Sanebimɔi ni Jɛ Kanelɔi Adɛŋ
Mɛni bɔfo Paulo tsɔɔ beni ewie akɛ “nii ni yɔɔ sɛɛ gbɛ lɛ [eejie ehiɛ] yɛ nɔ, shi nii ni yɔɔ hiɛ gbɛ lɛ ahe moŋ [ejwɛŋɔ]” lɛ? (Filipibii 3:13) Ani mɔ ko baanyɛ aje gbɛ eha ehiɛ akpa nɔ ko nɔ?
Dabi, yɛ shihilɛi pii amli lɛ, wɔnyɛŋ wɔje gbɛ wɔjie nɔ̃ kaimɔ ko kɛjɛ wɔjwɛŋmɔ mli. Anɔkwale lɛ ji akɛ, wɔhiɛ kpaa nibii ni wɔbaasumɔ ni wɔkai lɛ mli babaoo nɔ, ni wɔkaiɔ nibii ni etsɛŋ ni wɔhiɛ baakpa nɔ lɛ moŋ babaoo. Belɛ, mɛni Paulo tsɔɔ beni eŋmala wiemɔi ni yɔɔ Filipibii 3:13 lɛ mɔ? Emli sane lɛ yeɔ ebuaa wɔ ni wɔnuɔ shishi.
Yɛ Filipibii yitso 3 lɛ, Paulo wie “nɔ ko yɛ heloo gbɛfaŋ ni kulɛ [ekɛ ehiɛ] aaafɔ̃ nɔ” lɛ he. Ewie Yudafonyo diɛŋtsɛ ni eji ni tɔmɔ ko bɛ he, kɛ ekaa ni eyɔɔ kɛha Mla lɛ—ni ji nibii ni kulɛ ebaanyɛ eha ena hegbɛi komɛi yɛ Israel maŋ lɛ mli lɛ ahe. (Filipibii 3:4-6; Bɔfoi lɛ Asaji 22:3-5) Shi kɛlɛ, ekpoo nɛkɛ hegbɛi ni eyɔɔ nɛɛ fɛɛ, ni kɛ wɔɔkɛɛ lɛ, ebu fɛɛ akɛ laajemɔ nii. Mɛni hewɔ? Ejaakɛ ena nɔ kroko ni hi fe nomɛi—“Yesu Kristo . . . he nilee ni fe fɛɛ lɛ.”—Filipibii 3:7, 8.
Oti wulu fe fɛɛ ni mã Paulo hiɛ ji ni enine ashɛ, jeee gbɛhe ni nɔ kwɔ yɛ je nɛŋ, shi moŋ “gbohiiashitee lɛ nɔ.” (Filipibii 3:11, 12) Enɛ hewɔ lɛ, eŋma akɛ: “Nii ni yɔɔ sɛɛ gbɛ lɛ miijie mihiɛ yɛ nɔ, shi nii ni yɔɔ hiɛ gbɛ lɛ ahe moŋ mipeleɔ, ni miitiu oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he juromɔ nɔ lɛ he.” (Filipibii 3:13, 14) Beni Paulo wie akɛ “nii ni yɔɔ sɛɛ gbɛ lɛ [eejie ehiɛ] yɛ nɔ” lɛ, etsɔɔɔ akɛ yɛ gbɛ ko nɔ lɛ ejie “nii ni yɔɔ sɛɛ gbɛ lɛ” kɛjɛ jwɛŋmɔ mli kwraa. Eka shi faŋŋ akɛ, ekaiɔ nibii nɛɛ lolo, ejaakɛ etsĩ tã kɛtsɔ hiɛ yɛ eniŋmaa lɛ mli. Kɛfata he lɛ, yɛ shishijee Hela wiemɔ lɛ mli lɛ, ekɛ feemɔ wiemɔ henɔ ko ni tsɔɔ nifeemɔ ni miiya nɔ tsu nii, shi jeee nifeemɔ ni eba naagbee. Ekɛɛ “miijie mihiɛ yɛ nɔ,” jeee “mihiɛ ekpa nɔ.”
Hela wiemɔ ni atsɔɔ shishi akɛ “hiɛ eje nɔ” (e·pi·lan·thaʹno·mai) lɛ hiɛ shishinumɔi sɔrɔtoi, ni amɛteŋ ekome ji “ni asusuuu nɔ ko he,” loo “akpoo.” Taakɛ Exegetical Dictionary of the New Testament (ni Horst Balz kɛ Gerhard Schneider ŋma) lɛ tsɔɔ lɛ, enɛ ji nɔ ni “aajie hiɛ yɛ nɔ” lɛ tsɔɔ yɛ Filipibii 3:13. Paulo eyaaa nɔ esusuuu nibii ni eŋmɛɛ he lɛ ahe be fɛɛ be. Ekase bɔ ni efeɔ ebuɔ nomɛi akɛ nibii ni he ehiaaa. Amɛtamɔ “tumu nɔ nii” kɛji akɛto ŋwɛi hiɛnɔkamɔ lɛ he.—Filipibii 3:8.
Te Paulo wiemɔi lɛ baanyɛ akɔ wɔhe aha tɛŋŋ ŋmɛnɛ? Ojogbaŋŋ, taakɛ Paulo fee lɛ, ekolɛ Kristofonyo ko kɛ nibii esha afɔle koni esɔmɔ Nyɔŋmɔ. Ekolɛ eŋmɛɛ eshihilɛ mli nitsumɔ ni shika yɔɔ mli lɛ he kɛha be-fɛɛ sɔɔmɔ lɛ. Aloo ekolɛ ejɛ niiatsɛmɛi aweku mli, shi amɛkɛ lɛ ejaaa heloo gbɛfaŋ nii ni amɛyɔɔ lɛ dɔŋŋ, yɛ anɔkwale lɛ he miishɛɛ ni amɛbɛ lɛ hewɔ. Nɛkɛ afɔleshaai nɛɛ sa yijiemɔ waa, shi amɛjeee nibii ni sa akɛ aha jwɛŋmɔ ahi nɔ be fɛɛ be. Kristofonyo ‘jieɔ ehiɛ yɛ nɔ,’ loo esusuuu “nii ni yɔɔ sɛɛ gbɛ lɛ” ahe dɔŋŋ, yɛ wɔsɛɛ be ni yɔɔ nyam ni mɛɔ lɛ lɛ hewɔ.—Luka 9:62.
Ekolɛ abaanyɛ akɛ shishitoo mla ni yɔɔ Paulo wiemɔi lɛ asɛɛ lɛ atsu nii yɛ gbɛ kroko hu nɔ. Kristofonyo ni kɛ ehe ewo jeŋba fɔŋ ko mli dani ebakase Nyɔŋmɔ he nii lɛ hu? (Kolosebii 3:5-7) Aloo ŋɔɔ lɛ akɛ, beni ebatsɔ Kristofonyo sɛɛ lɛ, efee esha ko ni hiɛdɔɔ yɔɔ mli, ni asafo lɛ gbala etoi. (2 Korintobii 7:8-13; Yakobo 5:15-20) Ojogbaŋŋ, kɛji eshwa ehe lɛlɛŋ ni etsake egbɛ̀i lɛ, no lɛ “aju [ehe].” (1 Korintobii 6:9-11) Nɔ ni ba lɛ eho etee. Ekolɛ ehiɛ kpaŋ nɔ ni efee lɛ nɔ diɛŋtsɛ—lɛlɛŋ, eeefee nilelɔ akɛ eeekase nii kɛjɛ nakai niiashikpamɔ lɛ mli koni ekayafee nakai esha lɛ ekoŋŋ. Shi kɛlɛ, ‘ejieɔ ehiɛ yɛ nɔ’ kɛ shishinumɔ akɛ eyaaa nɔ ebuuu ehe fɔ daa nɛɛ dɔŋŋ. (Okɛto Yesaia 65:17 he.) Akɛni adamɔ Yesu afɔleshaa lɛ nɔ akɛ ehe eke lɛ hewɔ lɛ, ebɔɔ mɔdɛŋ akɛ ebaaha nɔ ni eho lɛ aho aya.
Yɛ Filipibii 3:13, 14 lɛ, Paulo wie lɛ diɛŋtsɛ ehe akɛ foidalɔ ni miida foi, ni ‘miipele kɛmiiya hiɛ’ kɛyashɛ oti lɛ he. Foidalɔ kwɛɔ ehiɛ, jeee esɛɛ. Nakai nɔŋŋ, esa akɛ Kristofonyo akwɛ jɔɔmɔi ni jwere ehiɛ lɛ, jeee nibii ni eshi yɛ sɛɛ lɛ. Paulo wie hu akɛ: “Kɛ nɔ ko yɛ ni nyɛjwɛŋɔ lɛ ekroko lɛ, Nyɔŋmɔ aaajie no hu kpo atsɔɔ nyɛ.” (Filipibii 3:15) No hewɔ lɛ, sɔlemɔ oha Nyɔŋmɔ ni eye ebua bo ni ona nɛkɛ susumɔ nɛɛ. Okɛ Nyɔŋmɔ susumɔi, taakɛ anaa yɛ Biblia lɛ mli lɛ, awo ojwɛŋmɔ mli obɔ. (Filipibii 4:6-9) Jwɛŋmɔ suɔmɔ ni Yehowa yɔɔ kɛha bo kɛ jɔɔmɔi ni onaa yɛ no hewɔ lɛ ahe. (1 Yohane 4:9, 10, 17-19) Kɛkɛ lɛ, Yehowa baatsɔ mumɔ krɔŋkrɔŋ lɛ nɔ eye ebua bo ni okasusu nibii ni oshi yɛ sɛɛ lɛ ahe dɔŋŋ. Shi moŋ, taakɛ Paulo ji lɛ, bo hu obaakpa wɔsɛɛ be ni yɔɔ nyam ni kã wɔhiɛ lɛ gbɛ.—Filipibii 3:17.