Miitao Biblia Mli Nikasemɔ!
1 Wɔteŋ mɛi babaoo ejie shwelɛ kɛha Biblia mli nikasemɔfeemɔ kpo, ni kɛ yiŋtoo kpakpa hu. Biblia mli nikasemɔ nitsumɔ lɛ ji he ni wɔnine shɛɔ oti ni wɔkɛmaa wɔhiɛ akɛ wɔɔfee kaselɔi heei lɛ nɔ yɛ. (Mat. 28:19, 20) Ni kɛlɛ, wɔteŋ mɛi babaoo ehi shi nyɔji abɔ, ekolɛ afii abɔ ni wɔnako miishɛɛ krɛdɛɛ ni baa kɛjɛɔ anɔkwale lɛ ni aaatsɔɔ mɔ ko lɛ mli. Mɛni wɔbaanyɛ wɔfee yɛ enɛ he yɛ November mli? Akɛni akɛ Nilee wolo lɛ baaha yɛ nɛkɛ nyɔŋ nɛɛ nɔ hewɔ lɛ, wɔbaanyɛ wɔbɔ mɔdɛŋ waa koni wɔkɛtsu nii ni wɔkɛje Biblia mli nikasemɔi heei ashishi.
2 Too Otsi Naagbee Kome loo Babaoo Ofɔ̃ Shi: Wɔmiiwo mɔ fɛɛ mɔ hewalɛ koni eto be ko yɛ nɛkɛ nyɔŋ nɛɛ nɔ efɔ̃ shi koni egbala ejwɛŋmɔ kɛya Biblia mli nikasemɔ hee shishijee nɔ. Asafo Woloŋ Nikasemɔ nɔkwɛlɔi lɛ ahala otsi(i) (a)naagbee ni akɛbaatsu nii lɛ, titri lɛ kɛha nɛkɛ yiŋtoo nɛɛ koni agbɛnɛ amɛto amɛkui lɛ ahe gbɛjianɔ koni amɛ fɛɛ amɛmia amɛhiɛ yɛ sɛɛsaramɔ nitsumɔ lɛ mli.
3 Okɛ osɛɛsaramɔ he nibii ni oŋmala oshwie shi lɛ aba nɛkɛ kpeei kɛha shiɛmɔyaa nɛɛ shishi. Koni oya mɛi fɛɛ ni jie miishɛɛ kpo, ni hé wolo, loo amɛba kpeei lɛ aŋɔɔ. Yaa mɔ fɛɛ mɔ ŋɔɔ kɛ oti pɔtɛɛ akɛ oooje nikasemɔ shishi.
4 Feemɔ Biblia Mli Nikasemɔ He Nɔkwɛmɔnɔ: Yɛ kpeei ni ahala kɛha shiɛmɔyaa lɛ shishi lɛ, esa akɛ akɛ nɔkwɛmɔnɔ ni asaa he jogbaŋŋ yɛ mli aha, ni atsɔɔ bɔ ni afeɔ ajeɔ nikasemɔ shishi yɛ sɛɛsaramɔ be mli. Obaanyɛ okɛɛ akɛ: “Mɛi babaoo yɛ Biblia, shi amɛyɔseee akɛ sanebimɔi ni he hiaa ni wɔ fɛɛ wɔkɛkpeɔ yɛ shihilɛ mli lɛ ahetooi yɛ mli. [Tsɔɔmɔ lɛ saneyitsei ni ato naa yɛ Nilee wolo lɛ mli, ni okane saneyitsei ni yɔɔ yitsei 3, 5, 6, 8, kɛ 9.] Kɛji okɛ nikasemɔ he wolo nɛɛ tsu nii ŋmɛlɛtswaa kome loo nɔ yɛ otsi fɛɛ otsi mli lɛ, obaanyɛ oná Biblia lɛ he shishijee shishinumɔ ko yɛ nyɔji fioo pɛ mli. Kɛji ooosumɔ ni ohala nɛkɛ yitsei nɛɛ ateŋ eko lɛ, maná he miishɛɛ akɛ matsɔɔ bo bɔ ni gbɛjianɔtoo lɛ tsuɔ nii ehaa.” Kɛ mɔ lɛ shashao shi akɛ ekɛ bo aaakase nii lɛ yɛ dekã ni ebɛ kwraa lɛ hewɔ lɛ, tsɔɔmɔ mli oha lɛ akɛ wɔyɛ gbɛjianɔtoo ni afo lɛ kuku hu. Jiemɔ Taoɔ wolo bibioo lɛ yi otsɔɔ lɛ, ni okɛɛ akɛ obaasumɔ ni okɛ lɛ akase nikasemɔ kome kuku yɛ minitii 15 kɛyashi 30 mli daa otsi.
5 Kɛ wɔ fɛɛ wɔkɛ mɔdɛŋbɔɔ fee ekome ni wɔje nikasemɔi ashishi, ni kɛ wɔsɔle wɔha Yehowa jɔɔmɔ yɛ wɔ mɔdɛŋbɔi anɔ lɛ, eka shi faŋŋ akɛ, wɔbaaná nikaselɔi heei! (1 Yoh. 5:14, 15) Kɛ ootao Biblia mli nikasemɔ lɛ, enɛ baanyɛ afee hegbɛ ni oná ni okɛaaje eko shishi.