Okɛ Woji Tɛtrɛbii Aha Yɛ Hegbɛ Fɛɛ Hegbɛ Ni Ooona Mli
1 Buu-Mɔɔ lɛ etee nɔ efã Maŋtsɛyeli anɔkwale lɛ sɛɛ nɔ ni fe afi oha nɛ. Ekɛ Nyɔŋmɔ Wiemɔ lɛ tsuɔ nii kɛ hesaa akɛ klante ni akɛfolɔɔ tɔmɔi amli ni akɛkpaa apasa jamɔ mli tsɔɔmɔi ahe mama. Ehefatalɔ wolo tɛtrɛɛ Awake! lɛ hu flɔ anɔkwale gbɛ lɛ sɛɛ. Kɛha mɛi pii ni sumɔɔ jalɛ nifeemɔ lɛ, ebaatee amɛmiishɛɛ yɛ Ŋmalɛ mli saji ni mli kwɔlɔ ni anaa yɛ Asafo lɛ woji krokomɛi amli lɛ shi. Mɛni wɔbaanyɛ wɔfee koni wɔha mɛi babaoo anine ashɛ woji tɛtrɛbii nɛɛ anɔ?
2 Klɛŋklɛŋ nifeemɔ ji ni wɔle woji tɛtrɛbii lɛ amli saji. Enɛ tsɔɔ akɛ ni wɔɔkane amrɔ nɔŋŋ ni wɔnine aaashɛ nɔ ni agbɛnɛ wɔkɛ mɛi krokomɛi ni yɔɔ asafo lɛ mli lɛ agba emli saji lɛ ahe sane. Enɛ baaye abua wɔ ni wɔkɛ ekaa atsu nii ni wɔkɛ woji tɛtrɛbii lɛ aha mɛi krokomɛi ni wɔna sɛɛnamɔ ni yɔɔ woji nɛɛ ahe lɛ he jwɛŋmɔ kpakpa.
Kanemɔ Woji Tɛtrɛbii Lɛ
3 Nifeemɔi ni nyiɛ sɛɛ ji ni wɔtao hegbɛi ni wɔɔtsɔ nɔ wɔkɛ woji tɛtrɛbii lɛ aha mɛi krokomɛi. Akɛ nɔkwɛmɔ nɔ lɛ, yɛ nanemɛi ni aheɔ amɛ ayeɔ, gbɔmɛi loo wekumɛi ni yɔɔ wiemɔ lɛ he miishɛɛ lɛ agbɛfaŋ lɛ, yɛ bei babaoo mli lɛ nɔ ni he hiaa ni ofee nɔŋŋ ji ni otee sanebimɔ loo sane ko ni amɛsumɔɔ lɛ shi. Kɛ otee amɛ akɔnɔ shi kɛha enɛ he hiɛsɔɔ babaoo lɛ, obaanyɛ okɛɛ amɛ akɛ obaaku osɛɛ ni okɛ sane ko ni aŋma ni kɔɔ nɔ ni nyɛsusu he lɛ he aba. Kɛkɛ lɛ ohe afee oya ni okɛ wolo ni wieɔ nɔ ni nyɛsusu he loo nyɛwie he lɛ aha amɛ.
4 Kɛjɛ November ni ho lɛ mli ni Yehowa gbele gbɛ kɛha wɔ koni wɔnine ashɛ mumɔŋ niyenii ni yɔɔ Blɔfo loo ŋleshi woji tɛtrɛbii lɛ amli lɛ nɔ yɛ naagbai ni jwere wɔnɔ lɛ fɛɛ sɛɛ. Wɔle akɛ amrɔ nɛɛ nɔ ni wɔnine shɛɔ nɔ lɛ faaa. Ebaahi kɛkɛ kɛha shiɛlɔ lɛ diɛŋtsɛ teemɔŋ nikasemɔ ni ekɛto. Shi wɔyɛ hiɛnɔkamɔ akɛ, shiɛlɔi pii baashɛ amɛ diɛŋtsɛ amɛnɔ koni no aye abua koni nanemɛi ni anyɛɔ akɛ he fɔɔ amɛnɔ lɛ anine ashɛ amɛ diɛŋtsɛ amɛnɔ nɔ. Yɛ nakai beaŋ nɔŋŋ lɛ, nyɛbaanyɛ nyɛwo mɛi ni yɔɔ wiemɔ lɛ he miishɛɛ lɛ hewalɛ ni amɛshɛ amɛ diɛŋtsɛ amɛnɔ.
Hɛgbɛi Krokomɛi
5 Ani obɔ mɔdɛŋ akɛ ooona mɛi pii ni heɔ woji tɛtrɛbii lɛ daa? Kɛ okɛ woji tɛtrɛbii ha lɛ, ha ale akɛ eeefee bo miishɛɛ akɛ oooku osɛɛ yɛ otsii enyɔ mli ni okɛ nɔ ni nyiɛ sɛɛ lɛ aba. Onaa baakpɛ ohe akɛ ooona mɛi abɔ ni baasumɔ ni okɛ nɔ ni baanyiɛ sɛɛ lɛ aba abaha amɛ. Kaimɔ hu akɛ, be fɛɛ be ni oooku osɛɛ oya ni okɛ mɔ ayawie loo okɛ wolo ko aha mɔ lɛ. obaanyɛ obu enɛ he akɔntaa akɛ sɛɛsaramɔ.
6 Obaanyɛ otao hegbɛi ni okɛ woji tɛtrɛbii lɛ aha, tamɔ wekumɛi ni okɛ amɛ aaawie. sɛɛsaramɔi ni ooofee, aloo nɔ kroko ni sa nɛkɛ, ni oha shihilɛ mli ni wɔyɔɔ bianɛ lɛ ahi ojwɛŋmɔ mli. Nɛkɛ ŋaawoi ni akɛha nɛɛ fɛɛ asɛɛnyiɛmɔ baanyɛ afee nɔ ni oootsɔ nɔ oye obua mɛi pii ni amɛbatsɔmɔ wɔwoji ni damɔ Biblia lɛ nɔ lɛ kanelɔi daa koni yɛ naagbee lɛ amɛbatsɔmɔ Yehowa yijielɔi.