Wɔyɛ Jaramɔ Bei Amli Bianɛ

BIBLIA lɛ egba akɛ adesai baabote “jaramɔ bei amli.” Etsɛ nɛkɛ bei nɛɛ akɛ “naagbee gbii lɛ.” (2 Timoteo 3:1-5; 2 Petro 3:3-7) Yesu Kristo wie nakai be lɛ nɔŋŋ he beni ehaa sane ko ni ekaselɔi lɛ bi lɛ kɛkɔ “je nɛŋ naagbee lɛ” he lɛ hetoo lɛ. (Mateo 24:3) Ani wɔyɛ naagbee gbii lɛ amli bianɛ? Okɛ nɔ ni Biblia lɛ gba fɔ̃ shi lɛ ato nɔ ni atswaa he adafi nyɛsɛɛ nɛɛ ni atsitsii tã yɛ shishigbɛ lɛ ahe okwɛ, ni no sɛɛ lɛ omu sane naa oha ohe.

Nɔ ni Biblia lɛ gba fɔ̃ shi: ta baaya nɔ yɛ je lɛŋ he fɛɛ he—Luka 21:10; Kpojiemɔ 6:4.

Nɔ ni atswaa he adafi nyɛsɛɛ nɛɛ: “Mɛi ni agbe yɛ tai ni awu yɛ afi 1900 afii amli lɛ fa kwraa fe mɛi fɛɛ ni agbe yɛ tai ni awu kɛjɛ be ni afɔ Kristo lɛ mli aahu kɛyashi afi 1900 lɛ shɛ lɛ toi etɛ.”—Worldwatch Institute.

Nɔ ni Biblia lɛ gba fɔ̃ shi: hɔ̃ji kɛ helai—Luka 21:11; Kpojiemɔ 6:5-8.

Nɔ ni atswaa he adafi nyɛsɛɛ nɛɛ: Yɛ afi 2004 mli lɛ, mɛi aaafee akpekpei 863 naaa niyenii kpakpa amɛye, ni yibɔ nɛɛ fa fe mɛi ni naaa niyenii kpakpa amɛye yɛ afi 2003 lɛ akpekpei 7.—United Nations Food and Agriculture Organization.

Mɛi aaafee akpekpei akpe sɔŋŋ hiɔ shi yɛ tsũi ni bɛ hiŋmɛi nɔ lɛ amli; mɛi akpekpei akpei 2.6 ashihilɛhei bɛ falefale bɔ ni sa; mɛi akpekpei akpei 1.1 naaa nu kpakpa amɛnu.—Worldwatch Institute.

Atridii mɔɔ mɛi akpekpei 500; mɛi akpekpei 40 miiye HIV-AIDS; wɔlɔmɔ fɔŋ gbe mɛi akpekpei 1.6 yɛ afi 2005 mli.—World Health Organization.

Nɔ ni Biblia lɛ gba fɔ̃ shi: shikpɔŋ lɛ fitemɔ—Kpojiemɔ 11:18.

Nɔ ni atswaa he adafi nyɛsɛɛ nɛɛ: “Amrɔ nɛɛ, adesai anifeemɔi baanyɛ aha nibii pii ni wala yɔɔ amɛmli lɛ ashishi abule yɛ be kukuoo mli.” “Adebɔɔ nibii ni baa adesai awala yi lɛ mli etɛ mli enyɔ fɛɛ enyɔ tsuuu nii jogbaŋŋ yɛ je lɛŋ hei fɛɛ.”—Millennium Ecosystem Assessment.

“Adesai anifeemɔi eha kɔɔyɔŋ nibii ni haa jeŋ dɔɔ lɛ efa babaoo, ni enɛ eha Shikpɔŋ lɛ nɔ kɔɔyɔŋ tsakemɔ lɛ he eba sane, ni enɛ baanyɛ eha nyɛmɔ ni shikpɔŋ lɛ yɔɔ ni ekɛbaa wala yi lɛ he aba sane.”—NASA, Goddard Institute for Space Studies.

Nɔ ni Biblia lɛ gba fɔ̃ shi: abaashiɛ Nyɔŋmɔ Maŋtsɛyeli lɛ he sanekpakpa lɛ atsɔɔ jeŋ fɛɛ—Mateo 24:14; Kpojiemɔ 14:6, 7.

Nɔ ni atswaa he adafi nyɛsɛɛ nɛɛ: Yɛ afi 2007 mli lɛ Yehowa Odasefoi aaashɛ 6,957,854 kɛ ŋmɛlɛtswai ni fe akpekpei akpei 1.4 shiɛ Nyɔŋmɔ Maŋtsɛyeli lɛ he sanekpakpa lɛ yɛ maji 236 anɔ.—2008 Yearbook of Jehovah’s Witnesses.

Taakɛ wɔna kɛtsɔ hiɛ lɛ, Biblia lɛ gba akɛ yɛ adafitswaa gbohii lɛ fɛɛ sɛɛ lɛ, wɔbaanyɛ wɔná hiɛnɔkamɔ akɛ nibii baahi. Yesu tsi Nyɔŋmɔ Maŋtsɛyeli lɛ he “sanekpakpa” lɛ tã. Mɛni ji Nyɔŋmɔ Maŋtsɛyeli lɛ? Mɛni hewɔ ehaa wɔnáa hiɛnɔkamɔ akɛ nibii baahi wɔsɛɛ lɛ? Ni te Nyɔŋmɔ Maŋtsɛyeli lɛ baasa ohe eha tɛŋŋ?

[Wiemɔ ni akɔ ni akɛmiitsu nii ni yɔɔ baafa 5]

Biblia lɛ gba nibii ni wɔnaa yɛ je lɛŋ ŋmɛnɛ lɛ efɔ̃ shi