November

Kɛ́ fɔlɔ ji bo lɛ, ye obua obii lɛ ni amɛsaa amɛhe ni amɛhã sane hetoo yɛ afii abɔ ni amɛye lɛ naa. Bei komɛi lɛ, asusuɔ saji ni yɔɔ hiɛdɔɔ tamɔ gbalashihilɛ mli naagbai kɛ jeŋba he nɛkɛ. Shi yɛ enɛɛmɛi amli po lɛ, kukuji komɛi yɛ ni no lɛ gbekɛbii lɛ baanyɛ ahã hetoo. Agbɛnɛ hu, ye obua obii lɛ ni amɛna akɛ, jeee be fɛɛ be ni kɛ́ amɛwó amɛnine nɔ lɛ abaatsɛ amɛ. Kɛ́ ofee nakai lɛ, kɛ́ amɛwó amɛnine nɔ ni atsɛɛɛ amɛ po lɛ, amɛnijiaŋ ejeŋ wui. (1 Tim. 6:18) Wɔ fɛɛ wɔbaanyɛ wɔsaa wɔhe jogbaŋŋ koni wɔhã saji ahetoo ni woɔ Yehowa hiɛ nyam ni baatswa wɔnyɛmimɛi Kristofoi lɛ ema shi. (Abɛi 25:11) Eyɛ mli akɛ bei komɛi lɛ, wɔbaanyɛ wɔgba niiashikpamɔ ko ni wɔná lɛ kuku moŋ, shi esa akɛ wɔkwɛ jogbaŋŋ koni ekafee akɛ daa nɛɛ wɔmiigbala jwɛŋmɔ kɛmiiba wɔnɔ. (Abɛi 27:2; 2 Kor. 10:18) Moŋ lɛ, esa akɛ wɔgbala jwɛŋmɔ kɛya Yehowa, e-Wiemɔ lɛ, kɛ wɔnyɛmimɛi krokomɛi lɛ anɔ.—Kpo. 4:11. w23.04 24-25 kk. 17-18

Suɔmɔ he miihia waa, ejaakɛ ebaaye ebua wɔ ni wɔya nɔ wɔshi kpe ni wɔhiɛ ahi wɔhe nɔ. (Mat. 22:​37-39) Akɛni wɔsumɔɔ Nyɔŋmɔ hewɔ lɛ, wɔyaa nɔ wɔshiɛɔ ekɔɔɔ he eko naagbai ni wɔkɛkpeɔ yɛ shiɛmɔ nitsumɔ lɛ hewɔ. (2 Tim. 1:​7, 8) Akɛni wɔsumɔɔ mɛi ni jáaa Yehowa lɛ hu asane hewɔ lɛ, wɔyaa nɔ wɔshiɛɔ, ni wɔtsɔɔ tɛlifoŋ kɛ lɛtaŋmaa nɔ po wɔfeɔ nakai. Wɔle akɛ, amɛbaanyɛ amɛtsake ni amɛbaafee nɔ ni ja. (Eze. 18:​27, 28) Wɔsumɔɔ wɔnyɛmimɛi Kristofoi lɛ hu. Suɔmɔ nɛɛ tsirɛɔ wɔ ni ‘wɔwowoɔ wɔhe hewalɛ, ni wɔtswaa wɔhe wɔmaa shi.’ (1 Tes. 5:11) Tamɔ bɔ ni asraafoi woɔ amɛhe hewalɛ kɛ́ amɛmiiwu ta lɛ, nakai nɔŋŋ esa akɛ wɔ hu wɔwowoo wɔhe hewalɛ. Wɔjeŋ gbɛ wɔfeŋ nɔ ko loo wɔwieŋ nɔ ko ni baadɔ wɔnyɛmimɛi Kristofoi lɛ, loo wɔjeŋ gbɛ wɔfeŋ amɛ nɔ ko kɛtoŋ efɔŋ ko ni amɛfee wɔ lɛ najiaŋ. (1 Tes. 5:​13, 15) Agbɛnɛ hu, kɛ́ wɔjie bulɛ kpo wɔtsɔɔ mɛi ni nyiɛɔ hiɛ yɛ asafo lɛ mli lɛ, no baatsɔɔ akɛ wɔsumɔɔ amɛ.—1 Tes. 5:12. w23.06 9 kk. 6; 10-11 kk. 10-11

Nɔ kome ni wɔbaanyɛ wɔfee koni wɔhemɔkɛyeli lɛ mli awa ji, ni wɔbaajwɛŋ kpɔmɔnɔ lɛ nɔ. Kpɔmɔnɔ lɛ ji nɔ ni hãa wɔnáa nɔmimaa akɛ Nyɔŋmɔ shiwoi lɛ baaba mli. Kɛ́ wɔjwɛŋ nɔ hewɔ ni Yehowa kɛ kpɔmɔnɔ lɛ hã, kɛ nɔ mli ni etsɔ dani ekɛhã lɛ nɔ jogbaŋŋ lɛ, ebaahã wɔná hemɔkɛyeli ni mli wa akɛ, shi ni Yehowa ewo akɛ wɔbaahi shi kɛya naanɔ yɛ jeŋ hee ko mli lɛ baaba mli. Mɛni hewɔ wɔkɛɔ nakai? Mɛni mli Yehowa tsɔ be ni ekɛ kpɔmɔnɔ lɛ hãa lɛ? Yehowa tsu ekromɔbi ni esumɔɔ lɛ waa lɛ, ni ji enaanyo kpaakpa lɛ kɛjɛ ŋwɛi koni abafɔ lɛ akɛ adesa ni yeɔ emuu yɛ shikpɔŋ lɛ nɔ. Be ni Yesu yɔɔ shikpɔŋ lɛ nɔ lɛ, ekɛ shihilɛi ni mli wawai srɔtoi kpe. Agbɛnɛ hu, apiŋ lɛ ni agbe lɛ musuŋshaa naa. Yehowa nu he waa be ni ena shihilɛ ni e-Bi lɛ lɛ tsɔɔ mli lɛ. Eji wɔ-Nyɔŋmɔ ni yɔɔ suɔmɔ lɛ miisumɔ ni wɔná shihilɛ kpakpa be kukuoo ko kɛkɛ kulɛ, eŋmɛŋ gbɛ ni apiŋ e-Bi ni esumɔɔ waa lɛ ni agbe lɛ. (Yoh. 3:16; 1 Pet. 1:​18, 19) Akɛni Yehowa ŋmɛ gbɛ ni e-Bi ni esumɔɔ waa lɛ bagbo kɛhã wɔ lɛ hewɔ lɛ, bɔ fɛɛ bɔ ni fee lɛ, ebaahã wɔhi shi kɛya naanɔ yɛ jeŋ hee lɛ mli. w23.04 27 kk. 8-9

Ani Yehowa miisumɔ waa ni etee mɛi ni egboi lɛ ashi? Hɛɛ, eesumɔ waa diɛŋtsɛ. Mɛni tsɔɔ nakai? Ekɛ emumɔ lɛ tsirɛ mɛi ni ŋmala Biblia lɛ ateŋ mɛi babaoo ni amɛŋmala shi ni ewo akɛ ebaatee gbohii ashi wɔsɛɛ lɛ he sane. (Yes. 26:19; Kpo. 20:​11-13) Ni be fɛɛ be lɛ Yehowa yeɔ eshiwoi anɔ. (Yos. 23:14) Anɔkwa, Yehowa miishwe waa ni etee gbohii lɛ ashi. Susumɔ sane ko ni Hiob wie lɛ he okwɛ. Ewie akɛ kɛ́ egbo lɛ, Yehowa baashwe waa ni ena lɛ ekoŋŋ. (Hiob 14:​14, 15) Nakai nɔŋŋ Yehowa shweɔ ni ena etsuji fɛɛ ni egboi lɛ ekoŋŋ. Eesumɔ waa ni etee amɛ shi ni amɛná gbɔmɔtsoŋ hewalɛ kpakpa kɛ miishɛɛ. Ni mɛi akpekpei abɔ ni náaa hegbɛ amɛkase Yehowa he nii dani amɛgboi lɛ hu? Wɔ-Nyɔŋmɔ ni yɔɔ suɔmɔ lɛ miisumɔ ni etee amɛ hu shi. (Bɔf. 24:15) Eesumɔ ni ehã amɛ hegbɛ ni amɛbatsɔmɔ enanemɛi ni amɛhi shikpɔŋ lɛ nɔ kɛya naanɔ.—Yoh. 3:16. w23.04 9 kk. 5-6

Mɛni kɛ́ ofee lɛ, ebaahã ohiɛnɔkamɔ lɛ mli awa? Akɛ nɔkwɛmɔnɔ lɛ, kɛ́ ohiɛnɔkamɔ ji obaahi shikpɔŋ lɛ nɔ kɛya naanɔ lɛ, belɛ kanemɔ nibii ni Biblia lɛ ewie yɛ Paradeiso lɛ he lɛ ni ojwɛŋ nɔ. (Yes. 25:8; 32:​16-18) Feemɔ bɔ ni nibii baaji ahã yɛ jeŋ hee lɛ mli lɛ he mfoniri, ni ofee ohe mfoniri akɛ oyɛ jɛmɛ. Kɛ́ be fɛɛ be lɛ wɔfee wɔhe mfoniri akɛ wɔyɛ jeŋ hee lɛ mli lɛ, wɔbaana naagbai ni wɔkɛkpeɔ lɛ akɛ eji “be fioo ko nɔ, ni etsiii” hu. (2 Kor. 4:17) Yehowa baatsɔ hiɛnɔkamɔ ni ehã bo lɛ nɔ ehã ohe awa. Ehã wɔle nibii ni kɛ́ wɔfee lɛ ebaadro wɔ hewalɛ. No hewɔ lɛ, kɛ́ ahã bo nitsumɔ ko ni tsii yɛ asafo lɛ mli, okɛ shihilɛ ni mli wa miikpe, loo oosumɔ ni oya nɔ okɛ miishɛɛ asɔmɔ Yehowa lɛ, sɔlemɔ ohã lɛ ni ofee aŋkro nikasemɔ. Agbɛnɛ hu, bi onyɛmimɛi Kristofoi lɛ ni amɛye amɛbua bo, ni okɛ ojwɛŋmɔ ama ohiɛnɔkamɔ lɛ nɔ. Kɛ́ ofee nibii nɛɛ, Nyɔŋmɔ kɛ ‘hewalɛ fɛɛ baawaje bo yɛ enyɛmɔ ni yɔɔ nyam lɛ naa koni onyɛ okɛ tsuishitoo kɛ miishɛɛ afi shi shiŋŋ.’—Kol. 1:11. w23.10 17 kk. 19-20

Nibii pii yɛ ni wɔbaanyɛ wɔda Yehowa shi yɛ he kɛ́ wɔmiisɔle. Wɔbaanyɛ wɔda lɛ shi yɛ nibii kpakpai fɛɛ ni wɔyɔɔ lɛ ahe, ejaakɛ lɛ eŋɔɔ nibii kpakpai fɛɛ jɛɔ. (Yak. 1:17) Akɛ nɔkwɛmɔnɔ lɛ, wɔbaanyɛ wɔda lɛ shi yɛ shikpɔŋ fɛfɛo ni ehã wɔ kɛ nibii ni yɔɔ naakpɛɛ ni ebɔ lɛ ahe. Agbɛnɛ hu, wɔbaanyɛ wɔda lɛ shi akɛ wɔyɛ wala mli, ni wɔbaanyɛ wɔda lɛ shi yɛ wɔweku lɛ, wɔnanemɛi, kɛ hiɛnɔkamɔ ni ehã wɔná lɛ he. Wɔbaanyɛ wɔda lɛ shi hu akɛ ehã wɔbatsɔmɔ enanemɛi. Ekolɛ ehe baahia ni wɔje gbɛ wɔsusu nibii ni Yehowa feɔ ehãa wɔ lɛ ahe dani wɔjwɛŋmɔ baaya eko nɔ ni wɔda lɛ shi yɛ he. Ŋmɛnɛ lɛ, mɛi pii leee shidaa. Be fɛɛ be lɛ, amɛjwɛŋmɔ yɛ nibii ni amɛmiisumɔ ni afee ahã amɛ lɛ anɔ moŋ fe nibii ni amɛyɔɔ momo ni esa akɛ amɛda shi yɛ he lɛ anɔ. Kɛ́ wɔhã su nɛɛ ná wɔnɔ hewalɛ lɛ, be fɛɛ be ni wɔbaasɔle lɛ, nii sɔŋŋ wɔbaabi. Bɔ ni afee ni ekaba lɛ nakai lɛ, esa akɛ wɔsusu nibii srɔtoisrɔtoi pii ni Yehowa feɔ ehãa wɔ lɛ ahe ni wɔda lɛ shi yɛ he.—Luka 6:45. w23.05 4 kk. 8-9

Yehowa wɔ-Tsɛ ni yɔɔ ŋwɛi lɛ sumɔɔ wɔ, ni kɛ́ ena ni wɔmiipiŋ lɛ, edɔɔ lɛ waa. (Yes. 63:9) Fɛɛ sɛɛ lɛ, eŋmɛɔ gbɛ ni wɔkɛ shihilɛi ni mli wawai ni tamɔ la loo fai kpeɔ. (Yes. 43:2) Shi ewo wɔ shi akɛ, ebaaye ebua wɔ ni ‘wɔtsɔ’ fɛɛ mli. Ekɔɔɔ he eko naagbai ni wɔkɛbaakpe lɛ, ehãŋ shihilɛ lɛ mli awa kɛshɛ he ko ni wɔnyɛŋ wɔsɔmɔ lɛ. Agbɛnɛ hu, Yehowa kɛ emumɔ krɔŋkrɔŋ ni yɔɔ hewalɛ waa lɛ baaye ebua wɔ koni wɔfi shi. (Luka 11:13; Fip. 4:13) Enɛ hewɔ lɛ, wɔbaanyɛ wɔhe wɔye akɛ, be fɛɛ be ni wɔkɛ shihilɛ ni mli wa baakpe lɛ, Yehowa baaye ebua wɔ ni wɔnyɛ wɔfi shi ni wɔye lɛ anɔkwa. Yehowa miisumɔ ni wɔkɛ wɔhiɛ afɔ̃ enɔ. (Heb. 11:6) Bei komɛi lɛ, wɔbaanyɛ wɔnu he akɛ wɔnaagbai lɛ tamɔ gbogbo ko ni kwɔ waa ni wɔnyɛŋ wɔtu. Ekolɛ wɔbaanu he po akɛ, Yehowa yeŋ ebuaŋ wɔ. Shi Biblia lɛ hãa wɔleɔ akɛ, Nyɔŋmɔ baanyɛ ehã wɔ hewalɛ ni ‘wɔkɛtu gbogbo.’ (Lala 18:29) No hewɔ lɛ, nɔ najiaŋ ni wɔyiŋ baafee wɔ kɔshikɔshi kɛji Yehowa baaye ebua wɔ lɛ, esa akɛ wɔsɔle wɔhã lɛ ni wɔhe wɔye kɛ wɔtsui fɛɛ akɛ ebaahã wɔsɔlemɔ lɛ hetoo.—Yak. 1:​6, 7. w23.11 22 kk. 8-9

Wiemɔi nɛɛ ŋɔɔ waa, ni amɛhãa mɛi ni ebote gbalashihilɛ mli lɛ leɔ nɔ ko ni he hiaa waa ni baanyɛ awo amɛ hewalɛ. No ji akɛ, amɛbaanyɛ amɛsumɔ amɛhe waa kɛya naanɔ. Kɛ́ suɔmɔ ni gbalashihilɛ mli hefatalɔi yɔɔ kɛhã amɛhe lɛ baahi shi daa jio, ehiŋ shi daa jio, fɛɛ damɔ amɛnɔ. Wɔbaanyɛ wɔkɛ enɛ ato la ko ni ashɛre he. Kɛ́ akɛ lai wooo mli lɛ, ebaagbo. Shi kɛ́ akɛ lai wo mli be fɛɛ be lɛ, ebaaya nɔ etso. Nakai nɔŋŋ kɛ́ nuu ko kɛ eŋa tee nɔ amɛfee nibii ni baahã suɔmɔ ni amɛyɔɔ kɛhã amɛhe lɛ mli awa lɛ, amɛsuɔmɔ lɛ mli baawa daa. Bei komɛi lɛ, shika he naagbai, helai, loo biiakwɛmɔ baanyɛ ahã nuu ko kɛ eŋa anu he akɛ suɔmɔ ni amɛyɔɔ kɛhã amɛhe lɛ he miijɔ. No hewɔ lɛ, kɛ́ nuu ko kɛ eŋa miitao ni “Yah lalilɛi” lɛ aya nɔ atso yɛ amɛgbalashihilɛ lɛ mli lɛ, esa akɛ amɛteŋ mɔ fɛɛ mɔ afee nibii ni baahã esumɔ Yehowa waa. w23.05 20-21 kk. 1-3

Mɛni esa akɛ wɔfee koni wɔfee ekãa? Wɔfɔlɔi baanyɛ awo wɔ hewalɛ ni wɔfee ekãa. Shi kɛ́ amɛyɛ ekãa po lɛ, amɛnyɛŋ amɛfee ekãa amɛhã wɔ. Kɛ́ mɔ ko miitao ni efee ekãa lɛ, etamɔ nɔ ni eetao ekase nitsumɔ hee ko. Bei pii kɛ́ mɔ ko miikase nitsumɔ hee ko lɛ, ekwɛɔ bɔ ni mɔ ni tsɔɔ lɛ lɛ feɔ lɛ ehãa lɛ, kɛkɛ lɛ, lɛ hu efee lɛ nakai. Nakai nɔŋŋ kɛ́ mɔ ko miitao efee ekãa lɛ, esa akɛ ekwɛ bɔ ni mɛi krokomɛi jie su nɛɛ kpo amɛhã ni ekase amɛ. Esa akɛ wɔkase Nyɔŋmɔ Wiemɔ lɛ jogbaŋŋ tamɔ bɔ ni Daniel fee lɛ. Esa akɛ wɔsɔle wɔhã Yehowa daa ni wɔkɛɛ lɛ bɔ ni wɔnuɔ he wɔhãa lɛ, koni naanyobɔɔ ni yɔɔ wɔ kɛ lɛ teŋ lɛ mli awa. Agbɛnɛ hu, esa akɛ wɔkɛ wɔhiɛ afɔ̃ Yehowa nɔ waa, ni wɔhe wɔye akɛ ebaaye ebua wɔ. Kɛ́ wɔfee nibii nɛɛ, no lɛ, kɛ́ wɔkɛ shihilɛ ko ni miika wɔhemɔkɛyeli lɛ kpe lɛ, wɔbaanyɛ wɔfee ekãa. Bei pii lɛ, kɛ́ wɔfee ekãa lɛ, ehãa mɛi buɔ wɔ. Agbɛnɛ hu, ebaanyɛ ehã mɛi ni hiɛ tsui kpakpa lɛ aná he miishɛɛ akɛ, akɛ amɛ akase Yehowa he nii. Enɛɛmɛi fɛɛ ji yiŋtoi kpakpai ahewɔ ni esa akɛ wɔfee ekãa. w23.08 2 kk. 2; 4 kk. 8-9

Greek wiemɔ ni atsɔɔ shishi akɛ ‘kaa nii kwɛɔ’ lɛ kɔɔ bɔ ni mɛi kaa dadei tamɔ shika tsuru kɛ jwiɛtɛi amɛkwɛɔ akɛ ekpakpa ni lo lɛ he. Nakai nɔŋŋ esa akɛ wɔka nibii ni wɔnuɔ loo wɔkaneɔ lɛ wɔkwɛ akɛ amɛyɛ mli nakai lo. Ehe baahia waa ni wɔ wɔfee nakai, titri lɛ, akɛni amanehulu kpeteŋkpele lɛ miibɛŋkɛ nɛɛ. Yɛ nɔ najiaŋ ni wɔbaahe nibii ni mɛi wieɔ lɛ wɔye kɛkɛ lɛ, esa akɛ wɔkɛ nibii ni wɔnuɔ loo nibii ni wɔkaneɔ lɛ ato nibii ni Biblia lɛ kɛ Yehowa asafo lɛ tsɔɔ wɔ lɛ ahe. Kɛ́ wɔfee nakai lɛ, daimonioi awiemɔ ko lakaŋ wɔ. (Abɛi 14:15; 1 Tim. 4:1) Wɔle akɛ Yehowa webii lɛ baaje amanehulu kpeteŋkpele lɛ mli. Shi akɛ aŋkroaŋkroi lɛ, wɔteŋ mɔ ko mɔ ko leee kɛji ebaahi wala mli yɛ nakai beiaŋ loo ehiŋ wala mli. (Yak. 4:14) Kɛ̃lɛ wɔle akɛ, kɛ́ wɔyɛ wala mli ni amanehulu kpeteŋkpele lɛ je shishi jio, wɔgboi dani eba jio, kɛ́ wɔye Yehowa anɔkwa lɛ wɔbaaná naanɔ wala. No hewɔ lɛ, nyɛhãa wɔ fɛɛ wɔkɛ wɔjwɛŋmɔ amaa hiɛnɔkamɔ kpakpa ni wɔyɔɔ lɛ nɔ, ni be fɛɛ be lɛ, wɔsaa wɔhe wɔto Yehowa gbi lɛ! w23.06 13 kk. 15-16

Wɔleee bɔ ni Biblia mli gbalɛi komɛi baaba mli amɛhã. (Dan. 12:​8, 9) Shi kɛ́ wɔleee bɔ ni gbalɛ ko baaba mli ehã lɛ, no etsɔɔɔ akɛ ebaŋ mli. Wɔheɔ wɔyeɔ akɛ, kɛ́ be ni sa lɛ shɛ lɛ, Yehowa baahã wɔnu shishi tamɔ bɔ ni efee yɛ blema lɛ. Etsɛŋ, gbalɛ ni kɛɔ akɛ abaakɛɛ “toiŋjɔlɛ kɛ shweshweeshwe” lɛ baaba mli. (1 Tes. 5:3) No sɛɛ lɛ, je lɛŋ nɔyelii lɛ baatutua amale jamɔ ni amɛbaakpãtã hiɛ. (Kpo. 17:​16, 17) Kɛkɛ lɛ, amɛtutua Nyɔŋmɔ webii lɛ. (Eze. 38:​18, 19) Enɛ kɛ naagbee ta lɛ, ni ji Harmagedon ta lɛ baaba. (Kpo. 16:​14, 16) Wɔyɛ nɔmimaa waa akɛ, etsɛŋ ni nibii nɛɛ baaba. Shi kɛyashi amɛbaaba lɛ, nyɛhãa wɔyaa nɔ wɔkasea gbalɛi ni yɔɔ Biblia lɛ mli lɛ, ni wɔye wɔbua mɛi krokomɛi ni amɛ hu amɛfee nakai. Enɛ baatsɔɔ akɛ, wɔhiɛ sɔɔ nikeenii nɛɛ ni wɔ-Tsɛ ni yɔɔ ŋwɛi ni sumɔɔ wɔ lɛ kɛdro wɔ lɛ. w23.08 13 kk. 19-20

Be ni bɔfo Paulo wieɔ hemɔkɛyeli, hiɛnɔkamɔ, kɛ suɔmɔ he lɛ, emu esane lɛ naa akɛ, ‘suɔmɔ ji sui nɛɛ ateŋ nɔ ni he hiaa fe fɛɛ.’ (1 Kor. 13:13) Mɛni hewɔ Paulo kɛɛ nakai? Nɔ hewɔ lɛ ji, wɔsɛɛ kɛ́ jeŋ hee ni Nyɔŋmɔ ewo he shi lɛ ba lɛ, ehe ebahiaŋ ni wɔná nakai shiwoo lɛ mli hemɔkɛyeli loo wɔná hiɛnɔkamɔ akɛ ebaaba mli, ejaakɛ eba mli momo. Shi suɔmɔ hu? Ehe baahia ni wɔya nɔ wɔsumɔ Yehowa kɛ wɔnyɛmi gbɔmɔ be fɛɛ be. Anɔkwa, suɔmɔ nɛɛ mli baaya nɔ awa kɛya naanɔ. Agbɛnɛ hu, kɛ́ wɔsumɔɔ wɔnyɛmimɛi lɛ, no hãa anaa akɛ Kristo sɛɛnyiɛlɔi ji wɔ lɛɛlɛŋ. Yesu kɛɛ ebɔfoi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yoh. 13:35) Agbɛnɛ hu, kɛ́ wɔsumɔɔ wɔhe lɛ, no hãa wɔfeɔ ekome. Paulo kɛɛ suɔmɔ ji “kpãa ni feɔ mɛi ekome yɛ gbɛ ni eye emuu nɔ.” (Kol. 3:14) Bɔfo Yohane kɛɛ enyɛmimɛi Kristofoi lɛ akɛ: “Mɔ fɛɛ mɔ ni sumɔɔ Nyɔŋmɔ lɛ, esa akɛ esumɔ enyɛmi hu.” (1 Yoh. 4:21) No hewɔ lɛ, kɛ́ wɔsumɔɔ wɔnyɛmimɛi lɛ, no hãa anaa akɛ wɔsumɔɔ Nyɔŋmɔ. w23.11 8 kk. 1, 3

Biblia lɛ kɛ wɔshihilɛ akɛ Kristofoi lɛ toɔ foidamɔ he. Mɛi ni baada foi nɛɛ kɛyashi naagbee lɛ baaná naanɔ wala. (2 Tim. 4:​7, 8) Esa akɛ wɔmia wɔhiɛ ni wɔya nɔ wɔda foi lɛ, titri lɛ, akɛni eshwɛ fioo ni wɔbaatse kpãa lɛ hewɔ. Bɔfo Paulo tsɔɔ wɔ nɔ ko ni baanyɛ aye abua wɔ ni wɔnyɛ wɔda wɔgbe naa. Ekɛɛ ‘wɔshɛ nɔ fɛɛ nɔ ni tsii wɔfɔ̃ ni wɔkɛ shifimɔ ada foi ni kã wɔhiɛ lɛ.’ Ani no mli lɛ Paulo miitsɔɔ akɛ esaaa akɛ Kristofonyo tereɔ jatsu ko kwraa? Dabi, jeee nakai no mli lɛ etsɔɔ lɛ. Nɔ moŋ ni etsɔɔ ji, esa akɛ wɔshɛ nɔ fɛɛ nɔ ni tsii ni he ehiaaa lɛ wɔfɔ̃ koni wɔnyɛ wɔda foi lɛ jogbaŋŋ ni ekatɔ wɔ. Kɛ́ wɔmiitao wɔda foi lɛ kɛyagbe naa lɛ, esa akɛ wɔkɛ wɔhiɛ afɔ̃ shi koni kɛ́ wɔna nɔ ko ni tsii ni he ehiaaa ni baanyɛ awo wɔnajiaŋ lɛ, wɔjie kɛje jɛmɛ oya nɔŋŋ. Shi yɛ nakai beiaŋ nɔŋŋ lɛ, esaaa akɛ wɔshɛrɛɔ jatsui ni esa akɛ wɔtere lɛ wɔshwieɔ. Kɛ́ wɔshɛrɛ wɔshwie lɛ, wɔjie wɔhe kɛje foidamɔ lɛ mli.—2 Tim. 2:5. w23.08 26 kk. 1-2

Kɛ́ wɔnuɔ nii ashishi lɛ, wɔnuŋ he akɛ susumɔ ni wɔhiɛ kɛ yiŋ ni wɔkpɛɔ yɛ saji ahe lɛ ja ni mɛi krokomɛi anɔ ejaaa. Akɛ nɔkwɛmɔnɔ lɛ, wɔnyɛmimɛi yei lɛ ekomɛi sumɔɔ ni amɛwo makeup, shi amɛteŋ mɛi komɛi hu sumɔɔɔ. Nyɛmimɛi komɛi enuuu dãa kwraa, shi mɛi komɛi hu nuɔ fioo. Wɔ fɛɛ wɔmiisumɔ ni wɔná gbɔmɔtsoŋ hewalɛ kpakpa, shi esoro wɔteŋ mɔ fɛɛ mɔ kɛ gbɛ ni ebaasumɔ ni atsɔ nɔ atsa lɛ. Kɛ́ wɔyanu he akɛ susumɔ ni wɔhiɛ yɛ saji ni tamɔ nɛkɛ ahe lɛ ja fe fɛɛ, ni wɔbɔ mɔdɛŋ akɛ wɔbaakɔne nyɛmimɛi lɛ ayiŋ koni amɛ hu amɛkpɛlɛ nɔ lɛ, wɔbaanyɛ wɔtɔ̃tɔ mɛi komɛi anane ni wɔfite ekomefeemɔ ni yɔɔ asafo lɛ mli lɛ. (1 Kor. 8:9; 10:​23, 24) Akɛ nɔkwɛmɔnɔ lɛ, nɔ najiaŋ ni Yehowa baawo wɔ mlai yɛ nɔ ni wɔwo kɛ nɔ ni wɔkawo he lɛ, ehã wɔ shishitoo mlai koni nomɛi akudɔ wɔ. Ekɛɛ wɔsaa wɔhe bɔ ni sa mɛi ni tsɛɔ amɛhe Nyɔŋmɔ jalɔi, ni wɔkɛ hiɛ ni gboɔ nɔ kɛ “hiɛshikamɔ” awula wɔhe. (1 Tim. 2:​9, 10) No hewɔ lɛ, esaaa akɛ wɔsaa wɔhe bɔ ni kɛ́ mɛi na wɔ lɛ, amɛhiɛ baafee amɛ yaa. Kɛ́ asafoŋ onukpai lɛ hu kɛ Biblia mli shishitoo mlai tsu nii lɛ, amɛwoŋ amɛnyɛmimɛi lɛ mlai yɛ saji ni kɔɔ atade kɛ yitsɔi he lɛ ahe. w23.07 23 kk. 13-14

Yehowa etsɔɔ wɔ nɔ ni kɛ́ wɔfee lɛ wɔbaaná miishɛɛ kɛya naanɔ. Ehã wɔna akɛ, mɛi ni yaa “yoo kwashia” ni yɔɔ hoo lɛ shĩa lɛ kɛ amɛjwɛŋmɔ maa ‘ŋɔɔmɔ’ ni amɛbaaná kɛ́ amɛyabɔ ajwamaŋ lɛ nɔ. Amɛbaayagbe naa yɛ “Gbonyobu lɛ mli tɔ̃ɔ.” (Abɛi 9:​13, 17, 18) Shi mɛi ni yaa “anɔkwa hiɛshikamɔ” shĩa lɛ náa he sɛɛ waa! (Abɛi 9:1) Yehowa miitsɔɔ wɔ nii koni wɔsumɔ nibii ni esumɔɔ lɛ ni wɔnyɛ nibii ni enyɛɔ lɛ. (Lala 97:10) Agbɛnɛ hu, kɛ́ wɔfɔ̃ mɛi nine akɛ amɛba “anɔkwa hiɛshikamɔ” shĩa lɛ ni amɛba lɛ, wɔnáa miishɛɛ waa. Etamɔ nɔ ni ‘wɔyadamɔ maŋ lɛ mli hei ni kwɔlɔ lɛ wɔmiibolɔ akɛ: “Mɔ fɛɛ mɔ ni jwɛŋmɔ esako lɛ aba biɛ.”’ Mɛi fɛɛ ni boɔ wɔtsɛmɔ lɛ toi ni amɛbafataa wɔhe lɛ kɛ wɔ fɛɛ baaná jɔɔmɔi bianɛ. Shi jeee no kɛkɛ. Kɛ́ wɔtee nɔ ‘wɔnyiɛ niiashishinumɔ gbɛ lɛ nɔ tɛ̃ɛ’ lɛ, wɔbaahi shi kɛya naanɔ.—Abɛi 9:​3, 4, 6. w23.06 24 kk. 17-18

Kɛ́ mɔ ko ni okɛtsuɔ nii loo mɔ ko ni okɛyaa skul lɛ bi bo ohemɔkɛyeli lɛ he sane lɛ, te onuɔ he ohãa tɛŋŋ? Ani otsui fãa? Kɛ́ nakai lɛ, jeee okome. Wɔteŋ mɛi pii hu atsui fãa. Ni kɛ̃lɛ, ani ole akɛ, kɛ́ mɔ ko bi wɔ wɔhemɔkɛyeli lɛ he sane lɛ, no baanyɛ ahã wɔna nɔ ni esusuɔ loo eheɔ eyeɔ ni no baanyɛ aye abua wɔ ni wɔshiɛ wɔhã lɛ? Shi bei komɛi lɛ, bɔ ni mɛi komɛi biɔ wɔ saji lɛ amɛhãa lɛ baanyɛ ekɛ naataamɔ aba. Esaaa akɛ enɛ feɔ wɔ naakpɛɛ, ejaakɛ mɛi komɛi yɛ ni akɛɛ amɛ nibii gbohii yɛ wɔhe. (Bɔf. 28:22) Agbɛnɛ hu, wɔyɛ “naagbee gbii lɛ” amli, ni wɔle akɛ mɛi baatsɔmɔ “mɛi ni anyɛɛɛ akɛ amɛ afee kpaŋmɔ” kɛ “mɛi ni hiɛ yɔɔ la.” (2 Tim. 3:​1, 3) Ekolɛ obaabi ohe akɛ, ‘Kɛ́ mɔ ko bi mi sane ko ni baanyɛ ekɛ naataamɔ aba lɛ, te mafee tɛŋŋ mikɛ naajɔlɛ ahã lɛ hetoo?’ Su ko ni baanyɛ aye abua wɔ ji, mlijɔlɛ. Mɔ ko ni mli jɔ lɛ nyɛɔ emɔɔ etsui mli kɛ́ mɔ ko wo emli la loo eleee nɔ ni ebaafee yɛ shihilɛ ko mli. w23.09 14 kk. 1-2

Gbɛtsɔɔmɔi ni Yehowa asafo lɛ kɛhãa wɔ lɛ buɔ wɔhe. Akɛ nɔkwɛmɔnɔ lɛ, abɔɔ wɔ kɔkɔ ni wɔkasumɔ heloonaa nibii babaoo, ni agbɛnɛ hu, wɔtsi wɔhe kɛje nibii ni baahã wɔku Nyɔŋmɔ mla mli lɛ ahe. Kɛ́ wɔbo gbɛtsɔɔmɔi nɛɛ toi lɛ, Yehowa jɔɔ wɔ waa. (Yes. 48:​17, 18; 1 Tim. 6:​9, 10) Ŋwanejee ko bɛ he akɛ, Yehowa baaya nɔ etsɔ adesai anɔ ekɛ gbɛtsɔɔmɔi ahã wɔ yɛ amanehulu kpeteŋkpele lɛ mli kɛbote Afi Akpe Nɔyeli lɛ mli. Ani wɔbaaya nɔ wɔkɛ gbɛtsɔɔmɔi ni amɛkɛbaahã wɔ lɛ atsu nii? Bɔ ni wɔfeɔ wɔnii yɛ gbɛtsɔɔmɔi ni akɛhãa wɔ bianɛ lɛ ahe lɛ ni baatsɔɔ. Enɛ hewɔ lɛ, nyɛhãa wɔyaa nɔ wɔkɛ Yehowa gbɛtsɔɔmɔi atsua nii be fɛɛ be, kɛ́ gbɛtsɔɔmɔi nɛɛ jɛ hii ni kwɛɔ wɔnɔ lɛ aŋɔɔ po. (Yes. 32:​1, 2; Heb. 13:17) Be ni wɔfeɔ nakai lɛ, nyɛhãa wɔhea Yehowa, mɔ ni tsɔɔ wɔ gbɛ lɛ wɔyea kɛ wɔtsui fɛɛ, ejaakɛ wɔle akɛ eetsɔɔ wɔ gbɛ koni wɔkayaje oshãra ko ni baafite wɔ kɛ lɛ teŋ lɛ mli, ni agbɛnɛ hu, wɔyashɛ jeŋ hee lɛ mli shweshweeshwe ni wɔná naanɔ wala. w24.02 25 kk. 17-18

Bɔfo Paulo kɛ miishɛɛ sɔmɔ Yehowa, shi ekɛ naagbai pii hu kpe. Akɛ nɔkwɛmɔnɔ lɛ, bei pii lɛ Paulo fãa gbɛ kakadaŋŋ, ni nakai beiaŋ lɛ, gbɛfãa bɛ mlɛo. Be ni efãa gbɛ lɛ, ekɛ “oshãrai kpe yɛ fai ahiɛ,” kɛ agbɛnɛ hu, “yɛ julɔi adɛŋ.” Bei komɛi hu lɛ, mɛi ni sumɔɔɔ Kristofoi asane lɛ yiɔ lɛ. (2 Kor. 11:​23-27) Ni yɛ asafo lɛ mli po lɛ, jeee be fɛɛ be nyɛmimɛi lɛ ahiɛ sɔɔ mɔdɛŋ ni ebɔɔ koni eye ebua amɛ lɛ. (2 Kor. 10:10; Fip. 4:15) Mɛni ye ebua Paulo ni etee nɔ esɔmɔ Yehowa yɛ naagbai nɛɛ fɛɛ sɛɛ? Nibii ni ekase yɛ Ŋmalɛ lɛ mli kɛ bɔ ni Yehowa ye ebua lɛ lɛ hã ebale Yehowa jogbaŋŋ. Paulo bahe eye waa akɛ, Yehowa Nyɔŋmɔ sumɔɔ lɛ. (Rom. 8:​38, 39; Efe. 2:​4, 5) Ni lɛ hu ebasumɔ Yehowa waa. Nɔ kome ni hãa wɔnaa nakai ji, ‘etee nɔ esɔmɔ mɛi krɔŋkrɔŋi lɛ.’—Heb. 6:10. w23.07 9 kk. 5-6

Biblia lɛ tsɛɔ maŋ nɔyelɔi lɛ akɛ “hegbɛi ni yeɔ nɔ lɛ.” Mɛi pii kpɛlɛɔ nɔ akɛ ehe miihia ni aná nɔyelɔi yɛ maŋ lɛ mli, ni amɛboɔ mlai ni nɔyelɔi nɛɛ woɔ lɛ ekomɛi toi. Shi nɛkɛ mɛi nɛɛ nɔŋŋ booo mlai lɛ ekomɛi toi kɛ́ amɛnuɔ he akɛ ejaaa loo ebaahã amɛhe afi amɛ. Biblia lɛ hãa wɔleɔ akɛ, adesai nɔyelii hãa mɛi piŋɔ, Satan ni kudɔɔ amɛ, ni etsɛŋ abaakpãtã amɛhiɛ. (Lala 110:​5, 6; Jaj. 8:9; Luka 4:​5, 6) Shi ehãa wɔleɔ hu akɛ, “mɔ fɛɛ mɔ ni teɔ shi ewoɔ hegbɛ lɛ, eete shi eewo Nyɔŋmɔ gbɛjianɔtoo.” Bianɛ lɛ, Yehowa eŋmɛ nɔyelii lɛ gbɛ ni amɛye wɔnɔ koni nibii akafee basabasa, ni eesumɔ ni wɔbo amɛ toi. No hewɔ lɛ, esa akɛ wɔkɛ nɔyelɔi lɛ ‘agbɛnaa nii ahã amɛ,’ kɛ́ too ni jio, bulɛ ni jio, toiboo ni jio. (Rom. 13:​1-7) Mlai lɛ ekomɛi yɛ ni ekolɛ wɔbaanu he akɛ ebaahã wɔhe afi wɔ, loo ejaaa, loo ebaahã wɔfite shika pii. Shi wɔboɔ Yehowa toi, ni lɛ ekɛɛ wɔbo nɔyelɔi lɛ toi kɛ́ nɔ ni amɛbiɔ ni wɔfee lɛ ekuuu emla ko mli.—Bɔf. 5:29. w23.10 8 kk. 9-10

Be ni afɔ Samson lɛ, no mli lɛ, Filistibii lɛ ni yeɔ Israel maŋ lɛ nɔ, ni amɛhãaa Israelbii lɛ ahe ajɔ amɛ kwraa. (Koj. 13:1) Akɛni Filistibii lɛ ayitsoŋ wa hewɔ lɛ, Israelbii lɛ piŋ waa. Yehowa hala Samson akɛ ‘enyiɛ hiɛ kɛhere Israelbii lɛ kɛje Filistibii lɛ adɛŋ.’ (Koj. 13:5) Ehe bahia ni Samson kɛ ehiɛ afɔ̃ Yehowa nɔ koni enyɛ etsu nitsumɔ ni wa nɛɛ. Be ko lɛ, Filistibii lɛ asraafoi komɛi ba Lehi, ni eeenyɛ efee akɛ eyɔɔ Yuda kpokpaa lɛ nɔ lɛ, koni amɛbamɔ Samson. No mli lɛ, Yuda hii lɛ miishe gbeyei, no hewɔ lɛ, amɛkpɛ amɛyiŋ akɛ amɛbaamɔ Samson ni amɛkɛ lɛ ahã Filistibii lɛ. Amɛfĩmɔ lɛ kɛ kpãi hei enyɔ ni amɛkɛ lɛ yahã Filistibii lɛ. (Koj. 15:​9-13) Shi ‘Yehowa mumɔ lɛ ba Samson nɔ’ ni etserɛ kpãi lɛ yɛ eniji ahe. “Ena tejinuu ko ni gbo etsɛko kadaa wu,” ni ekɔ ni ekɛgbe Filisti hii 1,000!—Koj. 15:​14-16. w23.09 2-3 kk. 3-4

Yehowa etsɔ Biblia lɛ nɔ ejie ‘enaanɔ yiŋ ni eto’ lɛ kpo etsɔɔ wɔ fiofio. Akɛni “Yehowa hãa nɔ fɛɛ nɔ tsuɔ eyiŋtoo he nii” hewɔ lɛ, nɔ ko nɔ ko bɛ ni baanyɛ afite eyiŋtoo. (Abɛi 16:4) Enɛ hewɔ lɛ, eyiŋtoo lɛ hiɔ shi kɛyaa naanɔ. Mɛɛ yiŋ Yehowa eto? Ni mɛɛ tsakemɔi efee koni enyɛ etsu eyiŋtoo lɛ he nii? Be ni Yehowa bɔ Adam kɛ Hawa lɛ, ehã amɛle yiŋtoo ni eyɔɔ kɛhã adesai. Ekɛɛ amɛ akɛ ‘amɛfɔ ni amɛyi afa, ni amɛyi shikpɔŋ lɛ nɔ obɔ, ni amɛkwɛ nɔ, ni amɛye bɔɔ nii fɛɛ ni yɔɔ wala mli yɛ shikpɔŋ lɛ nɔ lɛ anɔ.’ (1 Mo. 1:28) Be ni Adam kɛ Hawa tse atua ni amɛhã adesai fɛɛ fee esha lɛ, no fiteee Yehowa yiŋtoo lɛ. Eto gbɛjianɔ kroko koni enyɛ etsu eyiŋtoo lɛ he nii. Be ni atse atua lɛ nɔŋŋ ni ekpɛ eyiŋ akɛ ebaato Maŋtsɛyeli ko shishi yɛ ŋwɛi, ni ebaatsɔ nɔ etsu eyiŋtoo kɛhã adesai kɛ shikpɔŋ lɛ he nii.—Mat. 25:34. w23.10 20 kk. 6-7

Yehowa baanyɛ eye ebua wɔ ni wɔya nɔ wɔsɔmɔ lɛ. Jeee be fɛɛ be wɔbaaná lɛ mlɛo, titri lɛ, kɛ́ wɔyɛ gbɔjɔmɔi komɛi ni wɔmiibɔ he mɔdɛŋ shi eyako. Ebaanyɛ eba lɛ akɛ wɔgbɔjɔmɔ lɛ mli wa fe bɔfo Petro nɔ lɛ po. Shi Yehowa baanyɛ eye ebua wɔ ni wɔnijiaŋ akaje wui. (Lala 94:​18, 19) Akɛ nɔkwɛmɔnɔ lɛ, afii babaoo dani nyɛmi nuu ko baaba asafo lɛ mli lɛ, no mli lɛ ekɛ hii náa bɔlɛ. Emia ehiɛ waa ekpa su nɛɛ, shi bei komɛi lɛ, enáa nakai akɔnɔ lɛ ekoŋŋ. Mɛni ye ebua lɛ ni enijiaŋ ejeee wui lɛ? Ewie akɛ: “Yehowa wajeɔ wɔ.” Ekɛfata he akɛ: “Yehowa mumɔ lɛ ni ekɛyeɔ ebuaa mi hewɔ lɛ, mile akɛ manyɛ maya nɔ manyiɛ anɔkwale lɛ mli. Yehowa kɛ mi etsu nibii babaoo yɛ asafo lɛ mli, ni yɛ migbɔjɔmɔ lɛ fɛɛ sɛɛ lɛ, eyaa nɔ ewajeɔ mi.” w23.09 23 kk. 12

Nyɛmimɛi oblahii, ja nyɛmia nyɛhiɛ waa dani nyɛbaanyɛ nyɛbatsɔmɔ mɛi ni edara yɛ mumɔŋ. Ehe baahia ni nyɛkase mɛi ni feɔ nɔkwɛmɔnɔ kpakpa, nyɛle bɔ ni ajwɛŋɔ jogbaŋŋ, nyɛtsɔmɔ mɛi ni abaanyɛ amu afɔ̃ amɛnɔ, nyɛkase nibii ni baaye abua nyɛ yɛ shihilɛ mli, ni nyɛsaa nyɛhe kɛhã nibii ni nyɛbaasumɔ ni nyɛfee wɔsɛɛ. Ekolɛ kɛ́ osusu nibii sɔŋŋ ni esa akɛ ofee koni obatsɔ mɔ ko ni eda yɛ mumɔŋ lɛ ahe lɛ, onuɔ he akɛ onyɛŋ oshɛ he kɔkɔɔkɔ. Shi obaanyɛ. Hã ehi ojwɛŋmɔ mli be fɛɛ be akɛ, Yehowa efee klalo akɛ ebaaye ebua bo. (Yes. 41:​10, 13) Onyɛmimɛi Kristofoi lɛ hu yɛ jɛmɛ. Amɛ hu amɛbaaye amɛbua bo. Kɛ́ obatsɔ mɔ ko ni eda yɛ mumɔŋ lɛ, obaaná miishɛɛ waa, ni otsui baanyɔ omli. Nyɛmimɛi oblahii, wɔsumɔɔ nyɛ waa. Yehowa ajɔɔ nyɛ waa yɛ nyɛhiɛ ni nyɛmiaa koni nyɛbatsɔmɔ mɛi ni edara yɛ mumɔŋ lɛ hewɔ. w23.12 29 kk. 19-20

Ŋɔɔ lɛ akɛ, okɛ nyɛmimɛi komɛi etee henaabuamɔ ko. Nyɛyaná nyɛhewɔŋ miishɛɛ waa ni nyɛsha mfoniri. Osha mfonirii lɛ etɛ sɔŋŋ koni kɛ́ aleenɔ eko eyafeee fɛo lɛ, ojie yɛ mli. Be ni okwɛɔ mfonirii etɛ lɛ, ona akɛ ekome ko yɛ mli ni nyɛmi lɛ eko eŋa ehiŋmɛii yɛ mli. No hewɔ lɛ, obaajie no yɛ mli, ejaakɛ oyɛ mfonirii enyɔ sɔŋŋ ni mɔ fɛɛ mɔ, ni nakai nyɛmi lɛ hu fata he lɛ, miiŋmɔ yɛ mli. Bei pii lɛ, kɛ́ wɔkɛ wɔnyɛmimɛi lɛ fee ekome kɛfee nɔ ko lɛ, wɔnáa miishɛɛ waa, ni wɔhiɛ kpaaa nɔ kɔkɔɔkɔ. Shi ŋɔɔ lɛ akɛ, be ko be ni okɛ nyɛmimɛi komɛi ebua nyɛhe naa ni nyɛmiiná nyɛhewɔŋ miishɛɛ lɛ, nyɛmi lɛ eko fee nɔ ko loo ewie nɔ ko ni dɔ bo waa. Mɛni esa akɛ ofee? Esa akɛ ojie yɛ ojwɛŋmɔ mli, tamɔ bɔ ni obaajie mfoniri ni bɛ fɛo lɛ yɛ ekrokomɛi lɛ ateŋ lɛ. (Efe. 4:32) Akɛni wɔkaiɔ nibii kpakpai babaoo ni wɔkɛ wɔnyɛmi lɛ efee ni hã wɔná miishɛɛ hewɔ lɛ, esaaa akɛ efeɔ naagba kwraa akɛ wɔbaajie nɔ ni efee ni gba wɔnaa lɛ kɛje wɔjwɛŋmɔ mli. Wɔmiisumɔ ni wɔkɛ nibii kpakpai ni wɔkaiɔ yɛ ehe lɛ pɛ ato wɔjwɛŋmɔ mli. w23.11 12 kk. 16-17

Greek wiemɔi ni Paulo kɛtsu nii yɛ biɛ lɛ hãa wɔnaa akɛ, esa akɛ Kristofoi yei awo atade ni bulɛ yɔɔ he, ni agbɛnɛ hu, amɛsusu bɔ ni mɛi baana amɛhesaamɔ amɛhã lɛ he. Nyɛmimɛi yei ni kɛ hiɛ ni gboɔ nɔ saa nyɛhe, wɔsumɔɔ nyɛsane waa, ni wɔmiihã nyɛ aekoo! Naa su kroko ni nyɛmimɛi yei fɛɛ ni edara yɛ mumɔŋ lɛ jieɔ lɛ kpo. No ji, amɛkɔɔ sane sɛɛ. Shi kɛ́ akɛɛ mɔ ko kɔɔ sane sɛɛ lɛ, te etsɔɔ tɛŋŋ? Etsɔɔ akɛ, mɔ lɛ nyɛɔ ekpaa ekpakpa kɛ efɔŋ mli, ni no sɛɛ lɛ, ehalaa akɛ ebaafee nɔ ni ja. Abigail fee nɔkwɛmɔnɔ kpakpa yɛ enɛ gbɛfaŋ. Be ko lɛ, ewu kpɛ yiŋ gbonyo ko ni kɛ weku muu lɛ fɛɛ wala wo oshãra mli. Shi Abigail kɔ sane sɛɛ ni efee nɔ ko yɛ naagba lɛ he amrɔ nɔŋŋ, ni no here weku muu lɛ fɛɛ yiwala. (1 Sam. 25:​14-23, 32-35) Kɛ́ wɔkɔɔ sane sɛɛ lɛ, no baawa wɔ ni wɔle be ni esa akɛ wɔwie kɛ be ni esa akɛ wɔfee diŋŋ. Agbɛnɛ hu, ebaaye ebua wɔ ni wɔfee nibii ni tsɔɔ akɛ wɔsusuɔ mɛi ahe ni yɛ nakai beiaŋ nɔŋŋ lɛ, wɔkoliii amɛsaji amli.—1 Tes. 4:11. w23.12 20 kk. 8-9

Bɔfo Paulo ŋma wolo nɛɛ eyahã asafo ni yɔɔ Roma lɛ. Nyɛmimɛi ni yɔɔ asafo nɛɛ mli lɛ kase Yehowa kɛ Yesu he nii, amɛhe amɛnɔ amɛye, ni amɛbatsɔmɔ Kristofoi. Amɛhemɔkɛyeli lɛ hewɔ lɛ, Nyɔŋmɔ bu amɛ jalɔi, ni ekɛ mumɔ krɔŋkrɔŋ lɛ fɔ amɛ mu. (Rom. 5:1) Enɛ hã amɛbaná hiɛnɔkamɔ ko ni nɔ bɛ ni baanyɛ aba mli hu. Sɛɛ mli lɛ, Paulo ŋma wolo emaje Kristofoi ni afɔ amɛ mu ni yɔɔ Efeso lɛ ni ewie hiɛnɔkamɔ ni Nyɔŋmɔ ehã amɛ lɛ he. Nakai hiɛnɔkamɔ lɛ ji, amɛbaaná “gboshinii kɛhã mɛi krɔŋkrɔŋi lɛ.” (Efe. 1:18) Agbɛnɛ hu, be ni Paulo ŋma wolo emaje Kolosebii lɛ, etsɔɔ amɛ he ni amɛhiɛnɔkamɔ lɛ baaba mli yɛ. Etsɛ amɛhiɛnɔkamɔ lɛ akɛ, ‘hiɛnɔkamɔ ni akɛto ahã amɛ yɛ ŋwɛi.’ (Kol. 1:​4, 5) Saji nɛɛ ni Paulo wie lɛ hãa wɔnaa akɛ, Kristofoi ni afɔ amɛ mu lɛ ahiɛnɔkamɔ ji, abaatee amɛ shi kɛya ŋwɛi, amɛbaahi shi kɛya naanɔ yɛ jɛmɛ, ni amɛkɛ Kristo baaye maŋtsɛ.—1 Tes. 4:​13-17; Kpo. 20:6. w23.12 9 kk. 4-5

Greek wiemɔ ni atsɔɔ shishi akɛ ‘bu’ yɛ ŋmalɛ nɛɛ mli lɛ ji wiemɔ ni akɛtsuɔ nii kɛ́ aawie asraafoi ni miibu maŋ ko he lɛ ahe. Mɛi ni yɔɔ maŋ lɛ mli lɛ nyɛɔ amɛwɔɔ ni amɛsheee gbeyei, ejaakɛ amɛle akɛ asraafoi lɛ miibu maŋ lɛ he. Nakai nɔŋŋ Nyɔŋmɔ toiŋjɔlɛ lɛ buɔ wɔtsuii kɛ wɔjwɛŋmɔi ahe ni wɔtsui yeee, ejaakɛ wɔle akɛ efɔŋ ko ninaŋ wɔ. (Lala 4:8) Tamɔ bɔ ni eba lɛ yɛ Hana gbɛfaŋ lɛ, kɛ́ wɔshihilɛ lɛ tsakeee amrɔ nɔŋŋ po lɛ, wɔyeŋ wɔtsui. (1 Sam. 1:​16-18) Ni kɛ́ wɔyeee wɔtsui lɛ, ewaaa akɛ wɔbaasusu nii ahe jogbaŋŋ ni wɔkpɛ yiŋ kpakpai. Mɛni wɔbaanyɛ wɔfee? Kɛ́ wɔhao lɛ, esa akɛ wɔbo wɔtsɛ mfonirifeemɔŋ bulɔ lɛ. Yɛ mɛɛ gbɛ nɔ? Esa akɛ wɔsɔle aahu kɛyashi wɔbaanu he akɛ wɔná Nyɔŋmɔ toiŋjɔlɛ lɛ. (Luka 11:9; 1 Tes. 5:17) Kɛ́ okɛ shihilɛ ko ni mli wa miikpe lɛ, yaa nɔ osɔle, ni Yehowa toiŋjɔlɛ lɛ baabu otsui kɛ ojwɛŋmɔ he.—Rom. 12:12. w24.01 21 kk. 5-6

Apiŋ Yesu, ajɛ lɛ, ni afolɔ enaa. Fɛɛ sɛɛ lɛ, etee nɔ efi shi koni enyɛ etse e-Tsɛ lɛ gbɛ́i lɛ he. Yesu le akɛ esa akɛ ebo e-Tsɛ lɛ toi yɛ nibii fɛɛ mli. No hewɔ lɛ, efeee lɛ hiɛgbele akɛ ebaatsɔ nibii nɛɛ amli. (Heb. 12:2) Agbɛnɛ hu, ele akɛ Satan ji mɔ ni hɔ shihilɛi ni mli wawai fɛɛ ni etsɔ mli yɛ nakai be lɛ mli lɛ sɛɛ. (Luka 22:​2-4; 23:​33, 34) Satan yasusu akɛ ebaanyɛ ehã Yesu atɔ̃ Yehowa nɔ. Shi ehiɛ gbo kpɔtɔɔ ejaakɛ eyayeee omanye. Yesu hã ana faŋŋ akɛ, Satan ji amalelɔ, ni akɛ Yehowa yɛ tsuji anɔkwafoi ni baaye lɛ anɔkwa kɛji amɛkɛkai ni mli wawai po kpe! Ani oosumɔ ni ohã Yesu, ni ji wɔ-Maŋtsɛ lɛ aná miishɛɛ? Belɛ, yaa nɔ ojie Yehowa yi ni oye obua mɛi koni amɛle lɛ jogbaŋŋ. Kɛ́ ofee nakai lɛ, belɛ ookase Yesu. (1 Pet. 2:21) Tamɔ Yesu fee lɛ, bo hu ohã Yehowa mii eshɛ ehe, ni oohã aana faŋŋ akɛ ehenyɛlɔ Satan ji amalelɔ! w24.02 11 kk. 11-13

Yɛ afii enumɔ ni eho nɛɛ amli lɛ, abaptisi mɛi ni fa fe miliɔn kome ni amɛbatsɔmɔ Yehowa Odasefoi. Kɛ́ ojɔɔ ohe nɔ ohã Yehowa lɛ, no tsɔɔ akɛ okpɛ oyiŋ akɛ obaatsɔ Yesu Kristo kaselɔ, ni ohã Nyɔŋmɔ suɔmɔnaa nii ni obaafee lɛ he ahia bo fe nɔ fɛɛ nɔ yɛ oshihilɛ mli. Mɛni ohe nɔ ni ojɔɔ lɛ baabi ni ofee? Yesu kɛɛ: “Kɛ́ mɔ ko miisumɔ akɛ enyiɛ misɛɛ lɛ, ekwa ehe.” (Mat. 16:24) Abaanyɛ atsɔɔ Greek wiemɔ ni atsɔɔ shishi akɛ “ekwa ehe” lɛ shishi hu akɛ, “ekafee nɔ ni lɛ diɛŋtsɛ esumɔɔ.” Kɛ́ ojɔɔ ohe nɔ ohã Yehowa lɛ, esaaa akɛ ofeɔ nɔ ko ni esumɔɔɔ. (2 Kor. 5:​14, 15) Enɛ tsɔɔ akɛ, obaatsi ohe kɛje “heloo lɛ nitsumɔi lɛ” ahe, tamɔ ajwamaŋbɔɔ nɛkɛ. (Gal. 5:​19-21; 1 Kor. 6:18) Ani ebaawa kɛhã bo akɛ obaatsi ohe kɛje nɛkɛ nibii nɛɛ ahe? Kɛ́ osumɔɔ Yehowa, ni oheɔ oyeɔ akɛ kɛ́ obo emlai lɛ toi lɛ obaaná he sɛɛ lɛ, ewaŋ kɛhãŋ bo kwraa.—Lala 119:97; Yes. 48:​17, 18. w24.03 2 kk. 1; 3 kk. 4

Mɛi ni Yehowa yɔɔ amɛhe miishɛɛ lɛ, amɛ ni ehãa amɛ emumɔ krɔŋkrɔŋ lɛ. (Mat. 12:18) Wɔbaanyɛ wɔbi wɔhe akɛ, ‘Ani minyɛ mijie mumɔ lɛ yibii lɛ eko kpo yɛ mishihilɛ mli?’ Ani bianɛ lɛ, otoɔ otsui shi waa ohãa mɛi fe be ni obaleko Yehowa lɛ? Kɛ́ ofee nibii ni baahã onyɛ ojie mumɔ lɛ yibii lɛ kpo jogbaŋŋ yɛ oshihilɛ mli lɛ, no baahã ohe oye waa akɛ Yehowa yɛ ohe miishɛɛ. Mɛi ni Yehowa yɔɔ amɛhe miishɛɛ lɛ, amɛ ni amɛnáa kpɔmɔnɔ lɛ he sɛɛ. (1 Tim. 2:​5, 6) Eyɛ mli akɛ abaptisi wɔ ni wɔheɔ wɔyeɔ akɛ Yesu kɛ ewala bashã afɔle ehã wɔ moŋ, shi bei komɛi lɛ, wɔnuɔ he akɛ Yehowa bɛ wɔhe miishɛɛ. Kɛ́ eba lɛ nakai lɛ, mɛni wɔbaanyɛ wɔfee? Nɔ kome ni esa akɛ wɔkai ji akɛ, jeee be fɛɛ be bɔ ni wɔnuɔ he wɔhãa yɛ sane ko he lɛ ja, shi nɔ fɛɛ nɔ ni Yehowa kɛɔ wɔ lɛ ja be fɛɛ be. Yehowa buɔ mɛi fɛɛ ni heɔ kpɔmɔnɔ lɛ amɛyeɔ lɛ jalɔi, ni ewo shi akɛ ebaajɔɔ amɛ.—Lala 5:12; Rom. 3:26. w24.03 30 kk. 15; 31 kk. 17