TOƁƁERE 46
Fii honɗun hiɗon haani okkude Alla ngurndan mon ɗan e looteɗon maande kisiyee ?
Si on okkii Yahuwah Alla ngurndan mon ɗan, haray on fodii mo e nder toraare ko kanko tun reweton e on waɗay faale makko on ko adii kon e nder ngurndan mon ɗan (Zabuura 40:8 [40:9, VPFJ]). Ɓawto ɗun, on lootete maande kisiyee fii hollugol fow on okkii Alla ngurndan mon ɗan. Fewjoore okkugol Yahuwah Alla ngurndan mon ɗan ko huunde ɓurnde hittude ko waylata no wuurirton non. Ko honɗun wakkilinta on waɗugol ɗun ?
1. Ko honɗun wakkilinta goɗɗo okkugol Alla ngurndan makko ɗan ?
Ko giggol wakkilinta en okkugol Yahuwah Alla ngurndan mon ɗan (1 Yuuhanna 4:10, 19). Deftere Alla nden wi’i « yo a yiɗir Alla Joomiraaɗo maa on ɓernde maa nden fow e wonkii maa kin fow e hakkil maa kin fow e doole maa ɗen fow » (Markuusa 12:30). En hollay hiɗen yiɗi Alla hara wonaa e ko haaleten kon tun, kono e kuuɗe men ɗen kadi. Wano giggol tiiɗungol waɗata haa gorko e deɓɓo jommbindira, ko wano non kadi, giggol men fii Yahuwah Alla waɗata haa okken mo ngurndan mon ɗan e looteɗen maande kisiyee.
2. Ko baraaji honɗi Yahuwah Alla okkata Seedeeɓe makko lootiiɓe maande kisiyee ?
Si on lootaama maande kisiyee, on tawete e ɓeynguure Yahuwah Alla weltiinde nden. On annday giggol Alla ngol e ɓaŋŋe buy e on ɓurtay mo ɓadaade (janngee Malakii 3:16-18). Waɗugol Yahuwah Alla wa baaba mon wallay on heɓugol musiɓɓe yiɗuɓe Alla e yiɗuɓe on kadi e nder aduna on fow (janngee Markuusa 10:29, 30). Wano yiiruɗen non, no woodi ko haanuɗon waɗude ado yo on looteede maande kisiyee. Ko adii kon, hiɗon haani anndude Yahuwah Alla, yiɗon mo e gomɗinon Ɓiɗɗo makko on. Ɓawto ɗun, hiɗon haani okkude Yahuwah Alla ngurndan mon ɗan e nder toraare. Si on waɗii ɗun ɗoo fow e on lootaama maande kisiyee, ɗun hollay hiɗon e laawol nawrayngol e ngurndan poomaayankejan. Deftere Alla nden wi’i ko « lootagol maande kisiyee wonaɗon dandireede fewndo ɗoo » (1 Petruusu 3:21).
LUGGINEE
Ndaaree fii honɗun no hitti ka okkon Yahuwah Alla ngurndan mon ɗan e looteɗon maande kisiyee.
3. Mo kala no haani suɓaade mo o rewata
Ɓaawo ɗoo, Isra’iilayankeeɓe goo miijino ɓe waawayno rewude Yahuwah Alla e ɓe rewa kadi Baalu alla fenaande on. Kono Yahuwah Alla neluno Iiliiya, annabaajo makko on, fii wurtugol miijooji maɓɓe ɗin. Janngee 1 Lamɓe Isra’iila ɓen 18:21 e yewton fii ngal lanndal :
Ko honɗun Isra’iilayankeeɓe ɓen haanunoo suɓaade ?
Wano Isra’iilayankeeɓe ɓen, enen kadi hiɗen haani suɓaade ko hommbo reweten. Janngee Luuka 16:13 e yewton fii ɗee lanndaale :
Fii honɗun en haanaa rewude goɗɗo goo maa huunde goo sinaa Yahuwah Alla ?
Ko honno hollirten Yahuwah Alla en suɓike rewugol mo ?
4. Miijitee fii no Yahuwah Alla yiɗiri on non
Yahuwah Alla okkii en piiji kelɗuɗi buy. Ko honɗun waaweten mo okkude ? Fijinee VIDIO on.
Ko honno Yahuwah Alla holliri on giggol ? Janngee Zabuura 104:14, 15 (VPFJ) e 1 Yuuhanna 4:9, 10. Ɓawto ɗun, yewton fii ɗee lanndaale :
Ko dokke Yahuwah Alla honɗe ɓuruɗon yiɗude ?
Ko honno ɗee dokke wallirta on miijagol fii Yahuwah Alla ?
Si goɗɗo okkii en huunde nde yiɗuɗen tigi tigi, en faalete hollugol mo weltaare fii mun. Janngee Yaɲɲannde sariyaaji ɗin 16:17 e yewton fii ngal lanndal :
Si on miijike fii ko Yahuwah Alla waɗani on kon fow, ko honɗun faaleteɗon mo okkude ?
5. Okkugol Yahuwah Alla ngurndan mon ɗan adday baraaji buy
Yimɓe buy no miijoo ko darja, golle moƴƴe maa jawdi addanta ɓe weltaare. Haray ɗun ko goonga ? Fijinee VIDIO on e yewton fii lanndaale jokkituɗe ɗen.
Fii kala Andrey no yiɗunoo moƴƴa fijugol balon, fii honɗun o acciti ɗen golle moƴƴe ?
O fewjuno okkugol Yahuwah Alla ngurndan makko ɗan edii fijugol balon. E miijo mon, ko o fewjunoo kon ko ko moƴƴi ? Fii honɗun ?
Ado Puulusa wonude almasiiyaajo, o waawayno wonude aaden hittuɗo ka golle makko. Ko karamokoojo lolluɗo jannunoo mo sariya Yahuudiyankeeɓe ɓen. Kono o seluno ɗun fow fii wonugol almasiiyaajo. O ninsuno fii mun ? Janngee Filipii 3:8 e yewton fii ɗee lanndaale :
Fii honɗun Puulusa, ado o wonude almasiiyaajo, wi’i o jogori ko o waɗunoo kon fow « meere » maa « tuuɗe » ?
Ko honɗun o heɓi ɓawto ɗun ?
E miijo mon, ko honɗun ɓurata on okkude weltaare : ko rewugol Alla kaa ko waɗugol huunde nde faalaɗon e ngurndan mon ɗan ?
Ko Puulusa wonti almasiiyaajo, o heɓuno ɓuri ko o accunoo kon.
WOƁƁE GOO NO WI’A : « Miɗo anndi miɗo haani wuurirde no Deftere Alla nden haaliri non. Kono mi hebilaaki lootegol maande kisiyee. »
Ko honɗun miijiɗon ?
RAWNOODE
Ko giggol waɗata haa okken Yahuwah Alla ngurndan men ɗan e looteɗen maande kisiyee.
Ndartannde
Fii honɗun Yahuwah Alla no hanndi yiɗireede ɓernde men nden fow e dewal men ngal ?
Ko honno Yahuwah Alla barkinirta Seedeeɓe makko lootaade maande kisiyee ɓen ?
Hiɗon faalaa okkude Yahuwah Alla ngurndan mon ɗan ?
TASKEE
Ndaaree fii honɗun yimoowo e fijoowo balon suɓii okkugol Yahuwah Alla ngurndan maɓɓe ɗan.
Lanndaale sukaaɓe e jiwɓe : Ko honno mi huutorta ngurndan an ɗan ? — Maanditagol (6:54)
Miijee fii dalilji goo waɗayɗi haa okkon Yahuwah Alla ngurndan mon ɗan.
« Fii honɗun okkanton Yahuwah Alla ngurndan mon ɗan ? » (Suudu Aynirdu ndun, 15 sanwiye 2010)
E nder oo vidio ndaaree no ɓee okkuɓe Yahuwah Alla ngurndan maɓɓe ɗan weltori.
Ndaaree ko waɗi haa debbo miijii ko honɗun ɓurani mo hittude (e nder taariika on « Gila duuɓi buy mi lanndotono hoore an fii honɗun hiɗen ka hoore leydi. »)
« Deftere Alla nden no wayla ngurndan » (Suudu Aynirdu ndun, 1 noofaambur 2012)