Heɓen baraaji Taguɗo en on haa poomaa

Alla foduno annabi Ibrahiima wonndema goɗɗo e jurriya makko on addanay « leƴƴi aduna on fow » baraaji (Fuɗɗoode nden 22:18, VPFJ). Ko hommbo wonaynoo on neɗɗo ?

Ko yahata fayda duuɓi 2 000, Alla okkuno annabi Iisaa, jurriya annabi Ibrahiima, bawgal waɗugol kaawakeeji. Ɗii kaawakeeji holluno ko annabi Ibrahiima fodanoo kon, hewtirayno leƴƴi ɗin fow rewrude e annabi Iisaa (Galaasi 3:14).

Kaawakeeji annabi Iisaa ɗin holluno ko kanko Alla suɓii fii barkingol tagaaɗo, e ɗi holluno kadi honno Alla huutortoo mo fii barkingol tagaaɗo haa poomaa. Ndaaree honno kaawakeeji annabi Iisaa ɗin holliri goɗɗi e sifaaji makko yooɗuɗi :

Moƴƴere ɓernde : O sellinno nawnuɓe.

Ɲannde goo, gorko mo ɗamajan torino annabi Iisaa yo o sellin mo. Annabi Iisa meemi mo e jaabii : « Miɗo yiɗi » (Markuusa 1:40-42). Ko ɗon kisan ɗamajan ɗan iwi e makko.

Moƴƴuki : O ɲamminno weelaaɓe.

Annabi Iisaa faalanooka yo yimɓe ɓe weele. Ko yahata nde laabi ɗiɗi, o waɗuno kaawee fii ɲammingol yimɓe guluuji guluuji e hoore ɗuuɗingol bireediije e likkoy (Matta 14:17-21 ; 15:32-38). Fow ɲaamuno haa haari e ɲaametee buy luttuno.

Yurmeende : O immintinno mayɓe.

E hoore yurmeende, annabi Iisaa immintinno ɓiɗɗo bajjo keynguujo mo alaano hay gooto ko dankoo mo (Luuka 7:12-15).