Mɛni Enɛɛmɛi Fɛɛ Tsɔɔ?

YESU KRISTO kɛɛ akɛ: Nɔ ni baakadi “je nɛŋ naagbee” lɛ ji ta, hɔmɔ, tsɛŋemɔhela, kɛ shikpɔŋhosomɔi.—Mateo 24:1-8; Luka 21:10, 11.

Kɛjɛ afi 1914 kɛbaa nɛɛ, ta ni yaa nɔ yɛ maŋ kɛ maŋ teŋ kɛ wiemɔ kui ateŋ lɛ efite shihilɛ lɛ, ni bei pii lɛ osɔfoi ni kɛ amɛhe woɔ maŋkwramɔŋ saji amli kɛ amrɔ nɛɛ yiwalɛ tutuamɔi ni egbɛ eshwã lɛ ji nɔ ni kɛbaa.

Yɛ hiɛyaai ni aná yɛ jeŋ nilee mli lɛ fɛɛ sɛɛ lɛ, hɔmɔ ni naa wa waa yeɔ gbɔmɛi akpekpei ohai abɔ yɛ jeŋ fɛɛ. Gbɔmɛi akpekpei abɔ gboiɔ daa afi yɛ niyenii ni anáaa hewɔ.

Tsɛŋemɔhela ni mɔmɔɔ mɛi babaoo lɛ hu ji okadi ni Yesu kɛha lɛ ateŋ eko. Hela ni ji aja ni gbɛ eshwã babaoo lɛ gbe mɛi ni fa fe 21,000,000 yɛ Jeŋ Ta I lɛ sɛɛ. Nɔ ni tamɔɔɔ tsɛŋemɔhelai ni ba maji fioo komɛi pɛ amli yɛ afii ni eho lɛ amli lɛ, enɛ ba shikpɔŋ nɔ maji fɛɛ nɔ kɛ ŋshɔkpɔi ni yɔɔ shɔŋŋ lɛ hu anɔ. Amrɔ nɛɛ, AIDS miimɔmɔ mɛi babaoo yɛ je lɛŋ he fɛɛ he, ni tsɛŋemɔhelai tamɔ wɔlɔmɔ fɔŋ, atridii, shwilamɔ ni faa mli muawai kɛbaa, kɛ asara atridii miimɔmɔ mɛi yɛ maji ni yaa hiɛ kpaako lɛ amli.

Abɔɔ amaniɛ akɛ, shikpɔŋhosomɔi akpei nyɔŋmai abɔ ni naa wa yɛ gbɛ̀i srɔtoi anɔ lɛ baa daa afi. Yɛ tsɔnei ni ayɔɔ kɛ saji ahe amaniɛbɔɔ nifeemɔ gbɛ̀i ni etee hiɛ lɛ fɛɛ sɛɛ lɛ, osharai ni jɛɔ shikpɔŋhosomɔi ni baa yɛ hei ni mɛi fa babaoo yɛ lɛ ebatsɔ saji ni aŋmalaa he saji yɛ bei babaoo mli.

Biblia lɛ hu gba efɔ̃ shi akɛ: “Ná enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shikasuɔlɔi, shwãlɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ; tsi ohe kɛjɛ nɛkɛ gbɔmɛi ahe.”—2 Timoteo 3:1-5.

Ani okpɛlɛɛɛ nɔ akɛ wɔyɛ “jaramɔ bei” amli?

Ani oyɔse akɛ gbɔmɛi sumɔɔ amɛ diɛŋtsɛ amɛhe, amɛji shikasuɔlɔi, ni amɛwóɔ amɛhe nɔ babaoo yɛ gbɛ ni mli wa waa nɔ?

Namɔ aaaje he ŋwane akɛ je lɛ eyi obɔ kɛ gbɔmɛi ni feɔ pɛsɛmkunya waa ni amɛhiɛ esɔɔɔ nii, ni amɛji kpaŋmɔ mlikulɔi, mɛi ni he tseee loo mɛi ni yeee anɔkwa?

Ani ole akɛ fɔlɔi anɔ toigbolɔi kɛ suɔmɔ ni abɛ yɛ gbɛ ni ehiii kwraa nɔ lɛ etee hiɛ waa, ni jeee yɛ hei fioo komɛi pɛ kɛkɛ shi moŋ yɛ shikpɔŋ nɔ he fɛɛ he hu?

Ŋwanejee ko bɛ he akɛ, oyɔse akɛ jeŋ ni wɔyɔɔ mli lɛ ji jeŋ ko ni shwɛmɔ kɛ ŋɔɔmɔ eyi mli obɔ tɔ ni asumɔɔɔ ekpakpafeemɔ yɛ mli. Nakai ji bɔ ni Biblia lɛ tsɔɔ subaŋi ni baaya nɔ yɛ “naagbee gbii lɛ” amli lɛ mli.

Ani odaseyelii babaoo he miihia bɔni afee ni akɛyoo nɔ̃ be ni wɔyɔɔ mli lɛ? Yesu hu gba fɔ̃ shi akɛ, yɛ nakai be kome too lɛ nɔŋŋ mli lɛ, abaashiɛ Nyɔŋmɔ Maŋtsɛyeli lɛ he sanekpakpa lɛ atsɔɔ yɛ shikpɔŋ ni ayɔɔ nɔ lɛ nɔ he fɛɛ he. (Mateo 24:14) Ani aafee nakai?

Akalaa Buu-Mɔɔ ni ji wolo tɛtrɛɛ ni adamɔɔ Biblia lɛ nɔ aŋmalaa ní akɛtswaa Yehowa Maŋtsɛyeli lɛ he sanekpakpa lɛ he adafi lɛ daa yɛ wiemɔi babaoo mli fe adafitswaa woji krokomɛi fɛɛ.

Daa afi lɛ, Yehowa Odasefoi lɛ diɛŋtsɛ kɛ nɔ ni fa fe ŋmɛlɛtswai akpekpei toi akpe kome tsuɔ nii kɛyeɔ mɛi krokomɛi Nyɔŋmɔ Maŋtsɛyeli lɛ he odase.

Amrɔ nɛɛ, amɛkalaa woji ni tsɔɔ Biblia lɛ mli saji lɛ amli lɛ yɛ wiemɔi aaashɛ 400 mli, ni akalaa yɛ wiemɔi ni mɛi ni yɔɔ shɔŋŋ kɛ gbɔmɛi akui fioo ko pɛ wieɔ lɛ po mli. Yehowa Odasefoi lɛ kɛ sanekpakpa lɛ etee maji fɛɛ mli; amɛshiɛ hu yɛ ŋshɔkpɔi kɛ shikpɔŋkukuji babaoo ni daraaa kwraa kɛ́ aaasusu amɛhe yɛ maŋkwramɔŋ shishinumɔ naa lɛ amli. Amɛtsuɔ Biblia mli tsɔsemɔ gbɛjianɔtoo he nii daa yɛ shikpɔji babaoo nɔ.

Yɛ anɔkwale mli lɛ, aashiɛ Nyɔŋmɔ Maŋtsɛyeli lɛ he sanekpakpa lɛ yɛ shikpɔŋ ni ayɔɔ nɔ lɛ nɔ he fɛɛ he, jeee ní akɛtsake jeŋ muu lɛ fɛɛ, shi moŋ koni akɛye odase. Akɛ hegbɛ miiha gbɔmɛi ni yɔɔ he fɛɛ he lɛ koni amɛtsɔɔ kɛji akɛ amɛsusuɔ mɔ ni bɔ ŋwɛi kɛ shikpɔŋ lɛ he, kɛ agbɛnɛ kɛji akɛ amɛbaajie bulɛ kpo amɛtsɔɔ emlai lɛ ni amɛjie suɔmɔ kpo amɛtsɔɔ amɛnaanyo gbɔmɔ.—Luka 10:25-27; Kpojiemɔ 4:11.

Amrɔ nɛɛ, etsɛŋ ni Nyɔŋmɔ Maŋtsɛyeli lɛ baajie mɛi fɔji fɛɛ kɛaajɛ shikpɔŋ lɛ nɔ ni eha shikpɔŋ lɛ atsɔ jeŋ muu fɛɛ paradeiso.—Luka 23:43.

[Akrabatsa ni yɔɔ baafa 6]

Mɛni He Naagbee Gbii?

Jeee adesai anaagbee gbii. Biblia lɛ hiɛ naanɔ wala he gbɛkpamɔ kɛha mɛi ni feɔ Nyɔŋmɔ suɔmɔnaa nii lɛ.—Yohane 3:16, 36; 1 Yohane 2:17.

Jeee shikpɔŋ lɛ naagbee gbii. Nyɔŋmɔ ewo shi akɛ shikpɔŋ ni ayɔɔ nɔ lɛ baahi shi kɛya naanɔ.—Lala 37:29; 104:5; Yesaia 45:18.

Yɛ no najiaŋ lɛ, enɛɛmɛi ji nibii agbɛjianɔtoo ni yiwalɛ yɔɔ mli, ni suɔmɔ bɛ mli nɛɛ kɛ mɛi ni kɛ enifeemɔ gbɛ̀i lɛ tsuɔ nii lɛ anaagbee gbii.—Abɛi 2:21, 22.

[Akrabatsa/Mfoniri ni yɔɔ baafa 7]

Ani Biblia lɛ Ji Nyɔŋmɔ Wiemɔ Lɛɛlɛŋ?

Biblia gbalɔi lɛ ŋmala shii abɔ akɛ: “Bɔ ni Yehowa . . . kɛɛ nɛ.” (Yesaia 43:14; Yeremia 2:2) Yesu Kristo, ni ji Nyɔŋmɔ Bi lɛ po ma nɔ mi akɛ, ‘etooo lɛ diɛŋtsɛ eyiŋ ewieee.’ (Yohane 14:10) Biblia lɛ diɛŋtsɛ kɛɔ faŋŋ akɛ: “Ŋmalɛ fɛɛ ŋmalɛ . . . jɛ Nyɔŋmɔ Mumɔ lɛŋ.”—2 Timoteo 3:16.

Taakɛ United Bible Societies lɛ bɔ amaniɛ lɛ, wolo kroko ko kwraa bɛ ni akalaa yɛ wiemɔi babaoo—ni fa fe 2,200 mli. Wolo ko kwraa bɛ ni aja babaoo tamɔ nɛkɛ—amrɔ nɛɛ aja nɔ ni fe ekomekomei akpekpei toi akpei ejwɛ. Ani jeee nakai oookpa gbɛ kɛjɛ shɛɛ sane ni jɛ Nyɔŋmɔ ŋɔɔ kɛha adesai fɛɛ lɛ he?

Kɛha odaseyelii ni tsɔɔ akɛ Biblia lɛ jɛ Nyɔŋmɔ mumɔ lɛ mli lɛ, kwɛmɔ wolo ni ji Wolo Kɛha Gbɔmɛi Fɛɛ, ni Yehowa Odasefoi fee lɛ mli.

Kɛ okɛ hiɛsɔɔ kane Biblia lɛ kɛ anɔkwale ni eji akɛ eji Nyɔŋmɔ Wiemɔ lɛɛlɛŋ lɛ, obaaná he sɛɛ babaoo diɛŋtsɛ.

[Akrabatsa/Mfonirii ni yɔɔ baafa 8]

Mɛni Ji Nyɔŋmɔ Maŋtsɛyeli?

Eji nɔyeli ni yɔɔ ŋwɛi ni jieɔ bɔ ni anɔkwa Nyɔŋmɔ Yehowa lɛ, ni ji ŋwɛi kɛ shikpɔŋ Bɔlɔ lɛ yeɔ nɔ ehaa lɛ kpo.—Yeremia 10:10, 12.

Biblia lɛ tsĩɔ Yesu Kristo tã akɛ mɔ ni Nyɔŋmɔ kɛ nɔyeli hegbɛ ni tamɔ nakai eha lɛ. (Kpojiemɔ 11:15) Beni Yesu yɔɔ shikpɔŋ nɔ lɛ, ejie lɛ kpo etsɔɔ akɛ enine eshɛ hegbɛ ni yɔɔ naakpɛɛ nɔ momo kɛjɛ Nyɔŋmɔ ŋɔɔ—hegbɛ ni ha enyɛ ekudɔ adebɔɔ naa hewalɛi lɛ ní ha enyɛ etsá helai srɔtoi fɛɛ, ní ha enyɛ etee gbohii ashi po. (Mateo 9:2-8; Marko 4:37-41; Yohane 11:11-44) Biblia mli gbalɛ ni jɛ mumɔŋ lɛ gba fɔ̃ shi akɛ Nyɔŋmɔ kɛ “nɔyeli kɛ anunyam kɛ maŋtsɛyeli” lɛ hu baaha lɛ “koni majimaji kɛ asafoi kɛ wiemɔi lɛ fɛɛ asɔmɔ lɛ.” (Daniel 7:13, 14) Atsɛ́ɔ nakai nɔyeli lɛ akɛ ŋwɛi Maŋtsɛyeli; ŋwɛi ji he ni Yesu Kristo jɛɔ eyeɔ nɔ amrɔ nɛɛ.

[Mfonirii ni yɔɔ baafa 7]

Jeŋ muu fɛɛ sanekpakpa shiɛmɔ