Wɔmiikpee Bo Atuu Kɛmiiba “Mɛi Ni Sumɔɔ Heyeli” Kpokpai Wuji Anɔ Kpeei Ashishi!
HEYELI! Mɛɛ gbɛɛmɔ ni ŋɔɔ nakai wiemɔ lɛ ji nɛkɛ! Mɔ ko mɔ ko sumɔɔɔ ni ehiɔ nyɔŋyeli loo nomŋɔɔ mli. Tsakemɔi babaoo ni miibɛŋkɛ maŋkwramɔŋ heyeli ni hiɛ ka nɔ waa lɛ he lɛ eba nyɛsɛɛ nɛɛ fe bei fɛɛ ni akaiɔ.
Shi kɛlɛ, taakɛ bɔ ni asumɔɔ maŋkwramɔŋ heyeli lɛ, heyeli kroko ko yɛ ni he hiaa kwraa fe no ni asumɔɔ waa hu. No ji heyeli ni Yesu Kristo, Nyɔŋmɔ Bi lɛ wie he beni ekɛɛ ekaselɔi lɛ nɛkɛ lɛ: “Kɛji nyɛhi shi yɛ miwiemɔi lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:31, 32) Enɛ ji heyeli ni anaa kɛjɛɔ apasa jamɔ mli hemɔkɛyelii ahe, heyeli ni anaa kɛjɛɔ gbɔmɔ gbeyeishemɔ mli, heyeli ni anaa kɛjɛɔ esha nyɔŋyeli ni kaa mɔ he lɛ kɛ ekrokomɛi babaoo hu mli.
Nɛkɛ heyeli nɛɛ ji “Mɛi ni Sumɔɔ Heyeli” Kpokpai Wuji Anɔ kpeei ni Yehowa Odasefoi baafee yɛ je lɛŋ fɛɛ kɛjɛ 1991 latsaa be mli kɛyaa lɛ yitso. Kɛjɛ afi 1919, ni bafee afi ko ni sa kadimɔ akɛni ajie nɔyeli lɛ naatsii ni ekɛba mɛi ni nyiɛɔ hiɛ yɛ amɛteŋ lɛ anɔ kɛjɛ amɛnɔ hewɔ lɛ, Nyɔŋmɔ webii lɛ etee nɔ amɛna heyeli ni yaa hiɛ efaa babaoo yɛ amɛ jamɔ krɔŋŋ lɛ gbɛfaŋ lɛ mli ŋɔɔmɔ.
Eja jogbaŋŋ akɛ ama nɛkɛ saneyitso ni kɔɔ heyeli he nɛɛ nɔ mi waa yɛ afii abɔ ni eho lɛ amli yɛ teokrase kpeei wuji ashishi, kɛtsɔ saneyitsei tamɔ “‘Jeŋmaji ni Eye Amɛhe’ Teokrase kpee” lɛ kɛ “‘Nyɔŋmɔ Bii ni Eye Amɛhe’ Kpokpai Wuji Anɔ Kpeei” lɛ anɔ. Awie heyeli he babaoo hu yɛ woji tamɔ “The Truth Shall Make You Free” kɛ Naanɔ Wala—Yɛ Nyɔŋmɔ Bii lɛ Aheyeli Mli lɛ amli.
Heyeli ni jɛɔ Nyɔŋmɔ ŋɔɔ ni Yehowa webii yɔɔ lɛ jeee kɛha amɛhilɛ kɛ amɛmiishɛɛnamɔ kɛkɛ. Taakɛ wɔkaneɔ yɛ Galatabii 5:13 lɛ: “Ejaakɛ odeheyeli mli atsɛ nyɛ kɛba, anyɛmimɛi; shi nyɛdeheyeli lɛ kɛkɛ ni nyɛkahaa etsɔa hegbɛ ehaa heloo lɛ, shi moŋ nyɛtsɔa suɔmɔ mli nyɛsɔmɔsɔmɔa nyɛhe.” “Mɛi ni Sumɔɔ Heyeli” Kpokpai Wuji Anɔ kpeei lɛ baaye abua wɔ ni wɔhiɛ asɔ yiŋtoo ni yɔɔ heyeli ni wɔna lɛ he, ni ebaaye ebua wɔ ni wɔhiɛ wɔheyeli ni jara wa lɛ mli ni ebaatsɔɔ wɔ bɔ ni wɔɔfee wɔkɛtsu nii jogbaŋŋ kɛmɔ shi.
Abaaje kpokpai wuji anɔ kpee lɛ shishi Sohaa leebi 10:20 kɛ lala gbɛjianɔtoo ni baasaa wɔjwɛŋmɔ ni eha wɔfee klalo kɛha mumɔŋ niyenii ni baanyiɛ sɛɛ lɛ. Klɛŋklɛŋ gbi lɛ yitso ji “Ni Wɔɔle Anɔkwale ni Haa Wɔyeɔ Wɔhe Lɛ,” ni edamɔ Yohane 8:32 nɔ. Leebi gbɛjianɔtoo lɛ baawie sɛinɔtalɔ lɛ wiemɔi ni ekɛkpeeɔ mɛi fɛɛ kɛbaa kpee lɛ shishi lɛ kɛ wiemɔ titri ni yitso ji “Yiŋtoo ni Yɔɔ Heyeli ni Nyɔŋmɔ Kɛha Wɔ lɛ He kɛ Bɔ ni Wɔɔfee Wɔkɛtsu Nii” lɛ he. Nɛkɛ wiemɔ nɛɛ baama sɔrɔtofeemɔ ni yɔɔ Yehowa heyeli ni eye emuu kwraa lɛ kɛ heyeli fioo ni Nyɔŋmɔ kɛhaa wɔ lɛ teŋ. Ebaawo wɔ hewalɛ hu ni wɔkɛ heyeli ni wɔyɔɔ lɛ atsu nii jogbaŋŋ kɛmɔ shi bɔ ni wɔɔnyɛ. Shwane gbɛjianɔtoo lɛ baatsu wɔheyeli lɛ mli fai sɔrɔtoi lɛ kɛ wɔsɔɔmɔ nitsumɔ lɛ he nii ni ebaaba naagbee kɛ drama ni yitso ji Aha Aye he Koni Aha Anɔkwa Jamɔ Ashwere.
Gbi ni ji enyɔ lɛ yitso ji “Ni Wɔɔdamɔ Shi Shiŋŋ yɛ Heyeli ni Nyɔŋmɔ Kɛha Wɔ lɛ Mli,” ni edamɔ Galatabii 5:1 nɔ. Leebi gbɛjianɔtoo lɛ baatsu wiemɔi ni tsaraa nɔ, ni tsɔɔ bɔ ni weku lɛ mlibii aŋkroaŋkroi baanyɛ ana heyeli ni Nyɔŋmɔ kɛha lɛ mli ŋɔɔmɔ yɛ weku kɔkrɔɔ lɛ mli lɛ he nii. Mɛi ni efee klalo ni abaabaptisi amɛ lɛ baana wiemɔ ni kɔɔ bɔ ni anaa heyeli kɛtsɔɔ henɔjɔɔmɔ kɛ baptisimɔ nɔ lɛ he miishɛɛ waa diɛŋtsɛ. Nɔ ni fata shwane gbɛjianɔtoo lɛ he hu ji sanegbaa ni kanyaa mɔ ni tsɔɔ kɛji gbalashihilɛ ji nɔ ni kɛ miishɛɛ baa aloo jeee nakai. Abaaha wiemɔi ni tsaraa nɔ ni kɔɔ heyeli fai sɔrɔtoi lɛ ahe, kɛ no sɛɛ lɛ naagbee wiemɔ ni gbalaa jwɛŋmɔ kɛyaa Nyɔŋmɔ Najiaŋdamɔlɔ Nukpa kɛha heyeli kɛ naanɔ wala namɔ lɛ hu nɔ.
Yitso ni ato kɛha Hɔgbaa ji “Wɔheyeli lɛ ni Wɔkɛaatsu Nii ni Ekɛ Nyɔŋmɔ Mumɔ lɛ Akpa Gbee,” ni edamɔ 2 Korintobii 3:7 nɔ. Gbɛjianɔtoo lɛ baatsu wiemɔ ko ni tsara nɔ ni kɔɔ Yesu abɛbua ni aŋma yɛ Mateo 13:47-50 lɛ he lɛ he nii, ni ebaajie bɔ ni Yehowa Odasefoi tsuɔ nii akɛ gbɔmɛi ahe wolɛi lɛ kpo faŋŋ etsɔɔ. Maŋshiɛmɔ ni abaaha yɛ shwane mli lɛ yitso ji “Ni Wɔɔnya Nyɔŋmɔ Jeŋ Hee ni Heyeli Yɔɔ Mli lɛ He!” Nɔ ni baanyiɛ sɛɛ ji gbɛjianɔtoo hee ko ni akɛbaatsu nii yɛ kpokpai wuji anɔ kpeei ashishi agbɛnɛ lɛ: Buu-Mɔɔ nikasemɔ kɛha otsi lɛ naamuamɔ. Ni gbɛjianɔtoo lɛ baaba naagbee kɛ Ŋmalɛ naa ŋaawoo kɛha wɔ fɛɛ koni wɔya nɔ wɔya wɔhiɛ ni wɔkɛ heyeli ni Nyɔŋmɔ kɛha wɔ lɛ atsu nii yɛ wɔjeŋba kɛ wɔshiɛmɔ nitsumɔ lɛ hu mli.
Wɔmiikɛɛ mɛi fɛɛ ni sumɔɔ heyeli lɛ, yɛ lalatsɛ David wiemɔi nɛɛ amli akɛ: “Nyɛsaa nyɛnaa nyɛkwɛa, ni nyɛaana akɛ Yehowa hi.” (Lala 34:9) Kaaha nɔ ko miitsi onaa kwraa yɛ mɔdɛŋ ni obɔɔ ni oba kpee nɛɛ shishi lɛ mli. Ha efee ofaishitswaa akɛ obaahi jɛmɛ yɛ be mli ni abaaje shishi yɛ Sohaa leebi lɛ aahu kɛyashi abaaha naagbee wiemɔ lɛ yɛ Hɔgbaa shwane. Kɛ oba kpee lɛ shishi kɛ mumɔŋ tsinebaa kpakpa, ni oha ojwɛŋmɔ hi omumɔŋ hiamɔ nii anɔ jogbaŋŋ lɛ, no lɛ obaana miishɛɛ waa diɛŋtsɛ! (Mateo 5:3) Ni nyɛkahaa wɔhiɛ kpaa shishitoo mla nɛɛ nɔ, “Mɔ ni duɔ yɛ jɔɔmɔ mli lɛ, jɔɔmɔ mli nɔŋŋ eeekpa yɛ.” Enɛ kɔɔ bɔ ni wɔtsɔɔ hiɛ wɔsaa wɔhe jogbaŋŋ dani wɔbaa kpee lɛ, kɛ bɔ ni wɔboɔ wiemɔ lɛ toi jogbaŋŋ beni awieɔ lɛ, kɛ bɔ ni wɔkɛ ekaa tsuɔ hegbɛi ni wɔnaa ni wɔkɛaasɔmɔ akɛ mɛi ni kɛ amɛhe eha yɛ “Mɛi ni Sumɔɔ Heyeli” Kpokpai Wuji Anɔ Kpeei lɛ ashishi lɛ hu he.—2 Korintobii 9:6.