Gbɛjianɔtoo ní Akɛaana Hesaa akɛ Wielɔ kɛ Tsɔɔlɔ
KƐ́ OJI oblanyo, oblayoo, loo mɔ ni eda yɛ afii amli, nuu loo yoo lɛ, nɛkɛ nikasemɔ nɛɛ baanyɛ aye abua bo koni owie ní emɔ shi jogbaŋŋ ní obatsɔ mɔ ni he esa akɛ Nyɔŋmɔ Wiemɔ lɛ tsɔɔlɔ.
Skul nɔkwɛlɔ lɛ baato nifeemɔi ni akɛhaa mɛi ni kɛ amɛhe ewo Teokrase Sɔɔmɔ Skul lɛ mli lɛ he gbɛjianɔ. Obaana bo diɛŋtsɛ oŋaawoo wolo lɛ yɛ baafai etɛ ni nyiɛ sɛɛ lɛ mli. Nɔmbai ni nyiɛ saji otii srɔtoi lɛ ahiɛ lɛ damɔ shi kɛha nikasemɔi ni yɔɔ baafai ní nyiɛ sɛɛ lɛ mli. Yɛ nikasemɔi nɛɛ amli lɛ, obaana mligbalamɔi ni akɛha yɛ nɔ ni yɔɔ wiemɔ kɛ nitsɔɔmɔ fãi ni ohe aaasa yɛ mli lɛ mli, kɛ nɔ hewɔ ni eko fɛɛ eko he hiaa lɛ he. Obaana ŋaawoi ní yeɔ ebuaa yɛ bɔ ni aaafee atsu nɔ ni ajie yi lɛ he nii lɛ mli.
Okadi sui ni yɔɔ ŋaawoo wolo lɛ nɔ lɛ tsɔɔ saji otii ni abaanyɛ akɛtsu nii yɛ nifeemɔi ni kɔɔ (1) toibolɔi lɛ ní aaakane nii atsɔɔ amɛ, (2) nɔkwɛmɔnɔ ni akɛ mɛi enyɔ loo mɛi ni fa fe nakai aaafee, loo (3) wiemɔ ní ahaa atsɔɔ asafo lɛ he lɛ mli. Skul nɔkwɛlɔ lɛ kɛ sane oti ni obaatsu he nii lɛ baaha. Ehi akɛ oootsu sane oti kome pɛ he nii yɛ be kome mli. Kɛji otsu ŋaawoi ni akɛha yɛ nikasemɔi lɛ naagbee lɛ he nii lɛ, no lɛ obaaná he sɛɛ. Kɛ́ ana odaseyeli ní tsɔɔ faŋŋ akɛ okɛ ŋaawoo ni yɔɔ nikasemɔ ni akɛha lɛ mli lɛ etsu nii yɛ omanyeyeli mli lɛ, no lɛ oŋaawolɔ lɛ baaha bo sane oti kroko ní otsu he nii.
Kɛ́ esa akɛ otsu onifeemɔ lɛ he nii ákɛ nɔkwɛmɔnɔ lɛ, no lɛ bɔ ni obaafee lɛ oha lɛ he baahia. Anaa bɔ ni afeɔ nɔkwɛmɔnɔ ahaa kɛ bɔ ni ato naa aha yɛ baafa 82, shi jeee nɔ ni atsɔɔ nɛɛ pɛ esa akɛ okɛtsu nii. Ekolɛ, oŋaawolɔ lɛ baajie yi akɛ obɔ gbɛ pɔtɛɛ ko he mɔdɛŋ bɔni afee ni oná niiashikpamɔ, loo ekolɛ, ebaashi eha bo koni bo diɛŋtsɛ ohala eko.
Wolo nɛɛ ní oookane kɛ emli nifeemɔi ní ooofee kɛ́ jeee ohe osaa po yɛ skul nifeemɔi amli lɛ baaha oya ohiɛ babaoo. Ekolɛ, obaanyɛ okane nikasemɔ kome daa otsi loo nɔ̃.
Ekɔɔɔ he eko bei abɔ ni okɛ ohe ewo skul lɛ loo shiɛmɔ nitsumɔ lɛ mli, obaanyɛ oya hiɛ lolo. Eba akɛ obaaná tsɔsemɔ ní akɛhaa kɛtsɔ Teokrase Sɔɔmɔ Skul lɛ nɔ lɛ he sɛɛ kɛmɔ shi.