Etsɛŋ Shikpɔŋ Lɛ Baatsɔ Paradeiso!
“Wɔtsɛ ni yɔɔ ŋwɛi, ogbɛi lɛ he atse; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” —Mateo 6:9, 10.
SƆLEMƆ ni ale waa nɛɛ ni mɛi pii tsɛɔ lɛ akɛ Wɔtsɛ ni Yɔɔ Ŋwɛi loo Nuŋtsɔ lɛ Sɔlemɔ lɛ haa adesai náa hiɛnɔkamɔ. Yɛ mɛɛ gbɛ nɔ?
Taakɛ wɔnaa yɛ Nuŋtsɔ lɛ Sɔlemɔ lɛ mli lɛ, Nyɔŋmɔ Maŋtsɛyeli lɛ baaha afee Nyɔŋmɔ suɔmɔnaa nii yɛ shikpɔŋ lɛ nɔ tamɔ bɔ ni ŋwanejee ko bɛ he akɛ afeɔ amrɔ nɛɛ yɛ ŋwɛi lɛ. Nyɔŋmɔ suɔmɔnaa nii ji akɛ shikpɔŋ lɛ atsɔ Paradeiso. (Kpojiemɔ 21:1-5) Mɛni tuuntu ji Nyɔŋmɔ Maŋtsɛyeli lɛ, ni te eeefee tɛŋŋ eha shikpɔŋ lɛ atsɔ Paradeiso?
Eji Nɔyeli Diɛŋtsɛ
Nyɔŋmɔ Maŋtsɛyeli lɛ ji nɔyeli diɛŋtsɛ. Kɛ́ nɔyeli ko baatsu nii jogbaŋŋ lɛ, ebiɔ ni aná nɔyelɔi, mlai, kɛ eshishibii. Ani Nyɔŋmɔ Maŋtsɛyeli lɛ shɛɔ taomɔ nii nɛɛ ahe? Kadimɔ hetoi ni Biblia lɛ kɛhaa yɛ sanebimɔi etɛ ni nyiɛ sɛɛ nɛɛ ahe:
Namɛi ji nɔyelɔi yɛ Nyɔŋmɔ Maŋtsɛyeli lɛ mli? (Yesaia 33:22) Yehowa Nyɔŋmɔ ehala e-Bi Yesu Kristo koni ekwɛ Maŋtsɛyeli lɛ nɔ. (Mateo 28:18) Yɛ Yehowa gbɛtsɔɔmɔ naa lɛ, Yesu miihala mɛi fioo ko kɛmiijɛ “akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli,” koni amɛfata ehe kɛye nɔ akɛ ‘maŋtsɛmɛi yɛ shikpɔŋ lɛ nɔ.’—Kpojiemɔ 5:9, 10.
Mɛɛ mlai Nyɔŋmɔ Maŋtsɛyeli lɛ ewo kɛha eshishibii lɛ koni amɛye nɔ? Mlai loo kitai lɛ ekomɛi biɔ ni eshishibii lɛ afee nibii pɔtɛɛ komɛi. Yesu tsɔɔ mlai nɛɛ ateŋ nɔ ni he hiaa fe fɛɛ beni ekɛɛ akɛ: “Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ. Kitai lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no, akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’”—Mateo 22:37-39.
Mlai lɛ ekomɛi hu biɔ ni Nyɔŋmɔ Maŋtsɛyeli lɛ shishibii lɛ atsi amɛhe kɛjɛ nifeemɔi komɛi ahe. Akɛ nɔkwɛmɔnɔ lɛ, Biblia lɛ wieɔ yɛ faŋŋ mli akɛ: “Nyɛkahaa alakaa nyɛ! Ajwamaŋbɔlɔi loo wɔŋjalɔi loo gbalaŋkulɔi loo hii ni tsɔ̃mɔɔ amɛhe yei haa hii krokomɛi loo hii ni kɛ hii feɔ yakayaka nii loo julɔi loo hiɛjoolɔi loo dãatɔlɔi loo mɛi ajɛlɔi loo ojotswalɔi anine shɛŋ Nyɔŋmɔ maŋtsɛyeli lɛ nɔ.”—1 Korintobii 6:9, 10, Ga Biblia Hee.
Namɛi ji Nyɔŋmɔ Maŋtsɛyeli lɛ shishibii? Yesu kɛ Nyɔŋmɔ Maŋtsɛyeli lɛ shishibii lɛ to toi ahe. Ekɛɛ akɛ: “Amɛbanu migbee, ni toi lɛ fee kuu kome kɛ kwɛlɔ kome.” (Yohane 10:16) Mɛi ni ekɛɛɛ kɛkɛ akɛ amɛnyiɛɔ Tookwɛlɔ Kpakpa ni ji Yesu lɛ sɛɛ, shi moŋ amɛyeɔ ekitai anɔ lɛ ji mɛi ni baafee Nyɔŋmɔ Maŋtsɛyeli lɛ shishibii. Yesu kɛɛ akɛ: “Jeee mɔ fɛɛ mɔ ni kɛɔ mi akɛ: Nuŋtsɔ, Nuŋtsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ.”—Mateo 7:21.
No hewɔ lɛ, Nyɔŋmɔ Maŋtsɛyeli lɛ shishibii lɛ kɛ Nyɔŋmɔ gbɛi ni ji Yehowa lɛ tsuɔ nii, ni amɛkɛ woo haa egbɛi lɛ taakɛ Yesu fee lɛ. (Yohane 17:26) Amɛboɔ Yesu famɔ akɛ amɛtsɔɔ mɛi nɛkɛ “maŋtsɛyeli lɛ he sanekpakpa nɛɛ” he nii lɛ toi. (Mateo 24:14; 28:19, 20) Ni agbɛnɛ hu amɛjieɔ anɔkwa suɔmɔ kpo amɛtsɔɔ amɛhe amɛhe.—Yohane 13:35.
“Abaafite Mɛi ni Fiteɔ Shikpɔŋ Lɛ”
Nibii ni yaa nɔ amrɔ nɛɛ yɛ je lɛŋ lɛ tsɔɔ akɛ etsɛŋ ni Nyɔŋmɔ Maŋtsɛyeli lɛ kɛ tsakemɔi wuji baaba shikpɔŋ lɛ nɔ. Te wɔfeɔ tɛŋŋ wɔleɔ enɛ? Afii akpei enyɔ ni eho nɛ lɛ, Yesu wie okadi ko ni yɔɔ fãi srɔtoi ni baatsɔɔ akɛ “Nyɔŋmɔ maŋtsɛyeli lɛ eshɛ etã” lɛ he. (Luka 21:31) Taakɛ atsɔɔ mli yɛ sane ni tsɔ hiɛ lɛ mli lɛ, amrɔ nɛɛ aana okadi nɛɛ fãi srɔtoi lɛ faŋŋ yɛ je lɛŋ he fɛɛ he.
Mɛni baaba yɛ no sɛɛ? Yesu ha hetoo akɛ: “No be lɛ mli lɛ amanehulu babaoo aaaba, ní anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mateo 24:21) Jeee adesai kɛ amanehulu nɛɛ baaba. Yɛ no najiaŋ lɛ, Nyɔŋmɔ ji mɔ ni ‘baafite mɛi ni fiteɔ shikpɔŋ lɛ.’ (Kpojiemɔ 11:18) “Aaafolɔ” mɛi fɔji ni amɛŋkomeŋfa nifeemɔi ahewɔ lɛ, shikpɔŋ lɛ miihe afite lɛ “kɛaajɛ shikpɔŋ lɛ nɔ.” Shi mɛi ni eye emuu, ni ji mɛi ni jáa Nyɔŋmɔ yɛ gbɛ kpakpa nɔ lɛ “aaashwɛ yɛ [shikpɔŋ lɛ] nɔ.”—Abɛi 2:21, 22.
Eja gbɛ akɛ Yehowa Nyɔŋmɔ kɛ tsakemɔi wuji nɛɛ aaaba. Mɛni hewɔ? Susumɔ nɔkwɛmɔnɔ nɛɛ he okwɛ: Ŋɔɔ lɛ akɛ bo ji shĩa bibioo ko ni akɛhaiɔ lɛ shiatsɛ. Mɛi ni ehai oshĩa lɛ ateŋ mɛi komɛi baa amɛjeŋ jogbaŋŋ ni amɛmli jɔ; amɛwoɔ amɛtsũi lɛ ahe nyɔmɔ ni amɛkwɛɔ tsũi ni amɛyɔɔ mli lɛ anɔ jogbaŋŋ. Shi kɛlɛ, mɛi ni ehai oshĩa lɛ ateŋ mɛi komɛi hu yɛ basabasa ni amɛfoɔ amɛ pɛ amɛnɔ mli; amɛkpoɔ akɛ amɛaawo amɛtsũi lɛ ahe nyɔmɔ ni amɛfiteɔ tsũi lɛ po. Yɛ kɔkɔ ni obɔ amɛ shii abɔ lɛ fɛɛ sɛɛ lɛ, amɛtsakeee amɛsubaŋi gbohii lɛ. Mɛni obaafee amɛ? Ákɛ shiatsɛ lɛ, ŋwanejee ko bɛ he akɛ obaafã amɛ.
Yɛ nakai gbɛ nɔ nɔŋŋ lɛ, Yehowa Nyɔŋmɔ yɛ hegbɛ akɛ etsɔɔ mɔ ni esa akɛ ehi shikpɔŋ lɛ nɔ, ejaakɛ lɛ ji shikpɔŋ lɛ kɛ emli nibii fɛɛ a-Bɔlɔ. (Kpojiemɔ 4:11) Yehowa eto eyiŋ akɛ ebaajie efɔŋfeelɔi, ni ji mɛi ni kpoɔ akɛ amɛbaafee esuɔmɔnaa nii ni amɛhaaa mɛi krokomɛi atoiaŋ ajɔ amɛ lɛ kɛjɛ shikpɔŋ lɛ nɔ.—Lala 37:9-11.
Shikpɔŋ lɛ Baatsɔ Paradeiso
Etsɛŋ, Nyɔŋmɔ Maŋtsɛyeli ni Yesu Kristo baakwɛ nɔ lɛ baaye shikpɔŋ lɛ nɔ. Yesu tsɛ gbɛjianɔtoo hee nɛɛ akɛ “jeŋ hee.” (Mateo 19:28) Te shihilɛ baatamɔ tɛŋŋ yɛ nɛkɛ jeŋ hee nɛɛ mli? Kadimɔ Biblia mli shiwoi ni nyiɛ sɛɛ nɛɛ:
Lala 46:9. “Ehãa tai asɛɛ foɔ kɛyaa shikpɔŋ lɛ naagbeehei lɛ.”
Yesaia 35:1. “Ŋã kpataa kɛ shikpɔŋ gbiŋ lɛ aaanyá, ŋã kplanaa lɛ hu mli aaafili lɛ, ni eeegba afofro tamɔ fɔfɔi!”
Yesaia 65:21-23. “Mɛi ni mihala lɛ aaaye amɛnine naa nitsumɔ lɛ mli nii aahu po. Amɛgboŋ deŋme yakatswaa, ni amɛfɔŋ amɛhaŋ oshara.”
Yohane 5:28, 29. “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ [kaimɔ] gbohiiabui lɛ amli lɛ aaanu [Yesu] gbee, ni amɛaaje kpo.”
Kpojiemɔ 21:4. “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.”
Nɔ Hewɔ ni Esa akɛ Ohe Oye
Ani oheɔ Biblia mli shiwoi lɛ oyeɔ? Biblia lɛ gba efɔ̃ shi akɛ mɛi pii heŋ amɛyeŋ. Ekɛɛ akɛ: “Naagbee gbii lɛ anɔ lɛ hefɛoyelɔi aaaba . . . mɛi ní aaanyiɛ yɛ amɛ diɛŋtsɛ amɛkɔnɔi lɛ anaa, ni amɛaakɛɛ: Nɛgbɛ ebaa lɛ he shiwoo lɛ yɔɔ? ejaakɛ kɛjɛ beyinɔ ní tsɛmɛi lɛ tee yawɔwɔi nɛɛ, bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ.” (2 Petro 3:3, 4) Shi hefɛoyelɔi nɛɛ asusumɔ lɛ ejaaa kwraa. Susumɔ yiŋtoi ejwɛ pɛ ahewɔ ni obaanyɛ ohe nɔ ni Biblia lɛ kɛɔ lɛ oye:
(1) Nyɔŋmɔ kɛ ehe wo adesai asaji amli yɛ blema beaŋ. Enɛ he nɔkwɛmɔnɔ ni sa kadimɔ waa ji Nu Afua ni ba yɛ Noa beaŋ lɛ.—2 Petro 3:5-7.
(2) Nyɔŋmɔ Wiemɔ lɛ gba efɔ̃ shi yɛ anɔkwale mli akɛ nibii ni yaa nɔ yɛ jeŋ fɛɛ amrɔ nɛɛ baaba.
(3) Ejeee anɔkwale akɛ “bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ.” Adesai ni yɔɔ shikpɔŋ lɛ nɔ lɛ ashihilɛ kɛ amɛjeŋba miifite, ni aaafite nibii ni baa wala yi yɛ shikpɔŋ lɛ nɔ lɛ yɛ gbɛ ni enɔ bako dã nɔ.
(4) Amrɔ nɛɛ, aashiɛ “maŋtsɛyeli lɛ he sanekpakpa” lɛ yɛ shikpɔŋ lɛ nɔ fɛɛ, ni enɛ tsɔɔ akɛ etsɛŋ ni “naagbee lɛ aaaba.”—Mateo 24:14.
Yehowa Odasefoi miifɔ̃ bo nine ni oha amɛkɛ bo akase Biblia lɛ ni ji Nyɔŋmɔ Wiemɔ lɛ, koni ole naanɔ wala yɛ Nyɔŋmɔ Maŋtsɛyeli lɛ nɔyeli shishi lɛ he hiɛnɔkamɔ lɛ he saji babaoo. (Yohane 17:3) Lɛɛlɛŋ, nibii kpakpai ni hi pam miimɛ adesai yɛ wɔsɛɛ. Etsɛŋ nibii baahi jogbaŋŋ diɛŋtsɛ kɛha adesai! Ani obaaná wɔsɛɛ be nɛɛ mli gbɛfaŋnɔ?
[Wiemɔ ni akɔ ni akɛmiitsu nii ni yɔɔ baafa 7]
Mɛi ni kɛɔ akɛ nibii baakã he aya nɔ tamɔ bɔ ni amɛyɔɔ kɛjɛ jeŋbɔɔ shishijee mli lɛ asusumɔ lɛ ejaaa kwraa
[Mfoniri ni yɔɔ baafa 8]
Ani obaaná wɔsɛɛ be nɛɛ mli gbɛfaŋnɔ?