TOƁƁERE 47
Hiɗon hebilii lootegol maande kisiyee ?
Jannde mon Deftere Alla nden jannii on piiji buy fii Yahuwah Alla. No gasa on waylii jikkuuji mon goo fii weltingol Alla. Kono, taway no woodi huunde goo haɗaynde on okkugol Yahuwah Alla ngurndan mon ɗan e lootegol maande kisiyee. Ndee toɓɓere ɗoo yewtay fii satteendeeji ɗi yimɓe buy heɓunoo e fii no ɓe jittiri ɗi.
1. No haani ka anndon Deftere Alla nden fow ado yo on looteede maande kisiyee ?
Fii lootegol maande kisiyee hiɗon haani « anndu[de] goonga on » (1 Timotee 2:4). Ɗun firaa hiɗon haani jaabaade lanndaale ɗen fow ɗe yimɓe ɓen lanndotoo on fii Deftere Alla nden ado yo on looteede maande kisiyee. Hay almasiiyaaɓe lootaaɓe maande kisiyee gila ko neeɓi, no jokki janngugol Deftere Alla nden (Koloosi 1:9, 10). Kono hiɗon haani anndude janndeeji hittuɗi ka nder Deftere Alla. Ardotooɓe ɓen ka moftal wallay on anndugol si hiɗon anndi ɗii janndeeji.
2. Ko piiji honɗi haanuɗon waɗude ado yo on looteede maande kisiyee ?
Ado yo on looteede maande kisiyee hiɗon haani « tuubude, ruttoɗon » (janngee Kuuɗe sahaabaaɓe ɓen 3:19). Ɗun no firi hiɗon ninsi moƴƴa fii junuubaaji ɗi waɗuɗon ɗin e hiɗon lanndoo Yahuwah Alla yaafuyee. Hiɗon haani wikkaade fes kala jikku bonngu e felliton wuurirgol no Yahuwah Alla faaliraa non. E hoore ɗun, fuɗɗoɗon taweede ka pottite moftal e waajagol wa waajotooɗo mo lootaaka maande kisiyee.
3. Fii honɗun on haanaa accude kulol haɗa on looteede maande kisiyee ?
Woɓɓe hara no huli fii wota ɓe ronku waɗude ko ɓe fodi Yahuwah Alla kon. Tigi tigi on, wonnde on faljay. Hay worɓe e rewɓe sella-finndeeɓe yewtaaɓe fii mun ka Deftere Alla faljuno. Kono Yahuwah Alla habbotaako yo rewooɓe mo ɓen wonu yimɓe timmuɓe (janngee Zabuura 103:13, 14, VPFJ). O weltoto si on wakkilike waɗugol ko moƴƴi ! O wallay on. Tigi tigi on, Alla fodii en hay huunde waawataa en « sendude e giggol » makko ngol (janngee Roomu 8:38, 39).
LUGGINEE
Ndaaree no jittirton kala satteende haɗaynde on lootegol maande kisiyee e hoore anndugol Yahuwah Alla ko ɓuri nii e jaɓon ballal makko ngal.
4. Ɓeydee anndugol Yahuwah Alla
Ko haa honto haanuɗon anndude Yahuwah Alla ado yo on looteede maande kisiyee ? Hiɗon haani anndude mo moƴƴa fii no yiɗiron mo e faaleɗon weltingol mo. Fijinee VIDIO on fii anndugol no janngooɓe Deftere Alla nden e nder aduna on fow waɗiri ɗun. Ɓawto ɗun, yewton fii lanndaale jokkituɗe ɗen.
E nder vidio on, ko honɗun walli yimɓe goo hebilanagol lootegol maande kisiyee ?
Janngee Roomu 12:2 e yewton fii ɗee lanndaale :
Hiɗon sikkitii fii ko Deftere Alla nden woni jannude kon maa si Seedeeɓe Yahuwah ɓen no jannude goonga on ?
Si ko non, ko honɗun waɗoton ?
5. Jittee satteendeeji haɗayɗi on lootegol maande kisiyee
Si en suɓike okkugol Yahuwah Alla ngurndan men ɗan e lootegol maande kisiyee, en heɓay soono woo satteendeeji. Fii yi’ugol misal, fijinee VIDIO on e yewton fii lanndaale jokkituɗe ɗen.
Ko satteendeeji honɗi Narangerel haanunoo jittude fii rewugol Yahuwah Alla ?
Ko honno giggol makko fii Yahuwah Alla wallirnoo mo foolugol ɗii satteendeeji ?
Janngee Tindi 29:25 (VPFJ) e 2 Timotee 1:7 e yewton fii ngal lanndal :
Ko honɗun okkata en wakkilaare fii no fooliren satteendeeji men ɗin ?
6. Hooloree Yahuwah Alla
Yahuwah Alla wallay on waɗugol ko welata mo. Fijinee VIDIO on e yewton fii lanndaale jokkituɗe ɗen.
Ko honɗun haɗi janngoowo Deftere Alla nden looteede maande kisiyee ?
E nder ko o janngi kon, ko honɗun walli mo tiiɗingol hoolaare makko nden e Alla ?
Janngee Isaaya 41:10, 13 e yewton fii ngal lanndal :
Fii honɗun hiɗon waawi fellitude on hunnay fodoore mon nden si on okkii Yahuwah Alla ngurndan mon ɗan ?
7. Ɓeydee weltaare mon nden fii giggol Yahuwah Alla
Ko no miijorɗon fii giggol Yahuwah Alla ngol woo, ko non ɓurtirton hollugol weltaare mon nden e ko non kadi ɓurtirton faaleede rewugol mo haa poomaa. Janngee Zabuura 40:5 (VPFJ) e yewton fii ngal lanndal :
Ko baraaji Yahuwah Alla honɗi ɓurɗon yiɗude ?
Annabi Yeremiiya no yiɗunoo Yahuwah Alla e Daaluyee makko on e hari himo weltorii moƴƴa ngal teddungal wonugol rewoowo Yahuwah Alla. O wi’i : « Daaluyee maa on hebbinii ɓernde an nden weltaare, ko fii ko innde maa nden mi noddiraa, yaa an Yahuwah Alla » (Yeremiiya 15:16). Ɓawto ɗun yewtee fii ɗee lanndaale :
Fii honɗun wonugol Seedeejo Yahuwah ko teddungal hertiingal ?
Hiɗon faalaa looteede maande kisiyee wa Seedeejo Yahuwah ?
No woodi huunde haɗaynde on ?
E miijo mon, ko honɗun haanuɗon waɗude fii heɓugol faandaare lootegol maande kisiyee ?
WOƁƁE GOO NO WI’A : « Miɗo huli fii wota mi ronku waɗude ko mi fodi Yahuwah Alla kon fow si mi lootaama maande kisiyee. »
Ko ɗun miijiɗon onon kadi ?
RAWNOODE
Yahuwah Alla wallay on jittugol kala satteende haɗaynde on lootegol maande kisiyee.
Ndartannde
Ko honɗun haanuɗon anndude ka nder Deftere Alla ado yo on looteede maande kisiyee ?
No gasa ado yo on looteede maande kisiyee, ko honɗun haanuɗon waylude ?
Fii honɗun on haanaa accude kulol haɗa on looteede maande kisiyee ?
TASKEE
Ko honɗun wakkilinta on fewjugol fii lootegol maande kisiyee ?
« Hiɗon hebilii lootegol maande kisiyee ? » (Suudu Aynirdu ndun, marsi 2020)
Janngee fii no jittirton satteendeeji goo haɗayɗi on lootegol maande kisiyee.
« Ko piiji honɗi haɗata lan lootegol maande kisiyee ? » (Suudu Aynirdu ndun, marsi 2019)
Ndaaree no gorko jittiri satteendeeji hittuɗi goo fii yo o loote maande kisiyee.
Ka fuɗɗoode, gorko inneteeɗo Ataa huluno fewjugol fii lootegol maande kisiyee. Ndaaree ko walli mo laatingol ɗun.