Comhairle Maidir le Creideamh, Iompar, Agus Grá

BA leathdheartháireacha le hÍosa iad Séamas agus Iúd. Bhí Peadar agus Eoin ar bheirt den 12 aspal a bhí ag Íosa. Scríobh an ceathrar seo seacht gcinn de na litreacha atá le fáil sna Scrioptúir Gréigise Críostaí. Sé ainm an té a scríobh í atá ar gach litir acu. Bhí sé i gceist go gcuirfeadh an chomhairle inspioráidithe ó Dhia atá le fáil sna litreacha seo ar chumas Chríostaithe fanacht dílis do Iehova agus a Ríocht a choinneáil os a gcomhair amach.

Léirigh creideamh. Ní leor a bheith ag maíomh go bhfuil creideamh againn. Déantar gníomh de bharr fíorchreideamh. “Tá an creideamh marbh gan dea-oibreacha,” a scríobh Séamas. (Séamas 2:26) Cruthaítear buanseasmhacht nuair a léirítear muinín i nDia agus duine faoi thriail. Le go n-éireoidh leis, ní mór do Chríostaí eagna a iarraidh ar Dhia, agus é lánchinnte go dtabharfaidh Dia dó é. Bíonn Dia sásta linn nuair a léiríonn muid buanseasmhacht. (Séamas 1:2-6, 12) Má bhíonn Críostaí ionraic de bharr a chreideamh, tabharfaidh Dia aird air. “Druidigí i gcóngar Dé” a deir Séamas, “agus druidfidh Dia in bhur gcóngarsa.”—Séamas 4:8.

Ní mór do chreideamh an Chríostaí a bheith chomh láidir is go gcuireann sé ar a chumas diúltú do chathú agus do thionchair mhímhorálta. Is é an timpeallacht mhímhorálta a bhí ann ag an am, a spreag Iúd le himpí ar Chríostaithe “troid go dian ar son an chreidimh.”—Iúd 3.

Iompar glan. Éilíonn Iehova naofacht orthu siúd a adhrann é, sé sin, go mbeidís glan ar gach bealach. Scríobhann Peadar: “Bígí-se naofa in bhur n-iompar go léir, mar tá scríofa: ‘Bígí naofa mar go bhfuilimse [Iehova] naofa.’” (1 Peadar 1:15, 16) Tá dea-shampla ag Críostaithe ar fiú aithris a dhéanamh air. Deir Peadar: “Mar gur fhulaing Críost féin ar bhur son, agus gur fhág sé sampla agaibh le go leanfadh sibh a lorg.” (1 Peadar 2:21) Cé gur féidir le Críostaithe fulaingt de bharr dlíthe Dé a leanúint, déanann siad é “le coinsias glan.” (1 Peadar 3:16, 17) Molann Peadar do Chríostaithe a bheith ag cur thar maoil le hiompar naofa agus le gníomhartha cráifeachta agus iad ag fanacht le lá bhreithiúnas Dé agus “le domhan nua mar a lonnóidh an fhíréantacht.”—2 Peadar 3:11-13.

Taispeáin grá. “Is é Dia an Grá,” a scríobh Eoin. Insíonn an t-aspal dúinn gur léirigh Dia a mhórghrá trí Íosa a chur chugainn mar “íobairt sásaimh ar ár bpeacaí.” Cén freagra is ceart do Chríostaithe a thabhairt ar sin? Míníonn Eoin: “A chairde cléibh, ós fíor gur thug Dia grá dúinne nach mithid dúinne grá a thabhairt dá chéile.” (1 Eoin 4:8-11) Bealach amháin chun an grá seo a thaispeáint ná caitheamh go flaithiúil lenár gcomhadhraitheoirí.—3 Eoin 5-8.

Cén chaoi ar féidir le hadhraitheoirí Iehova a ngrá a léiriú dó? Freagraíonn Eoin: “Mar gurb é seo grá Dé, comhlíonadh a aitheanta; agus ní tromualach a aitheanta.” (1 Eoin 5:3; 2 Eoin 6) Geallann Dia go leanfaidh sé ag tabhairt grá dóibh siúd atá umhal dó agus treoróidh sé “chun na beatha síoraí” iad.—Iúd 21.

—Bunaithe ar Séamas; 1Peadar; 2 Peadar; 1 Eoin; 2 Eoin; 3 Eoin; Iúd.