TOƁƁERE 16
Ko honɗun annabi Iisaa waɗunoo fewndo o wonunoo ka hoore leydi ?
Yimɓe buy no miijoo fii annabi Iisaa wa boobo penu maa annabaajo faamuɗo. Kono en waaway anndude fii makko ko ɓuri nii e hoore taskagol ngurndan makko ɗan ka hoore leydi ? E nder ndee toɓɓere, en ndaaray piiji ɓurɗi hittude ɗi annabi Iisaa waɗi e honno ɗii nafirta on.
1. Ko golle honɗe ɓurnoo hittande annabi Iisaa ?
Golle ɓurnooɗe hittande annabi Iisaa ɗen hari ko feɲɲingol « Kibaaru Moƴƴo on, ɗun ko kibaaru fii laamu Alla ngun » (janngee Luuka 4:43). O feɲɲinno kibaaru moƴƴo on wonndema Alla waɗoyay laamu, maa guwerneman, jittoyayngu satteendeeji tagaaɗo fowa. Annabi Iisaa wakkilino yottingol ngal nelal okkayngal tanƴinaare fii duuɓi tati e feccere (Matta 9:35).
2. Ko honɗun kaawakeeji annabi Iisaa ɗin holli ?
Deftere Alla nden no haali fii « kaawakeeji moƴƴi e kuuɗe e maandeeji, kon ko Alla warri e [annabi Iisaa] » (Kuuɗe sahaabaaɓe ɓen 2:22). E hoore bawgal Alla ngal, annabi Iisaa waawuno deƴƴingol waabiliire, ɲammingol yimɓe guluuji e guluuji, ɲawndugol nawnuɓe e hay immintingol mayɓe (Matta 8:23-27 ; 14:15-21 ; Markuusa 6:56 ; Luuka 7:11-17). Kaawakeeji annabi Iisaa ɗin holluno ko laaɓi pos ko Alla nelunoo mo. Ɗii holluno kadi Yahuwah Alla no mari bawgal jittugol satteendeeji men ɗin fow.
3. Ko honɗun ngurndan annabi Iisaa ɗan jannata en ?
Annabi Iisaa ɗoftino Yahuwah Alla e saa’iiji ɗin fow (janngee Yuuhanna 8:29). Fii kala ɓe dartino mo, annabi Iisaa e hoore sella-finndeyaagal, waɗuno kala ko Baaba makko yamirnoo mo haa o feƴƴini. O holluno yimɓe no waawi rewude Alla hay si no sattani ɓe. Ko wano non annabi Iisaa accanii en « misal, fii no jokkir[en] batteeji makko ɗin » (1 Petruusu 2:21).
LUGGINEE
Ndaaree honno annabi Iisaa feɲɲinirnoo kibaaru moƴƴo on e no o waɗirnoo kaawakeeji non.
4. Annabi Iisaa feɲɲinno kibaaru moƴƴo on
Annabi Iisaa seppuno ka woɗɗi e laawi wonduɗi e nduggu fii feɲɲinangol yimɓe buy kibaaru moƴƴo on. Janngee Luuka 8:1 e yewton fii ɗee lanndaale :
Annabi Iisaa waajino tun yimɓe araynooɓe heɗitoo mo ?
Ko honno annabi Iisaa wakkilornoo fii yahugol ka yimɓe ?
Alla daaluno wonndema Almasiihu on feɲɲinay kibaaru moƴƴo on. Janngee Isaaya 61:1, 2 e yewton fii ɗee lanndaale :
Ko honno annabi Iisaa laatiniri ndee hiitannde ?
Hiɗon miijii yimɓe ɓen hannde no hatonjini e nanugol oo kibaaru moƴƴo ?
5. Annabi Iisaa jannuno goongaaji hittuɗi
E hoore feɲɲingol kibaaru moƴƴo on fii laamu Alla ngun, annabi Iisaa jannuno fii piiji nafayɗi en. Ndaaree goɗɗe e mise iwruɗe ka Waaju makko ka hoore fello. Janngee Matta 6:14, 34 e 7:12 e yewton fii ɗee lanndaale :
Ko waajuuji nafayɗi honɗi annabi Iisaa jonni e ɗee aayeeje ?
Hiɗon miijii ɗii waajuuji no wondani en e nafa hannde ?
6. Annabi Iisaa waɗuno kaawakeeji
Yahuwah Alla okkuno annabi Iisaa bawgal fii waɗugol kaawakeeji buy. Fii yi’ugol misal, janngee Markuusa 5:25-34 maa fijinon VIDIO on. Ɓawto ɗun, yewton fii lanndaale jokkituɗe ɗen.
Ko honɗun debbo nawnunooɗo on fellitunoo ?
Ko honɗun hawnanii on e oo kaawee ?
Janngee Yuuhanna 5:36 e yewton fii ngal lanndal :
Ko honɗun kaawakeeji annabi Iisaa ɗin ‘seeditani’ maa holli fii makko ?
Hari hiɗon anndi ?
Ko annduɗen kon fii annabi Iisaa no iwri ka defte nay noddaaɗe Linnjiila on (Matta, Markuusa, Luuka e Yuuhanna). Kala winndunooɗo haaluno fii makko no sertiri. Ko winndaa fii makko kon fow no holli ko labaa fii ngurndan makko ɗan.
MATTA
ko kanko adii winndude deftere aranere nden ka Linjiila. Hinde holli ko annabi Iisaa janni kon, tentinii fii laamu Alla ngun.
MARKUUSA
ko kanko winndi deftere ɓurnde raɓɓiɗude nden ka Linnjiila. Hinde haali fii piiji buy firnuɗi ɗi annabi Iisaa waɗi.
LUUKA
kanko o tentinno fii toraare e no annabi Iisaa teddinirnoo rewɓe ɓen non.
YUUHANNA
kanko o winnduno fii no annabi Iisaa siforii non e hoore haalugol fii yewtereeji hakkunde makko e yiɓɓe makko hiɓɓuɓe ɓen e woɓɓe goo.
WOƁƁE GOO NO WI’A : « Annabi Iisaa ko goɗɗo e annabaaɓe ɓen tun. »
Ko honɗun miijiɗon ?
RAWNOODE
Annabi Iisaa waajino fii laamu Alla ngun, o waɗuno kaawakeeji e o ɗoftino Yahuwah Alla saa’iiji ɗin fow.
Ndartannde
Ko golle honɗe ɓurnoo hittande annabi Iisaa ka hoore leydi ?
Ko honɗun kaawakeeji annabi Iisaa ɗin holli ?
Ko nafa honɗun heɓeten e nder ko annabi Iisaa janni en kon ?
TASKEE
Ko honɗun annabi Iisaa ɓurnoo haalude fii mun ?
« Ko honno laamu Alla ngun wa’irani annabi Iisaa ? » (Suudu Aynirdu ndun, 1 ottoombur 2014)
Ndaaree fii honɗun hoolantoɗen kaawakeeji ɗi annabi Iisaa ɗin waɗuno tigi tigi.
« Ko honɗun janngoton fii kaawakeeji annabi Iisaa ɗin ? » (Suudu Aynirdu ndun, 15 suwiye 2004)
Janngee no misal annabi Iisaa ngal battiniri gorko goo.
« Hari ko fii hoore an tun mi wuurani » (Suudu Aynirdu ndun, 1 ottoombur 2014)
Ndaaree saa’iiji hittuɗi golle annabi Iisaa ɗen gila ka fuɗɗoode haa ka sakkitoode.
a Toɓɓe 31-33 haaloyay fii laamu Alla ngun ko ɓuri nii.