Fii honɗun men ɓornantoo moƴƴa fii pottital amen ngal ?

On yi’i ɗii fotooji ɗoo honno Seedeeɓe Yahuwah ɓen ɓornori moƴƴa fii yahugol ka pottital maɓɓe ? Ko fii honɗun men wattanta yila e ko men ɓornotoo kon ?

Ko fii teddingol Allah. Ko goonga Allah ndaarataa tun ko ɓorniɗen kon (1 Samu’iila 16:7, TMN). Kono, si men mooɓondiri fii rewugol Allah, men ɓornoto moƴƴa fii teddingol mo e ɗimmooɓe amen ɓen. Wano si men ari yeeso ɲaawoowo, men wattanay yila e ko men ɓornii kon fii teddingol mo. Ko wano non kadi, meɗen haani ɓornaade moƴƴa fii teddingol Yahuwah “ Ɲaawoowo Aduna on fow ” e fii ka men rewata mo ɗon. — Fuɗɗooɗe nden 18:25.

Hollugol no men sifori non. Deftere Allah nden wi’i, rewooɓe Allah ɓen yo ɓorno “ no haaniri, hara hinaa no maniree e no hawnori ”. (1 Timotee 2:9, 10.) Ɓornagol “ no haaniri ” wonaa fii hollitagol maa wattagol conci adunayankooɓe. Kadi, wonugol “ hara hinaa no maniree e no hawnori ”, ko suɓagol conci moƴƴi ko surrata en. Ɗee tugaale wallay mo kala no suɓira conci mun ɗin. Hay si men wowlaali fus, conci ko men ɓornii kon hollay meɗen teddini ‘ Allah Danduɗo en on ’ e mawnini mo (Tiituusa 2:10 ; 1 Petruusu 2:12). Ɓornagol moƴƴa fii pottital amen ngal wallay woɓɓe goo no ɓe anndira honno men rewirta Yahuwah.

Wonaa yo on accu ko ɓorniɗon kon haɗa on yahude ka Fottirde Seedeeɓe Yahuwah ɓen. Conci ɗin haanaa sattude coggu maa wona ko yalti kesun, kono ko yo ɗi laaɓu e ɗi surra en.

• Fii honɗun haanuɗen ɓornagol moƴƴa si hiɗen rewude Allah ?

• Ko tugaale honɗe ɗowata en fii suɓagol conci men ɗin ?