Okɛ Wɔwoji lɛ Atsu Nii yɛ Nilee Mli

¹ Nɔ ni wɔkɛje woji kɛ nitsumɔ ni wɔto he gbɛjianɔ lɛ shishi ji July 1, 1879 Watchtower wolo tɛtrɛɛ lɛ ekomekomei 6,000 lɛ jaa. Kɛjɛ nakai beaŋ kɛbaa nɛɛ, akala woji ni fá babaoo, ni ajara babaoo diɛŋtsɛ.

² Tooyeli He Gbɛjianɔtoo ni Yɔɔ Mlɛo: Kɛjɛ December afi 1999 kɛyaa lɛ, akɛ woji tɛtrɛbii kɛ woji wuji miiha shiɛlɔi kɛ maŋbii ni yɔɔ wiemɔ lɛ he miishɛɛ lɛ yɛ tooyeli he gbɛjianɔtoo ni yɔɔ mlɛo naa, ni tsɔɔ akɛ abiii loo atsɔɔɔ akɛ akɛ shika pɔtɛɛ ko aye abua ní akɛmiifee nɔ ni adamɔɔ nɔ ahaa mɔ ko nine shɛɔ wolo ko nɔ. Kɛ akɛ wolo ha lɛ, akpɛlɛɔ nɔ fɛɛ nɔ ni ajɛɔ tsui mli akɛhaa lɛ nɔ koni akɛfĩ jeŋ muu fɛɛ sanekpakpa shiɛmɔ nitsumɔ lɛ sɛɛ. Wɔheɔ wɔyeɔ akɛ, Yehowa baajɔɔ gbɛjianɔtoo nɛɛ nɔ.—Okɛto Mateo 6:33 he.

³ Shihilɛi Ahe Nii ni Aaatsu yɛ Shiɛmɔ Nitsumɔ lɛ Mli: Wɔbaaya nɔ wɔkɛ Wɔ Maŋtsɛyeli Sɔɔmɔ lɛ mli gbɛtsɔɔmɔi atsu nii koni wɔkɛtee miishɛɛ shi. Ehe ehiaaa ni akɛ wolo ko aha yɛ hei ni ajieee miishɛɛ kpo atsɔɔɔ yɛ lɛ. Wɔsumɔŋ ni wɔkɛ wɔwoji lɛ aha mɛi ni ejieee miishɛɛ kpo lɛ ní wɔkɛfite yiŋtoo ni yɔɔ wɔwoji lɛ asɛɛ lɛ. Yɛ gbɛ kroko nɔ lɛ, yɛ he ni shiatsɛ lɛ ejie miishɛɛ kpo etsɔɔ ni ekpɛlɛ nɔ akɛ ebaakane wolo lɛ, abaanyɛ akɛha. Wɔmiisumɔ ni wɔkɛ wɔwoji lɛ atsu nii yɛ nilee mli.

⁴ Nɔ ni nyiɛ sɛɛ nɛɛ ji saji komɛi ni obaanyɛ owie beni okɛ wolo lɛ etsɔɔ lɛ: “Kɛ obaaná he miishɛɛ akɛ obaakane wolo nɛɛ, no lɛ miyɛ he miishɛɛ akɛ mashi maha bo.” Ekolɛ shiatsɛ lɛ baabi akɛ: “Enyiɛ ahɔɔ lɛ?” Obaanyɛ oha hetoo akɛ: “Wɔyeee jara. Wɔhɔɔɔ wolo nɛɛ. Akɛ tsuijurɔ miitsu nitsumɔ ni wɔtsuɔ yɛ nyɛ akutso lɛ mli ŋmɛnɛ lɛ yɛ shikpɔji 233 nɔ yɛ je lɛŋ fɛɛ ni akɛye abua mɛi koni amɛkase gbɛ ni aaatsɔ nɔ kɛya naanɔ wala mli lɛ he nii. Kɛ obaasumɔ ni okɛ nɔ ko aye abua nitsumɔ nɛɛ, no lɛ miyɛ he miishɛɛ akɛ makpɛlɛ nɔ.”

⁵ Kɛ okɛ woji tɛtrɛbii lɛ miiha lɛ, obaanyɛ obi saji komɛi ni kɔɔ emli sane pɔtɛɛ ko he, ní okɛɛ akɛ: “Masumɔ ni oyɔse sane nɛɛ mli nibii babaoo. Kɛ oosumɔ ni okane wolo tɛtrɛɛ nɛɛ, no lɛ, ebaaŋɔɔ minaa akɛ mashi maha bo.” Kɛ ahe lɛ, obaanyɛ okɛfata he akɛ: “Eŋɔɔ minaa akɛ minyɛ mikɛ sane nɛɛ ebaha bo. Misusuɔ akɛ obaana akɛ sane lɛ tsɔɔ mɔ nii jogbaŋŋ diɛŋtsɛ. Yɛ anɔkwale mli lɛ, masumɔ ni maba ekoŋŋ otsi ni baa nɛɛ koni male nɔ ni osusuɔ yɛ he. Obaana akɛ akalaa Buu-Mɔɔ lɛ yɛ wiemɔi 132 mli, ni ajaraa nɔ ni fá fe ekomekomei 22,000,000 yɛ je lɛŋ fɛɛ. [Kɛ́ Awake! ni lɛ, akalaa nɔ ni fá fe ekomekomei 19,000,000 yɛ wiemɔi 83 mli.] Too ni ajɛɔ suɔmɔ mli ayeɔ lɛ ji nɔ ni akɛfĩɔ nitsumɔ nɛɛ fɛɛ sɛɛ. Kɛ bo hu oosumɔ ni okɛ nɔ ko fioo ake kɛfĩ wolokasemɔ nitsumɔ nɛɛ sɛɛ lɛ, ebaafee miishɛɛ akɛ wɔbaakpɛlɛ nɔ.”

⁶ Yɛ shihilɛi komɛi amli lɛ, ekolɛ nɔ ni tsɔɔ too ni ayeɔ kɛha wɔ jeŋ muu fɛɛ nitsumɔ lɛ he sanegbaa baafee nɔ ni wa. Ákɛ nɔkwɛmɔnɔ lɛ, ekolɛ shiatsɛ ni yɔɔ wiemɔ lɛ he miishɛɛ lɛ baabi akɛ: “Nyɛkɛmiike lo?” Wɔbaanyɛ wɔha hetoo akɛ: “Kɛ oosumɔ ni okane wolo lɛ, ni obaasumɔ ni mikɛha bo lɛ, no lɛ, onɔ̃ ni. Masumɔ ni maba biɛ otsi ni baa nɛɛ koni wɔsusu nɔ ni wɔwie lɛ he, ní magba bo wɔ jeŋ muu fɛɛ nitsumɔ lɛ he sane babaoo.” Yɛ saramɔi ni nyiɛ sɛɛ lɛ mli lɛ, obaanyɛ okɛɛ shiatsɛ lɛ bɔ ni akɛ shika yeɔ buaa wɔ nitsumɔ lɛ ahaa.

⁷ Aloo shiatsɛ lɛ baanyɛ ahe wolo lɛ yɛ odɛŋ amrɔ nɔŋŋ ni ekɛɛ akɛ, “Oyiwaladɔŋŋ.” Obaanyɛ ohere nɔ akɛ: “Shidaa bɛ́. Mile akɛ obaaná ekanemɔ he miishɛɛ. Mɛi babaoo susuɔ bɔ ni feɔ ni akɛ shika yeɔ buaa nitsumɔ nɛɛ he, ejaakɛ wɔtsuɔ nitsumɔ nɛɛ yɛ jeŋ fɛɛ. Mɛi babaoo ni heɔ wɔwoji lɛ etsɔɔ hiɛsɔɔ kɛha nɔ ni amɛbaakase kɛjɛ mli lɛ, ni amɛ́jɛ amɛtsui mli amɛkɛ tooyeli fioo ko eha bɔni afee ni anyɛ ajara woji nɛɛ lolo. Kɛ mɛi fee nakai lɛ, wɔnáa he miishɛɛ akɛ wɔɔkpɛlɛ nɔ.”

⁸ Ani Ayɛ He Miishɛɛ Lɛɛlɛŋ?: Eka shi faŋŋ akɛ jeee wɔ yiŋtoo ji ni wɔjara woji wɔha mɔ fɛɛ mɔ kɛkɛ. Wɔmiisumɔ ni woji lɛ atsu yiŋtoo ni yɔɔ sɛɛ lɛ he nii, ni ji akɛ, koni eye ebua anɔkwafoi ni amɛkase Yehowa naakpɛɛ yiŋtoi lɛ ahe nii babaoo. Ebaafee nɔ ni sɛɛnamɔ baŋ he akɛ wɔɔshi woji lɛ wɔha aŋkroaŋkroi ni amɛjieee hiɛsɔɔ kpo amɛtsɔɔɔ mumɔŋ nibii lɛ. (Heb. 12:16) Woji ni ajaraa ni woɔ yibii lɛ damɔ nyɛmɔ ni oyɔɔ akɛ oooyɔse anɔkwa miishɛɛ lɛ nɔ. Mɛɛ gbɛ nɔ abaanyɛ atsɔɔ miishɛɛ ni tamɔ nɛkɛ? Suɔmɔ ni mli wa ni mɔ lɛ yɔɔ akɛ ekɛ bo aaagba sane lɛ ji okadi kpakpa. Aloo kɛ́ eebo bo toi beni owieɔ lɛ, ní eeha sanebimɔi ahetoo, ní eetsɔɔ ejwɛŋmɔ yɛ saji ahe lɛ tsɔɔ akɛ ekɛ ehe miiwo sanegbaa lɛ mli. Wiemɔ ni ekɛ bo wieɔ yɛ bulɛ kɛ naanyobɔɔ su naa lɛ tsɔɔ akɛ eyɛ enɛ he jwɛŋmɔ kpakpa. Kɛ enyiɛ sɛɛ beni okaneɔ nii kɛjɛɔ Biblia lɛ mli lɛ tsɔɔ bulɛ ni eyɔɔ kɛha Nyɔŋmɔ Wiemɔ lɛ. Bei pii lɛ, ebaafee nɔ ni yeɔ ebuaa akɛ ooobi kɛji amɛbaakane wolo ni okɛhaa amɛ lɛ. Agbɛnɛ hu, obaanyɛ okɛɛ lɛ akɛ obaaku osɛɛ obasara lɛ koni nyɛtsá sanegbaa lɛ nɔ. Enɛ he nitsumɔ yɛ gbɛ ni ja nɔ lɛ hu ji odaseyeli ni tsɔɔ akɛ amɛyɛ he miishɛɛ. Kɛ oyɔse odaseyelii ni tamɔ nɛkɛ ni tsɔɔ anɔkwa miishɛɛ ni ayɔɔ lɛ, ekolɛ mɔ lɛ kɛ wolo fɛɛ wolo ni enine shɛɔ nɔ lɛ baatsu nii koni ehe aba sɛɛnamɔ.

⁹ Enɛ baabi ni shiɛlɔ lɛ kɛ sɛɛyoomɔ babaoo atsu nii koni ekɛle kɛji mɔ lɛ ji mɔ ni sa ni jeee akɛ ená miishɛɛ kɛkɛ akɛni abaaha lɛ nɔ ko ni ewoŋ he nyɔmɔ hewɔ. (Mat. 10:11) Yɛ woji kɛhamɔ he gbɛjianɔtoo ni yɔɔ mlɛo nɛɛ naa lɛ, hegbɛ ni mɔ ko aaaná koni enine ashɛ eko nɔ lɛ damɔŋ nyɛ ni eeenyɛ ehé yɛ jara pɔtɛɛ ko naa lɛ nɔ, shi ebaadamɔ kɛji amɛyɛ shɛɛ sane lɛ he miishɛɛ lɛɛlɛŋ lɛ nɔ.

¹⁰ Wɔ Diɛŋtsɛ Wɔ Gbɛnaa Nii: Wɔhiɛ sɔɔ tooyeli ni wɔnyɛmimɛi lɛ kɛ mɛi ni yɔɔ wiemɔ lɛ he miishɛɛ lɛ kɛfĩɔ jeŋ muu fɛɛ nitsumɔ lɛ sɛɛ lɛ waa diɛŋtsɛ. No hewɔ lɛ, gbɛnaa nii diɛŋtsɛ kã shiɛlɔ fɛɛ shiɛlɔ nɔ akɛ ehiɛ wolo kotoku ni akadi he, koni ekɛ shika ni maŋbii kɛbaaye amɛbua lɛ awo mli. Kɛkɛ lɛ, kɛ́ atee asafoŋ kpee ni nyiɛ sɛɛ lɛ, akɛ shika fɛɛ ni akɛke lɛ awo tooyeli adeka ni yɔɔ Maŋtsɛyeli Asa lɛ nɔ lɛ mli yɛ anɔkwayeli mli, nɔ ni akadi he akɛ akɛtsuɔ nii kɛha Asafo lɛ jeŋ muu fɛɛ nitsumɔ lɛ. Ebaafee nɔ ni esaaa kwraa akɛ shiɛlɔ ko loo gbɛgbalɔ ko kɛ shika ni akɛke lɛ aaatsu yiŋtoo kroko ko he nii. Shika ni akɛke lɛ jeee shika he sɛɛnamɔ kɛha shika ni ekolɛ shiɛlɔ lɛ kɛha beni ekɔɔ wolo lɛ yɛ Maŋtsɛyeli Asa lɛ nɔ lɛ. Mɔ ko ni akɛ lɛ kpe yɛ shikpɔŋkuku lɛ mli lɛ ji mɔ ni kɛha yɛ hekɛnɔfɔɔ kwraa mli akɛ akɛ shika lɛ baaha koni akɛha Yehowa webii ni yɔɔ jeŋ fɛɛ lɛ anitsumɔ lɛ aya hiɛ. Suɔmɔ ni mli wa ni wɔɔjɛ mli koni wɔkɛ anɔkwayeli atsu nii yɛ sane nɛɛ mli lɛ kɛ yijiemɔ baaha wɔŋwɛi Tsɛ, Yehowa.—1 Kor. 10:31; Heb. 13:18.

¹¹ Nɛkɛ tsakemɔ ni wɔfee yɛ bɔ ni wɔtsuɔ wɔnitsumɔ lɛ wɔhaa lɛ ji odaseyeli lolo ni tsɔɔ akɛ “wɔkɛ Nyɔŋmɔ wiemɔ lɛ yeee jara.” (2 Kor. 2:17, NW) Etsɔɔ hu akɛ wɔjɛɛɛ je lɛ mli.—Yoh. 17:14.

¹² Akɛni Babilon Kpeteŋkpele lɛ hiɛkpatamɔ miibɛŋkɛ hewɔ lɛ, akɛ nɔnyɛɛ ni naa wa babaoo miiba jamɔ kui fɛɛ anɔ. Nɔ ni wɔtaoɔ titri ji akɛ, jeŋ muu fɛɛ Maŋtsɛyeli shiɛmɔ nitsumɔ ni he hiaa lɛ baaya nɔ be fɛɛ be ni naatsĩi ko kwraa bɛ mli, ní no aha mɛi babaoo yi aná wala.—Mat. 24:14; Rom. 10:13, 14.