Tsi Obɛŋkɛ Nyɔŋmɔ
Awusãi Atsɛ Lɛ
“A WUSÃI atsɛ . . . ji Nyɔŋmɔ yɛ eshihilɛhe krɔŋkrɔŋ lɛ.” (Lala 68:6) Wɔkaseɔ nɔ ko ni taa mɔ tsuiŋ waa yɛ Yehowa Nyɔŋmɔ he yɛ wiemɔi ni ajɛ mumɔŋ aŋma nɛɛ mli—etsɔɔ akɛ esusuɔ mɛi ni bɛ bualɔ lɛ ahiamɔ nii ahe. Anaa faŋŋ yɛ Mla ni ekɛha Israel lɛ mli akɛ esusuɔ awusãi ahe. Nyɛhaa wɔpɛia wiemɔ ni ji “awusã” ni anaa yɛ 2 Mose 22:22-24 lɛ, he klɛŋklɛŋ ni atsĩ wiemɔ nɛɛ tã yɛ Biblia lɛ mli, lɛ mli wɔkwɛa.
Nyɔŋmɔ bɔɔ kɔkɔ akɛ: “Nyɛkawaa . . . awusã ko yi.” (Kuku 22) Wiemɔi nɛɛ jeee wiemɔi ni akɛmiikpa mɛi afai ni amɛye amɛbua awusãi; eji Nyɔŋmɔ famɔ. Ewaaa akɛ aaawa gbekɛ ko ni tsɛ egbo yi, ejaakɛ etsɛ lɛ ji mɔ ni buɔ ehe ni ehaa lɛ ehiamɔ nii. Esaaa akɛ mɔ ko ‘waa’ gbekɛ ni yɔɔ shihilɛ ni tamɔ nɛkɛ mli lɛ ‘yi’ yɛ gbɛ ko gbɛ ko nɔ. Atsɔɔ wiemɔ ni ji ‘wa yi’ lɛ shishi yɛ Biblia shishitsɔɔmɔi krokomɛi amli akɛ “niseniianii,” “ye sane fɔŋ,” kɛ “ye awui.” Ákɛ aaaye awusã ko sane fɔŋ lɛ ji hiɛdɔɔ sane yɛ Nyɔŋmɔ hiɛ. Te eyɔɔ hiɛdɔɔ eha tɛŋŋ?
Mla lɛ yaa nɔ ekɛɔ akɛ: “Shi kɛji owa amɛ yi, ni amɛfó amɛtsɛ mi lɛ, ja mibo amɛyaafo lɛ toi.” (Kuku 23) Akɛ wiemɔ ni ji ‘nyɛ’ ni kɔɔ mɛi pii ahe lɛ tsu nii yɛ kuku 22 lɛ mli, shi yɛ kuku 23 lɛ mli lɛ akɛ wiemɔ ni ji ‘o’ ni kɔɔ mɔ aŋkro he lɛ tsu nii. Esa akɛ maŋ muu lɛ fɛɛ kɛ agbɛnɛ aŋkro fɛɛ aŋkro aye Nyɔŋmɔ mla nɛɛ nɔ. Yehowa miikwɛ; eba etoi shi eha awusãi, ni efee klalo akɛ ebaabo amɛbolɔmɔi kɛha yelikɛbuamɔ lɛ toi.—Lala 10:14; Abɛi 23:10, 11.
Belɛ, kɛ́ mɔ ko ye awusã ko sane fɔŋ ni no ha ebo etsɛ Nyɔŋmɔ lɛ, mɛni baaba? Yehowa kɛɛ akɛ: “Mimlifu lɛ naa aaawa naakpa, ni mikɛ klante aaagbe nyɛ.” (Kuku 24) Wolo ko ni gbalaa Biblia mli wiemɔi amli lɛ kɛɛ akɛ “wiemɔ nɛɛ shishi ŋmiiŋmi ji ‘ni migugɔ baadɔ la,’ ni eji agwaseiaŋ wiemɔ kɛha mlifu ni naa wa waa.” Kadimɔ akɛ Yehowa shiii ehaaa adesai kojolɔi ni yɔɔ Israel lɛ ni amɛkwɛ ni aye mla nɛɛ nɔ. Nyɔŋmɔ diɛŋtsɛ ni baagbala mɔ fɛɛ mɔ ni feɔ gbekɛ ko ni bɛ bualɔ lɛ niseniianii lɛ toi.—5 Mose 10:17, 18.
Yehowa tsakeee. (Maleaki 3:6) Enuɔ he ehaa gbekɛbii ni amɛfɔlɔ kome loo enyɔ lɛ fɛɛ egboi. (Yakobo 1:27) Okɛ enɛ akashwɛ kwraa—kɛ́ afee gbekɛbii ni bɛ shihilɛ mli niiashikpamɔ niseniianii lɛ, ehaa awusãi a-Tsɛ lɛ mli fuɔ yɛ gbɛ ni ja nɔ. “Yehowa mlifu ni naa wa” lɛ baaba mɛi ni yeɔ gbekɛbii ni bɛ bualɔi lɛ sane fɔŋ lɛ anɔ, ni amɛnyɛŋ amɛjo naa foi. (Zefania 2:2) Mɛi fɔji ni tamɔ nɛkɛ lɛ baayɔse akɛ “Nyɔŋmɔ hiɛkalɔ lɛ dɛŋ gbeemɔ yɛ gbeyei pam.”—Hebribii 10:31.—w09 04/01-E.