Ani Obaanyɛ Ona Miishɛɛ Kɛ Oyɛ Babaoo Feemɔ?

WƆTEŊ mɛi pii bɛ deka kwraa yɛ shihilɛ mli. Nɔnyɛɛ babaoo ni ŋmɛnɛŋmɛnɛ shihilɛ kɛbaa lɛ biɔ ni wɔmia wɔhiɛ ni wɔya wɔhiɛ be fɛɛ be. Esa akɛ wumɛi kɛ tsɛmɛi atsu amɛwekui, amɛ nitsumɔtsɛmɛi, kɛ mɛi krokomɛi agbɛnaa nii ni jwere amɛnɔ lɛ ahe nii. Esa akɛ ŋamɛi kɛ nyɛmɛi atsu nibii ni he hiaa amɛweku lɛ yɛ shia lɛ he nii, ni yɛ bei komɛi lɛ amɛyɛ heloo naa nitsumɔi hu. Obalaŋtai hu baa nɔnyɛɛ shishi akɛ amɛtsu weku lɛ mli gbɛnaa nii komɛi ahe nii yɛ be mli ni amɛkaseɔ nii ni baasaa amɛ kɛha nitsumɔ kpakpa yɛ shihilɛ mli lɛ.

Shi wɔteŋ mɛi ni wɔjɔɔ wɔwala nɔ wɔha Yehowa Nyɔŋmɔ ni wɔji e-Dasefoi ni abaptisi amɛ lɛ hu? Kɛfata nibii fɛɛ ni abiɔ yɛ wɔdɛŋ lɛ ahe lɛ, wɔyɛ bɔfo Paulo ŋaawoo nɛɛ hu: “Minyɛmimɛi ni misumɔɔ, nyɛfia shi ni nyɛkagbugbaa, ni nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛdeŋmegbomɔ lɛ efeee yaka yɛ Nuŋtsɔ lɛ mli.” (1 Korintobii 15:58) Hɛɛ, gbɛnaa nii krokomɛi ni akɛfata he hu ji anɔkwa jamɔ taomɔ nii lɛ fa. Te wɔɔfee tɛŋŋ wɔtsu gbɛnaa nii nɛɛ fɛɛ he nii ni wɔna jwɛŋmɔŋ toiŋjɔlɛ kɛ miishɛɛ hu?

Nii ni Anyɛ Atsu kɛ Miishɛɛ Baa

Miishɛɛ​—henumɔ akɛ mɔ ko yɛ jogbaŋŋ loo etsui enyɔ emli​—lɛ kɔɔ omanye ni aye yɛ shihilɛ mli gbɛnaa nii ahe nitsumɔ mli lɛ he. Kɛji akɛ wɔnyɛɔ wɔtsuɔ wɔ daa gbi gbɛnaa nii ahe nii yɛ gbɛ ni sa ni mɔɔ shi jogbaŋŋ nɔ, wɔnyɛɔ wɔtsuɔ nii yɛ be naa yɛ gbɛjianɔtoo kpakpa naa lɛ, wɔnuɔ he akɛ wɔtsu nɔ ko ni wɔtsui nyɔɔ wɔmli. Nakai ji bɔ ni esa akɛ eba lɛ, ni nɔ ni jɛɔ mli baa lɛ haa wɔnaa miishɛɛ.

Jeee Yehowa Nyɔŋmɔ yiŋtoo ji ni eha gbɛnaa nii ni wɔtsuɔ he nii lɛ atamɔ jatsui ni tsii ni nyɛɔ wɔnɔ. Shi moŋ, nɔ ni eshweɔ be fɛɛ be ji ni ‘wɔmli afili wɔ ni wɔna nɔ kpakpa kɛjɛ wɔdeŋmegbomɔ lɛ fɛɛ mli.’ (Jajelɔ 3:​12, 13) Kɛ wɔyɛ miishɛɛ yɛ wɔnitsumɔ mli lɛ, yɛ be babaoo mli lɛ wɔwoɔ yibii babaoo. Wɔboɔ famɔ toi amrɔ nɔŋŋ, ni wɔnyɛɔ wɔkɛ mɛi krokomɛi hiɔ shi yɛ toiŋjɔlɛ mli. Shi, yɛ gbɛ kroko nɔ lɛ, kɛ wɔbɛ miishɛɛ lɛ, wɔnitsumɔ lɛ tsɔɔ tamɔ nitsumɔ ko ni eŋɔɔɔ​—nɔ ko ni no nɔŋŋ afeɔ, ejeɔ mɔ tsine, enyɛɔ mɔ nɔ loo ebiɔ babaoo tsɔ. Enɛ kɛ nitsumɔ mli sui ni haaa awo yibii kɛ jwɛŋmɔ fɔŋ ni anaa baa. Shihilɛ batsɔɔ tamɔ daa gbi mpleshii ko yɛ be mli ni wɔbɔɔ mɔdɛŋ ni wɔtsu nɔ fɛɛ nɔ ni ataoɔ yɛ wɔdɛŋ lɛ he nii lɛ. Shi, kɛji akɛ wɔɔna gbɛ ko ni wɔɔtsɔ nɔ wɔhi shi akɛ mɛi ni yɔɔ miishɛɛ yɛ nɔ ni wɔfeɔ lɛ mli lɛ, eka shi faŋŋ akɛ wɔbaanyɛ wɔna shihilɛ gbɛ ni nyɔmɔwoo kɛ tsui ni nyɔɔ mɔ mli yɔɔ mli.

Ŋmɛɛ Pɛpɛɛpɛ

Kɛ wɔɔfee mɛi ni yɔɔ miishɛɛ yɛ be mli ni wɔyɔɔ babaoo po tsumɔ lɛ, ehe baahia ni wɔŋmɛ pɛpɛɛpɛ. Ni mɛni ji pɛpɛɛpɛ-ŋmɛɛ? Eji “jwɛŋmɔŋ kɛ henumɔŋ shiŋŋ-feemɔ.” Mɔ ni ŋmɛɔ pɛpɛɛpɛ lɛ bɔɔ mɔdɛŋ ni efee mɔ ni toɔ gbɛjianɔ kpakpa yɛ enitsumɔi amli. Etsɔɔ hiɛ etoɔ gbɛjianɔ, etsiii nitsumɔ etooo sɛɛ, ni ehiɛ ka shi. Eyeɔ ehe nɔ yɛ niyeli, ninumɔ, hiɛtserɛjiemɔi kɛ shwɛmɔi amli. Yɛ anɔkwale mli lɛ “ehiɛ kaa shi yɛ nibii fɛɛ mli.”​—1 Korintobii 9:​24-27; Okɛto Tito 2:2 he.

Sɔlemɔ tsuɔ babaoo yɛ Kristofoi apɛpɛɛpɛ-ŋmɛɛ ni ahiɛɔ mli lɛ mli. Yehowa tsulɔ baanyɛ asɔle abi Nyɔŋmɔ mumɔ krɔŋkrɔŋ lɛ kɛ eŋwɛi Tsɛ lɛ yelikɛbuamɔ koni ewo eyibii lɛ, ni henɔyeli fata he. (Luka 11:​13; Galatabii 5:​22, 23) Esa akɛ Kristofonyo lɛ akwɛ Nyɔŋmɔ hiɛ titri yɛ sɔlemɔ mli, kɛ ekɛ kaai ni woɔ epɛpeɛpɛ-ŋmɛɛ he gbeyei lɛ miikpe lɛ. Lalatsɛ David kɛɛ: “Gbɛ ni onyiɛ nɔ lɛ, ŋɔ-fɔ Yehowa nɔ, ni oŋɔ ohiɛ hu ofɔ enɔ, ni eeefee.” (Lala 37:⁠5) Ehe baahia ni wɔsɔle yɛ bei komɛi amli taakɛ David fee beni ekpa fai nɛkɛ lɛ: “Naanyɔŋmɔ, feemɔ oya oha mi! Bo ji mibualɔ kɛ mijielɔ; Yehowa, kaatsɛ kwraa!” (Lala 70:⁠6) Kaaha ohiɛ miikpa nɔ akɛ obaanyɛ otsɔ sɔlemɔ nɔ ohiɛ pɛpɛɛpɛ ni oŋmɛɔ lɛ mli ni obaana ‘Nyɔŋmɔ toiŋjɔlɛ ni fe jwɛŋmɔi fɛɛ ni buɔ wɔtsuii kɛ wɔjwɛŋmɔŋ nyɛmɔi ahe lɛ.’​—Filipibii 4:​6, 7.

Akɛni ekɛ ehe fɔɔ Yehowa nɔ ni enaa Nyɔŋmɔ toiŋjɔlɛ lɛ mli ŋɔɔmɔ hewɔ lɛ, Kristofonyo ni ŋmɛɔ pɛpɛɛpɛ lɛ jwɛŋmɔŋ ka shi. (Tito 2:​11, 12) Enɛ baa kɛjɛɔ Biblia shishitoo mlai ahe shishinumɔ kpakpa ni mɔ ko yɔɔ lɛ kɛ bɔ ni ekɛtsuɔ nii yɛ eshihilɛ mli lɛ mli. Gbɔmɔ ni tamɔ nɛkɛ jeee osato, ni asaŋ ekɛ oyaiyeli ekojooo sane. Sane shishinumɔ haaa efee nɔ ni sa lɛ pɛ ehiɛ loo efee kuɛŋtilɔ. Ebuɔ ehe kɛ enyɛmɔi akɛ mɔ ni baa shi, ni enɛ nyɛɔ ehaa ekɛ mɛi fɛɛ hiɔ shi yɛ toiŋjɔlɛ mli. (Mika 6:⁠8) Nɔ ni yɔɔ miishɛɛ ji akɛ, sui ni yeɔ buaa mɔ ko koni efee mɔ ni ŋmɛɔ pɛpɛɛpɛ lɛ fata sui ni ataoɔ yɛ mɛi ni ahala amɛ akɛ amɛsɔmɔ akɛ nɔkwɛlɔi yɛ Kristofoi asafo lɛ mli lɛ he.​—1 Timoteo 3:​2, 3.

Wɔbaanyɛ ni wɔkɛ nibii pii afata wɔmiishɛɛ lɛ he kɛtsɔ mɔdɛŋ ni wɔɔbɔ ni wɔŋmɛ pɛpɛɛpɛ yɛ wɔ daa gbi shihilɛ mli lɛ nɔ. Kɛ wɔjie sui ni tsɔɔ akɛ wɔŋmɛɔ pɛpɛɛpɛ lɛ kpo lɛ, wɔbaanyɛ wɔtsu nibii ni he hiaa lɛ fɛɛ ni gbɔmɔtsoŋ loo henumɔŋ nɔnyɛɛ keketee ko bɛ mli. Bɔ ni wɔhiɔ shi wɔhaa lɛ baatsɔɔ akɛ wɔyɛ shiŋŋ, ni wɔbaanyɛ wɔtsu babaoo. Mɛi krokomɛi baana miishɛɛ yɛ bɔ ni amɛkɛ wɔ bɔɔ lɛ mli, ni wɔbaana tsui ni nyɔɔ mɔ mli kɛ miishɛɛ hu babaoo. Mɛni ji gbɛi komɛi ni anyɛɔ atsuɔ he nii ni wɔɔtsɔ nɔ wɔŋmɛ pɛpɛɛpɛ?

Gbɛi ni Anyɛɔ Atsɔɔ nɔ Aŋmɛɔ Pɛpɛɛpɛ

Bɔni afee ni wɔŋmɛ pɛpɛɛpɛ lɛ, esa akɛ wɔbɔ mɔdɛŋ ni wɔtsu wɔshihilɛ mli nibii ahe nii oya yɛ gbɛjianɔtoo kpakpa naa. Ehe miihia ni wɔtsɔ hiɛ wɔto gbɛjianɔ, ni wɔtsu saji ahe nii yɛ gbɛjianɔtoo kpakpa naa. Mɛi ni etooo gbɛjianɔ kpakpa lɛ tsiɔ nibii amɛtoɔ sɛɛ ni enɛ haa nɔnyɛɛ kɛ yeyeeye-feemɔ ni faa babaoo haa amɛshihilɛ feɔ basaa. Omanye ni wɔɔye yɛ shihilɛ ni tamɔ nɛkɛ mli lɛ baaye abua wɔ ni wɔnu he akɛ wɔmiikudɔ wɔshihilɛ fe ni wɔɔnu he akɛ shihilɛi ni baa trukaa eha wɔfee mɛi ni nyɛɛɛ nɔ ko kwraa afee.

Esaaa akɛ wɔbɔɔ mɔdɛŋ akɛ wɔ pɛ wɔɔfee nɔ fɛɛ nɔ. Yɛ bei babaoo mli lɛ, etɔɔ mɛi ni sumɔɔɔ ni ayeɔ abuaa amɛ lɛ ni amɛyiŋ futuɔ. Nitsumɔi sɔrɔtoi pii yɛ ni mɛi krokomɛi baanyɛ atsu he nii. No hewɔ lɛ nilee yɛ mli akɛ oooŋɔ hegbɛ ni mɛi ni sumɔɔ ni amɛye amɛbua lɛ anyɛmɔ kɛhaa lɛ ni okɛtsu nii. Kɛfata ojatsu lɛ ni no aaaha efee fɛlɛfɛlɛ aha bo lɛ he lɛ, enɛ baawo mɛi ni sumɔɔ ni amɛtsi amɛbɛŋkɛ wɔ lɛ hewalɛ.

Jwɛŋmɔ bɛ mli akɛ wɔkɛ wɔhe aaato mɛi ni nyɛɔ amɛfeɔ babaoo lɛ ahe. Ni wɔɔbɔ mɔdɛŋ wɔtamɔ mɛi ni eka shi faŋŋ amɛtsuɔ babaoo fe bɔ ni wɔfeɔ lɛ jeɔ mɔ nijiaŋ wui, ehaa wɔnuɔ he akɛ wɔshɛɛɛ ni wɔsaaa. Susumɔ ni tamɔ nɛkɛ fiteɔ nii, egbɔjɔɔ faishitswaa kɛ hekɛnɔfɔɔ ni wɔyɔɔ lɛ. Paulo ŋma akɛ: “Shi mɔ fɛɛ mɔ aka lɛ diɛŋtsɛ enitsumɔ ekwɛ, ni no dani eeena nɔ ko yɛ lɛ diɛŋtsɛ emli kɛkɛ ni eshwa efɔ nɔ, ni jeee mɔ kroko nɔ lɛ nɔ.” (Galatabii 6:⁠4) Kaimɔ akɛ nitsulɔ ni abuɔ lɛ waa fe fɛɛ lɛ ji mɔ ni boɔ famɔi atoi, eyɛ shiŋŋ ni anyɛɔ akɛ he fɔɔ enɔ, ni etsuɔ nitsumɔ kpakpa. Kɛ nakai wɔji lɛ, hiɛ baasɔ wɔ nitsumɔ, ni abaabi no shi babaoo.​—Abɛi 22:⁠29.

Ehe miihia ni wɔkwɛ wɔgbɔmɔtsoŋ hewalɛnamɔ jogbaŋŋ. Eji nibii ni jara wa fe fɛɛ ni wɔyɔɔ lɛ eko, ejaakɛ kɛ enɛ bɛ lɛ, nɔ ko fioo ko pɛ wɔbaanyɛ wɔfee. No hewɔ lɛ esa akɛ wɔbɔ mɔdɛŋ ni wɔye niyenii kpakpa ni haa gbɔmɔtsoŋ hewalɛ. Ehe miihia ni wɔjɔɔ wɔhe jogbaŋŋ, ni wɔwɔ yɛ be ni sa hu mli. Kɛ etɔ wɔ babaoo aloo wɔmiinu he akɛ wɔhe miitao aye lɛ, esaaa akɛ wɔkaa he wɔyaa nɔ nakai; nɔ ni baajɛ mli aba lɛ baanyɛ afite nii.

Ehe miihia waa ni wɔkwa huhuuhu wiemɔ. Kɛ wɔŋmɛ gbɛ ni wɔsusu nibii ni ejaaa he lɛ, wɔbaana tɔmɔ yɛ mɔ fɛɛ mɔ loo nɔ fɛɛ nɔ he. Enɛ ji gbɛ ni wɔɔtsɔ nɔ wɔha miishɛɛ ni wɔkɛ mɛi krokomɛi yɔɔ lɛ alaaje. Ni wɔɔye nibii ni wɔsusuɔ akɛ ejaaa lɛ he osheku ni wɔwie wɔshi lɛ, esa akɛ wɔbɔ mɛi ni esa akɛ amɛtsu saji nɛɛ ahe nii lɛ amaniɛ ni wɔshi sane lɛ wɔha amɛ ni amɛjaje nibii. (Okɛto 1 Korintobii 1:​10-12 he.) Kɛ wɔna jwɛŋmɔ kpakpa be fɛɛ be, ni wɔtao ni wɔmiikpa gbɛ akɛ wɔɔna nɔ kpakpa yɛ mɔ fɛɛ mɔ he, kɛ shihilɛ mli nibii ni kudɔɔ wɔ lɛ amli lɛ, belɛ nilelɔi ji wɔ.​—Okɛto Yuda 3, 4, 16 he.

Yɛ be mli ni wɔtoɔ wɔnitsumɔi ahe gbɛjianɔ lɛ, esa akɛ wɔkai akɛ shɛii ni wɔɔfee lɛ baaha wɔfee nibii heei, shi wɔnyɛŋ wɔhiɛ mli kɛshɛ shɔŋŋ. Jeee akɛ keketee ni wɔfeɔ be fɛɛ be lɛ haa etɔɔ wɔ kɛkɛ, shi ekɛ nijiaŋwujee ni baagbɔjɔ wɔfaishitswaa ni baaha wɔya nɔ lɛ baaba. No hewɔ lɛ, nyɛhaa wɔnanefaa loo nɔ ni wɔnyɛɔ wɔtsuɔ lɛ afee nɔ ni wɔbaanyɛ wɔtsu lɛ nakai be fɛɛ be kɛya naanɔ. Akɛ nɔkwɛmɔ nɔ lɛ, ehi akɛ oooto be he gbɛjianɔ ni onyɛ otsu he nii oha daa shia kɛ shia shiɛmɔ nitsumɔ kɛ Kristofoi asɔɔmɔ nitsumɔ lɛ mli nibii krokomɛi. Ehe miihia ni wɔna be wɔha hejɔɔmɔ kɛ hiɛtserɛjiemɔ ni tswaa mɔ maa shi. Ni eeefee sɛɛnamɔ akɛ wɔkɛ gbɔmɛi ni amɛna enɛɛmɛi amli niiashikpamɔ afii nyɔŋmai abɔ lɛ aaagba sane, ejaakɛ ekolɛ amɛkase bɔ ni atsuɔ nibii ni he hiaa lɛ ahe nii ni gbɔmɔtsoŋ kɛ henumɔŋ tɔlɛ bɛ mli.

Okɛ Kojomɔ Kpakpa Atsu Nii

Ehi akɛ wɔɔnu he akɛ gbɛnaa nii jwere wɔnɔ, ni wɔmiisumɔ ni wɔtsu gbɛnaa nii ni jwere wɔnɔ lɛ fɛɛ he nii, ni nɔ ni yɔɔ Yehowa webii asafo lɛ mli hu fata he. Nyɔŋmɔ sumɔɔ nitsulɔi ni kɛ hiɛdɔɔ tsuɔ nii ni anyɛɔ akɛ he fɔɔ amɛnɔ. (Okɛto Mateo 25:​21; Tito 2:​11-14 he.) Shi Ŋmalɛi lɛ woɔ hewalɛ akɛ: “Ŋɔɔ ŋaawoo ni hi kɛ jwɛŋmɔ oto.” (Abɛi 3:21) Biblia mli ŋaawoo he baaba sɛɛnamɔ aha wɔ, ni ehe miihia ni wɔkɛ jwɛŋmɔ kɛ kojomɔ kpakpa atsu nii, ni wɔto gbɛjianɔ jogbaŋŋ, ni wɔtsu nii kɛyashɛ he ni wɔhewalɛ baaŋmɛ wɔ gbɛ ni wɔtsu kɛyashi.

Esa akɛ wɔha kɔkɔbɔɔ ni akɛha yɛ Jajelɔ 9:4 lɛ kɛ ŋaawo akɛ wɔna babaoo feemɔ yɛ Nuŋtsɔ lɛ nitsumɔ lɛ mli lɛ aŋmɛ pɛpɛɛpɛ. Wɔkaneɔ yɛ jɛmɛ akɛ: “Gbee ni hiɛ ka lɛ ehi fe jata ni egbo.” Hɛɛ, gbee ni hiɛ ka, ni mɛi komɛi sumɔɔɔ esane lɛ hi fe jata ni egbo, kooloo ni mɛi buɔ lɛ akɛ eji koo mli maŋtsɛ lɛ. Kɛ wɔkɛ pɛpɛɛpɛ-ŋmɛɛ tsu nii ni wɔkwɛ wɔgbɔmɔtsoŋ hewalɛnamɔ nɔ jogbaŋŋ lɛ, wɔbaahi wala mli ni wɔya nɔ wɔtsu nii. Gbohii lɛ bɛ gbɛfaŋnɔ ko dɔŋŋ yɛ nitsumɔ ko mli. Kojomɔ kpakpa baanyɛ aye abua wɔ ni wɔkɛ pɛpɛɛpɛ-ŋmɛɛ ni hiɛshikamɔ yɔɔ mli ni ŋmɛɔ wɔ gbɛ ni wɔtsu nibii ni he hiaa wɔ ni wɔlaajeee wɔmiishɛɛ Iɛ atsu nii.

No hewɔ lɛ, babaoo ni wɔyɔɔ tsumɔ lɛ etsɔɔɔ akɛ wɔnyɛŋ wɔna miishɛɛ. Mɛi ni bɛ deka kwraa lɛ baanyɛ afee mɛi ni yɔɔ miishɛɛ fe fɛɛ lɛ ateŋ mɛi komɛi kɛ amɛkɛ hiɛshikamɔ tsuɔ nii, amɛkɛ jwɛŋmɔ kpakpa kwɛɔ shihilɛ, ni amɛkɛ kojomɔ kpakpa tsuɔ nii koni amɛŋmɛ pɛpɛɛpɛ. Wɔbaanyɛ wɔna miishɛɛ ni fe fɛɛ kɛ wɔkɛ nilee tsu nii, wɔtsu nitsumɔi kpakpai, ni wɔkɛ wɔhiɛ fɔ Yehowa Nyɔŋmɔ nɔ.​—1 Timoteo 6:​17-19.