Jeŋ Hee Ko—Yɛ Nyɔŋmɔ Shiwoo lɛ Naa

BIBLIA lɛ, ni ji Nyɔŋmɔ Wiemɔ ni aŋma lɛ kɛ hiɛnɔkamɔ haa wɔ, beni ekɛɛ akɛ: “Yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.”—2 Petro 3:13.

Mɛni ji “ŋwɛi hee” lɛ? Biblia lɛ wieɔ ŋwɛi he kɛkɔɔ nɔyeli he. (Bɔfoi lɛ Asaji 7:49) “Ŋwɛi hee” lɛ ji maŋtsɛyeli hee ni baaye shikpɔŋ lɛ nɔ. Eji ehee, ejaakɛ ebaaye ŋmɛnɛŋmɛnɛ beaŋ nɔyeli gbɛjianɔtoo lɛ najiaŋ; eji nifeemɔ hee ko hu yɛ Nyɔŋmɔ yiŋtoo he nitsumɔ mli. No ji Maŋtsɛyeli ni Yesu tsɔɔ wɔ koni wɔsɔle yɛ he lɛ. (Mateo 6:10) Akɛni Nyɔŋmɔ ji e-Jɛɛhe ni ŋwɛi ji he ni eyɔɔ hewɔ lɛ, atsɛ́ɔ lɛ akɛ “ŋwɛi maŋtsɛyeli lɛ.”—Mateo 7:21.

Mɛni ji “shikpɔŋ hee” lɛ? Ejeee shikpɔŋ kutruku hee ko, ejaakɛ Biblia lɛ kɛɔ faŋŋ akɛ mɛi baahi shikpɔŋ lɛ nɔ kɛya naanɔ. “Shikpɔŋ hee” lɛ ji adesai aweku hee ko. Ebaafee ehee ejaakɛ no mli lɛ áfolɔ mɛi fɔji lɛ ashwie. (Abɛi 2:21, 22) Mɛi fɛɛ ni baahi wala mli yɛ nakai be lɛ mli lɛ kɛ woo baaha Bɔlɔ lɛ ni amɛbaabo lɛ toi ni amɛbaahi shi yɛ etaomɔ nii lɛ anaa. (Lala 22:28) Aafɔ̃ gbɔmɛi ni yɔɔ maŋ fɛɛ maŋ mli lɛ nine koni amɛkase nakai taomɔ nii lɛ ahe nii ni amɛhi shi yɛ naa amrɔ nɛɛ. Ani oofee nakai?

Mɛi fɛɛ kɛ bulɛ baaha Nyɔŋmɔ nɔyeli lɛ yɛ E-jeŋ hee lɛ mli. Ani suɔmɔ kɛha Nyɔŋmɔ tsirɛɔ bo koni obo lɛ toi? (1 Yohane 5:3) Ani okɛtsuɔ nii jogbaŋŋ yɛ oshia? yɛ nitsumɔhe loo yɛ skul? yɛ bɔ ni okɛ oshihilɛ tsuɔ nii ohaa lɛ mli?

Adesai aweku lɛ baafee ekome yɛ anɔkwa Nyɔŋmɔ lɛ jamɔ mli yɛ nakai jeŋ hee lɛ mli. Ani ojáa ŋwɛi kɛ shikpɔŋ Bɔlɔ lɛ? Ani ojamɔ lɛ feɔ bo kɛ nanemɛi jálɔi ni yɔɔ maji fɛɛ mli, ni hiɛ hewolonɔ sui srɔtoi, ni wieɔ wiemɔi srɔtoi lɛ ekome?—Lala 86:9, 10; Yesaia 2:2-4; Zefania 3:9.

[Akrabatsa ni yɔɔ baafa 17]

Nyɔŋmɔ ni Kɛ Nibii Nɛɛ Ahe Shiwoo Haa Lɛ

Lɛ ji ŋwɛi ni wɔnaa nɛɛ kɛ shibɔlemɔ ŋulami ni ji Shikpɔŋ lɛ Bɔlɔ. Lɛ ji mɔ ni Yesu Kristo wie ehe akɛ “anɔkwa Nyɔŋmɔ kome lɛ.”—Yohane 17:3.

Adesai ateŋ mɛi babaoo kɛ woo haa nyɔŋmɔi ni amɛ diɛŋtsɛ amɛfee amɛ lɛ. Mɛi akpekpei abɔ kotoɔ shi yɛ amagai ni wala bɛ amɛmli lɛ ahiɛ. Mɛi krokomɛi hu woɔ adesai anitsumɔ gbɛjianɔtoi, jeŋ nileei ni akɛtaoɔ heloonaa nii babaoo, loo amɛ diɛŋtsɛ amɛkɔnɔ nii lɛ ahiɛ nyam. Jeee mɛi fɛɛ ni kɛɔ akɛ amɛkɛ Biblia lɛ tsuɔ nii lɛ kɛ woo haa gbɛi ni ji mɔ ni Biblia lɛ wieɔ ehe akɛ ‘anɔkwa Nyɔŋmɔ lɛ’ nɔ̃ lɛ.—5 Mose 4:35.

Bɔlɔ lɛ wie lɛ diɛŋtsɛ ehe akɛ: “Mi ji Yehowa, migbɛi ji no.” (Yesaia 42:5, 8) Nɛkɛ gbɛi nɛɛ jeɔ kpo aaafee shii 7,000 yɛ Biblia lɛ mli yɛ be mli ni aŋma yɛ eshishijee wiemɔi lɛ amli lɛ. Yesu Kristo tsɔɔ esɛɛnyiɛlɔi lɛ koni amɛsɔle akɛ: “Wɔtsɛ ni yɔɔ ŋwɛi, ogbɛi lɛ he atse.”—Mateo 6:9.

Mɛɛ gbɔmɔ nɛkɛ anɔkwa Nyɔŋmɔ lɛ ji? Etsɔɔ bɔ ni lɛ diɛŋtsɛ eji akɛ mɔ ni ji “musuŋtsɔlɔ kɛ durolɔ ní toɔ tsui, ní mɔbɔnalɛ kɛ anɔkwale fá pii,” kɛ agbɛnɛ ákɛ mɔ ni haaa mɛi ni jeɔ gbɛ amɛkuɔ ekitai lɛ amli lɛ aŋɔ amɛhe amɛye kwraa. (2 Mose 34:6, 7) Yinɔsane ni tsɔɔ bɔ ni ekɛ adesai yeɔ ehaa lɛ maa anɔkwale ni tsɔɔ bɔ ni eji nɛɛ nɔ mi.

Esa akɛ atse gbɛi lɛ kɛ mɔ ni gbɛi lɛ damɔ shi kɛha lɛ lɛ fɛɛ he, loo abu amɛ akɛ krɔŋkrɔŋ. Ákɛ Bɔlɔ kɛ Jeŋ Muu Fɛɛ Maŋtsɛ lɛ, esa akɛ wɔbo lɛ toi ni wɔkɛ jamɔ fɛɛ aha lɛ. Ani bo diɛŋtsɛ lɛ, oboɔ lɛ toi ni okɛ jamɔ haa lɛ?

[Akrabatsa/Mfoniri ni yɔɔ baafa 18]

Mɛɛ Tsakemɔi “Ŋwɛi Hee kɛ Shikpɔŋ Hee” lɛ Kɛbaaba?

Abaatsake shikpɔŋ lɛ ni afee lɛ Paradeiso Luka 23:43

Nitsumɔ ni haa mɔ tsui nyɔɔ emli, niyenii babaoo Yesaia 25:6; 65:17, 21-23

[Akrabatsa/Mfonirii ni yɔɔ baafa 19]

Ani Obaaná He Sɛɛ?

Nyɔŋmɔ maleee!—Tito 1:2.

Yehowa jajeɔ akɛ: “Miwiemɔi . . . [lɛ] ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”—Yesaia 55:11.

Yehowa eje shishi momo eebɔ “ŋwɛi hee kɛ shikpɔŋ hee.” Ŋwɛi nɔyeli lɛ eje enitsumɔ shishi momo. Áto “shikpɔŋ hee” lɛ shishi momo.

Yɛ be mli ni Kpojiemɔ Wolo lɛ ewie nibii ni yɔɔ miishɛɛ ni “ŋwɛi hee kɛ shikpɔŋ hee” lɛ kɛbaaba abaha adesai lɛ ekomɛi ahe egbe naa lɛ, etsɛ́ Nyɔŋmɔ diɛŋtsɛ, ni ji Jeŋ Muu Fɛɛ Maŋtsɛ lɛ wiemɔi ayisɛɛ akɛ: “Naa, miifee nii fɛɛ ehee. Ni ekɛɛ mi akɛ: Ŋmaa, ejaakɛ nɛkɛ wiemɔi nɛɛ anɔkwa wiemɔi ni ma shi shiŋŋ ni.”—Kpojiemɔ 21:1, 5.

Sanebimɔ ni he hiaa waa lɛ ji akɛ, Ani wɔmiifee tsakemɔi ni he hiaa bɔni afee ni abu wɔ akɛ mɛi ni sa akɛ amɛfee mɛi ni baahi “shikpɔŋ hee” lɛ nɔ yɛ “ŋwɛi hee” lɛ shishi?