TOƁƁERE 17
Ko honno annabi Iisaa sifori ?
E nder ko janngeten kon fii piiji ɗi annabi Iisaa wi’i e ɗi o waɗi fewndo o wonunoo ka hoore leydi, en annday sifaaji wallayɗi en ɓurtugol ɓadaade mo kanko e Baaba makko, Yahuwah Alla. Ko honɗun woni goɗɗi e ɗii sifaaji labaaɗi ? E ko honno waawirten ɲemmbude annabi Iisaa e nder ngurndan men ɗan ?
1. Ko honno annabi Iisaa nanndiri e Baaba makko ?
E nder duuɓi miliyaarji ko annabi Iisaa wonunoo ka kammu, o lasindino Baaba makko e o jannguno piiji buy. Ko ɗun waɗi himo miijora e himo waɗira piiji wa Baaba makko (janngee Yuuhanna 5:19). Tigi tigi on, annabi Iisaa no ɲemmɓude sifaaji Baaba makko ɗin ko timmi, ko ɗun waɗi o wi’i : « Kala yi’uɗo lan, haray yi’ii Baabaajo on » (Yuuhanna 14:9). Ko no janngirton fii sifaaji annabi Iisaa ɗin non, ko non anndirton Yahuwah Alla moƴƴa. E piide misal, yurmeende annabi Iisaa nden fii yimɓe no holli honno Yahuwah Alla kippiri fii mon.
2. Ko honno annabi Iisaa hollirnoo himo yiɗi Yahuwah Alla ?
Annabi Iisaa wi’uno : « Kono aduna on no haani andude wonde miɗo yiɗi Baabaajo on, ko ɗun waɗi si miɗo waɗirde wano Baabaajo on yamirimmi non » (Yuuhanna 14:31). Ko annabi Iisaa wonunoo ka hoore leydi, o holluno giggol tiiɗungol fii Baaba makko e hoore ɗoftagol mo hay si hino sattannoo mo waɗugol ɗun. Annabi Iisaa no yiɗunoo haalugol kadi fii Baaba makko e wallugol woɓɓe goo fii no ɓe wonira weldiɓɓe Alla (Yuuhanna 14:23).
3. Ko honno annabi Iisaa hollirnoo himo yiɗi yimɓe ?
Deftere Alla nden wi’i annabi Iisaa no « weltori yimɓe ɓe [Alla] tagi ɓen » (Tindi 8:31, VPFJ). O holluno ngol giggol e nder wakkillingol e wallugol yimɓe fii nafa maɓɓe. Kaawakeeji ɗi o waɗi ɗin hollaano tun bawgal makko ngal, kono ɗi holluno kadi yurmeende makko nden (Markuusa 1:40-42). O moƴƴuno e yimɓe e o ɓurnaali hay gooto. Konnguɗi makko ɗin multuno sella-finndeeɓe jentinooɓe mo ɓen e okkuno ɓe tanƴinaare. Annabi Iisaa hari no hebilii tampugol e maayugol sabu giggol makko ngol fii tagaaɗo. Kono himo yiɗi tentinii jokkuɓe janndeeji makko ɗin (janngee Yuuhanna 15:13, 14).
LUGGINEE
Ɓeydee anndugol sifaaji annabi Iisaa ɗin e ndaaron no hollirton giggol e moƴƴere wano o waɗirnoo non.
4. Annabi Iisaa no yiɗi Baaba makko
Misal annabi Iisaa ngal no jannude en honno hollirten Alla giggol men ngol. Janngee Luuka 6:12 e Yuuhanna 15:10 ; 17:26. Ɓawto janngugol aaya kala, yewten fii ngal lanndal :
E hoore ɲemmbugol annabi Iisaa, honno hollirten hiɗen yiɗi Yahuwah Alla ?
Annabi Iisaa no yiɗunoo Baaba makko on e o torotono mo saa’i woo.
5. Annabi Iisaa no kippi fii hatonjiniiɓe
Annabi Iisaa hari no haajaa fii woɓɓe goo ɓuri fii makko. Hay si tawuno himo ronki, o huutorayno saa’i makko on e doole makko ɗen fii wallugol yimɓe. Janngee Markuusa 6:30-44 e yewton fii ɗee lanndaale :
E nder ɗee aayeeje, ko honno annabi Iisaa hollirnoo himo haajaa e woɓɓe goo ? (Ndaaree aayeeje 31, 34, 41 e 42).
Ko honɗun wakkilinnoo annabi Iisaa wallugol yimɓe ? (Ndaaree aaya 34).
Sabu ko annabi Iisaa ɲemmbi sifaaji Baaba makko ɗin, ko honɗun ɗun janni en fii Yahuwah Alla ?
Ko honno ɲemmbirten annabi Iisaa fii haajegol e woɓɓe goo ?
6. Annabi Iisaa ko yaaja-ɓerndeejo
Fii kala annabi Iisaa alaano piiji buy, hari ko yaaja-ɓerndeejo e o wakkilinno en wonugol yaaja-ɓerdeeɓe. Janngee Kuuɗe sahaabaaɓe ɓen 20:35 e yewton fii ngal lanndal :
Wano annabi Iisaa wi’iri non, ko honno heɓirten weltaare ?
Fijinee VIDIO on e yewton fii lanndal jokkitungal ngal.
Hay si en alaa piiji buy, ko honno waawirten okkude ?
Hari hiɗon anndi ?
Deftere Alla nden no janni en yo en toro Yahuwah Alla e innde annabi Iisaa nden (janngee Yuuhanna 16:23, 24). Si en tororike Alla wano non, en hollay hiɗen weltii fii ko annabi Iisaa walli en weldugol e Yahuwah Alla.
WOƁƁE GOO NO WI’A : « Si yimɓe no tampude ko fii haray Alla no jarribaade ɓe. »
Ɓayri annabi Iisaa no ɲemmbude sifaaji Baaba makko ɗin, honno kuuɗe makko ɗen holliri wonaa Yahuwah Alla woni e jarribaade en ?
RAWNOODE
Annabi Iisaa no yiɗi Yahuwah Alla e himo yiɗi yimɓe. Ɓayri annabi Iisaa no ɲemmbude sifaaji Baaba makko ɗin, no ɓeydirton anndugol mo non, ko non ɓurtirton anndugol Yahuwah Alla.
Ndartannde
Ko honno hollirten giggol men ngol fii Yahuwah Alla wano annabi Iisaa ?
Ko sifaaji annabi Iisaa honɗi ɓurɗon yiɗude ?
Ko honno hollirten giggol men ngol fii yimɓe wano annabi Iisaa ?
TASKEE
Ndaaree sifaaji annabi Iisaa goo ɗi waawuɗen ɲemmbude.
Ndaaree fii honɗun toragol Alla e innde annabi Iisaa no hitti.
« Fii honɗun torantoɗen e innde annabi Iisaa ? » (Suudu Aynirdu ndun, 1 feeburuyee 2008)
Deftere Alla nden no haali fii mbaadi annabi Iisaa ndin ?
« Ko honɗun e mbaadi annabi Iisaa marunoo ? » (Winndannde ka jw.org)
Ko honɗun janngeten fii no annabi Iisaa dankornoo rewɓe ɓen non ?
« Alla no teddini rewɓe ɓen » (Suudu Aynirdu ndun, 1 settaambur 2012)