November

Mɛi ni sɔmɔɔ Yehowa lɛ yɛ hiɛnɔkamɔ akɛ wɔsɛɛ lɛ, amɛbaahi shi kɛya naanɔ, ni amɛnine baashɛ nibii krokomɛi fɛɛ ni ŋmɛɛ Adam kɛ Hawa lɛ anɔ. Suɔmɔ ni Adam kɛ Hawa yɔɔ kɛhã Yehowa lɛ mli waaa, ni no hewɔ amɛkpɛ amɛyiŋ akɛ amɛsɔmɔŋ lɛ lɛ. Kɛ̃lɛ, Yehowa kpãtãaa amɛhiɛ amrɔ nɔŋŋ. Moŋ lɛ, ehã amɛhi shi, amɛfɔ, ni amɛ diɛŋtsɛ amɛkpɛ amɛyiŋ yɛ bɔ ni amɛbaatsɔse amɛbii lɛ amɛhã lɛ he. Adam kɛ Hawa tse amɛhe kɛje Yehowa he, ni nɔ ni jɛ mli kɛba lɛ hãa wɔnaa faŋŋ akɛ, nilee bɛ nɔ ni amɛfee lɛ mli. Amɛbinuu onukpa lɛ gbe enyɛmi nuu fioo lɛ, tsɛ efeko lɛ nɔ ko. Sɛɛ mli lɛ, awuiyeli bahe shi yɛ adesai ateŋ, ni mɛi pii fee nɔ ni amɛsumɔɔ ni amɛsusuuu mɛi krokomɛi ahe. (1 Mo. 4:8; 6:11-13) Shi Yehowa to gbɛjianɔ koni ehere adesai fɛɛ ni miisumɔ ni amɛsɔmɔ lɛ lɛ ayiwala. (Yoh. 6:38-40, 57) Yehowa etsɔɔ akɛ etoɔ etsui shi waa ni esumɔɔ wɔ. Kɛ́ otee nɔ okase esui kpakpai nɛɛ ahe nii lɛ, ekã shi faŋŋ akɛ obaasumɔ lɛ waa. Suɔmɔ nɛɛ baatsirɛ bo ni okwa gbɛ fɔŋ ni Adam kɛ Hawa kɔ lɛ, ni ojɔɔ ohe nɔ ohã Yehowa. w19.03 2 kk. 3; 4 kk. 9

Mɛni baaye abua wɔ ni wɔnu he wɔhã mɛi krokomɛi? Kɛ́ oweku lɛ mli bii loo onyɛmimɛi Kristofoi lɛ kɛ shihilɛ ko ni wa miikpe lɛ, bɔɔ mɔdɛŋ ni okɛ ohe awo amɛshihilɛ lɛ mli. Feemɔ nibii ni baahã oblahii kɛ oblayei, mɛi ni bɛ hewalɛ, hiimeji kɛ yeimeji, kɛ mɛi ni agboi yɛ amɛnɔ ni yɔɔ osafo lɛ mli lɛ ana akɛ osusuɔ amɛhe. Bi amɛ bɔ ni nibii yaa lɛ ehãa. Ni kɛ́ amɛmiikɛɛ bo lɛ, bo amɛ toi jogbaŋŋ. Hã amɛna akɛ onuɔ amɛ shishi, ni ole akɛ amɛnáaa shihilɛ lɛ mlɛo. Feemɔ nɔ ni obaanyɛ kɛye obua amɛ. Kɛ́ ofee nibii nɛɛ lɛ, no baatsɔɔ akɛ osumɔɔ amɛ lɛɛlɛŋ. (1 Yoh. 3:18) Esa akɛ wɔhã ehi wɔjwɛŋmɔ mli akɛ, mɔ fɛɛ mɔ kɛ nɔ ni wɔbaanyɛ wɔfee kɛye wɔbua lɛ. Mɛni hewɔ? Ejaakɛ esoro mɔ fɛɛ mɔ kɛ bɔ ni efeɔ enii ehãa kɛ́ ekɛ shihilɛ ko ni wa miikpe. Mɛi komɛi yɛ ni kɛ́ amɛkɛ naagbai miikpe lɛ, amɛsumɔɔ ni amɛkɛ mɛi agba he sane, shi mɛi komɛi hu efeee nakai. No hewɔ lɛ, eyɛ mli akɛ wɔmiisumɔ ni wɔye wɔbua amɛ moŋ, shi esa akɛ wɔkwɛ jogbaŋŋ ni wɔkakoli amɛsaji amli. (1 Tes. 4:11) Ekolɛ jeee nɔ fɛɛ nɔ ni amɛbaawie lɛ ni wɔkɛ amɛ baakpã gbee yɛ he, shi esaaa akɛ wɔwieɔ wɔshiɔ amɛ. Bɔ ni amɛnuɔ he yɛ sane lɛ he lɛ amɛgbaa wɔ lɛ. Esa akɛ wɔhe afee oya kɛ sane toiboo, ni wɔkaye wɔhe oyai wɔwie.​—Mat. 7:1; Yak. 1:19. w19.03 18-19 kk. 18-19

Ani otsui fãa kɛ́ obaawie anɔkwale lɛ he yɛ mɛi ateŋ? Kɛ́ nakai lɛ, susumɔ Nehemia he okwɛ. Nehemia sɔmɔ yɛ maŋtsɛ ko ni yɔɔ hewalɛ waa lɛ shĩa. Be ko lɛ, enu akɛ akumɔ Yerusalem gbogboi lɛ, ni akɛ la eshã egbói lɛ hu. Enɛ hã eye awerɛho. (Neh. 1:1-4) Maŋtsɛ lɛ na akɛ ebɛ miishɛɛ, no hewɔ lɛ, ebi lɛ nɔ hewɔ ni ewerɛ eho ehe nakai lɛ. Nehemia tsui fã waa! Shi esɔle ehã Yehowa amrɔ nɔŋŋ ni ehã maŋtsɛ lɛ hetoo. Nɔ ni ekɛɛ lɛ tsirɛ maŋtsɛ lɛ ni eye ebua Nyɔŋmɔ webii lɛ waa. (Neh. 2:1-8) Mɔ kroko hu ji Yona. Be ni Yehowa kɛɛ lɛ akɛ eyashiɛ ehã Ninivebii lɛ, etsui fã aahu akɛ ejo foi kɛtee he kroko kwraa. (Yona 1:1-3) Shi Yehowa ye ebua Yona ni enyɛ etsu nitsumɔ ni ekɛwo edɛŋ lɛ. Ni Ninivebii lɛ ná enɛ he sɛɛ waa. (Yona 3:5-10) Nehemia sane lɛ hãa wɔnaa akɛ, ehe miihia ni wɔsɔle dani wɔhã hetoo. Ni Yona sane lɛ hu hãa wɔnaa akɛ kɛ́ wɔsheɔ gbeyei waa po lɛ, Yehowa baanyɛ aye abua wɔ ni wɔnyɛ wɔsɔmɔ lɛ. w19.01 11 kk. 12

Kɛ́ wɔkɛ nibii ni wɔkase yɛ Biblia lɛ mli lɛ bɔi nitsumɔ yɛ wɔshihilɛ mli lɛ, ekolɛ wɔwekumɛi kɛ wɔnanemɛi kɛ wɔ ehiŋ shi jogbaŋŋ tamɔ tsutsu ko. Mɛni hewɔ? Yesu tsɔɔ nɔ hewɔ lɛ yɛ sɔlemɔ ko ni esɔle ehã esɛɛnyiɛlɔi lɛ mli. Ewie akɛ: “Okɛ anɔkwale lɛ afee amɛ krɔŋkrɔŋ; owiemɔ lɛ anɔkwale ni.” (Yoh. 17:17; shn.) Abaanyɛ atsɔɔ kuku nɛɛ shishi hu akɛ, “Okɛ anɔkwale lɛ ajie amɛ ato afã.” Kɛ́ wɔkɛ nibii ni wɔkase yɛ Biblia lɛ mli lɛ bɔi nitsumɔ yɛ wɔshihilɛ mli lɛ, ehãa esoroɔ wɔ kwraa yɛ mɛi ni yɔɔ je lɛ mli lɛ ahe, ejaakɛ esoro gbɛtsɔɔmɔi ni wɔkɛtsuɔ nii yɛ shihilɛ mli lɛ yɛ nɔ ni amɛkɛtsuɔ nii lɛ ahe. Ebafeɔ tamɔ nɔ ni ajie wɔ ato afã. Enɛ hewɔ lɛ, yɛ mɔdɛŋ fɛɛ ni wɔbɔɔ koni wɔ kɛ wɔnanemɛi kɛ wɔwekumɛi lɛ ateŋ akafite lɛ fɛɛ sɛɛ lɛ, amɛteŋ mɛi komɛi tseee amɛhiɛ amɛhãaa wɔ tamɔ tsutsu ko, ni amɛwieɔ amɛshiɔ wɔhemɔkɛyeli lɛ. Shi enɛ efeee wɔ naakpɛɛ, ejaakɛ Yesu wie akɛ: “Anɔkwa, mɔ diɛŋtsɛ shĩabii baatsɔmɔ ehenyɛlɔi.” (Mat. 10:36) Kɛ̃lɛ, ewie hu akɛ ekɔɔɔ he eko nɔ ni wɔkɛbaashã afɔle yɛ anɔkwale lɛ hewɔ lɛ, wɔbaaná nɔ ni fe nakai toi abɔ! w18.11 6 kk. 11

Bɔfo Paulo hu hiɛ sɔ enyɛmimɛi Kristofoi lɛ, ni wɔnaa enɛ yɛ nibii ni ewie yɛ amɛhe lɛ amli. Ewie akɛ, be fɛɛ be ni ebaasɔle lɛ, edaa Nyɔŋmɔ shi yɛ amɛhewɔ. Nibii ni ewie yɛ woji ni eŋmala eyahã amɛ lɛ amli hu hãa wɔnaa akɛ ehiɛ sɔ amɛ. Akɛ nɔkwɛmɔnɔ lɛ, yɛ Romabii 16:1-15 lɛ, Paulo tsĩ enyɛmimɛi Kristofoi 27 sɔŋŋ agbɛ́i atã. Mɛi nɛɛ ateŋ mɛi komɛi ji Priska kɛ Akwila. Paulo wie akɛ, nyɛmi yoo nɛɛ kɛ ewu lɛ “kɛ amɛwala wo oshãra mli” yɛ ehewɔ. Agbɛnɛ hu, etsĩ Foibe tã ni ewie yɛ ehe akɛ, “eye ebua mɛi pii,” ni lɛ Paulo lɛ hu fata he. Paulo sumɔ nyɛmimɛi ni yɔɔ Roma lɛ, ni ejie amɛyi yɛ bɔ ni amɛtsuɔ nii waa lɛ hewɔ. Paulo le akɛ enyɛmimɛi ni yɔɔ Roma lɛ yeee emuu, shi ewieee amɛfatɔi ahe, moŋ lɛ, ewie sui kpakpai ni amɛyɔɔ lɛ ahe. Kɛ́ okwɛ lɛ, te nyɛmimɛi ni Paulo tsĩ amɛgbɛ́i atã lɛ nu he amɛhã tɛŋŋ be ni akane Paulo wolo lɛ ahã asafo muu lɛ fɛɛ lɛ? Ŋwanejee ko bɛ he akɛ, eta amɛtsuiŋ waa ni ehã naanyobɔɔ ni yɔɔ amɛ kɛ Paulo teŋ lɛ mli bawa waa. Ani ofɔɔ nyɛmimɛi ni yɔɔ osafo lɛ mli lɛ ayijiemɔ yɛ nibii kpakpai ni amɛfeɔ kɛ hewalɛwoo wiemɔi ni amɛwieɔ lɛ ahewɔ? w19.02 16 kk. 8-9

Akɛni wɔyeee emuu ni wɔtɔ̃ɔ be fɛɛ be hewɔ lɛ, ekolɛ wɔbaanu he akɛ wɔnyɛŋ wɔye Yehowa anɔkwa. Shi ani ja wɔye emuu dani wɔbaanyɛ wɔye Yehowa anɔkwa? Dabi. Yehowa kɛ ejwɛŋmɔ emaaa wɔtɔmɔi anɔ. Biblia lɛ kɛɔ akɛ: “Ao Yah, eji okwɛɔ tɔmɔi kulɛ, Ao Yehowa, namɔ baanyɛ shi adamɔ?” (Lala 130:3) Yehowa le akɛ wɔtɔ̃ɔ, ejaakɛ wɔyeee emuu, ni no hewɔ lɛ, ejɛɔ etsuiŋ ekɛ wɔhe eshai keɔ wɔ. (Lala 86:5) Agbɛnɛ hu, Yehowa le nɔ ni wɔbaanyɛ wɔfee kɛ nɔ ni wɔnyɛŋ wɔfee. No hewɔ lɛ, ekɛŋ wɔ ni wɔfee nɔ ko ni lɛ diɛŋtsɛ ele akɛ wɔnyɛŋ wɔfee. (Lala 103:12-14) Suɔmɔ ji nɔ titri ni baaye abua wɔ ni wɔye Yehowa anɔkwa be fɛɛ be. Be fɛɛ be lɛ, esa akɛ wɔsumɔ wɔ-Tsɛ ni yɔɔ ŋwɛi lɛ kɛ wɔtsui muu fɛɛ, ni wɔkɛ wɔhe fɛɛ ahã lɛ. No ji, esaaa akɛ shi ko kwraa baa wɔsuɔmɔ lɛ he. Kɛ́ wɔkɛ kai kpe, shi fɛɛ sɛɛ lɛ, wɔtee nɔ wɔsumɔ Nyɔŋmɔ kɛ wɔtsui muu fɛɛ lɛ, belɛ wɔmiiye lɛ anɔkwa ji no. (1 Kro. 28:9; Mat. 22:37) Wɔmiisumɔ ni wɔfee wɔ-Tsɛ ni yɔɔ ŋwɛi lɛ suɔmɔnaa nii ni wɔhi shi yɛ etaomɔ nii ni ja lɛ anaa. Wɔsusuɔ nɔ ni Yehowa miisumɔ ni wɔfee lɛ he dani wɔkpɛɔ wɔyiŋ yɛ saji ahe, ejaakɛ wɔsumɔɔ lɛ. Wɔkɛ wɔnifeemɔ tsɔɔ akɛ, wɔyeɔ Yehowa anɔkwa. w19.02 3 kk. 4-5

Kɛ́ wɔfee nɔ ni ja lɛ, wɔnáa he sɛɛ be fɛɛ be, ni no hãa wɔhemɔkɛyeli lɛ mli waa. (Yak. 1:2, 3) Kɛ́ wɔfee nɔ ni ja lɛ, wɔmii shɛɔ wɔhe, ejaakɛ wɔhãa Yehowa náa wɔhe miishɛɛ ni ebuɔ wɔ efataa ebii lɛ ahe, ni agbɛnɛ hu, shwelɛ ni wɔyɔɔ akɛ wɔfee nɔ ni sa ehiɛ lɛ mli waa. (Abɛi 27:11) No hewɔ lɛ, wɔnaa kaa fɛɛ kaa ni wɔkɛbaakpe lɛ akɛ hegbɛ ni wɔná ni wɔkɛbaatsɔɔ akɛ wɔsɔmɔɔɔ wɔ-Tsɛ ni susuɔ wɔhe lɛ kɛ tsui ni mli eja enyɔ. (Lala 119:113) Moŋ lɛ, wɔhãa anaa akɛ wɔsumɔɔ lɛ kɛ wɔtsui fɛɛ, ni wɔtswa wɔfai shi akɛ wɔbaabo ekitãi lɛ toi ni wɔfee esuɔmɔnaa nii. (1 Maŋ. 8:61) Wɔyeee emuu ni no hewɔ lɛ wɔbaanyɛ wɔtɔ̃. Kɛ́ wɔtɔ̃ lɛ, esa akɛ wɔkai Maŋtsɛ Hezekia nɔkwɛmɔnɔ lɛ. Lɛ hu etɔ̃, shi etsake etsui ni etee nɔ esɔmɔ Yehowa kɛ ‘etsui muu fɛɛ.’ (Yes. 38:3-6; 2 Kro. 29:1, 2; 32:25, 26) Nyɛhãa wɔfea nɔ fɛɛ nɔ ni wɔbaanyɛ kɛtsĩ Satan gbɛ koni ekafite wɔjwɛŋmɔ. Nyɛhãa wɔsɔlea wɔhãa Yehowa koni ehã wɔ “toiboo tsui,” ni wɔnyɛ wɔye lɛ anɔkwa daa.​—1 Maŋ. 3:9; Lala 139:23, 24. w19.01 18-19 kk. 17-18

Kɛ́ wɔhã saji ahetoo yɛ asafoŋ kpeei ashishi lɛ, wɔ diɛŋtsɛ wɔnáa he sɛɛ. (Yes. 48:17) Yɛ mɛɛ gbɛ nɔ? Klɛŋklɛŋ lɛ, kɛ́ wɔkpɛ wɔyiŋ akɛ wɔbaahã sane hetoo lɛ, wɔbaasaa wɔhe jogbaŋŋ kɛhã asafoŋ kpee lɛ. Ni kɛ́ wɔsaa wɔhe jogbaŋŋ nakai lɛ, wɔbaanu Nyɔŋmɔ Wiemɔ lɛ shishi jogbaŋŋ. Ni kɛ́ wɔnu Nyɔŋmɔ Wiemɔ lɛ shishi jogbaŋŋ lɛ, wɔkɛbaatsu nii jogbaŋŋ yɛ wɔshihilɛ mli. Nɔ ni ji enyɔ lɛ, akɛni wɔkɛ wɔhe wo nikasemɔ lɛ mli hewɔ lɛ, ekã shi faŋŋ akɛ wɔbaaná miishɛɛ waa. Nɔ ni ji etɛ lɛ, akɛni sane hetoohamɔ kãaa shi akɔɔɔ hewɔ lɛ, kɛ́ wɔmia wɔhiɛ wɔhã eko lɛ, ekã shi faŋŋ akɛ, ebaatsɛ waa dani wɔhiɛ baakpa nɔ ni wɔwie lɛ nɔ. Agbɛnɛ hu, ehãa Yehowa náa miishɛɛ. Wɔle akɛ Yehowa boɔ wɔ toi, ni ehiɛ sɔɔ mɔdɛŋ ni wɔbɔɔ koni wɔhã saji ahetoo yɛ asafoŋ kpeei ashishi lɛ waa. (Mal. 3:16) Mɛni efeɔ kɛtsɔɔ akɛ ehiɛ sɔɔ mɔdɛŋ ni wɔbɔɔ lɛ? Ejɔɔ wɔ. (Mal. 3:10) Eyɛ faŋŋ akɛ, wɔyɛ yiŋtoi kpakpai pii ahewɔ ni esa akɛ wɔhã saji ahetoo yɛ asafoŋ kpeei ashishi. w19.01 8 kk. 3; 10 kk. 7-9

Yehowa hiɛ kã shi waa, ni wɔnaa enɛ yɛ bɔ ni ekɛ wɔ yeɔ ehãa lɛ mli. Yɛ nɔ najiaŋ ni ebaato mlai babaoo eshwie wɔnɔ akɛ wɔye nɔ lɛ, eto etsui shi eetsɔɔ wɔ bɔ ni wɔbaafee wɔye suɔmɔ mla lɛ nɔ. Eetsɔse wɔ ni wɔhi shi yɛ eshishitoo mlai lɛ anaa ni wɔhi efɔŋ. Wɔnaa enɛ he nɔkwɛmɔnɔ yɛ Yesu Gɔŋ Nɔ Shiɛmɔ lɛ mli. Yɛ shiɛmɔ nɛɛ mli lɛ, Yesu tsɔɔ wɔ nɔ hewɔ ni mɛi feɔ nibii gbohii. (Mat. 5:27, 28) Yɛ jeŋ hee lɛ mli lɛ, Yesu, Nyɔŋmɔ Maŋtsɛyeli lɛ nɔ Maŋtsɛ lɛ, baaya nɔ atsɔɔ wɔ nii koni wɔbatsɔmɔ tamɔ lɛ ni wɔsumɔ ekpakpa ni wɔhi efɔŋ. (Heb. 1:9) Agbɛnɛ hu, ebaahã wɔgbɔmɔtsei kɛ wɔjwɛŋmɔ aye emuu. Nakai beiaŋ lɛ, wɔbaaná miishɛɛ waa, ejaakɛ wɔnuŋ he akɛ wɔyafee nɔ ko gbonyo, ni naagbai ni wɔnáa ŋmɛnɛ akɛni wɔyeee emuu lɛ hewɔ lɛ fɛɛ sɛɛ baafo. Hɛɛ, wɔbaaná “anunyam heyeli” ni Yehowa ewo he shi lɛ. (Rom. 8:21) Shi no hu etsɔɔɔ akɛ yɛ jeŋ hee lɛ mli lɛ, wɔbaafee nɔ fɛɛ nɔ ni wɔsumɔɔ kɛkɛ. Kɛ́ wɔkase Nyɔŋmɔ ni wɔhã suɔmɔ kudɔ wɔ lɛ, no dani wɔbaanyɛ wɔwie akɛ wɔye wɔhe lɛɛlɛŋ.​—1 Yoh. 4:7, 8. w18.12 23 kk. 19-20

Mla lɛ ŋmɛ gbɛ ni Israelbii lɛ ashwie amɛŋamɛi kɛji amɛna “hiɛgbejianii ko” yɛ amɛhe. Mla lɛ etsɔɔɔ nɔ ni “hiɛgbejianii” nɛɛ ji. Shi ekã shi faŋŋ akɛ, ebaafee nɔ ko ni yɔɔ hiɛgbele waa loo tɔmɔ ko ni yɔɔ hiɛdɔɔ waa, jeee tɔmɔ bibioo ko kɛkɛ. (5 Mo. 23:14) Dɔlɛ sane ji akɛ, be ni shɛɔ Yesu beiaŋ lɛ, Yudafoi pii ‘miishwie amɛŋamɛi yɛ sane fɛɛ sane hewɔ.’ (Mat. 19:3) Wɔsumɔŋ wɔkɔ amɛnane kɔkɔɔkɔ! Yɛ gbalɔ Maleaki beiaŋ lɛ, nɔ ni mɛi komɛi feɔ nɛ: amɛshwieɔ amɛŋamɛi ni amɛkɛ amɛ ehi shi kɛjɛ amɛblahiiaŋ lɛ koni amɛkɛ oblayei ni ekolɛ amɛjáaa Yehowa po lɛ ahi shi. Shi Nyɔŋmɔ tsɔ Maleaki nɔ ehã ana bɔ ni enuɔ he ehãa yɛ gbalatsemɔ he. Ewie akɛ: “Minyɛɔ gbalatsemɔ.” (Mal. 2:14-16) Nɔ ni ewie nɛɛ kɛ nɔ ni ewie yɛ klɛŋklɛŋ gbalashihilɛ lɛ he lɛ kpãa gbee. Ewie akɛ nuu baakpɛtɛ eŋa he, “ni amɛbaatsɔ heloo kome.” (1 Mo. 2:24) Nɔ ni Yesu wie lɛ, akɛ “nɔ ni Nyɔŋmɔ kɛtsa lɛ, gbɔmɔ ko akagbála mli” lɛ, hãa wɔnaa akɛ efiɔ nɔ ni e-Tsɛ lɛ ewie yɛ gbalashihilɛ he lɛ sɛɛ.​—Mat. 19:6. w18.12 11 kk. 7-8

Nyɛmimɛi komɛi ashihilɛi ŋmɛɔ amɛ gbɛ koni amɛyasɔmɔ yɛ shɔŋŋ. Su ni amɛjieɔ lɛ kpo lɛ tamɔ su ni gbalɔ Yesaia jie lɛ kpo be ni Yehowa bi akɛ, “Namɔ matsu, ni namɔ baaya ahã wɔ?” lɛ. Ehã hetoo akɛ: “Naa mi! Tsu mi!” (Yes. 6:8) Ani obaasumɔ ni oye obua Yehowa asafo lɛ? Ani oshihilɛ baaŋmɛ bo gbɛ ni ofee nakai? Yesu wie yɛ shiɛmɔ kɛ kaselɔfeemɔ nitsumɔ lɛ he akɛ: “Nyɛkpaa nikpamɔ Nuŋtsɔ lɛ fai koni etsu nitsulɔi kɛba enikpamɔ lɛ mli.” (Mat. 9:38) Ani obaanyɛ osɔmɔ akɛ gbɛgbalɔ yɛ he ko ni hiamɔ lɛ da yɛ? Ani obaanyɛ oye obua mɔ ko ni efee nakai? Nyɛmimɛi babaoo nuɔ he akɛ gbɛ ni hi fe fɛɛ ni amɛbaanyɛ amɛtsɔ nɔ amɛtsɔɔ akɛ amɛsumɔɔ Nyɔŋmɔ kɛ amɛnyɛmi gbɔmɔ ji, ni amɛbaayasɔmɔ akɛ gbɛgbalɔi yɛ hei ni shiɛlɔi ahe miihia waa yɛ. Ani obaanyɛ osusu gbɛi krokomɛi ni obaanyɛ otsɔ nɔ otsu babaoo yɛ Yehowa sɔɔmɔ lɛ mli lɛ ahe? Kɛ́ otsu babaoo yɛ Yehowa sɔɔmɔ lɛ mli lɛ, obaaná miishɛɛ waa. w18.08 27 kk. 14-15

Nyɛhãa wɔsusua nɔ ni Biblia lɛ kɛɔ wɔ yɛ Yesu fɔmɔ lɛ he lɛ he, ejaakɛ ehãa wɔnaa bɔ ni Yehowa naa heloonaa nibii ehãa. Nyɔŋmɔ diɛŋtsɛ hala Yosef kɛ Maria akɛ Yesu fɔlɔi, eyɛ mli akɛ amɛbɛ nɔ ko tsɔ. (3 Mo. 12:8; Luka 2:24) Be ni afɔ Yesu lɛ, Maria kɛ lɛ “fɔ̃ nɔ ni kooloi yeɔ nii yɛ mli lɛ mli, ejaakɛ amɛnáaa tsũ yɛ gbɔiatoohe lɛ.” (Luka 2:7) Eji Yehowa miisumɔ ni afɔ e-Bi lɛ yɛ he ko ni yɔɔ nyam kwraa fe he ni afɔ lɛ yɛ nɛɛ kulɛ, ebaanyɛ efee aahu. Shi jeee he ni abaafɔ Yesu yɛ lɛ ji nɔ titri ni he hiaa Yehowa. Nɔ moŋ ni he hiaa lɛ titri ji, ni abaafɔ e-Bi lɛ awo weku ko ni hiɛ dɔɔ anɔkwa jamɔ he lɛ mli. Sane nɛɛ hãa wɔnaa bɔ ni Yehowa naa heloonaa nibii ehãa. Fɔlɔi komɛi yɛ ni ogbɔjɔ shihilɛ ni amɛtaoɔ amɛbii lɛ aná lɛ he miihia amɛ aahu akɛ, amɛnyɛɔ amɛbii lɛ anɔ ni amɛtiu heloonaa nibii asɛɛ, kɛ́ no baasa wekukpaa ni yɔɔ amɛbii lɛ kɛ Yehowa teŋ lɛ he po. Shi tamɔ bɔ ni wɔna lɛ, nɔ ni he hiaa Yehowa fe fɛɛ ji, ni wekukpaa kpakpa baahi wɔ kɛ lɛ teŋ. Ani bo hu onaa lɛ nakai? Ni ani anaa enɛ yɛ onifeemɔi amli? w18.11 24 kk. 7-8

Yehowa miisumɔ ni wɔmii ashɛ wɔhe, ejaakɛ miishɛɛ lɛ, edɛŋ nikeenii ni. Anɔkwa, efee nibii pii ehã wɔ koni wɔná miishɛɛ. (5 Mo. 12:7; Jaj. 3:12, 13) Shi ŋmɛnɛ lɛ, bɔ ni je lɛŋ shihilɛ efee lɛ hewɔ lɛ, nibii pii baanyɛ afite miishɛɛ ni wɔyɔɔ lɛ. Mɛni ji nibii nɛɛ ekomɛi? Kɛ́ wɔwekunyo loo wɔnaanyo ko gbo loo ashwie lɛ kɛje asafo lɛ mli, wɔgbãla fite, wɔnitsumɔ je wɔdɛŋ, loo wɔkɛ naagba kroko ko ni mli wa kpe lɛ, ebaanyɛ ehã wɔmiishɛɛ fɛɛ atã. Agbɛnɛ hu, kɛ́ toiŋjɔlɛ bɛ wɔweku lɛ mli akɛni daa nɛɛ wɔmiibé hewɔ lɛ, no hu baanyɛ afite wɔmiishɛɛ. Kɛfata he lɛ, ebaanyɛ ewa waa akɛ wɔbaaná miishɛɛ kɛ́ wɔnanemɛi nitsulɔi loo wɔnanemɛi skulbii ye wɔhe fɛo, mɛi wa wɔ yi, loo awo wɔ tsuŋ yɛ Yehowa Odasefoi ni wɔji lɛ hewɔ. Nakai nɔŋŋ kɛ́ wɔgbɔmɔtsoŋ hewalɛ miiba shi, ekolɛ yɛ gbɔlɛ hewɔ, wɔmiiye hela ko ni ehiii tsamɔ, loo daa nɛɛ wɔnuɔ he akɛ wɔhe ehiaaa ni wɔhe bɛ sɛɛnamɔ ko kwraa lɛ, no hu baanyɛ ahã ewa kɛhã wɔ akɛ wɔbaaná miishɛɛ. Shi esaaa akɛ wɔhiɛ kpaa nɔ akɛ, Yesu Kristo, ni ji “Nɔyelɔ kome pɛ ni yɔɔ hewalɛ waa ni yɔɔ miishɛɛ lɛ,” jɛ etsuiŋ eshɛje mɛi amii ni ehã amɛná miishɛɛ. (1 Tim. 6:15; Mat. 11:28-30) Yɛ e-Gɔŋ Nɔ Shiɛmɔ lɛ mli lɛ, etsɔɔ sui komɛi ni baanyɛ ahã wɔná miishɛɛ ekɔɔɔ he eko naagbai ni wɔkɛkpeɔ yɛ Satan je lɛ mli. w18.09 17-18 kk. 1-3

Kusumii kɛ nifeemɔi ni esaaa Nyɔŋmɔ hiɛ lɛ ji nibii ni ewa waa kɛhã mɛi akɛ amɛkɛ baashã afɔle yɛ anɔkwale lɛ hewɔ lɛ ateŋ ekome. (Abɛi 23:23) Mɛi komɛi yɛ ni kɛ́ amɛna kɛjɛ Ŋmalɛ lɛ mli akɛ kusum ko loo nifeemɔ ko ni amɛkɛ amɛhe woɔ mli lɛ esaaa Yehowa hiɛ lɛ, ewaaa tsɔ kɛhãaa amɛ akɛ amɛbaatsi amɛhe kɛje he. Shi mɛi komɛi yɛ ni kɛ́ amɛná amɛle po lɛ, amɛsheɔ gbeyei akɛ amɛwekumɛi, amɛnanemɛi, kɛ mɛi ni amɛkɛtsuɔ nii lɛ baate shi amɛwo amɛ, ni enɛ hãa ewaa kɛhãa amɛ akɛ amɛbaatsi amɛhe kɛje nibii nɛɛ ahe. Bei komɛi lɛ, sane lɛ fiteɔ kwraa kɛji eba lɛ akɛ esa akɛ amɛtsi amɛhe kɛje nifeemɔ loo kusum ko ni afeɔ kɛwoɔ weku lɛ mli bii ni egboi lɛ ahiɛ nyam, loo ekroko ni tamɔ nakai ni kã mɛi atsui nɔ waa lɛ he. Mɛni baaye abua wɔ ni wɔnyɛ wɔfee ekãa ni wɔtsi wɔhe kɛje nifeemɔi ni esaaa Nyɔŋmɔ hiɛ lɛ ahe? Nɔkwɛmɔnɔ kpakpa ni Kristofoi komɛi fee lɛ baanyɛ aye abua wɔ. Be ni mɛi komɛi ni feɔ majik yɛ Efeso lɛ batsɔmɔ Kristofoi lɛ, amɛfee nɔ ko ni sa kadimɔ waa. Biblia lɛ kɛɔ akɛ: “[Amɛkɛ] amɛwoji lɛ bashwie shi ni amɛshã yɛ mɛi fɛɛ ahiɛ. Ni amɛbu fɛɛ naa ni amɛna akɛ fɛɛ feɔ jwiɛtɛi kapɛji 50,000.” (Bɔf. 19:19, 20) Kristofoi anɔkwafoi nɛɛ kpãtã amɛmajik woji lɛ ahiɛ, eyɛ mli akɛ woji nɛɛ ajara wa moŋ, ni Yehowa jɔɔ amɛ waa yɛ afɔle nɛɛ ni amɛshã lɛ hewɔ. w18.11 7 kk. 15-16

Be ni Israelbii lɛ fo Yordan lɛ sɛɛ etsɛɛɛ lɛ, Yoshua kɛ nuu ko ni egbala eklante ehiɛ yɛ edɛŋ lɛ kpe yɛ Yeriko masɛi. Nuu lɛ, ŋwɛibɔfo ni, ni ekɛɛ Yoshua akɛ lɛ ji “Yehowa asraafoi lɛ anɔ onukpa,” ni efee klalo akɛ ebaafã Nyɔŋmɔ webii lɛ ahe. (Yos. 5:13-15; shn.) Ŋwɛibɔfo lɛ tsɔɔ Yoshua nɔ tuuntu ni esa akɛ efee koni amɛnyɛ amɛye Yeriko nɔ kunim. Gbɛtsɔɔmɔi ni ekɛhã lɛ lɛ ekomɛi yɛ ni yɛ adesai ahiɛ lɛ, etamɔ nɔ ni nilee bɛ mli. Akɛ nɔkwɛmɔnɔ lɛ, ŋwɛibɔfo lɛ kɛɛ Yoshua akɛ efolɔ esraafoi lɛ fɛɛ ketia. Kɛ́ Yoshua folɔ esraafoi lɛ ketia lɛ, eyɛ faŋŋ akɛ gbii fioo baaho dani amɛbaanyɛ amɛya ta. (1 Mo. 34:24, 25; Yos. 5:2) Ekolɛ be ni afolɔ asraafoi lɛ ketia lɛ, amɛsusu bɔ ni amɛbaafee amɛbu amɛwekui ahe kɛ́ amɛhenyɛlɔi lɛ batutua amɛ lɛ he. Shi be ni amɛyaanu lɛ, akɛɛ “aŋa Yeriko naa kpɛŋŋ yɛ Israelbii lɛ ahewɔ; mɔ ko mɔ ko ejeee kpo, ni mɔ ko mɔ ko baaa mli hu”! (Yos. 6:1) Ŋwanejee ko bɛ he akɛ, amaniɛbɔɔ nɛɛ hã hemɔkɛyeli ni amɛyɔɔ akɛ gbɛtsɔɔmɔ ni Nyɔŋmɔ kɛhã amɛ lɛ hi lɛ mli wa waa. w18.10 23 kk. 5-7

Te wɔbaafee tɛŋŋ wɔba wɔhe shi tamɔ Paulo? Klɛŋklɛŋ lɛ, esaaa akɛ wɔnuɔ he akɛ shiɛmɔ nitsumɔ lɛ loo nibii krokomɛi ni Yehowa yeɔ ebuaa wɔ ni wɔnyɛɔ wɔtsuɔ lɛ ahewɔ lɛ, esoro wɔ kwraa. No hewɔ lɛ, bi ohe akɛ: ‘Te minaa mɛi ni yɔɔ mishikpɔŋkuku lɛ mli lɛ mihãa tɛŋŋ? Ani jwɛŋmɔ ni ejaaa ni mɛi hiɛ yɛ maŋ ko nɔ bii ahe lɛ ená minɔ hewalɛ yɛ gbɛ ko nɔ?’ Yehowa Odasefoi ni yɔɔ jeŋ fɛɛ lɛ bɔɔ mɔdɛŋ akɛ amɛbaashiɛ amɛhã mɛi fɛɛ ni baabo sane kpakpa lɛ toi. Mɛi nɛɛ ekomɛi yɛ ni abuuu amɛ, kɛ̃lɛ, Odasefoi komɛi bɔɔ mɔdɛŋ amɛkaseɔ amɛwiemɔ kɛ bɔ ni amɛhiɔ shi amɛhãa lɛ koni amɛnyɛ amɛshiɛ amɛhã amɛ. Shi enɛ hãaa Odasefoi nɛɛ anu he akɛ amɛhi fe amɛ. Moŋ lɛ, amɛbɔɔ mɔdɛŋ akɛ amɛbaanu mɛi ni amɛshiɛɔ amɛhãa lɛ ateŋ mɔ fɛɛ mɔ shishi, koni no awa amɛ ni amɛnyɛ amɛshɛ mɔ lɛ tsui he. w18.09 5 kk. 9, 11

Romabii lɛ hã agbe Yuda. Yudafoi ni dɔɔ amɛmaŋ lɛ he waa lɛ kɛ Yudafoi krokomɛi ni eshwɛ lɛ fɛɛ kpa Mesia lɛ baa lɛ gbɛ waa. Shi amɛyasusu akɛ Mesia lɛ baawo amɛmaŋ lɛ hiɛ nyam ní ehã amɛye amɛhe kɛje Roma nɔyeli lɛ shishi. (Luka 2:38; 3:15) Amɛteŋ mɛi babaoo susu akɛ, Mesia lɛ baato maŋtsɛyeli ko shishi yɛ shikpɔŋ lɛ nɔ yɛ Israel, ni no baahã Yudafoi akpekpei abɔ ni egbɛ eshwã maji krokomɛi anɔ lɛ aku amɛsɛɛ kɛba amɛmaŋ Israel. Be ko po lɛ, Yohane Baptisilɔ lɛ bi Yesu akɛ: “Ani bo ji Mɔ Ni Baa lɛ, aloo wɔkpa mɔ kroko gbɛ?” (Mat. 11:2, 3) Eeenyɛ efee akɛ, be ni Yohane bi sane nɛɛ lɛ, no mli lɛ eetao ele kɛji mɔ kroko baaba ni ebatsu nibii ni Yudafoi lɛ shweɔ lɛ fɛɛ ahe nii ehã amɛ. Kaselɔi enyɔ lɛ ni kɛ Yesu kpe yɛ gbɛ ni yaa Emao lɛ nɔ yɛ eshitee lɛ sɛɛ lɛ hu wie nɔ ko ni amɛkpa gbɛ akɛ kulɛ Mesia lɛ baafee lɛ he. (Luka 24:21) No sɛɛ etsɛɛɛ lɛ, Yesu bɔfoi lɛ bi lɛ akɛ: “Nuŋtsɔ, ani nɛkɛ be nɛɛ mli obaasaa oto maŋtsɛyeli lɛ oma shi ohã Israel lɛ?”​—Bɔf. 1:6. w18.06 4 kk. 3-4

Esa akɛ wɔkwɛ jogbaŋŋ, titrii lɛ, kɛ́ wɔnu sane ko ni kɔɔ Yehowa webii lɛ ahe. Biblia lɛ kɛɔ akɛ Satan wieɔ Nyɔŋmɔ tsuji anɔkwafoi ahe efɔŋ. (Kpo. 12:10) Yesu bɔ wɔ kɔkɔ akɛ, ‘mɛi baamale amɛwie wɔhe efɔŋ fɛɛ efɔŋ.’ (Mat. 5:11) Kɛ́ wɔhã kɔkɔbɔɔ nɛɛ hi wɔjwɛŋmɔŋ be fɛɛ be lɛ, wɔnaa ekpɛŋ wɔhe kɛ́ wɔnu ni mɛi miiwie Yehowa webii ahe sane ni bɛ mli kwraa. Ani osumɔɔ e-mail kɛ tɛs mɛseji sɛndimɔ waa? Kɛ́ onu sane ko loo niiashikpamɔ ko ni ŋɔɔ onaa waa lɛ, ani ohe tswaa shi ni ohã onanemɛi kɛ owekumɛi ale amrɔ nɔŋŋ, tamɔ bɔ ni mɛi ni tsuɔ nii yɛ TV kɛ redio steshɛŋ lɛ ahe tswaa shi ni amɛtswa nɔ ko he adafi kɛ́ amɛnu nɔŋŋ lɛ? Dani obaasɛndi nakai sane lɛ, bi ohe akɛ: ‘Ani miyɛ nɔmimaa akɛ sane nɛɛ ni miyasɛndi lɛ yɛ mli? Ani mile sane lɛ mli fɛɛ jogbaŋŋ?’ Kɛ́ onyɛɛɛ ohã sanebimɔi nɛɛ ahetoo akɛ hɛɛ lɛ, belɛ kwɛmɔ jogbaŋŋ ni ekaba lɛ akɛ amale oyaagbɛ oshwã lɛ. Kɛ́ oyiŋ miifee bo kɔshikɔshi yɛ sane lɛ he lɛ, kaasɛndi. Jiemɔ yɛ foŋ lɛ nɔ, diliitimɔ! w18.08 3 kk. 3; 4 kk. 6-7

Yesu miisumɔ ni wɔfee mɛi ejurɔ koni wɔná miishɛɛ. Mɛi pii yɛ ni kɛ́ afee amɛ ejurɔ lɛ, amɛhiɛ sɔɔ. Shi jeee mɛi fɛɛ baajie hiɛsɔɔ kpo. Kɛ̃lɛ, wɔle akɛ mɛi ni hiɛ baasɔ lɛ atsui baanyɛ atsirɛ amɛ ni amɛ hu amɛfee mɛi ejurɔ. No hewɔ lɛ, kɛ́ mɛi jie hiɛsɔɔ kpo jio, amɛjieee hiɛsɔɔ kpo jio, yaa nɔ ofee mɛi ejurɔ. Namɔ aaale yibii kpakpai ni ejurɔ kome kɛkɛ ni obaafee mɔ ko lɛ baawo? Mɛi ni jɛɔ amɛtsuiŋ amɛfeɔ ejurɔ lɛ kpaaa gbɛ akɛ mɛi baato amɛ najiaŋ. Yesu wie akɛ: “Kɛ́ oŋmɛ okpɔlɔ lɛ, fɔ̃ɔ ohiafoi kɛ obubuafoi kɛ akpaketsɛmɛi kɛ shwilafoi nine; ni obaaná miishɛɛ, akɛni amɛbɛ nɔ ko ni amɛkɛbaato bo najiaŋ lɛ hewɔ.” (Luka 14:13, 14) Biblia lɛ kɛɔ akɛ: “Mɔ ni hãa mɔ nɔ lɛ, abaajɔɔ lɛ.” Ekɛɔ hu akɛ: “Mɔ fɛɛ mɔ ni naa mɔ ni bɛ yelikɛbualɔ mɔbɔ lɛ yɛ miishɛɛ.” (Abɛi 22:9; Lala 41:1) No hewɔ lɛ, esa akɛ miishɛɛ ni wɔnáa kɛ́ wɔye wɔbua mɛi lɛ atsirɛ wɔ ni wɔfee mɛi ejurɔ. w18.08 21-22 kk. 15-16

Ŋmɛnɛ lɛ, ewa waa akɛ wɔbaale anɔkwale fɛɛ ni yɔɔ saji ni wɔnuɔ lɛ amli ni wɔna kɛji amɛyɛ mli loo amɛbɛ mli. Mɛni hewɔ? Ejaakɛ saji ni wɔnuɔ lɛ pii yɛ ni fã anɔkwale ni fã hu amale. Ekomɛi hu yɛ ni anɔkwale lɛ nɔŋŋ ni, shi jeee sane lɛ fɛɛ agba wɔ lɛ. Kɛfata he lɛ, wɔyeee emuu. Mɛni baaye abua wɔ ni wɔnyɛ wɔtao saji amli jogbaŋŋ ni wɔkpɛ yiŋ ni ja? Esa akɛ wɔkɛ shishitoo mlai ni yɔɔ Biblia lɛ mli lɛ atsu nii. Shishitoo mlai nɛɛ ekome ji akɛ, kɛ́ wɔhã sane hetoo dani wɔbo sane lɛ mli toi lɛ, wɔmiifee buulu ni wɔmiishwie wɔhiɛ shi hu. (Abɛi 18:13) Ekroko hu nɛ: Kɛ́ wɔnu sane ko lɛ, esa akɛ wɔtao mli dani wɔhe wɔye. (Abɛi 14:15) Naa shishitoo mla kroko hu: Kɛ́ wɔkɛ afii babaoo esɔmɔ Yehowa po lɛ, esaaa akɛ wɔkɛ wɔhe fɔ̃ɔ wɔ diɛŋtsɛ wɔniiashishinumɔ nɔ. Biblia mli shishitoo mlai baabu wɔhe ni amɛbaaye amɛbua wɔ ni wɔkpɛ yiŋ kpakpai kɛji akɛ wɔtao nii amli jogbaŋŋ koni wɔle anɔkwale fɛɛ ni yɔɔ saji ni wɔnuɔ lɛ amli. w18.08 7 kk. 19

Kɛ́ abaptisi wɔ lɛ, no tsɔɔ akɛ wɔmiisumɔ ni mɛi fɛɛ ale akɛ Yehowa nii ji wɔ, ni wɔmiisumɔ ni wɔjɛ wɔtsuiŋ fɛɛ wɔba wɔhe shi wɔhã lɛ. Yesu hu fee nɔ ko ni tamɔ nakai. Be ni ehã abaptisi lɛ lɛ, yɛ gbɛ ko nɔ lɛ, ekɛɛ Yehowa akɛ: “Ao mi-Nyɔŋmɔ, miishwe akɛ mafee osuɔmɔnaa nii.” (Lala 40:7, 8, shn.) Be ni abaptisi Yesu lɛ, te Yehowa nu he ehã tɛŋŋ? Biblia lɛ kɛɔ akɛ: “Be ni abaptisi Yesu agbe naa lɛ, amrɔ nɔŋŋ ni ewó ehe nɔ kɛje nu lɛ mli; ni naa! ŋwɛi naa gbele, ni ena Nyɔŋmɔ mumɔ lɛ miikpeleke shi tamɔ okpo, ni eeba enɔ. Agbɛnɛ hu, naa! gbee ko jɛ ŋwɛi kɛɛ: ‘Mɔ nɛ ji mi-Bi ni misumɔɔ lɛ lɛ, mɔ ni miná ehe miishɛɛ lɛ.’” (Mat. 3:16, 17) Eyɛ mli akɛ no mli lɛ, Yehowa nii ji Yesu momo moŋ, shi Yehowa ná miishɛɛ be ni ena akɛ e-Bi lɛ yɛ he miishɛɛ akɛ ebaafee e-Tsɛ lɛ pɛ suɔmɔnaa nii lɛ. Kɛ́ wɔ hu wɔjɔɔ wɔhe nɔ wɔhã Yehowa lɛ, ebaaná miishɛɛ, ni ebaajɔɔ wɔ.​—Lala 149:4. w18.07 23 kk. 4-5

Namɛi ji “wɔ” lɛ ni Mose kɛɛ amɛbaajie nu yɛ tɛsaa lɛ mli amɛhã maŋbii lɛ? Eeenyɛ efee akɛ, no mli lɛ eetsɔɔ lɛ kɛ enyɛmi Aaron. Nɔ ni ewie lɛ etsɔɔɔ bulɛ, ejaakɛ Yehowa ji mɔ ni fee naakpɛɛ nii lɛ. Etamɔ nɔ ni wiemɔi ni yɔɔ Lala 106:32, 33 lɛ maa nɔ mi akɛ enɛ hewɔ Yehowa mli fu Mose lɛ. Jɛmɛ kɛɔ akɛ: “Amɛwo emli la yɛ Meriba nui lɛ ahe, ni Mose ná sane yɛ amɛhewɔ. Amɛhã emli fu, ni eyawieee jogbaŋŋ.” (4 Mo. 27:14) Fɛɛ mli lɛ, nɔ ni Mose fee lɛ hãaa akɛ anunyam ni sa Yehowa lɛ ahã lɛ. Yehowa kɛɛ Mose kɛ Aaron akɛ: “Nyɛyi enyɔ lɛ fɛɛ nyɛtse famɔ ni mikɛhã yɛ Meriba nui lɛ ahe lɛ hiɛ atua.” (4 Mo. 20:24) Enɛ ji esha ni yɔɔ hiɛdɔɔ waa! Afii komɛi dani sane nɛɛ baaba lɛ, Yehowa hã Israelbii komɛi ni tse ehiɛ atua lɛ le akɛ, nɔ ni amɛfee lɛ hewɔ lɛ, ehãŋ amɛya Shiwoo Shikpɔŋ lɛ nɔ. (4 Mo. 14:26-30, 34) No hewɔ lɛ, eja ni esa hu akɛ be ni Mose tse atua lɛ, Yehowa gbala etoi yɛ nakai gbɛ nɔŋŋ nɔ. Hegbɛ ni ená akɛ ebaaya Shiwoo Shikpɔŋ lɛ nɔ lɛ bɔ lɛ, tamɔ bɔ ni ebɔ atuatselɔi krokomɛi lɛ nɔŋŋ. w18.07 14 kk. 9, 12; 15 kk. 13

Kɛ́ wɔle akɛ nɔ ko ni wɔyɛ hegbɛ akɛ wɔfeɔ lɛ baanyɛ agba wɔnyɛmi ko naa lɛ, ani wɔkɛ hegbɛ ni wɔyɔɔ lɛ baashã afɔle yɛ wɔnyɛmi lɛ hewɔ? Ŋwanejee ko bɛ he akɛ, wɔbaafee nakai. Wɔnyɛmimɛi lɛ ekomɛi yɛ ni dani amɛbaaba anɔkwale lɛ mli lɛ, amɛwuɔ dãa, shi bianɛ ni amɛbale anɔkwale lɛ, amɛtswa amɛfai shi akɛ amɛyaŋ dãa he kwraa. Ekã shi faŋŋ akɛ, wɔsumɔŋ ni wɔfee nɔ ko ni baahã wɔnyɛmimɛi nɛɛ ayakɔ amɛsa jeŋba lɛ ekoŋŋ ni eye amɛ awui, aloo jeee nakai? (1 Kor. 6:9, 10) No hewɔ lɛ, kɛ́ nyɛmi ko basara wɔ ni ekɛɛ wɔ akɛ enuuu dãa lɛ, esaaa akɛ wɔnyɛɔ enɔ doo akɛ enu. Kɛ́ wɔnyɛ enɔ lɛ, no baatsɔɔ akɛ wɔsumɔɔɔ esane. Be ni Timoteo ji oblanyo lɛ, ekpɛlɛ ni afo lɛ ketia eyɛ mli akɛ eji nɔ ko ni waa mɔ he waa. Timoteo le akɛ, kɛ́ afooo lɛ ketia lɛ, ebaanyɛ etɔ̃tɔ Yudafoi ni ebaayashiɛ ehã lɛ anane. Shi Timoteo sumɔɔɔ ni etɔ̃tɔɔ mɛi anane, tamɔ bɔ ni bɔfo Paulo hu bɔ mɔdɛŋ ni ekatɔ̃tɔ mɛi anane lɛ. (Bɔf. 16:3; 1 Kor. 9:19-23) Ani bo hu obaasumɔ ni okɛ nɔ ko ni oyɔɔ he hegbɛ lɛ ashã afɔle yɛ mɛi krokomɛi ahilɛkɛhamɔ hewɔ? w18.06 18-19 kk. 12-13

Kɛ́ okɛ mɔ ko ni sɔmɔɔɔ Yehowa lɛ kpe klɛŋklɛŋ kwraa lɛ, ekolɛ nɔ pɛ ni obaale yɛ ehe ji egbɛ́i kɛ bɔ ni ehiɛ su yɔɔ. Shi jeee nakai eji kɛ́ okɛ mɔ ko ni sɔmɔɔ Yehowa lɛ kpe klɛŋklɛŋ kwraa, ejaakɛ kɛ́ hooo kwraa lɛ, ole akɛ, mɔ ko ni sɔmɔɔ Yehowa lɛ sumɔɔ lɛ. Ole hu akɛ, Yehowa na nɔ kpakpa ko yɛ mɔ lɛ he ni no hewɔ lɛ, ehã ebafata ewebii ni efee ekome akɛ weku kɛmiisɔmɔ lɛ lɛ ahe. (Yoh. 6:44) Enɛ hewɔ lɛ, kɛ́ esoro he ni mɔ lɛ jɛ kɛ bɔ ni atsɔse lɛ ahã po lɛ, ole lɛ waa, ni lɛ hu ele bo waa! Ole hu akɛ, Odasefonyo fɛɛ Odasefonyo ni okɛbaakpe lɛ nuɔ “wiemɔ krɔŋŋ” lɛ, ekɔɔɔ he eko emaŋ wiemɔ. Enɛ hewɔ lɛ, ole akɛ eheɔ eyeɔ akɛ Nyɔŋmɔ yɛ, ekɛ gbɛtsɔɔmɔi ni Nyɔŋmɔ kɛhã yɛ bɔ ni wɔba wɔjeŋ wɔhã lɛ he lɛ tsuɔ nii, ni wɔsɛɛ lɛ, okɛ lɛ fɛɛ baahi jeŋ hee lɛ mli. Enɛ ji nibii ni he hiaa fe fɛɛ ni esa akɛ ole yɛ mɔ ko he, ejaakɛ kɛ́ oná ole akɛ mɔ lɛ heɔ nibii nɛɛ eyeɔ lɛ, obaanyɛ omu ofɔ̃ enɔ ni lɛ hu ebaanyɛ emu efɔ̃ onɔ. Ni kɛ́ nyɛteŋ mɔ fɛɛ mɔ baanyɛ amu afɔ̃ enaanyo nɔ lɛ, nyɛnaanyobɔɔ lɛ mli baawa ni ebaahi shi kɛya naanɔ. w18.12 21 kk. 9-10

Kristo tsɔɔ gbɛtsɔɔmɔ kuu lɛ gbɛ ni amɛhã efee faŋŋ akɛ ehe ehiaaa ni afolɔɔ Kristofoi ni jeee Yudafoi lɛ ketia. (Bɔf. 15:19, 20) Shi loloolo lɛ, Kristofoi ni ji Yudafoi lɛ tee nɔ amɛfolɔ amɛbii ketia, ni enɛ tee nɔ afii pii. Ekolɛ, wɔbaabi akɛ, ‘Mɛni hewɔ kwraa Yesu ŋmɛ gbɛ ni ketiafoo sane lɛ tee nɔ efee naagba be kplaŋŋ, eyɛ mli akɛ egbele lɛ kɛ Mose Mla lɛ ba naagbee?’ (Kol. 2:13, 14) Kɛ́ afee tsakemɔ yɛ bɔ ni wɔnuɔ Biblia mli sane ko shishi lɛ mli lɛ, eheɔ be dani mɛi komɛi nuɔ shishi. Ehe be dani Kristofoi ni ji Yudafoi lɛ nu shishi akɛ amɛbɛ Mla lɛ shishi dɔŋŋ. (Yoh. 16:12) Ebawa kɛhã amɛteŋ mɛi komɛi akɛ amɛbaakpɛlɛ nɔ akɛ, Nyɔŋmɔ ebuuu ketiafoo akɛ eji wekukpaa krɛdɛɛ ni yɔɔ lɛ kɛ ewebii lɛ ateŋ lɛ he okadi dɔŋŋ. (1 Mo. 17:9-12) Amɛteŋ mɛi komɛi hu she gbeyei akɛ kɛ́ amɛhã esoro amɛ yɛ Yudafoi krokomɛi lɛ ahe lɛ, abaawa amɛ yi. (Gal. 6:12) Shi sɛɛ mli lɛ, Kristo tsɔ woji ni mumɔ krɔŋkrɔŋ lɛ tsirɛ Paulo ni eŋmala lɛ anɔ ekɛ gbɛtsɔɔmɔi ni sa hã yɛ sane nɛɛ he.​—Rom. 2:28, 29; Gal. 3:23-25. w18.10 24-25 kk. 10-12

Kaiafa mɛ ni je na, kɛkɛ ni etsu asraafoi koni amɛyamɔ Yesu. Yesu le akɛ amɛmiitao amɛgbe lɛ. No hewɔ lɛ, nakai gbi lɛ gbɛkɛ be ni ekɛ ebɔfoi lɛ yeɔ nii nɔ ni ji naagbee nɔ lɛ, ekɛɛ amɛ akɛ amɛhé klantei. Yesu miitao etsɔɔ amɛ nɔ ko ni he miihia waa, ni klantei enyɔ fa kɛhã nɔ ni etaoɔ etsɔɔ amɛ lɛ. (Luka 22:36-38) Sɛɛ mli yɛ nakai gbɛkɛ lɛ nɔŋŋ mli lɛ, Petro kɛ klante bã mɛi ni miiba amɛbamɔ Yesu lɛ ateŋ mɔ kome. Petro fee nakai ejaakɛ enu he akɛ nɔ ni mɛi lɛ feɔ lɛ ejaaa. (Yoh. 18:10) Shi Yesu kɛɛ lɛ akɛ: “Okɛ oklante lɛ awo etoohe, ejaakɛ mɛi fɛɛ ni gbalaa klante lɛ, klante naa amɛbaagbo yɛ.” (Mat. 26:52, 53) Mɛni kaselɔi lɛ kase yɛ sane nɛɛ mli? No ji akɛ, amɛfataaa je lɛ he. Mra mli yɛ nakai gbɛkɛ lɛ mli lɛ, Yesu sɔle koni ekaselɔi lɛ ahi shi akɛ mɛi ni fataaa je lɛ he. (Yoh. 17:16) Jeee amɛ amɛbaakwɛ ni aye jalɛ sane yɛ je lɛ mli; Nyɔŋmɔ pɛ yɔɔ nakai hegbɛ lɛ. Toiŋjɔlɛ kɛ ekomefeemɔ yɛ Yehowa tsuji ateŋ. Kɛ́ Yehowa kwɛ bɔ ni wɔfee ekome yɛ jeŋ ni mli egbala nɛɛ mli lɛ, emii shɛɔ ehe waa.​—Zef. 3:17. w18.06 7 kk. 13-14, 16

Bei komɛi lɛ, Satan bɔɔ mɔdɛŋ akɛ ebaawo wɔhe gbeyei koni wɔkafee Yehowa suɔmɔnaa nii. Akɛ nɔkwɛmɔnɔ lɛ, ebaanyɛ ehã amralofoi lɛ atsĩ wɔshiɛmɔ nitsumɔ lɛ naa. Aloo ebaanyɛ ehã mɛi ni wɔkɛtsuɔ nii loo mɛi ni wɔkɛyaa skul lɛ aye wɔhe fɛo akɛni wɔhiɔ shi yɛ Biblia mli shishitoo mlai anaa lɛ hewɔ. (1 Pet. 4:4) Ebaanyɛ ehã wɔwekumɛi ni ekolɛ amɛhiɛɛɛ wɔhe jwɛŋmɔ fɔŋ ko lɛ aje wɔnijiaŋ wui koni wɔkpa asafoŋ kpeei yaa. (Mat. 10:36) Mɛni baaye abua wɔ ni wɔnyɛ wɔdamɔ kai ni tamɔ nɛkɛ lɛ anaa? Klɛŋklɛŋ lɛ, esa akɛ wɔhã ehi wɔjwɛŋmɔ mli akɛ, shihilɛi ni tamɔ nakai lɛ baanyɛ aba, ejaakɛ Satan kɛ wɔ miiwu. (Kpo. 2:10) Nɔ ni ji enyɔ lɛ, esa akɛ wɔhã yiŋtoo hewɔ ni Satan feɔ nakai lɛ ahi wɔjwɛŋmɔ mli. Satan kɛɛ akɛni wɔkɛ shihilɛ ni mli wa ekpeko lɛ hewɔ wɔsɔmɔɔ Yehowa lɛ, shi kɛ́ wɔkɛ shihilɛ ni mli wa kpe pɛ, wɔbaakpa Yehowa sɔɔmɔ. (Hiob 1:9-11; 2:4, 5) Agbɛnɛ hu, esa akɛ wɔkɛ wɔhiɛ afɔ̃ Yehowa nɔ, ni wɔkpa lɛ fai ni ewaje wɔ koni wɔnyɛ wɔfi shi. Kaimɔ akɛ, Yehowa kwaŋ wɔ kɔkɔɔkɔ.​—Heb. 13:5. w18.05 26 kk. 14

Esaaa akɛ wɔhiɛ kpaa nɔ kɔkɔɔkɔ akɛ, kɛ́ efee tamɔ nɔ ni mɛi booo sane lɛ toi po lɛ, wɔshiɛmɔ nitsumɔ lɛ baanyɛ aná mɛi anɔ hewalɛ. Eyɛ mli akɛ mɛi babaoo booo wɔ toi moŋ, shi amɛnaa wɔ. Amɛnaa bɔ ni wɔsaa wɔhe jogbaŋŋ, bɔ ni wɔjieɔ bulɛ kpo wɔtsɔɔ mɛi, kɛ bɔ ni wɔtseɔ wɔhiɛ wɔhãa mɔ fɛɛ mɔ lɛ. Enɛ baanyɛ aná amɛteŋ mɛi komɛi anɔ hewalɛ waa, ni ekolɛ no baanyɛ ahã amɛtsake jwɛŋmɔ ni ejaaa ni amɛhiɛ yɛ wɔhe lɛ. Sergio kɛ Olinda, ni amɛji gbɛgbalɔi lɛ wie akɛ: “Be ko lɛ, hela bamɔ wɔ, ni no hewɔ lɛ wɔnyɛɛɛ wɔya maŋ lɛ mli. Be ni ebahi fioo ni wɔbɔi yaa ekoŋŋ lɛ, mɛi . . . bi wɔ akɛ, ‘Mɛni ba ni wɔna nyɛ etsɛ nɛkɛ?’” Kɛ́ wɔtee nɔ wɔgba mɛi Nyɔŋmɔ Maŋtsɛyeli lɛ he sane, ni ‘wɔjieee wɔnine’ yɛ shiɛmɔ nitsumɔ lɛ he lɛ, belɛ wɔmiitsu nɔ ko ni he hiaa waa kɛmiiye wɔmiibua ni ‘aye jeŋmaji lɛ fɛɛ odase.’ (Mat. 24:14) Nɔ ni fe fɛɛ lɛ, wɔtsui baanyɔ wɔmli waa, ejaakɛ wɔle akɛ Yehowa náa nɔ ni wɔfeɔ lɛ he miishɛɛ. Anɔkwa, esumɔɔ mɛi fɛɛ ni kɛ “shifimɔ woɔ yibii” lɛ!​—Luka 8:15. w18.05 16 kk. 16-18

Kɛjɛ be ni Adam fee esha ni ekɛ esha tsɛŋe adesai fɛɛ lɛ nɔ kɛbaa lɛ, Yehowa ehã ana akɛ eji Nyɔŋmɔ ni woɔ mɔ hewalɛ. Be ni Adam tse atua yɛ Eden abɔɔ lɛ mli lɛ sɛɛ nɔŋŋ lɛ, Yehowa fee nɔ ko ni baashɛje Adam seshibii ni baaba yɛ sɛɛ mli lɛ amii. Yehowa wo shi yɛ Eden abɔɔ lɛ mli akɛ be ni yi aaawula shi lɛ, ekpãtã Satan Abonsam, ni ji “blema onufu lɛ,” kɛ enitsumɔi gbohii lɛ fɛɛ ahiɛ. Aŋma shiwoo ni ji gbalɛ nɛɛ yɛ 1 Mose 3:15. (Kpo. 12:9; 1 Yoh. 3:8) Yehowa tsulɔ Noa yinɔbii lɛ efeee Nyɔŋmɔ suɔmɔnaa nii. No mli lɛ, Noa kɛ eweku lɛ pɛ jáa Yehowa. Akɛni Noa yinɔbii lɛ fee yiwalɛ nii ni amɛkɛ amɛhe wo jeŋba sha mli waa hewɔ lɛ, kulɛ enijiaŋ baanyɛ aje wui. (1 Mo. 6:4, 5, 9, 11; Yuda 6) Shi Yehowa kɛɛ Noa akɛ ebaakpãtã nakai yinɔbii fɔji lɛ ahiɛ, ni etsɔɔ Noa nɔ ni efee koni ekɛbaa lɛ kɛ eweku lɛ yi. (1 Mo. 6:13-18) Yehowa hã Noa na akɛ eji Nyɔŋmɔ ni woɔ mɔ hewalɛ. w18.04 15 kk. 1-2

Esaaa akɛ wɔnuɔ he kɔkɔɔkɔ akɛ wɔnyɛŋ wɔwo mɔ ko mɔ ko hewalɛ ejaakɛ wɔwiemɔ faaa. Ebiii ni wɔwie pii dani wɔbaanyɛ wɔwo mɔ ko hewalɛ. Bei komɛi lɛ, nɔ pɛ ni he hiaa ji ni wɔbaafee wɔhiɛ ŋmɔlɔŋmɔlɔ ni wɔŋa mɔ lɛ. Kɛ́ wɔfee nakai shi mɔ lɛ eŋmɔɔɔ lɛ, eeenyɛ efee akɛ ekɛ naagba ko miikpe ni esa akɛ ekɛ mɔ ko agba he sane. No hewɔ lɛ, wɔbaanyɛ wɔbo lɛ toi, ni ekolɛ no baashɛje emii. (Yak. 1:19) Wɔteŋ mɔ fɛɛ mɔ baanyɛ awo enyɛmi Kristofonyo ko ni ehao loo ewerɛ eho ehe lɛ hewalɛ. Maŋtsɛ Solomon ŋma akɛ: “Wiemɔ ni awieɔ yɛ be ni sa mli lɛ​—ehi waa diɛŋtsɛ! Kɛ́ mɔ ko tse ehiɛ ehã bo lɛ, ehãa onáa miishɛɛ; amaniɛbɔɔ kpakpa hãa wui náa hewalɛ.” (Abɛi 15:23, 30) Nɔ ko ni Paulo wie lɛ po tsɔɔ akɛ, obaanyɛ okɛ mɔ lɛ afee ekome kɛlá Maŋtsɛyeli lalai, ni no hu baawo lɛ hewalɛ. (Bɔf. 16:25; Kol. 3:16) Etsɛŋ kwraa ehe baahia ni wɔwowoo wɔhe hewalɛ waa fe bɔ ni wɔfeɔ amrɔ nɛɛ po. Mɛni hewɔ? Ejaakɛ Yehowa gbi lɛ “miibɛŋkɛ.”​—Heb. 10:25. w18.04 23 kk. 16; 24 kk. 18-19