Teemɔ Mɛi ni Oyahaa Amɛ Woji Tɛtrɛbii Daa lɛ Amiishɛɛ Shi
1. Mɛɛ gbɛ nɔ wɔbaanyɛ wɔtsɔ wɔtee mɛi ni wɔkɛ woji tɛtrɛbii lɛ yahaa amɛ daa lɛ amiishɛɛ shi?
1 Mɛi babaoo ni wɔkɛkpeɔ yɛ shiɛmɔ nitsumɔ lɛ mli lɛ hereɔ wɔ hiɛmɛɛ ni amɛkɛ hiɛsɔɔ kpɛlɛɔ wɔwoji lɛ anɔ, shi amɛshashaoɔ shi akɛ amɛaakpɛlɛ nɔ ákɛ akɛ amɛ afee Biblia mli nikasemɔ daa. Gbɛ kome ni wɔɔtsɔ nɔ wɔtee amɛmiishɛɛ shi ji kɛtsɔ woji tɛtrɛbii lɛ ni wɔkɛaaha amɛ daa lɛ nɔ. Kɛ́ okɛ woji tɛtrɛbii ha lɛ, ŋmaa mɔ lɛ gbɛi kɛ edrɛs, be ni okɛtee eŋɔɔ, wolo tɛtrɛɛ diɛŋtsɛ ni eŋɔ, kɛ ŋmalɛ ni nyɛsusu he, kɛ nibii krokomɛi fɛɛ ni okadi akɛ ekolɛ mɔ lɛ mii shɛɔ he lɛ oshwie shi. Be fɛɛ be ni onine baashɛ woji tɛtrɛbii heei anɔ lɛ, kwɛmɔ mli ni ohala saji otii ni mɛi ni oyahaa amɛ eko daa lɛ baaná he miishɛɛ ni owie nomɛi ahe be mli ni oyasaraa amɛ lɛ. (1 Kor. 9:19-23) Beni be shwieɔ mli lɛ, nɔ ko ní amɛkane yɛ wɔwoji tɛtrɛbii lɛ amli lɛ baanyɛ atee amɛmiishɛɛ shi ni amɛbaasumɔ ní amɛkase babaoo kɛfata he.
2. Mɛni hewɔ ni ehe hiaa ni gbɔmɛi kɛ oyaiyeli atao Yehowa sɛɛ gbɛ bianɛ lɛ, ni mɛni wɔbaanyɛ wɔfee ni wɔkɛye wɔbua amɛ?
2 Wɔkpɛlɛɔ nɔ akɛ mɛi babaoo nyɛŋ amɛbatsɔmɔ Yehowa sɔɔlɔi kɛtsɔ woji tɛtrɛbii lɛ ni amɛ diɛŋtsɛ amɛbaakane kɛkɛ lɛ nɔ. Akɛni ehe miihia waa ni gbɔmɛi kɛ oyaiyeli atao Yehowa sɛɛ gbɛ bianɛ hewɔ lɛ, mɛni wɔbaanyɛ wɔfee ni wɔkɛye wɔbua amɛ? (Zef. 2:2, 3; Kpoj. 14:6, 7) Wɔbaanyɛ wɔtee amɛmiishɛɛ shi kɛtsɔ ŋmalɛ ko ni baakɔ amɛhe jogbaŋŋ ni wɔkɛ amɛ baasusu he be fɛɛ be ni wɔkɛ woji tɛtrɛbii lɛ baaha amɛ lɛ nɔ.
3. (a) Mɛɛ gbɛ nɔ wɔbaanyɛ wɔtsɔ wɔsaa wɔhe kɛha sanegbaai ni akɛdamɔɔ ŋmalɛ kome nɔ lɛ? (b) Mɛɛ saneyitsei kɔɔ mɛi ni yɔɔ oshikpɔŋkuku lɛ mli lɛ ahe titri?
3 Ha Sanegbaa lɛ Adamɔ Ŋmalɛ Kome Nɔ: Susumɔ mɔ ni oyahaa lɛ woji tɛtrɛbii daa lɛ he, ni be fɛɛ be lɛ okɛ ŋmalɛ ko ni kɔɔ ehiamɔ nii ahe lɛ asaa ohe ni okɛ lɛ agba he sane. (Fil. 2:4) Ákɛ nɔkwɛmɔnɔ lɛ, obaanyɛ otsɔ sɛɛkuu-kɛsaramɔi srɔtoi anɔ ogba nɔ ni Biblia lɛ kɛɔ yɛ shihilɛ ni gbohii lɛ yɔɔ mli lɛ kɛ gbohiiashitee he hiɛnɔkamɔ lɛ he sane otsɔɔ mɔ ko ni esuɔlɔ ko egbo nyɛsɛɛ nɛɛ nɔŋŋ lɛ. Obaanyɛ okɛ saneyitsei titrii ni ji “Death” (Gbele) kɛ “Resurrection” (Gbohiiashitee) ni yɔɔ Reasoning wolo lɛ mli lɛ asaa ohe kɛha nɛkɛ sanegbaai ni akɛdamɔɔ ŋmalɛ kome nɔ nɛɛ. Obaanyɛ okɛ saneyitsei krokomɛi ni kɔɔ enɛɛmɛi ahe, tamɔ bɔ ni abaafee ajie hela, gbɔlɛ, kɛ gbele kɛya kwraa lɛ atsa sanegbaai lɛ anɔ yɛ sɛɛ mli. Yiŋtoo lɛ ji akɛ, otao saneyitso ko ni mɔ lɛ baaná he miishɛɛ koni oya nɔ otsɔɔ lɛ nɔ ni Biblia lɛ kɛɔ yɛ he fiofio.
4. Mɛni hewɔ ehe hiaa ni wɔha mɛi anu sane lɛ shishi be mli ni wɔkɛ Ŋmalɛi lɛ tsuɔ nii lɛ, ni mɛɛ gbɛ nɔ wɔɔtsɔ wɔfee enɛ?
4 Ha Amɛnu Sane lɛ Shishi: Eyɛ mli akɛ bei pii lɛ, sanegbaai ni tamɔ nɛkɛ ni oooha efee nɔ ni yɔɔ mlɛo kɛ kuku lɛ hi jogbaŋŋ moŋ, shi babaoo he miihia fe nɔ ni oookane ŋmalɛ ni ohala lɛ kɛkɛ. Satan eshwila mɛi pii ajwɛŋmɔi yɛ sanekpakpa lɛ he. (2 Kor. 4:3, 4) Ehe miihia ni aye abua mɛi ni le Biblia mli saji lɛ po dani amɛnu shishi. (Bɔf. 8:30, 31) No hewɔ lɛ, ŋmɛɛ otsui shi kɛtsɔɔ ŋmalɛ lɛ mli, ni ofee he nɔkwɛmɔnɔ, tamɔ bɔ pɛ ni obaafee yɛ Teokrase Sɔɔmɔ Skul nifeemɔ ko mli lɛ. (Bɔf. 17:3) Bɔɔ mɔdɛŋ ni oha mɔ lɛ ana akɛ ebaanyɛ ekɛ Nyɔŋmɔ Wiemɔ lɛ atsu nii yɛ lɛ diɛŋtsɛ eshihilɛ mli.
5. Mɛɛ gbɛ nɔ mɔ ko ni ohaa lɛ woji tɛtrɛbii daa lɛ saramɔ baanyɛ ebatsɔ Biblia mli nikasemɔ?
5 Kɛji akɛ mɔ lɛ náa nɔ ni ekaseɔ lɛ he miishɛɛ lɛ, okɛ Biblia mli ŋmalɛi enyɔ loo etɛ afata he ni okɛtsa sanegbaai lɛ anɔ fiofio be fɛɛ be ni obaaku osɛɛ ni oyasara lɛ lɛ. Taomɔ hegbɛ ni okɛ lɛ aje Taoɔ wolo bibioo loo Nilee wolo lɛ kasemɔ shishi. Yɛ nɛkɛ gbɛ nɔ lɛ, mɛi ni okɛ woji tɛtrɛbii lɛ yahaa amɛ daa lɛ asaramɔ baanyɛ ebatsɔ Biblia mli nikasemɔ agbɛnɛ.