Sanebimɔ He
◼ Mɛɛ gbɛ nɔ wɔteŋ mɔ fɛɛ mɔ baanyɛ atsɔ aye abua koni wɔkase nii yɛ toiŋjɔlɛ mli be fɛɛ be yɛ asafoŋ kpeei ashishi? (5 Mose 31:12)
Yɛ bulɛ ni wɔyɔɔ kɛha Yehowa kɛ gbɛjianɔ ni eto kɛha asafoŋ kpeei lɛ hewɔ lɛ, awoɔ wɔ fɛɛ hewalɛ ni wɔba mra ni wɔfee klalo kɛha nɔ ni ebaatsɔɔ wɔ lɛ. Kɛ́ wɔtara sɛi ni yɔɔ hiɛgbɛ yɛ asa lɛ nɔ lɛ anɔ lɛ, enɛ yeɔ ebuaa ni ashiɔ sɛi ni yɔɔ sɛɛ gbɛ lɛ ahaa mɛi ni hiɛ gbekɛbii kɛ mɛi ni ekolɛ amɛbaakpe sɛɛ kɛba lɛ. Dani kpee lɛ baaje shishi lɛ, esa akɛ ato mobail foŋ kɛ elɛktrɔnik tsɔnei krokomɛi ni gbɛɔ lɛ he gbɛjianɔ bɔ ni amɛgbɛŋ kɛgbaŋ nyɛmimɛi lɛ anaa. Kɛ́ mɛi fɛɛ ni naa ebakpe shi lɛ ha ehi amɛjwɛŋmɔ mli akɛ kpee lɛ shishi ni amɛyɔɔ lɛ tsɔɔ akɛ amɛyɛ Nyɔŋmɔ hiɛ lɛ, nibii ni afeɔ kɛgbáa mɛi anaa lɛ nɔ baagbɔ́ ni ebaafee fioo ko pɛ.—Jaj. 5:1; Fil. 2:4.
Kɛ́ mɛi heei bɔi kpee baa lɛ, asafo lɛ mlinyo ko ni le amɛ lɛ baanyɛ ekɛ amɛ ata shi. Enɛ baanyɛ aye abua waa kɛ́ mɔ lɛ yɛ bii ni ehe baahia ni atsɔse amɛ. Kpeeibaa baanyɛ afee nɔ ko hee ko kwraa kɛha weku lɛ. Kɛ́ nakai ni lɛ, no lɛ amɛhiɛ baasɔ waa kɛ́ amɛbaanyɛ amɛta sɛɛgbɛ sɛi lɛ anɔ yɛ he ni ekolɛ amɛgbaŋ mɛi krokomɛi anaa kɛ́ ehe bahia ni fɔlɔi lɛ ashi asa lɛ nɔ be kukuoo ko yɛ amɛbii bibii lɛ ahiamɔ nii ahe nitsumɔ hewɔ. (Abɛi 22:6, 15) Esaaa akɛ wekui ni yɔɔ bii bibii lɛ yataraa tsũ kroko mli, he ni amɛbii lɛ baanyɛ aná hegbɛ kɛbolɔ. Ehi jogbaŋŋ akɛ fɔlɔ lɛ kɛ ebii lɛ baashi asa lɛ nɔ kɛ́ eetao ni etsɔse amɛ loo eyatsu amɛhiamɔ nii ko he nii, koni no sɛɛ lɛ ekɛ ebii lɛ aku sɛɛ kɛba asa lɛ nɔ ekoŋŋ.
Mɛi ni kwɛɔ shitaramɔ nɔ lɛ yeɔ buaa koni toiŋjɔlɛ ahi he ni akpeɔ yɛ kɛha jamɔ lɛ. Amɛyeɔ amɛbua wekui kɛ mɛi ni ekolɛ amɛbaakpe sɛɛ kɛba lɛ koni amɛná he ko ni sa ni amɛta. Mɛi ni kwɛɔ shitaramɔ nɔ lɛ haa ehiɔ amɛjwɛŋmɔ mli akɛ, esa akɛ amɛkɛ ŋaa kɛ nilee aye abua mɛi krokomɛi kɛná he ko kpakpa amɛta ní amɛkagbá mɛi krokomɛi anaa bɔ ni esaaa. Kɛ́ nɔ ko ni baanyɛ agbá mɛi krokomɛi anaa ba trukaa lɛ, amɛkɛ nilee tsuɔ nii kɛtsuɔ he nii. Kɛ́ gbekɛ ko nifeemɔ miigbala mɛi krokomɛi ajwɛŋmɔ lɛ, mɛi ni kwɛɔ shitaramɔ nɔ lɛ baanyɛ ajɛ mlihilɛ mli amɛye abua.
Mɛi fɛɛ ni eba kpee kɛha jamɔ lɛ baanyɛ aye abua ni aná toiŋjɔlɛ kɛkase Yehowa kɛ eyiŋtoo kɛha toiŋjɔlɛ kɛ jalɛ jeŋ hee lɛ he nii.—Heb. 10:24, 25.