Kɛ́ Wɔkɛ Yitsoyeli He Gbɛjianɔ Ni Nyɔŋmɔ Eto Lɛ Tsu Nii Lɛ, Wɔbaaná He Sɛɛ

KƐ́ ABAANYƐ ato wɔhe gbɛjianɔ ni wɔfee Yehowa suɔmɔnaa nii lɛ, belɛ ehe miihia ni wɔba wɔhe shi wɔhã Nyɔŋmɔ, ni ji Jeŋ Muu Fɛɛ Nɔyelɔ lɛ. Wɔbaa wɔhe shi wɔhãa e-Bi lɛ, ni ji Kristofoi asafo lɛ Yitso lɛ, ni wɔbaa wɔhe shi wɔhãa yitsoyeli he gbɛjianɔi krokomɛi ni ato lɛ hu. Wɔ fɛɛ wɔnáa wɔhe shi ni wɔbaa yɛ nɛkɛ gbɛ nɔ lɛ he sɛɛ waa.

² Adesai ahe shi ni amɛbaa amɛhãa nɔyeli ni ato lɛ je shishi yɛ Eden abɔɔ lɛ mli. Anaa enɛ yɛ Nyɔŋmɔ famɔi ni yɔɔ 1 Mose 1:28 kɛ 2:16, 17 lɛ. Esa akɛ kooloi fɛɛ aba amɛhe shi amɛhã adesai, ni Adam kɛ Hawa hu aba amɛhe shi amɛhã Nyɔŋmɔ ni amɛfee esuɔmɔnaa nii. Kɛ́ amɛbo Nyɔŋmɔ toi lɛ, no baahã amɛtoiŋ ajɔ amɛ, ni nɔ fɛɛ nɔ baaya nɔ yɛ gbɛjianɔtoo kpakpa naa. Sɛɛ mli lɛ, awie yitsoyeli he gbɛjianɔtoo lɛ he yɛ 1 Korintobii 11:3 lɛ. Bɔfo Paulo ŋma akɛ: “Miisumɔ ni nyɛle akɛ nuu fɛɛ nuu yitso ji Kristo lɛ; ni yoo fɛɛ yoo hu yitso ji nuu; ni Kristo lɛ hu yitso ji Nyɔŋmɔ.” Enɛ tsɔɔ akɛ, mɔ fɛɛ mɔ yɛ mɔ ko ni esa akɛ eba ehe shi ehã lɛ, ja Yehowa pɛ.

³ Ŋmɛnɛ lɛ, mɛi babaoo ebuuu yitsoyeli he gbɛjianɔtoo lɛ. Mɛni hewɔ? Naagba lɛ fɛɛ je shishi yɛ Eden be ni wɔ-klɛŋklɛŋ fɔlɔi lɛ kpɛ amɛyiŋ akɛ amɛbaŋ amɛhe shi amɛhãŋ Nyɔŋmɔ koni eye amɛnɔ akɛ amɛyitso lɛ. (1 Mo. 3:4, 5) Kɛ̃lɛ, nakai ni amɛfee lɛ hãaa amɛná heyeli babaoo. Moŋ lɛ, ehã amɛyaje Satan Abonsam, ni ji mumɔŋ bɔɔ nɔ fɔŋ lɛ shishi. Klɛŋklɛŋ atuatsemɔ nɛɛ tse adesai kɛje Nyɔŋmɔ he. (Kol. 1:21) Nɔ ni ejɛ enɛ mli kɛba ji, ŋmɛnɛ lɛ, adesai babaoo yɛ mɔ fɔŋ lɛ hewalɛ lɛ shishi.​—1 Yoh. 5:19.

⁴ Anɔkwale lɛ ni wɔkase yɛ Nyɔŋmɔ Wiemɔ lɛ mli ni wɔkɛtsuɔ nii lɛ ehã wɔje Satan hewalɛ shishi. Akɛ mɛi ni ejɔɔ amɛhe nɔ amɛhã Yehowa ni abaptisi wɔ lɛ, wɔbaa wɔhe shi wɔhãa Yehowa akɛ wɔ-Maŋtsɛ. Maŋtsɛ David wie akɛ, Yehowa ta “nii fɛɛ nɔ akɛ yitso,” ni wɔkɛ lɛ kpãa gbee. (1 Kro. 29:11) Anɔkwa, wɔjɛɔ heshibaa mli wɔjajeɔ akɛ: “Nyɛnáa nyɛlea akɛ Yehowa lɛ, lɛ ji Nyɔŋmɔ. Lɛ efee wɔ, ni enii ji wɔ. Emaŋ lɛ kɛ elɛɛhe lɛ gwantɛŋi ji wɔ.” (Lala 100:3) Wɔyɔseɔ akɛ Yehowa je agbo ni esa akɛ wɔba wɔhe shi kwraa wɔhã lɛ, ejaakɛ lɛ ebɔ nii fɛɛ. (Kpo. 4:11) Akɛ anɔkwa Nyɔŋmɔ lɛ sɔɔlɔi lɛ, wɔkaseɔ Yesu Kristo, mɔ ni ba ehe shi ehã Nyɔŋmɔ yɛ gbɛ ni nɔ bɛ nɔ ni ekɛto okadi ehã wɔ lɛ.

⁵ Mɛni Yesu kase kɛjɛ amanehulu ni ena be ni eyɔɔ shikpɔŋ lɛ nɔ lɛ mli? Hebribii 5:8 lɛ tsɔɔ akɛ: “Eyɛ mli akɛ bi ji lɛ moŋ, shi ekase bɔ ni aboɔ Nyɔŋmɔ toi kɛjɛ amanehului ni ena lɛ amli.” Yesu ba ehe shi ehã e-Tsɛ ni yɔɔ ŋwɛi lɛ be ni ekɛ shihilɛ ni naa wa po kpe lɛ. Kɛfata he lɛ, Yesu diɛŋtsɛ etooo eyiŋ efeee nɔ ko. Etooo lɛ diɛŋtsɛ eyiŋ ewieee nɔ ko; asaŋ etaooo lɛ diɛŋtsɛ enunyam. (Yoh. 5:19, 30; 6:38; 7:16-18) Be ni esɔmɔɔ yɛ shikpɔŋ lɛ nɔ lɛ, esumɔɔ akɛ efee e-Tsɛ lɛ suɔmɔnaa nii, eyɛ mli akɛ enɛ hã ate shi awo lɛ ni awa lɛ yi moŋ. (Yoh. 15:20) Fɛɛ sɛɛ lɛ, Yesu ba ehe shi ehã Nyɔŋmɔ. Yesu ‘ba ehe shi’ kɛtee “gbele [mli] yɛ piŋmɔ tso nɔ” tete. Jɔɔmɔi babaoo ejɛ ehe shi ni eba ehã Yehowa kwraa lɛ mli kɛba, egbele gbɛ kɛhã adesai koni ahere amɛyiwala kɛya naanɔ, ehã awo enɔ gojoo, ni ewo e-Tsɛ hiɛ nyam.​—Fip. 2:5-11; Heb. 5:9.

YITSOYELI HE GBƐJIANƆTOI SRƆTOI NI ESA AKƐ WƆBA WƆHE SHI WƆHÃ

⁶ Kɛ́ wɔfee Nyɔŋmɔ suɔmɔnaa nii lɛ, belɛ wɔmiiba wɔhe shi wɔmiihã lɛ, ni enɛ baahã wɔye wɔhe kɛjɛ naagbai ni mɛi ni baaa amɛhe shi amɛhãaa lɛ lɛ kɛkpeɔ lɛ ahe. Abonsam, ni ji wɔhenyɛlɔ lɛ, yaa nɔ etaoɔ akɛ emi wɔ. Kɛ́ wɔdamɔ shi shiŋŋ ni wɔtsĩ lɛ gbɛ, ni wɔjɛ wɔsuɔmɔ mli wɔba wɔhe shi wɔhã Yehowa lɛ, Yehowa baajie wɔ kɛjɛ mɔ fɔŋ lɛ dɛŋ.​—Mat. 6:10, 13; 1 Pet. 5:6-9.

⁷ Yɛ Kristofoi asafo lɛ mli lɛ, wɔbaa wɔhe shi wɔhãa Kristo yitsoyeli lɛ kɛ hegbɛ ni ekɛhã “nyɔŋ anɔkwafo kɛ hiɛshikalɔ lɛ.” Enɛ saa bɔ ni wɔkɛ wɔnyɛmimɛi lɛ yeɔ wɔhãa lɛ he. Wɔhe shi ni wɔbaa wɔhãa yitsoyeli he gbɛjianɔ ni Nyɔŋmɔ eto yɛ asafo lɛ mli lɛ baatsirɛ wɔ ni wɔbo Nyɔŋmɔ Wiemɔ lɛ toi yɛ wɔjamɔ lɛ fãi srɔtoi lɛ fɛɛ amli. Toiboo nɛɛ biɔ ni wɔshiɛ, wɔya asafoŋ kpeei ni wɔkɛ wɔhe awo mli, wɔbo asafoŋ onukpai lɛ toi, ni wɔkɛ asafoŋ gbɛtsɔɔmɔi atsu nii.​—Mat. 24:45-47; 28:19, 20; Heb. 10:24, 25; 13:7, 17.

⁸ Wɔhe shi ni wɔbaa wɔhãa Nyɔŋmɔ lɛ hãa toiŋjɔlɛ, shweshweeshwefeemɔ, kɛ gbɛjianɔtoo kpakpa hiɔ Kristofoi asafo lɛ mli. Yehowa tsuji lɛ jieɔ esui lɛ akpo. (1 Kor. 14:33, 40) Niiashikpamɔ ni wɔná yɛ Yehowa asafo lɛ ni wɔkɛbɔɔ lɛ mli lɛ hãa wɔnuɔ he tamɔ bɔ ni Maŋtsɛ David nu he lɛ nɔŋŋ. Be ni David na srɔto ni yɔɔ Yehowa tsuji kɛ mɛi fɔji lɛ ateŋ lɛ, ekɛ miishɛɛ wie akɛ: “Maŋ ni Yehowa ji amɛ-Nyɔŋmɔ lɛ yɛ miishɛɛ!”​—Lala 144:15.

⁹ Yɛ gbalashihilɛ kɛ weku shihilɛ mli lɛ, ‘yoo fɛɛ yoo yitso ji nuu.’ Nakai nɔŋŋ esa akɛ hii aba amɛhe shi amɛhã Kristo, ni Kristo hu yitso ji Nyɔŋmɔ. (1 Kor. 11:3) Esa akɛ ŋamɛi aba amɛhe shi amɛhã amɛwumɛi, ni gbekɛbii hu aba amɛhe shi amɛhã amɛfɔlɔi. (Efe. 5:22-24; 6:1) Kɛ́ weku lɛ mli bii lɛ ateŋ mɔ fɛɛ mɔ ba ehe shi ehã mɔ ni ji eyitso lɛ, no kɛ toiŋjɔlɛ baa.

¹⁰ Esa akɛ wu lɛ akase Kristo ni ekɛ eyitsoyeli lɛ atsu nii yɛ suɔmɔ mli. (Efe. 5:25-29) Kɛ́ ekpoo eyitsoyeli lɛ loo ekɛtsu nii yɛ gbɛ ni yɔɔ kpɛŋŋ nɔ lɛ, ebaawa kɛhã eŋa kɛ ebii lɛ akɛ amɛbaaba amɛhe shi amɛhã lɛ. Ŋa lɛ ji wu lɛ yelikɛbualɔ loo hefatalɔ ni sa. (1 Mo. 2:18) Kɛ́ eto etsui shi eye ebua ewu lɛ ni ejie bulɛ kpo etsɔɔ lɛ lɛ, ewu lɛ baaná ehe miishɛɛ ni ekɛ yijiemɔ baahã Nyɔŋmɔ. (1 Pet. 3:1-4) Kɛ́ wumɛi kɛ ŋamɛi kɛ Biblia mli ŋaawoo ni kɔɔ yitsoyeli he lɛ tsu nii pɛpɛɛpɛ lɛ, efeɔ nɔkwɛmɔnɔ ehãa gbekɛbii lɛ ni amɛbaa amɛhe shi amɛhãa Nyɔŋmɔ.

¹¹ Wɔhe shi ni wɔbaa wɔhãa Nyɔŋmɔ lɛ hu saa bɔ ni wɔnaa “hegbɛi ni yeɔ nɔ lɛ,” ni Nyɔŋmɔ “kɛ amɛ eto amɛgbɛhei lɛ” wɔhãa lɛ he. (Rom. 13:1-7) Akɛni Kristofoi ji maŋbii ni yeɔ mla nɔ hewɔ lɛ, amɛwoɔ too, ni amɛtsɔɔ nakai feemɔ nɔ amɛkɛ ‘Kaisare nibii hãa Kaisare, shi amɛkɛ Nyɔŋmɔ nibii hãa Nyɔŋmɔ.’ (Mat. 22:21) Agbɛnɛ hu, gbɛjianɔi fɛɛ ni atoɔ koni akɛtsu shikpɔŋkukuji lɛ amli nii lɛ kɛ mlai ni kɔɔ bɔ ni esa akɛ abu mɛi ahe saji ni ahiɛ lɛ ahe ahã lɛ ahe lɛ kpãa gbee. Akɛni wɔbaa wɔhe shi wɔhãa hegbɛi ni ato nɛɛ ni wɔboɔ amɛ toi yɛ nɔ fɛɛ nɔ ni amɛbiɔ ni eteee shi ewooo Yehowa mla ni ja lɛ hewɔ lɛ, wɔnyɛɔ wɔkɛ wɔhewalɛ kɛ wɔnyɛmɔ fɛɛ tsuɔ shiɛmɔ nitsumɔ lɛ.​—Mar. 13:10; Bɔf. 5:29.

¹² Wɔhe shi ni wɔbaa wɔhãa yitsoyeli he gbɛjianɔi fɛɛ ni Nyɔŋmɔ eto lɛ kɔɔ wɔshihilɛ gbɛ fɛɛ he. Hemɔkɛyeli ni wɔyɔɔ lɛ hewɔ lɛ, wɔmiikpa be ni adesai fɛɛ baaba amɛhe shi amɛhã Yehowa Nyɔŋmɔ lɛ gbɛ. (1 Kor. 15:27, 28) Abaajɔɔ mɛi ni yɔseɔ maŋtsɛ ni Yehowa ji ni amɛyaa nɔ amɛbaa amɛhe shi amɛhãa lɛ lɛ kɛya naanɔ, ni amɛbaaná Yehowa hiɛ dromɔ!