Nɔkwɛlɔi ni Nyiɛɔ Hiɛ—Teokrase Sɔɔmɔ Skul Nɔkwɛlɔ Lɛ
1 Teokrase Sɔɔmɔ Skul nɔkwɛlɔ lɛ ji mɔ ko ni eda yɛ mumɔŋ ni bɔɔ mɔdɛŋ waa yɛ wiemɔ kɛ nitsɔɔmɔ mli ni biɔ ni wɔkɛ woo aha lɛ ni wɔkɛ lɛ afee ekome. (1 Tim. 5:17) Mɛni ji egbɛnaa nii?
2 Teokrase Sɔɔmɔ Skul lɛ wojiatoohe ni yɔɔ Maŋtsɛyeli Asa lɛ nɔ lɛ bajeɔ ekwɛmɔ shishi. Eyɛ he miishɛɛ waa akɛ eeewo mɛi fɛɛ ni he saa lɛ hewalɛ koni amɛŋma amɛgbɛi yɛ skul lɛ mli. Ekwɛɔ koni aŋmala nibii jogbaŋŋ ashwie shi bɔni afee ni akɛ nifeemɔi lɛ ahe nitsumɔ aha yɛ gbɛjianɔtoo kpakpa naa, kɛ hoo lɛ, otsii etɛ kɛtsɔ hiɛ dani skul nifeemɔ lɛ eko fɛɛ eko ashɛ. Ehe miihia ni ele asafo lɛ jogbaŋŋ, koni eha nikaselɔ fɛɛ nikaselɔ kɛ enyɛmɔi ahi ejwɛŋmɔ mli. Eyɛ mli akɛ ekolɛ ebaaha nyɛmi kroko aye abua lɛ kɛha skul lɛ he gbɛjianɔtoo moŋ, shi nifeemɔi lɛ ní aaaja lɛ jogbaŋŋ lɛ baaje skul nɔkwɛlɔ lɛ gbɛtsɔɔmɔ shishi.
3 Bɔni afee ni eha skul lɛ mli nitsɔɔmɔ lɛ amɔ shi jogbaŋŋ lɛ, esa akɛ nɔkwɛlɔ lɛ asaa ehe jogbaŋŋ daa otsi, koni ekase woji amli nifeemɔi ni ekaha lɛ jogbaŋŋ. Enɛ haa enyɛɔ ehaa asafo lɛ náa nibii ni akaseɔ lɛ he miishɛɛ, koni ele kɛji atsu nifeemɔ ni akɛha lɛ he nii jogbaŋŋ, koni emamɔ otii ni he hiaa ni akɛbaafata niŋmaa kaai lɛ ahe lɛ anɔ mi.
4 Yɛ skulnyo fɛɛ skulnyo wiemɔ sɛɛ lɛ, nɔkwɛlɔ lɛ baajie skulnyo lɛ yi ni ebaatsɔɔ nɔ hewɔ ni wiemɔ su ko ni etsu he nii lɛ hi loo nɔ hewɔ ni ehe hiaa ni eya hiɛ yɛ mli. Kɛ tsɔsemɔ he miihia mɔ ko lolo koni ekɛsaa ehe yɛ eskul nifeemɔi amli lɛ, no lɛ, nɔkwɛlɔ lɛ, loo mɔ kroko ni ehala lɛ lɛ baanyɛ ekɛ yelikɛbuamɔ aha.
5 Bɔni afee ni wɔná nitsumɔ dɛŋdɛŋ ni Teokrase Sɔɔmɔ Skul nɔkwɛlɔ lɛ tsuɔ kɛ ŋaawolɔi krokomɛi ni sɔmɔɔ yɛ egbɛtsɔɔmɔ shishi lɛ he sɛɛ kɛmɔ shi lɛ, esa akɛ wɔya skul lɛ daa. Esa akɛ wɔtsu wɔnifeemɔi lɛ fɛɛ ahe nii hu ni wɔkɛ ŋaawoo ni wɔnine shɛɔ nɔ kɛ nɔ ni akɛhaa skulbii krokomɛi lɛ hu atsu nii. Yɛ nɛkɛ gbɛ nɔ lɛ, wɔbaanyɛ wɔya hiɛ fiofio yɛ wɔnyɛmɔ ni wɔkɛaashiɛ Maŋtsɛyeli shɛɛ sane lɛ yɛ faŋŋ mli kɛ yɛ shia kɛ shia lɛ.—Bɔf. 20:20; 1 Tim. 4:13, 15.