TOƁERE 6

Tanƴinaare honnde maruɗen fii mayɓe ?

1. Kibaaru moƴƴo hommbo wonani fii mayɓe ?

Laazaaru no immintina, banndiraaɓe makko ɓen, Mariyatu e Mariama no jaɓɓaade mo

Ko annabi Iisaa wonunoo ka aduna, himo marunoo ɗimmoojo inneteeɗo Laazaaru hoɗunooɗo saare Betanii takko Yerusalaam. On ɗimmoojo makko ko o maayi, wonuno balɗe nay si annabi Iisaa hewti ton. O yaaduno e Mariyatu e Mariama ka gaburu Laazaaru. Ɓe hewti ton tun, jamaa on mooɓi. Annditee weltaare Mariyatu e Mariama ko annabi Iisaa immintinnoo Laazaaru ? — Janngee Yuuhanna 11:21-24, 38-44.

Hari Mariyatu no anndi Kibaaru moƴƴo on fii mayɓe ɓen. Himo annduno Yahuwah immintinoyay mayɓe ɓen ɓe wuurita e oo aduna. — Janngee Yuuhanna 11:24.

2. Ko honɗun heɓata en si en maayi ?

Ko baaba Aadama tagaa, e ko o maayi — Allah daalani Aadama : “ Ko a mbullaari, a yiltoto wontaa mbullaari. ” — FUƊƊOOƊE NDEN 3:19.

Tagaaɗo ko loopal (Fuɗɗoode nɗen 2:7 ; 3:19). En alaa ɓanndu wa malaa’ikaaɓe ɓen. Si en maayi en alaa ko wuurata e men. Hakkile men ɗen kadi maayay. Miijooji men, ngaɲaneendi men e yurmeende men fow hattay. Ko ɗun waɗi ko Laazaaru immintinaa, o wowlaali hay fus no mayɗo woniri ɓayri mo maayi anndataa hay huunde. — Janngee Waajotooɗo on 9:5, 6, 10, TMN.

Allah sonnjataa yimɓe e nder yiite jahannama si ɓe maayi. Wano Deftere Allah nden wi’iri non, mayɓe ɓen anndaa hay huunde. Allah yiɗaa inneede o tampinoyay yimɓe e nder yiite jahannama si ɓe maayi. — Janngee Yeremiiya 7:31, TMN.

Ndaaree vidio on Ko honɗun heɓata en si maayi ?

3. Mayɓe ɓen waaway en yewtude ?

Mayɓe ɓen wowlataa, ɓe nanataa (Zabuura 115:17, TMN). Kono, malaa’ikaaɓe bonɓe waylitoto e yimɓe maayuɓe fii ɗaynugol en (Yuudu 6). Yahuwah no haɗi haaludugol e mayɓe. — Janngee Galaasi 5:20.

4. Homɓe immintinoytee ?

Gorko immintinaaɗo ka Aljanna no janngude fii Allah. Gorko on no wallude non jooni, janna woɓɓe goo immintinaaɓe.

Yimɓe guluuji e guluuji maayuɓe immintinoyte e hoore ndii leydi. Hay ɓee ɓe anndaano Allah waɗaynooɓe ko boni immintinoyte. — Janngee Kuuɗe sahaabaaɓe ɓen 24:15.

Ɓee immintinoytee ɓe heɓoyay feere no ɓe rewira Allah no laaɓiri e no ɓe hollira gomɗinal maɓɓe e Iisaa, ɓe ɗoftoo mo (Feɲɲinannde 20:11-13). Ontuma, ɓee waɗoyay ɓe ko moƴƴi wuuroyay haa poomaa e hoore ndii leydi. — Janngee Yuuhanna 5:28, 29.

5. Honɗun ummutal ngal holli en fii Yahuwah ?

Allah okkii en tanƴinaare fii mayɓe ɓayri annabi Iisaa maayi fii men. Ko ɗun holli giggol makko fii men. Ko hommbo faalaɗon yi’ude ɲannde ummutal ngal ? — Janngee Yuuhanna 3:16 ; Roomu 6:23.

Si hiɗon faalaa ɓeydugol, on ndaaray toɓe 6, 7 e 10 nder ndee deftere Que nous enseigne la Bible ?