Esa akɛ Wɔná Bulɛ Kɛha Yehowa Nɔyeli Hegbɛ
Mɛɛ subaŋ baa ojwɛŋmɔ mli kɛ́ atsi blemabii agbɛii tamɔ Kora, Datan, kɛ Abiram atã? Atuatsemɔ! Kɛmiishi mɛni? Nyɔŋmɔ nɔyeli hegbɛ. Áŋma gbɛ ni yɔɔ oshara ni amɛkɔ nɛɛ he saji fitsofitso afɔ shi yɛ 4 Mose yitso 16 lɛ mli, ni akɛ sane lɛ naamuamɔ eha yɛ saneyitso ni ji “Okɛ Anɔkwayeli Aba Ohe Shi Oha Hegbɛ Ni Nyɔŋmɔ Eto Lɛ,” ni je kpo yɛ August 1, 2002, Buu-Mɔɔ lɛ mli lɛ mli. Obaaná he sɛɛ akɛ oookane sane nɛɛ, koni agbɛnɛ okwɛ ehe drama ni aha emli eka shi faŋŋ yɛ vidio ni ji Respect Jehovah’s Authority (Ná Bulɛ Kɛha Yehowa Nɔyeli Hegbɛ) lɛ mli. Obaana béi ni te shi yɛ Korabii anɔkwafoi lɛ kɛ amɛtsɛ shitee-kɛ-wolɔ lɛ ni kɛ jeŋ muu fɛɛ Maŋtsɛ lɛ ná naataamɔ lɛ teŋ lɛ. (4 Mose 26:9-11) Esa akɛ drama nɛɛ, ni ji shihilɛ mli saji ni ba diɛŋtsɛ lɛ atsirɛ wɔ fɛɛ koni wɔha anɔkwa ni wɔyeɔ Yehowa lɛ aya hiɛ babaoo diɛŋtsɛ.
Be mli ni okwɛɔ vidio nɛɛ lɛ kadimɔ odaseyeli ni tsɔɔ bɔ ni Kora kɛ ehefatalɔi shitee-kɛ-wolɔi lɛ yeee anɔkwa yɛ yɛ gbɛ̀i ekpaa ni he hiaa nɛɛ anɔ: (1) Mɛɛ gbɛ nɔ amɛjieee bulɛ kpo amɛtsɔɔɔ Nyɔŋmɔ nɔyeli hegbɛ yɛ? (2) Mɛɛ gbɛ nɔ amɛtsɔ amɛha henɔwomɔ, hiɛnyam taomɔ, kɛ awuŋayeli ná amɛnɔ hewalɛ yɛ? (3) Mɛɛ gbɛ nɔ amɛtsɔ amɛgbala amɛjwɛŋmɔ kɛtee mɛi ni Yehowa ehala amɛ lɛ agbɔjɔmɔi anɔ yɛ? (4) Mɛɛ huhuuhu wiemɔ su amɛná? (5) Mɛni hewɔ amɛtsuii enyɔɔɔ amɛmli yɛ gbɛhei ni amɛsɔmɔɔ yɛ mli lɛ ahe lɛ? (6) Amɛkɛ anɔkwa ni ayeɔ nanemɛi kɛ wekumɛi lɛ ye anɔkwa ni ayeɔ Nyɔŋmɔ najiaŋ lɛ yɛ mɛɛ gbɛ nɔ?
Susumɔ bɔ ni nɔ ni wɔkaseɔ kɛjɛɔ Biblia mli drama nɛɛ mli lɛ kɔɔ bɔ ni wɔkwɛɔ Nyɔŋmɔ nɔyeli hegbɛ wɔhaa ŋmɛnɛ lɛ he: (1) Te esa akɛ wɔfee wɔnii yɛ yiŋ ni onukpai lɛ kpɛɔ yɛ asafo lɛ mli lɛ he wɔha tɛŋŋ, ni mɛni hewɔ? (2) Mɛɛ gbɛ nɔ wɔɔtsɔ wɔtswa susumɔi fɛɛ ni ejaaa ni teɔ shi yɛ wɔmli lɛ wɔfɔ yɛ? (3) Te esa akɛ wɔfee wɔnii yɛ mɛi ni Nyɔŋmɔ ehala amɛ akɛ amɛnyiɛ hiɛ lɛ agbɔjɔmɔi ahe wɔha tɛŋŋ? (4) Mɛni esa akɛ wɔfee kɛ́ huhuuhu wiemɔ mumɔ ko bɔi shitee yɛ wɔtsui mli? (5) Te esa akɛ wɔnu hegbɛ fɛɛ hegbɛ ni akɛwo wɔdɛŋ lɛ he wɔha tɛŋŋ? (6) Namɛi esaaa kɔkɔɔkɔ akɛ wɔkɛ amɛyeɔ klɛŋklɛŋ gbɛhe yɛ anɔkwa ni wɔyeɔ Nyɔŋmɔ lɛ najiaŋ, ni mɛɛ be mli enɛ baanyɛ afee kaa ni wa kɛha wɔ yɛ?
Mɛni hewɔ okwɛɛɛ vidio nɛɛ ekoŋŋ kɛ́ asusu sane nɛɛ he yɛ asafo lɛ mli agbe naa? Ha yiŋtoi ahewɔ ni esa akɛ wɔbu Yehowa nɔyeli hegbɛ be fɛɛ be lɛ ana ojwɛŋmɔ nɔ hewalɛ babaoo!—Lala 18:26; 37:28.