TOƁƁERE 37
Ko honɗun Deftere Alla nden haali fii golle e kaalisi ?
On sonnjike fii heɓugol golle maa kaalisi ? Welaa fii heɓugol kaalisi fii ngurndan men ɗan e rewugol Yahuwah Alla no haaniri. Deftere Alla nden no mari waajuuji haanuɗi wallayɗi en.
1. Ko honɗun Deftere Alla nden haali fii golle ?
Alla no faalaa yo en weltor golle men ɗen. Deftere Alla nden wi’i : « Alaa ko ɓuri e moƴƴande neɗɗanke […] sinaa weltorgol fii golle makko wakkilaare » (Waajotooɗo on 2:24). Yahuwah Alla ko golloowo wakkiliiɗo. Si en ɲemmbii mo e hoore gollirgol wakkilaare, en weltinay mo ɓernde e en heɓay weltaare enen kadi.
Golle no hitti. Kono en haanaa accude golle men ɗen hittana en ɓuri dewal men ngal e Yahuwah Alla (Yuuhanna 6:27). Alla no fodi en si en waɗii dewal men ngal ko adii kon e nder ngurndan men ɗan, o okkay en kala ko hatonjiniɗen.
2. Ko honno miijortoɗen fii kaalisi no haaniri ?
Fii kala Deftere Alla nden wi’i « mbuuɗi no dannda en », hinde waajii en kadi mbuuɗi tun waawataa en okkugol weltaare (Waajotooɗo on 7:12). Ko ɗun waɗi, hinde waajii en wota en yiɗu mbuuɗi kono ko yo en « yondino[r] ko jogiɗ[en] kon » (janngee Yahuudiyankeeɓe ɓen 13:5). Si en weltorii ko maruɗen kon, en dannday hoore men miijagol soono woo fii heɓugol jawdi buy. En ɲawlotaako fii ko woni woo (Tindi 22:7, VPFJ). Ɗun dannday en e satteendeeji fijugol kannda maa waɗugol piiji fii no heɓiren jawdi no yaawiri.
3. Ko honno huutorten kaalisi no moƴƴiri ?
Yahuwah Alla ko Alla yaaja-ɓerndeejo e en ɲemmbay mo si en wonii « okkooɓe e kafidotooɓe » (1 Timotee 6:18). Hiɗen waawi huutorde mbuuɗi men ɗin no moƴƴiri e hoore wallugol moftal ngal e hatonjiniiɓe tentinii musiɓɓe men ɓen ka dewal. Ko ɓuri hittande Yahuwah Alla, wonaa ko okketen kon, kono ko fii honɗun okkanten. Si en okkirii ɓernde laaɓunde, en weltoto e en weltinay Yahuwah Alla kadi (janngee Kuuɗe sahaabaaɓe ɓen 20:35).
LUGGINEE
Ndaaree nafa miijagol fii golle no haaniri e weltorgol fii ko maruɗen kon.
4. Teddinee Yahuwah Alla e hoore gollugol no haaniri
Weldigal men ngal e Yahuwah Alla no haani battinde no miijorten fii golle. Fijinee VIDIO on e yewton fii lanndaale jokkituɗe ɗen.
E nder vidio on, ko honɗun ŋalɗini on fii jikku e miijo Jason ngon ka golle makko ?
Ko honɗun o waɗi fii accugol golle makko ɗen ka ɗe haani wonude ɗon ?
Janngee Koloosi 3:23, 24 e yewton fii ngal lanndal :
Fii honɗun no gollirten non no hitti ?
Golle no hitti. Kono ɗe haanaa hittude ɓuri dewal men ngal e Yahuwah Alla.
5. Weltorgol ko maruɗen kon no nafa en
Yimɓe buy no faalaa heɓugol kaalisi buy. Kono wonaa nii Deftere Alla nden waajorii en. Janngee 1 Timotee 6:6-8 e yewton fii ngal lanndal :
Ko honɗun Deftere Alla nden waajii en waɗugol ?
En waaway heɓude ngurndan welɗan hay si en alaa kaalisi buy. Fijinee VIDIO on e yewton fii lanndal jokkitungal ngal.
Fii honɗun ɗii ɓeynguureeji no weltii hay si ɗi alaa kaalisi buy ?
Si tawii non hiɗen mari kaalisi buy e hiɗen faalaa heɓude ko ɓuri ɗun ? Annabi Iisaa holluno miijorgol nii no hulɓini. Janngee Luuka 12:15-21 e yewton fii ngal lanndal :
Ko honɗun misal ngal annabi Iisaa hollingal jannata en ? (Ndaaree aaya 15).
Janngee Tindi 10:22 (VPFJ), eɓɓindiron e 1 Timotee 6:10. Ɓawto ɗun yewton fii ɗee lanndaale :
E miijo mon ko honɗun ɓuri hittude : ko weldigal mon ngal e Yahuwah Alla kaa ko heɓugol kaalisi buy ? Fii honɗun ?
Ko bone hommbo heɓeten si en miijike soono woo fii heɓugol kaalisi buy ?
6. Yahuwah Alla dankoto en
Sonnjaa fii golle maa fii kaalisi hollay si hiɗen gomɗini Yahuwah Alla. Fijinee VIDIO on fii anndugol no jittirten sifa ɗii satteendeeji e yewton fii lanndaale jokkituɗe ɗen.
E nder vidio on, ko satteendeeji honɗi musiɗɗo men on ka dewal heɓunoo ?
Ko honɗun o waɗunoo fii jittugol ɗii satteendeeji ?
Janngee Matta 6:25-34 e yewton fii ngal lanndal :
Ko honɗun Yahuwah Alla fodi waɗooɓe mo ɓen ko adii kon e nder ngurndan maɓɓe ɗan ?
WOƁƁE GOO NO WI’A : « Miɗo haani gollude ko ɗuuɗi fii wurnugol ɓeynguure an nden. Mi waawataa taweede ka pottite moftal ɗen fow. »
Ko aaya hommbo fellintini on waɗugol dewal mon ngal e Yahuwah Alla ko adii kon ko huunde ɓurnde moƴƴude ?
RAWNOODE
Golle e kaalisi no hittani en, kono ɗun haanaa haɗugol en e rewugol Yahuwah Alla.
Ndartannde
Ko honɗun wallata on miijagol fii golle no haaniri non ?
Ko nafa honɗun heɓeten si en weltorii fii ko maruɗen kon ?
Ko honno hollirton hoolaare mon nden e nder ko Yahuwah Alla fodi jamaa makko on okkugol ɓe ko ɓe hatonjini kon ?
TASKEE
Ndaaree si Deftere Alla nden no wi’i kaalisi no boni.
Anndee ko dokkal honngal welata Alla.
« Ko honɗun Deftere Alla nden haali fii okkugol ? » (Winndannde ka jw.org)
Fijirgol kaalisi aldaa e bone ?
« Ko Deftere Alla nden haali kon : fijirgol mbuuɗi » (Finee !, marsi 2015)
Ndaaree ko walli gujjo yiɗunooɗo fijirgol kaalisi no wayliri jikku makko.
« Hari miɗo yiɗi fota ka pucci dogata » (Suudu Aynirdu ndun, 1 noofaambur 2011)