Nɔyaa ni Wɔkɛaasusu Kaselɔfeemɔ Nitsumɔ ni He Hiaa Waa lɛ He
1 Dani Yesu baashi shikpɔŋ nɔ lɛ, ewo esɛɛnyiɛlɔi lɛ kita koni ‘amɛfee jeŋmaji fɛɛ kaselɔi.’ Enɛ bi koni amɛtsu shiɛmɔ kɛ nitsɔɔmɔ he tafãa babaoo he nii koni amɛlɛɛ amɛnitsumɔ lɛ mli kɛya shikpɔŋ lɛ nɔ he fɛɛ he ni mɛi yɔɔ. (Mat. 28:19, 20; Bɔf. 1:8) Ani amɛbu nitsumɔ ni atu awo amɛdɛŋ nɛɛ akɛ jatsu ni tsii tsɔ̃? Efeŋ nakai taakɛ bɔfo Yohane bu lɛ eha lɛ. Beni ekɛ afii 65 etsu nii akɛ kaselɔfeelɔ lɛ, eŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.”—1 Yoh. 5:3.
2 Mra be mli Kristofoi anitsumɔ ni aŋma yɛ Ŋmalɛ lɛ mli lɛ tsɔɔ akɛ, amɛkɛ hiamɔ tsu nitsumɔ ni atu awo amɛdɛŋ akɛ amɛfee mɛi Yesu Kristo kaselɔi lɛ he nii. (2 Tim. 4:1, 2) Amɛfee enɛ, jeee akɛ eji nitsumɔ ni kã amɛnɔ kɛkɛ hewɔ, shi moŋ yɛ suɔmɔ ni mli wa ni amɛyɔɔ akɛ amɛaajie Nyɔŋmɔ yi ni amɛkɛ yiwalaheremɔ he hiɛnɔkamɔ abaha mɛi krokomɛi lɛ hewɔ. (Bɔf. 13:47-49) Akɛni sɛɛ mli lɛ mɛi fɛɛ ni batsɔmɔ kaselɔi lɛ diɛŋtsɛ bafee kaselɔfeelɔi hewɔ lɛ, Kristofoi asafo lɛ da oyayaayai yɛ klɛŋklɛŋ afii oha lɛ mli.—Bɔf. 5:14; 6:7; 16:5.
3 Kaselɔfeemɔ Nitsumɔ lɛ Miiya Hiɛ Oyayaayai: Aatsu kaselɔfeemɔ nitsumɔ ni fe fɛɛ fe bei fɛɛ ni eho lɛ yɛ afii ohai 20 nɛɛ mli! No hewɔ lɛ, kɛbashi amrɔ nɛɛ, gbɔmɛi akpekpei abɔ ekpɛlɛ sanekpakpa lɛ nɔ, ni amɛtsu he nii. (Luka 8:15) Akɛni be kɛha ŋmɛnɛŋmɛnɛ nibii agbɛjianɔtoo lɛ miitã oyayaayai hewɔ lɛ, “tsulɔ anɔkwafo kɛ nilelɔ” lɛ kɛ dɛŋdadei ni haa gbɔmɛi ni yɔɔ tsui kpakpa lɛ nyɛɔ amɛkaseɔ anɔkwale lɛ oyayaayai lɛ eha wɔ.—Mat. 24:45.
4 Yɛ afi 1995 lɛ, wɔnine shɛ wolo ni ji Nilee Ni Kɛ Mɔ Yaa Naanɔ Wala Mli lɛ nɔ, ni yɛ afi 1996 lɛ, nɔ ni nyiɛ sɛɛ ji wolo bibioo ni ji Mɛni Nyɔŋmɔ Taoɔ yɛ Wɔdɛŋ? lɛ. January 15, 1996 Buu-Mɔɔ lɛ wie yɛ Nilee wolo lɛ he yɛ baafa 14 lɛ akɛ: “Kɛ akɛaato he lɛ, abaanyɛ akase wolo ni hiɛ baafai 192 nɛɛ yɛ be kuku mli, ni esa akɛ ‘mɛi abɔ ni ajie ato naanɔ wala lɛ’ anyɛ akase nibii babaoo kɛtsɔ ekasemɔ nɔ, koni amɛjɔɔ amɛwala nɔ amɛha Yehowa ni abaptisi amɛ.”—Bɔf. 13:48.
5 Nɔ ni aŋma ahɔ July 1996 Wɔ Maŋtsɛyeli Sɔɔmɔ lɛ mli, ni yitso ji, “Bɔ ni Ooofee ni Okɛ Nilee Wolo lɛ Afee Kaselɔi” lɛ kɛ oti nɛɛ ma wɔhiɛ akɛ: “Yɛ bɔ ni nikaselɔ lɛ shihilɛi kɛ enilee yɔɔ ha lɛ naa lɛ, ekolɛ eeenyɛ eba akɛ ooogbe yitsei babaoo naa yɛ nikasemɔ be kome ni heɔ ŋmɛlɛtswaa kome loo nɔ̃ mli, yɛ be mli ni owooo nikasemɔ lɛ foi. Nikaselɔi lɛ baaya hiɛ jogbaŋŋ kɛ́ nitsɔɔlɔ kɛ nikaselɔ lɛ fɛɛ ye be ni amɛto lɛ nɔ kɛha nikasemɔ lɛ otsi fɛɛ otsi lɛ.” Sane lɛ tee nɔ ekɛɛ akɛ: “Esa akɛ akpa gbɛ akɛ beni mɔ ko aaagbe Nilee wolo lɛ kasemɔ naa lɛ, enɔkwayeli kɛ bɔ ni emiishɛɛ lɛ mli kwɔ ha yɛ Nyɔŋmɔ sɔɔmɔ mli lɛ baafee faŋŋ.” Sanebimɔ He ni yɔɔ October 1996 Wɔ Maŋtsɛyeli Sɔɔmɔ lɛ mli lɛ tsɔɔ mli akɛ: “Aakpa gbɛ akɛ, nitsɔɔlɔ ni he esa lɛ baanyɛ aye abua nikaselɔ anɔkwafo lɛ koni ená nilee ni fa saŋŋ koni ekpɛ eyiŋ yɛ nilee mli akɛ ebaasɔmɔ Yehowa yɛ be kuku ko sɛɛ.”
6 Nilee Wolo lɛ Miiwo Yibii: Beni be shɛ ni abaabaptisi oblayoo ko lɛ, egba bɔ ni enu he eha yɛ Nilee wolo lɛ kasemɔ he. Yɛ be fioo ko mli lɛ, akɛ lɛ kase Hii Shi Daa wolo lɛ. Beni ajie Nilee wolo lɛ kpo lɛ, nyɛmiyoo ni kɛ lɛ kaseɔ nii lɛ tsake kɛtee wolo hee lɛ mli. Etsɛɛɛ ni nikaselɔ lɛ nyɛ ena akɛ enɛ baabi koni ekpɛ eyiŋ, ni no tsirɛ lɛ koni eya hiɛ oyayaayai kɛjɛ nakai be lɛ mli kɛyaa. Oblayoo lɛ, ni amrɔ nɛɛ eji wɔnyɛmiyoo lɛ, kɛɛ: “Hii Shi Daa wolo lɛ ye ebua mi koni masumɔ Yehowa, shi Nilee wolo lɛ ye ebua mi koni makpɛ miyiŋ akɛ masɔmɔ lɛ.”
7 Susumɔ bɔ ni yoo kroko kase anɔkwale lɛ oyayaayai lɛ he okwɛ. Beni egbe enikasemɔ ni ji enyɔ lɛ naa lɛ, etee kpee yɛ Maŋtsɛyeli Asa lɛ nɔ yɛ kpokpaa nɔkwɛlɔ lɛ saramɔ be lɛ mli. Yɛ enikasemɔ ni ji etɛ lɛ mli yɛ nakai otsi lɛ mli lɛ, ekɛɛ lɛ akɛ ejɔɔ ehe nɔ eha Yehowa ni eesumɔ koni etsɔ shiɛlɔ ni abaptisiko lɛ. Yoo lɛ kɛ onukpai lɛ kpe, ni amɛkpɛlɛ enɔ akɛ shiɛlɔ, ni eje shiɛmɔyaa shishi yɛ otsi ni nyiɛ sɛɛ lɛ mli. Ekɛ ehe wo e-Biblia mli nikasemɔ lɛ mli aahu akɛ ebi koni akaha eba nitsumɔ bɔni afee ni ekase nii shii enyɔ loo etɛ daa otsi koni ekɛ ehe awo shiɛmɔ nitsumɔ lɛ mli waa. Bei komɛi lɛ, amɛkaseɔ yitsei enyɔ loo etɛ yɛ nikasemɔ be kome mli. Ekɛ nɔ ni ekaseɔ lɛ bɔi nitsumɔ yɛ eshihilɛ mli fɛɛ, ni ekɛ otsii ejwɛ gbe Nilee wolo lɛ naa, ni etee hiɛ kɛshɛ baptisimɔ mli!
8 Nyɛmiyoo ko wu wie lɛ diɛŋtsɛ ehe akɛ kulɛ eji “hefatalɔ ko ni heee yeee kwraa.” Gbi ko lɛ, nyɛminuu ko kɛɛ ekɛ lɛ baafee Biblia mli nikasemɔ yɛ Nilee wolo lɛ mli kɛ gbeekpamɔ lɛ akɛ nuu lɛ baanyɛ akpa nikasemɔ lɛ yɛ klɛŋklɛŋ nikasemɔ lɛ sɛɛ loo be fɛɛ be yɛ no sɛɛ. Wu lɛ kpɛlɛ nɔ akɛ ebaaka ekwɛ, eyɛ mli akɛ ebɔɔɔ mɔdɛŋ yɛ eskulyaa mli, ni ekaseko jamɔŋ wolo ko kwraa nɔ ni fe afii 20 sɔŋŋ. Te efee enii yɛ Nilee wolo lɛ kasemɔ he eha tɛŋŋ? Ekɛɛ: “Eji miishɛɛ diɛŋtsɛ akɛ mana akɛ akɛ wiemɔi ni mli waaa ŋma nɛkɛ Biblia kasemɔ he wolo nɛɛ. Emli saji lɛ yɛ faŋŋ ni atsɔɔ mli pɛpɛɛpɛ aahu akɛ etsɛɛɛ kwraa ni mikpaa be kroko ni wɔkɛbaakase nii lɛ gbɛ waa diɛŋtsɛ. Minitsɔɔlɔ lɛ kɛ kaselɔfeemɔ nitsɔɔmɔ gbɛ̀i ni Asafo lɛ etsɔɔ mli lɛ tsu nii jogbaŋŋ diɛŋtsɛ, ni yɛ Yehowa mumɔ lɛ yelikɛbuamɔ naa lɛ, abaptisi mi nyɔji ejwɛ sɛɛ. Manyɛ makɛɛ yɛ anɔkwale mli akɛ, kɛ́ wɔná suɔmɔ wɔha kaselɔfeemɔ nitsumɔ lɛ, ní wɔtee nɔ wɔtao mɛi ni hiɛ tsui kpakpa yɛ shiɛmɔ nitsumɔ lɛ mli, ní wɔkɛ Nilee wolo lɛ kɛ Biblia kasemɔ he woji krokomɛi ni Asafo lɛ kɛhaa lɛ tsu nii, ní nɔ ni fe fɛɛ lɛ wɔsɔle wɔbi Yehowa gbɛtsɔɔmɔ lɛ, wɔbaanyɛ wɔná hegbɛ krɛdɛɛ diɛŋtsɛ akɛ wɔɔye wɔbua kɛfee kaselɔi.” Yɛ anɔkwale mli lɛ, saji ni etsɔ hiɛ lɛ ji niiashikpamɔi ni efɔɔɔ kaa kwraa. Wɔnikaselɔi lɛ ateŋ mɛi babaoo kɛ oyaiyeli ni tamɔ nɛkɛ baaa anɔkwale lɛ mli.
9 Asuafo Nkɔso Gu Ahorow: Esoro Bɔ ni Nikaselɔ Fɛɛ Nikaselɔ Yaa nɔ Ehaa: Esa akɛ akpɛlɛ nɔ akɛ srɔtofeemɔ baanyɛ aba nyɛmɔi ni Nyɔŋmɔ Wiemɔ lɛ he nitsɔɔlɔi kɛ nikaselɔi fɛɛ yɔɔ lɛ mli waa diɛŋtsɛ. Mumɔŋ dalɛ baanyɛ aya lɛ blɛoo loo oyayaayai. Nikaselɔi komɛi kɛ nyɔji fioo náa nɔyaa ni mɛi krokomɛi baanyɛ amɛkɛ be kakadaŋŋ diɛŋtsɛ aná lɛ. Nɔ ni náa mɔ ko mumɔŋ dalɛ nɔ hewalɛ ji bɔ ni ewoloŋlee yɔɔ, bɔ ni ehiɛ sɔɔ mumɔŋ nibii, kɛ bɔ ni ehe ni etu eha Yehowa lɛ mli wa ha. Jeee mɔ fɛɛ mɔ ni wɔkɛ lɛ kaseɔ nii lɛ ‘jieɔ eyitsoŋ’ kɛkaseɔ Ŋmalɛi lɛ daa, taakɛ blema Beroiabii ni batsɔmɔ heyelilɔi lɛ fee lɛ.—Bɔf. 17:11, 12.
10 No hewɔ ni nɔ ni aŋma ahɔ April 1998 Wɔ Maŋtsɛyeli Sɔɔmɔ lɛ mli, ni yitso ji, “Aatao—Biblia Mli Nikasemɔi Babaoo” lɛ kɛ gbɛtsɔɔmɔ ni yɔɔ faŋŋ nɛɛ ha akɛ: “Shi kɛlɛ, jeee Biblia mli nikaselɔi fɛɛ yaa hiɛ yɛ gbɛ kome nɔ. Amɛteŋ mɛi komɛi susuuu mumɔŋ nibii ahe tamɔ mɛi krokomɛi, ni asaŋ amɛnuuu nibii ni atsɔɔ amɛ lɛ shishi oya. Mɛi krokomɛi náaa dekã kwraa, ni ekolɛ amɛnyɛɛɛ amɛná be ni he hiaa kɛha yitso muu lɛ fɛɛ kasemɔ otsi fɛɛ otsi. No hewɔ lɛ, yɛ shihilɛi komɛi amli lɛ ekolɛ ehe baahia ni afee nikasemɔ fe shi kome koni akɛgbe yitsei komɛi anaa kɛ nyɔji abɔ komɛi koni akɛgbe wolo muu lɛ fɛɛ naa.”
11 Kaselɔfeelɔi Hiɛɔ Jwɛŋmɔ ni Ŋmɛɔ Pɛpɛɛpɛ Mli: Ehe miihia ni wɔle bɔ ni nikasemɔ lɛ yaa nɔ ehaa yɛ nikaselɔ lɛ shihilɛi kɛ nyɛmɔ ni eyɔɔ yɛ nikasemɔ mli lɛ naa. Akɛni aawo wɔ hewalɛ koni wɔkɛ Taoɔ wolo bibioo lɛ aje nikasemɔi ashishi hewɔ lɛ, ebaanyɛ ehe kɛjɛ nyɔji enyɔ kɛyashi nyɔji etɛ koni akɛgbe naa dani akase Nilee wolo lɛ. Kɛ wɔkɛ ŋaawoi ni atsɔɔ yɛ nɔ ni aŋma ahɔ July 1996 Wɔ Maŋtsɛyeli Sɔɔmɔ lɛ mli lɛ fɛɛ tsu nii lɛ, ebaanyɛ ehe kɛjɛ nyɔji ekpaa kɛyashi nyɔji nɛɛhu kroko ni akɛbaagbe Nilee wolo lɛ naa. Mɛi komɛi ni kpaako amɛje nikasemɔ shishi yɛ Nilee wolo lɛ mli lɛ tsake kɛtee Taoɔ wolo bibioo lɛ mli koni eye ebua nikaselɔ lɛ koni ekase Biblia mli shishijee anɔkwalei lɛ oyayaayai. Kɛkɛ ni asaa aje nikasemɔ shishi yɛ Nilee wolo lɛ mli. Kɛ aje nikasemɔ shishi yɛ Nilee wolo lɛ mli ni eeeya nɔ jogbaŋŋ lɛ, ekolɛ sɛɛnamɔ baaba he babaoo kɛ akase Taoɔ wolo bibiooo lɛ beni agbe wolo lɛ naa, enɛ baafee Nyɔŋmɔ Wiemɔ lɛ mli shishijee anɔkwalei lɛ amlitii. Yɛ shihilɛ lɛ fɛɛ eko mli lɛ, wɔsumɔɔɔ ni wɔtsĩɔ shishinumɔ ni yɔɔ faŋŋ ni nikaselɔ lɛ baaná lɛ naa yɛ oyai ni wɔyeɔ hewɔ. Ehe miihia ni nikaselɔi fɛɛ aná shishitoo ni wa yɛ hemɔkɛyeli hee ni ená yɛ Nyɔŋmɔ Wiemɔ lɛ mli lɛ mli.
12 Yɛ be ni hoɔ ni wɔyɔɔ mli nɛɛ mli lɛ, ehe ebahia fe bei fɛɛ ni eho akɛ wɔɔye wɔbua mɛi krokomɛi koni amɛkase anɔkwale lɛ. Kɛfata sɔlemɔ ni wɔɔsɔle daa akɛ wɔɔje Biblia mli nikasemɔi ashishi lɛ he lɛ, nyɛhaa wɔsɔlea wɔhaa mɛi ni wɔkɛ amɛ kaseɔ nii momo lɛ. Kɛkɛ lɛ ebaafee miishɛɛ kɛha wɔ akɛ wɔɔya nɔ wɔbaptisi kaselɔi babaoo “daa kɛyashi jeŋ naagbee lɛ.”—Mat. 28:20.