Jiemɔ Miishɛɛ ni Suɔmɔ Yɔɔ Mli Kpo Otsɔɔ “Awusãi”

¹ Yehowa ji “awusãi atsɛ.” (Lala 68:6) Bɔ ni esusuɔ amɛhilɛ-kɛhamɔ he ehaa lɛ jeɔ kpo yɛ famɔ nɛɛ ni ekɛha blema Israel maŋ lɛ mli akɛ: “Nyɛkawaa yoo okulafo ko loo awusã ko yi. Shi kɛji owa amɛ yi, ni amɛfó amɛtsɛ mi lɛ, ja mibo amɛyaafo lɛ toi.” (2 Mose 22:22, 23) Nɔ ni fata Nyɔŋmɔ Mla lɛ he hu ji gbɛjianɔ ni eto koni eye ebua nakai gbɔmɛi lɛ yɛ amɛheloo naa hiamɔ nii agbɛfaŋ. (5 Mose 24:19-21) Yɛ Kristofoi agbɛjianɔtoo lɛ mli lɛ, awoɔ anɔkwa jalɔi hewalɛ ni ‘amɛsara awusãi kɛ okulafoi yɛ amɛmanehului lɛ amli.’ (Yak. 1:27) Te wɔɔfee tɛŋŋ wɔkase Yehowa miishɛɛ ni suɔmɔ yɔɔ mli ni ejieɔ lɛ kpo etsɔɔ mɛi ni daraa yɛ fɔlɔ kome wekui loo wekui ni jamɔ egbala mli lɛ mli lɛ?

² Mumɔŋ Tsɔsemɔ: Kɛ́ fɔlɔ kome mɔ ji bo loo oyɛ hefatalɔ ni heee yeee lɛ, no lɛ shia Biblia mli nikasemɔ ni okɛ obii lɛ aaafee daa lɛ baanyɛ afee nɔ ni wa. Shi Biblia mli nikasemɔ ni aaafee daa ni shishinumɔ aaahi mli lɛ he miihia kɛji akɛ amɛbaadara akɛ onukpai ni ŋmɛɔ pɛpɛɛpɛ. (Abɛi 22:6) Saji ni kɔɔ mumɔŋ nibii ahe ni akɛ amɛ aaagba lɛ hu he miihia waa. (5 Mose 6:6-9) Bei komɛi lɛ, onijiaŋ baaje wui, shi kaakpa. Yaa Yehowa ŋɔɔ kɛha hewalɛwoo kɛ gbɛtsɔɔmɔ yɛ be mli ni ‘olɛɔ obii lɛ yɛ Yehowa tsɔsemɔ kɛ ŋaawoo mli lɛ.’—Efe. 6:4.

³ Kɛ́ yelikɛbuamɔ ko he miihia bo koni okɛtsu o-Ŋmalɛ naa sɔ̃i ahe nii lɛ, no lɛ ha onukpai lɛ ale ohiamɔ nii lɛ. Ekolɛ amɛbaanyɛ amɛkɛ ŋaawoo loo yelikɛbuamɔ ni anyɛɔ atsuɔ he nii aha bo koni eye ebua bo ni oto mumɔŋ nifeemɔ gbɛ kpakpa he gbɛjianɔ kɛha oshiabii lɛ.

⁴ Bɔ ni Aaafee ni Mɛi Krokomɛi Aye Abua: Yɛ klɛŋklɛŋ afii oha lɛ mli lɛ, Timoteo batsɔ Yehowa tsulɔ ni yɔɔ ekãa ekɔɔɔ he eko akɛ eda yɛ shia ni mli egbala mli. Ŋwanejee ko bɛ he akɛ mɔdɛŋ ni enyɛ kɛ enaa bɔ ni amɛkɛtsɔɔ lɛ ŋmalɛ krɔŋkrɔŋ lɛ kɛjɛ egbekɛbiiashi lɛ tsu gbɛfaŋ nɔ ko ni he hiaa waa he nii. (Bɔf. 16:1, 2; 2 Tim. 1:5; 3:15) Shi kɛlɛ, ená ekɛ Kristofoi krokomɛi, ní bɔfo Paulo, mɔ ni tsɛ Timoteo akɛ ‘esuɔmɔ bi kɛ anɔkwafo yɛ Nuŋtsɔ lɛ mli’ lɛ fata he lɛ naanyobɔɔ lɛ he sɛɛ.—1 Kor. 4:17.

⁵ Nakai nɔŋŋ ŋmɛnɛ, kwɛ bɔ ni ehe yɔɔ sɛɛnamɔ kɛji nyɛmimɛi hii kɛ yei ni edara yɛ mumɔŋ lɛ jie miishɛɛ ni suɔmɔ yɔɔ mli kpo amɛtsɔɔ awusãi yɛ asafo lɛ mli lɛ! Ani ole amɛteŋ mɔ fɛɛ mɔ gbɛi? Ani okɛ amɛ gbaa sane yɛ Kristofoi akpeei ashishi kɛ yɛ bei krokomɛi amli? Ha amɛfata ohe yɛ shiɛmɔ nitsumɔ lɛ mli. Ekolɛ, bei komɛi lɛ obaanyɛ oha ni amɛ kɛ amɛfɔlɔ kome loo fɔlɔ ni heɔ yeɔ lɛ afata nyɛhe yɛ nyɛweku nikasemɔ lɛ mli loo yɛ hiɛtserɛjiemɔ kpakpa mli. Kɛ́ oblahii kɛ oblayei bibii nɛɛ bu bo akɛ amɛnaanyo lɛ, amɛnyɛɔ amɛkaseɔ onɔkwɛmɔnɔ lɛ ni amɛkpɛlɛɔ ohewalɛwoo nɔ.—Fil. 2:4.

⁶ Yehowa yɛ awusãi ahe miishɛɛ waa diɛŋtsɛ, ni ewoɔ mɔdɛŋ ni wɔbɔɔ koni wɔye wɔbua amɛ ni amɛha anɔkwale lɛ atsɔ amɛnɔ lɛ he nyɔmɔ. Mɛi babaoo ni dara yɛ fɔlɔ kome wekui amli loo shiai ni mli egbala mli ní nine shɛ nakai hewalɛwoo lɛ nɔ lɛ miisɔmɔ bianɛ yɛ anɔkwale mli akɛ gbɛgbalɔi, asafoŋ sɔɔlɔi, onukpai, nɔkwɛlɔi gbɛfalɔi, maŋsɛɛ sanekpakpa shiɛlɔi, loo Betel weku lɛ mli bii. Eba akɛ, wɔ fɛɛ wɔɔtao gbɛ̀i ni wɔɔtsɔ nɔ ‘wɔlɛɛ’ suɔmɔ ni wɔyɔɔ kɛha awusãi lɛ amli, yɛ wɔ ŋwɛi Tsɛ lɛ kasemɔ mli.—2 Kor. 6:11-13.