Ye Obua Shiatsɛ lɛ Koni Esusu Nii Ahe
1. Mɛɛ shiɛmɔ gbɛ mɔɔ shi jogbaŋŋ?
1 Te shiɛmɔ gbɛi nɛɛ ateŋ nɔ ni mɔɔ shi jogbaŋŋ—ní okɛ osusumɔ aaafi shiatsɛ lɛ nɔ aloo ni oooye obua lɛ ni esusu nii ahe ni emu saji anaa yɛ gbɛ ni ja nɔ? Beni bɔfo Paulo kɛ Yudafoi ni yɔɔ Tesalonika lɛ wieɔ lɛ, eha amɛsusu nii ahe, ni no ha “amɛteŋ mɛi komɛi he kpɛ̃lɛ.” (Bɔf. 17:2-4) Mɛni nii ahe ni aaaha mɔ asusu lɛ biɔ ni afee?
2. Mɛɛ gbɛ nɔ wɔɔtsɔ wɔkase Paulo kɛ́ wɔmiishiɛ sanekpakpa lɛ?
2 Susumɔ Bɔ ni Mɔ lɛ Nuɔ He Ehaa kɛ Eshihilɛ He: Mɔ ni haa mɛi susuɔ nii ahe lɛ haa bɔ ni mɛi ni yɔɔ eshikpɔŋkuku lɛ mli lɛ nuɔ nii ahe amɛhaa lɛ hiɔ ejwɛŋmɔŋ. Beni Paulo kɛ Helabii ni heee yeee lɛ wieɔ yɛ Areopago lɛ, etsĩ nibii ni amɛle ni amɛkpɛlɛɔ nɔ lɛ atã kɛje shishi. (Bɔf. 17:22-31) No hewɔ lɛ, kɛ́ oosaa ohe kɛ shiɛmɔ wiemɔ ni okɛbaatsu nii lɛ, susumɔ mɛi ni yɔɔ oshikpɔŋkuku lɛ mli lɛ ahemɔkɛyelii kɛ jwɛŋmɔ ni ejaaa ni amɛhiɛ yɛ wɔhe lɛ ahe. (1 Kor. 9:19-22) Kɛ́ shiatsɛ lɛ wie nɔ ko kɛku onaa lɛ, bɔɔ mɔdɛŋ ni otao nibii ni ekpɛlɛɔ nɔ, ni odamɔ nomɛi anɔ oshiɛ otsɔɔ lɛ.
3. Mɛɛ gbɛ nɔ wɔbaanyɛ wɔkɛ sanebimɔi atsu nii jogbaŋŋ kɛye wɔbua mɛi ni amɛsusu nii ahe jogbaŋŋ?
3 Okɛ Sanebimɔi Atsu Nii Jogbaŋŋ: Ja wɔle he ni gbɛfalɔ ko damɔ dani wɔbaanyɛ wɔtsɔɔ lɛ gbɛ koni eyashɛ he ni eyaa lɛ. Nakai nɔŋŋ hu ja wɔle shĩatsɛ ko susumɔ dani wɔbaanyɛ wɔye wɔbua lɛ koni emu sane naa yɛ gbɛ ni ja nɔ. Dani Yesu baaye ebua mɔ ko ni esusu nii ahe lɛ, bei pii lɛ ebiɔ saji koni ekɛle mɔ lɛ susumɔ. Ákɛ nɔkwɛmɔnɔ lɛ, beni nuu ko bi Yesu akɛ, “Mɛni mafee ni maná naanɔ wala?” lɛ, Yesu bi lɛ ejwɛŋmɔ dani eha lɛ hetoo. (Luka 10:25-28) Agbɛnɛ hu beni Petro ha sane ko hetoo ni ejaaa lɛ, Yesu kɛ sanebimɔi tsu nii jogbaŋŋ kɛjaje ejwɛŋmɔ. (Mat. 17:24-26) No hewɔ lɛ, kɛ́ shiatsɛ lɛ bi sane loo ewie nɔ ko ni ejaaa lɛ, wɔbaanyɛ wɔbi lɛ saji ni wɔkɛye wɔbua lɛ ni esusu nii ahe.
4. Mɛni hewɔ esa akɛ wɔbɔ mɔdɛŋ wɔye wɔbua shiatsɛ lɛ koni esusu nii ahe lɛ?
4 Kɛ́ wɔye wɔbua shiatsɛ lɛ ni esusu nii ahe lɛ, belɛ wɔmiikase Yesu ni ji Tsɔɔlɔ Kpele lɛ, kɛ sanekpakpa shiɛlɔi krokomɛi ni he ekpɔ ni hi shi yɛ klɛŋklɛŋ afii 100 lɛ mli lɛ. Nakai ni wɔfeɔ lɛ haa wɔwoɔ shiatsɛ lɛ ni wɔjieɔ bulɛ kpo wɔtsɔɔ lɛ. (1 Pet. 3:15) Enɛ feemɔ baanyɛ aha ená he miishɛɛ akɛ wɔku sɛɛ wɔbasara lɛ.