Sanekpakpa ní Amɛtaoɔ ni Onu Lɛ
BENI Yesu yɔɔ shikpɔŋ nɔ lɛ, ekaselɔi lɛ ba eŋɔɔ ni amɛbabi lɛ akɛ: ‘Mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?’ Eha hetoo akɛ jeŋmaji babaoo kɛ amɛhe baawuu tai, hɔmɔ, tsɛŋemɔ helai, shikpɔŋhosomɔi, mlakwamɔ ní baafa babaoo, amale jamɔ mli tsɔɔlɔi ní baalaka mɛi babaoo, nyɛ̃ɛ kɛ yiwaa ní akɛaaba enɔkwa sɛɛnyiɛlɔi lɛ anɔ, ni suɔmɔ ní ayɔɔ kɛha jalɛ nifeemɔ lɛ he baajɔ kwraa yɛ mɛi pii agbɛfaŋ. Kɛ́ nɛkɛ nibii nɛɛ bɔi baa lɛ, ebaatsɔɔ akɛ Kristo eba ni anaaa lɛ kɛ hiŋmɛii, ni ákɛ ŋwɛi Maŋtsɛyeli lɛ eshɛ shi etã. Enɛ baafee adafitswaa sane—sanekpakpa! No hewɔ lɛ Yesu kɛ wiemɔi nɛɛ fata he ákɛ okadi lɛ fã, akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:3-14.
Nibii diɛŋtsɛ ní eba yɛ je lɛŋ nyɛsɛɛ nɛɛ lɛ ehiii, shi nɔ ni amɛtsɔɔ lɛ hi, ni no ji ba ní Kristo eba lɛ. Shihilɛi ní wɔtsĩ tã yɛ yiteŋgbɛ lɛ bɔi kpojee yɛ faŋŋ mli yɛ nakai afi ní awie he babaoo, ni ji afi 1914 lɛ mli! Ekadi Jeŋmaji Abe lɛ naagbee kɛ be ní akɛbaatsake nibii kɛjɛ adesai anɔyeli mli kɛya Kristo Afii Akpe Nɔyeli lɛ mli (Afii Akpe Diɛŋtsɛ) lɛ shishijee.
Wɔnaa nɔ ni tsɔɔ akɛ tsakemɔ be ko baaho dã lɛ yɛ Lala 110, kukuji 1 kɛ 2 lɛ, kɛ Kpojiemɔ 12:7-12. Atsɔɔ yɛ jɛmɛ akɛ Kristo baata shi yɛ Nyɔŋmɔ ninejurɔ nɔ yɛ ŋwɛi kɛyashi be mli ní ebaatsɔ Maŋtsɛ. Kɛkɛ lɛ ta ní baate shi yɛ ŋwɛi yɛ nakai beaŋ lɛ baaha ashɛ́ Satan afɔ̃ shikpɔŋ lɛ nɔ, ni ekɛ kpóo baaba shikpɔŋ lɛ nɔ, ni Kristo baaye maŋtsɛ yɛ ehenyɛlɔi ateŋ. Efɔŋfeemɔ naagbee kwraa baaba kɛtsɔ ‘amanehulu kpeteŋkpele’ ko ni baatsá nɔ kɛyagbe naa yɛ Harmagedon ta lɛ mli lɛ nɔ, ni no sɛɛ lɛ Kristo Afii Akpe Nɔyeli ni kɛ toiŋjɔlɛ baaba lɛ baanyiɛ sɛɛ.—Mateo 24:21, 33, 34; Kpojiemɔ 16:14-16.
Biblia lɛ kɛɔ akɛ: “Shi ná enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shika suɔlɔi, shwãlɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ; tsi ohe kɛjɛ nɛkɛ gbɔmɛi ahe.”—2 Timoteo 3:1-5.
Ekolɛ mɛi komɛi baataa saji anaa akɛ nɛkɛ nibii nɛɛ eba yɛ adesai ayinɔsane be mli dã, shi anɔkwa sane ji akɛ, fɛɛ bako mli pɛpɛɛpɛ kɛyashɛko he ni eshɛ nɛɛ dã. Taakɛ yinɔsaneŋmalɔi kɛ saji ahe wielɔi tsɔɔ lɛ, be ko bako shikpɔŋ nɛɛ nɔ dã tamɔ nɔ ni eba kɛjɛ afi 1914 mli kɛbaa nɛɛ. (Kwɛmɔ baafa 7.) Haomɔi lɛ efá babaoo diɛŋtsɛ fe bei krokomɛi fɛɛ ní eho. Kɛfata he lɛ, esa akɛ wɔsusu anɔkwa saji nɛɛ hu ahe, yɛ Kristo okadi ní kɔɔ naagbee gbii nɛɛ ahe lɛ fãi krokomɛi lɛ agbɛfaŋ: Ba ní Kristo eba kɛ Maŋtsɛyeli lɛ ní ajajeɔ atsɔɔ yɛ shikpɔŋ lɛ nɔ fɛɛ lɛ etee hiɛ waa bɔ ni afeko nakai dã yɛ yinɔsane be mli. Yiwaa ní akɛbaa yɛ shiɛmɔ hewɔ lɛ eko bɛ ní kɛ nɔ ni akɛba Yehowa Odasefoi anɔ lɛ yeɔ egbɔ. Agbe amɛteŋ mɛi ohai abɔ yɛ Nazi yiwalɛ nsrai amli. Atsĩ Yehowa Odasefoi anitsumɔ naa yɛ hei komɛi aahu kɛbashi ŋmɛnɛ, ni yɛ hei krokomɛi lɛ, amɔmɔɔ amɛ, awoɔ amɛ tsuŋ, afeɔ amɛ niseniianii, ni agbeɔ amɛ po. Enɛɛmɛi fɛɛ ji okadi ní Yesu kɛha lɛ fã.
Taakɛ agba afɔ̃ shi yɛ Kpojiemɔ 11:18 lɛ, “jeŋmaji lɛ amli efu” Yehowa Odasefoi anɔkwafoi lɛ, ni enɛ tsɔɔ akɛ Yehowa baajie lɛ diɛŋtsɛ hu ‘emlifu’ kpo yɛ nakai jeŋmaji lɛ anɔ. Nɛkɛ ŋmalɛ nɛɛ nɔŋŋ kɛɔ hu akɛ Nyɔŋmɔ ‘baafite mɛi ni fiteɔ shikpɔŋ lɛ.’ Be ko bako yɛ adesai ayinɔsane mli ní nyɛmɔ ní shikpɔŋ lɛ yɔɔ ní ekɛbaa wala yi lɛ ebote oshara mli tamɔ nɛkɛ dã. Shi kɛlɛ, nibii yɛ srɔto amrɔ nɛɛ! Jeŋ nilelɔi babaoo ebɔ kɔkɔ akɛ kɛ́ adesai baaya nɔ amɛwo shikpɔŋ lɛ nɔ muji nɛkɛ lɛ, no lɛ ebaatsɔ he ni anyɛŋ nɔ ahi. Shi Yehowa “[shɔ̃] lɛ ni ahi nɔ,” ni no hewɔ lɛ ebaajie mɛi ní woɔ nɔ muji lɛ dani eba akɛ amɛbaafite shikpɔŋ lɛ kwraa kɛmɔ shi.—Yesaia 45:18.
SHIKPƆŊ NƆ JƆƆMƆI YƐ MAŊTSƐYELI LƐ SHISHI
Ekolɛ susumɔ ní ayɔɔ akɛ gbɔmɛi baahi shikpɔŋ lɛ nɔ ákɛ Nyɔŋmɔ Maŋtsɛyeli lɛ shishibii lɛ baafee nɔ ko ní yɔɔ naakpɛɛ kɛha mɛi ní heɔ Biblia lɛ amɛyeɔ, ní susuɔ mɛi fɛɛ ní ahere amɛyiwala lɛ ahe akɛ amɛyɛ ŋwɛi lɛ. Biblia lɛ tsɔɔ akɛ mɛi fioo ko pɛ baaya ŋwɛi, ni ákɛ mɛi ni baahi shi kɛya naanɔ yɛ shikpɔŋ nɔ lɛ baafee asafo babaoo ní aleee amɛyifalɛ. (Lala 37:11, 29; Kpojiemɔ 7:9; 14:1-5) Gbalɛ ko ni yɔɔ Biblia mli wolo ni ji Daniel mli lɛ tsɔɔ akɛ Nyɔŋmɔ Maŋtsɛyeli ní yɔɔ Kristo shishi lɛ baakpele shikpɔŋ lɛ nɔ fɛɛ ni ebaaye nɔ.
Afee Kristo Maŋtsɛyeli lɛ he mfoniri yɛ jɛmɛ ákɛ tɛ ko ní tse kɛjɛ Yehowa maŋtsɛyeli ní tamɔ gɔŋ lɛ nɔ. Ebatswa amaga ko ni feɔ shikpɔŋ nɔ jeŋmaji ní he wa lɛ ahe mfoniri lɛ ni ekpata ehiɛ kwraa, ni “tɛ lɛ ní tswa amaga lɛ tsɔ gɔŋ kpeteŋkpele, ni ekpele shikpɔŋ muu lɛ fɛɛ nɔ.” Gbalɛ lɛ yaa nɔ akɛ: “Ni nɛkɛ maŋtsɛmɛi nɛɛ ayinɔ lɛ Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”—Daniel 2:34, 35, 44.
Maŋtsɛyeli nɛɛ kɛ hiɛnɔkamɔ ní Ŋmalɛ fiɔ sɛɛ, ní ji naanɔ wala yɛ shikpɔŋ ní nɔ tse ní asaa nɔ fɛfɛo nɔ lɛ ji nɔ ni Yehowa Odasefoi sumɔɔ ní amɛgba bo ehe sane lɛ. Gbɔmɛi akpekpei abɔ ní yɔɔ wala mli bianɛ, kɛ akpekpei babaoo diɛŋtsɛ ní yɔɔ amɛgbohii abui amli bianɛ lɛ baaná hegbɛ ni amɛhi shi yɛ nɔ kɛya naanɔ. Nakai beaŋ lɛ, Yehowa shishijee yiŋtoo ní ekɛbɔ shikpɔŋ lɛ ní ekɛ klɛŋklɛŋ adesai enyɔ lɛ wo nɔ lɛ baaba mli, yɛ Kristo Yesu Afii Akpe Nɔyeli lɛ shishi. Nɛkɛ shikpɔŋ nɔ Paradeiso nɛɛ mli shihilɛ ejeŋ mɔ tsine kɔkɔɔkɔ. Taakɛ bɔ ni aha Adam nitsumɔ yɛ Eden trom lɛ mli lɛ, nakai nɔŋŋ adesai baaná nitsumɔi ní yɔɔ miishɛɛ waa ni ji kwɛmɔ ní amɛaakwɛ shikpɔŋ lɛ kɛ kwɛ̃ɛ nii kɛ kooloi ní yɔɔ wala mli yɛ nɔ lɛ anɔ. “Amɛbaaye amɛnine naa nitsumɔi lɛ amli ŋɔɔmɔ aahu be kakadaŋŋ.”—Yesaia 65:22, Revised Standard Version; 1 Mose 2:15.
Abaanyɛ atsɛ ŋmalɛi pii ní akɛtsɔɔ shihilɛi ní baahi shi kɛji aha sɔlemɔ ní Yesu tsɔɔ wɔ lɛ hetoo kwraa, ni ji akɛ: “Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.” (Mateo 6:10, NW) Shi kɛlɛ, ha enɛ afa kɛha wɔ bianɛ, akɛ: “Minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee. Ni mɔ ni tá maŋtsɛsɛi lɛ nɔ lɛ kɛɛ: Naa, miifee nii fɛɛ ehee. Ni ekɛɛ mi akɛ: Ŋmaa, ejaakɛ nɛkɛ wiemɔi nɛɛ anɔkwa wiemɔi ní ma shi shiŋŋ ni.”—Kpojiemɔ 21:3-5.
[Wiemɔ ni akɔ ni akɛmiitsu nii ni yɔɔ baafa 15]
“Jaramɔ bei,” SHI “no dani naagbee lɛ aaaba”
[Mfoniri ni yɔɔ baafa 18]
Netherlands
[Mfoniri ni yɔɔ baafa 18]
Nigeria