TOƁƁERE 55
Wallitee moftal mon ngal
E nder aduna on fow, miliyonji yimɓe no rewude Yahuwah Alla e hoore weltaare e nder mofte guluuje guluuje. Hiɓe weltorii ko ɓe jannetee kon e ko ɓe ekkintintee kon, e hiɓe weltii wallitagol moftal ngal e baŋŋe buy. Ko non miijorɗon fii moftal mon ngal ?
1. Ko honno huutorton saa’i mon on e doole mon ɗen fii wallitagol moftal ngal ?
En fow hiɗen waawi waɗude goɗɗun ka moftal. E piide misal, moftal mon ngal no mari nawyuɓe maa jukkuɓe ? On waaway ɓe wallude yahugol ka pottite ? Kaa on waaway ɓe wallitaade e piiji goo wano yahugol ka maakiti maa gollugol ka suudu ? (Janngee Yaaquuba 1:27). Hiɗen waawi kadi wallitaade laɓɓingol e wattugol Fottirde nden. Hay gooto forsataa en waɗugol ɗii piiji. Ko giggol men fii Alla e fii musiɓɓe men ɓen ka dewal ‘wakkilinta en’ waɗugol ɗun (Zabuura 110:3, VPFJ).
Lootaaɓe maande kisiyee ɓen no waawi wallitaade moftal ngal e baŋŋe goo. Musiɓɓe waawuɓe maruɓe sifaaji moƴƴi no waawi wonude wallitotooɓe, e ɓawto ɗun, ardotooɓe. Musiɓɓe worɓe ɓen e rewɓe ɓen ka dewal no waawi wallitaade ka waajagol e hoore wonugol ardiiɓe ka waajagol soono woo. Seedeeɓe goo no waawi wallitaade darnugol nokkeeli ka Yahuwah Alla rewetee maa ɓe yaha e nokkuure ka moftal hatonjini e ballal.
2. Ko honno huutorton jawle mon ɗen fii wallitagol moftal ngal ?
Deftere Alla nden wi’i : « Teddinir Joomiraaɗo on jawle maa ɗen » (Tindi 3:9, VPFJ). Meɗen weltii okkugol mbuuɗi e piiji goo fii wallitagol moftal ngal e fii golle waajagol ngol e nder aduna on fow (janngee 2 Korenti 9:7). Ko okketen kon ko fii wallitagol kadi heɓuɓe satteendeeji e masiibo. Seedeeɓe buy suɓoto « wallin[gol] feere » mbuuɗi soono woo fii waɗugol dokkal (janngee 1 Korenti 16:2). Hiɗen waawi waɗude dokkal e hoore huutorgol keesuuje dokkal anniyee e nokkeeli ka reweten Yahuwah Alla maa ka donate.jw.org ka enternet. En hollay hiɗen yiɗi Yahuwah Alla si en huutorii jawle men ɗen fii wallitagol.
LUGGINEE
Ndaaren fasonji no wallirten moftal ngal.
3. Huutoree jawle mon ɗen
Yahuwah Alla e annabi Iisaa no yiɗi okkiroowo weltaare. E piide misal, annabi Iisaa wattanno yila e keynguujo baaso wakkilinooɗo waɗugol dokkal. Janngee Luuka 21:1-4 e yewton fii ɗee lanndaale :
No haani ka okken mbuuɗi buy fii weltingol Yahuwah Alla ?
Ko honno Yahuwah Alla e annabi Iisaa miijortoo si en okkirii ɓernde laaɓunde ?
Fii anndugol no dokke men ɗen huutortee, fijinee VIDIO on e yewton fii lanndaale jokkituɗe ɗen.
Ko honno dokke mon ɗen nafirta mofte e nder aduna on fow ?
4. Hiɗon waawi wallitaade
Ɓaawo ɗoo, rewooɓe Yahuwah Alla ɓen gollayno moƴƴa fii dankagol nokkuure ka ɓe rewaynoo Alla ɗon. Ɓe waɗataano tun dokkal mbuuɗi. Janngee 2 Fillande taariika 34:9-11 e yewton fin ngal lanndal :
Ko honno Isra’iilayankeejo kala gerdaynoo fii wallitagol dankagol suudu Yahuwah Alla ndun maa nokkuure ka ɓe rewaynoo mo ɗon ?
Fii yi’ugol no Seedeeɓe Yahuwah ɓen jokkiri ngal misal, fijinee VIDIO on e yewton fii lanndaale jokkituɗe ɗen.
Fii honɗun no hitti laɓɓingol e wattugol Fottirde men nden ?
Ko honno wallirton ?
5. Musiɓɓe worɓe, gollanee moftal ngal
Deftere Alla nden no wakkilina musiɓɓe worɓe ɓen fii waɗugol kala ko ɓe waawi fii wallitagol moftal ngal. Fii yi’ugol misal, fijinee VIDIO on e yewton fii lanndal jokkitungal ngal.
Ko honɗun Ryan waɗi fii wallitagol moftal ngal ko ɓuri ko o waɗaynoo kon ?
Deftere Alla nden no sifii ko musiɓɓe worɓe ɓen waɗata fii wonugol wallitotooɓe maa ardotooɓe ka moftal. Janngee 1 Timotee 3:1-13 e yewton fii ɗee lanndaale :
Ko honɗun musiɓɓe worɓe ɓen faalaaɓe wonugol wallitotooɓe maa ardotooɓe habboraa ?
Ko honɗun ɓeynguureeji maɓɓe ɗin habboraa ? (Ndaaree aayeeje 4 e 11).
Si musiɓɓe worɓe ɓen wakkilike wonugol waawuɓe maruɓe sifaaji moƴƴi, ko honno ɗun nafirta moftal ngal ?
NO GASA WOƁƁE NO LANNDOO : « Ko honno Seedeeɓe Yahuwah ɓen heɓirta mbuuɗi fii golle maɓɓe ɗen ? »
Ko honno jaabortoɗon ?
RAWNOODE
Yahuwah Alla weltoto moƴƴa si en huutorii doole men ɗen, saa’i men on e jawle men ɗen fii wallitagol moftal ngal.
Ndartannde
Ko honno huutorten saa’i men on e doole men ɗen fii wallitagol moftal ngal ?
Ko honno huutorten jawle men ɗen fii wallitagol moftal ngal ?
Ko honno faalirteɗon wallitaade moftal ngal ?
TASKEE
Anndee fii honɗun Alla lanndotaako rewooɓe mo ɓen hannde fii sappaɓun.
« Ko honɗun Deftere Alla nden haali fii sappaɓun ? » (Winndannde ka jw.org)
Deftere Alla nden no okki worɓe lootaaɓe maande kisiyee ɓen golle ka moftal. Kono ko honɗun feƴƴata si tawii ko debbo lootaaɗo maande kisiyee haani waɗude ɗen golle ?
Faamugol honno moftal ngal ɗowirtee’ » (Suudu Aynirdu ndun, feeburuyee 2021)
Anndee fii Seedeeɓe Yahuwah wakkiliiɓe moƴƴa naɓangol musiɓɓe maɓɓe ɓen ka dewal saakite.
Anndee no golle amen ɗen yoɓirantee no sertiri e feddeeji diinaaji goo.
« Ko honno golle Seedeeɓe Yahuwah ɓen yoɓirantee ? » (Winndannde ka jw.org)