee 1 Tesalonii 2:13). Wonaa miijooji maɓɓe ɓe winndi. Kono ɓe « haal[uno] ko Alla longini ɓe kon » rewrude ruuhu seniiɗob makko on (2 Petruusu 1:21). Alla huutori ruuhu seniiɗo makko on fii no yimɓe winndira miijooji makko ɗin (2 Timotee 3:16).

2. Fow no waawi heɓude nafa Deftere Alla nden ?

Yimɓe ɓe « kala leɲol e kala bolondaa e kala haala e kala jamaa » no waawi heɓude nafa kibaaru moƴƴo wonɗo on ka nder Deftere Alla (janngee Feɲɲinannde 14:6). Alla waɗi fii yo Daaluyee makko on heɓo e nder haalaaji buy ɓuri kala deftere goo. Mo kala no waawi janngude Deftere Alla nden, kala ka o woni maa ka haala makko.

3. Honno Yahuwah Alla hiwirnoo Deftere makko nden ?

Deftere Alla nden winndano e gurii kulle maa e kaydiiji ɗi neeɓataa moƴƴiniraaɗi leggal papirus. Kono yiɗuɓe Deftere Alla nden winndituno nde no haaniri e ɓe waɗi egguɗe mayre. Hay si yimɓe dolnuɓe etino mulugol Deftere Alla nden, woɓɓe goo hari no hebilii maayugol fii danndugol nde. Yahuwah Alla accaali hay gooto maa hay huunde haɗugol en janngugol Deftere makko nden. Deftere Alla nden wi’i : « Daaluyee Alla men on luttay haa poomaa » (Isaaya 40:8).

LUGGINEE

4. Deftere Alla nden no haalani en ko ka hommbo nde iwri

Fijinee VIDIO on, janngon 2 Timotee 3:16 e yewton fii lanndaale jokkituɗe ɗen.

VIDIO : Ko miijo hommbo woni ka nder Deftere Alla ? (Suutannde) (2:48)

• Si tawii ko yimɓe winndi Deftere Alla nden, fii honɗun hinde noddaa Daaluyee Alla ?

• E miijo mon, hino haani ka Alla yewta yimɓe ko o miijii ?

5. Deftere Alla nden daɗii muleede

VIDIO : Ɓe teddinno Deftere Alla nden (Suutannde : William Tyndale) (6:17)

• Anndugol ko woɓɓe goo hebilinoo waɗugol fii hiwugol Deftere Alla nden, ɗun waɗataa on ɓurton faaleede janngugol nde ? Fii honɗun ? 

Janngee Zabuura 119:97 (VPFJ) e yewton fii ngal lanndal :

• Ko honɗun waɗi yimɓe buy no hebilinoo maayugol fii firugol e sennditugol Deftere Alla nden ?

6. Deftere fii fow

Ko Deftere Alla nden ɓuri fireede e sennditeede e nder aduna on fow. Janngee Kuuɗe sahaabaaɓe ɓen 10:34, 35 e yewton fii ɗee lanndaale :

• Fii honɗun Alla no faalaa yo Daaluyee makko on fire e sennditee e nder aduna on fow ?

• Ko honɗun yiɗuɗon ka nder Deftere Alla ?

RAWNOODE

Deftere Alla nden ko Daaluyee Alla on, e Alla waɗi fii no yimɓe ɓen fow janngira nde.

Ndartannde

• Alla wahayinino yimɓe fii no ɓe winndira Deftere makko nden. Ko honɗun ɗun firi ?

• E nder ko jannguɗon kon fow fii Deftere Alla nden, ko honɗun ɓurɗon yiɗude ?

• Ko honɗun miijiɗon fii ko Alla waɗi kon fow fii daalangol en ?

TASKEE

Janngee fii taariika Deftere Alla nden gila tagganɗe haa ka firoore Deftere Alla nden hannde.

« No Deftere Alla nden hewtiri en non » (Finee !, noofaambur 2007)

Janngee no Deftere Alla nden daɗirnoo boneeji tati tiiɗuɗi.

« Deftere Alla nden : taariika no nde danndiranoo non » (Suudu Aynirdu ndun n° 4 2016)

Ndaaree boneeji ɗi yimɓe heɓunoo fii firugol Deftere Alla nden.

Ɓe teddinno Deftere Alla nden (14:26)

Deftere Alla nden winnditano e firano nde laabi buy. Ko honno fellitirton nelal makko ngal waylaaka fes ?

« Daaluyee Alla winndaaɗo on waylaama maa ɓoylaama ? » (Winndannde ka jw.org)