“Bɔ ni Ooofee Okɛ Woji Tɛtrɛbii lɛ Aha yɛ . . . Mli.”

Nyɔɔŋ fɛɛ nyɔɔŋ nɔ lɛ akɛ nifeemɔ ni tsɔɔ bɔ ni wɔɔfee wɔkɛ woji tɛtrɛbii lɛ aha lɛ fataa nibii ni wɔsusuɔ he yɛ Sɔɔmɔ Kpee lɛ mli lɛ he. Yiŋtoo lɛ jeee ni akɛsusu saji ni yɔɔ woji tɛtrɛbii lɛ amli lɛ he. Shi moŋ ato fã nɛɛ he gbɛjianɔ koni akɛsusu gbɛi anɔ ni abaatsɔ ni akɛ woji tɛtrɛbii lɛ aha lɛ he. No hewɔ lɛ, gbɛtsɔɔmɔ ni yɔɔ he lɛ ji akɛ, nyɛminuu ni baatsu nifeemɔ nɛɛ he nii lɛ kɛ wiemɔ fioo ko ni baatee mɛi amiishɛɛ shi yɛ woji tɛtrɛbii lɛ ahe lɛ baakpa enifeemɔ lɛ hiɛ. Esa ákɛ akɛ woji ni yɔɔ wiemɔ ni nyɛsafo lɛ wieɔ lɛ mli lɛ atsu nii kɛ́ eko yɛ. No sɛɛ lɛ, ebaabi shiɛlɔi lɛ ni amɛtsɔɔ bɔ ni amɛbaafee amɛkɛ wolo lɛ mli sane ko (loo emli saji komɛi) baatsu nii aha bɔni afee ni mɔ fɛɛ mɔ anyɛ anyiɛ sɛɛ ni amɛ hu amɛna bɔ ni amɛaafee amɛkɛha kɛ́ amɛtee shiɛmɔ. Nɔ najiaŋ ni eeebi toibolɔi lɛ ni amɛwie bɔ ni amɛaafee amɛkɛ woji lɛ aha lɛ he lɛ, eha amɛtsɔɔ saji ni amɛbaabi kɛtee mɛi lɛ amiishɛɛ shi kɛ ŋmalɛi ni amɛbaakane amɛha amɛ lɛ. Ebaaha afee nɔkwɛmɔnii yɛ bɔ ni akɛ woji enyɔ lɛ fɛɛ baatsu nii lɛ he kɛmu enifeemɔ lɛ naa. Esa akɛ wɔkwɛ woji lɛ amli kɛtsɔ hiɛ bɔni afee ni wɔnyɛ wɔtsɔɔ bɔ ni wɔɔfee wɔkɛha kɛ́ wɔba kpee lɛ. Kɛ́ wɔ fɛɛ wɔsaa wɔhe jogbaŋŋ lɛ, fã nɛɛ baaye abua wɔ ní wɔteŋ mɔ fɛɛ mɔ ajɔɔ enyɛmi naa.—Abɛi 27:17.