Ani Obɛ Dekã Kwraa?
1 Paulo wo ŋaa akɛ esa akɛ ‘wɔna babaoo feemɔ yɛ Nuntsɔ lɛ nitsumɔ lɛ mli.’ (1 Kor. 15:58) Aawo wɔ hewalɛ ni wɔto gbɛjianɔ daa kɛha teemɔŋ nikasemɔ, shiɛmɔ nitsumɔ ni wɔkɛ wɔhe aaawo mli daa, anɔkwayeli ni wɔkɛaaya kpeei, kɛ asafoŋ nitsumɔi ni wɔkɛ ekãa aaatsu he nii. Kɛfata he lɛ, esa akɛ wɔye wɔbua mɛi krokomɛi ni wɔyelikɛbuamɔ he hiaa amɛ lɛ. Akɛni wɔyɛ babaoo feemɔ hewɔ lɛ, wɔbaanu he yɛ bei komɛi amli akɛ nitsumɔ fa yɛ wɔnɔ tsɔ, ni eeeha wɔsusu akɛ esa akɛ wɔtao gbɛi krokomɛi ni wɔɔtsɔ nɔ wɔtse wɔ nitsumɔ he jatsu lɛ nɔ.
2 Shihilɛi komɛi yɛ ni baanyɛ afee nilee, kɛ nɔ ni jwɛŋmɔ yɔɔ mli akɛ wɔɔjie nitsumɔi komɛi kɛjɛ mli, loo ni wɔtse efalɛ lɛ nɔ. Gbɔmɛi aŋkroaŋkroi komɛi nuɔ he akɛ aakpa gbɛ akɛ amɛaafee nɔ fɛɛ nɔ ni mɛi krokomɛi biɔ kɛjɛɔ amɛdɛŋ lɛ. Kɛ aŋmɛɛɛ pɛpɛɛpɛ yɛ enɛ gbɛfaŋ lɛ, ebaanyɛ ekɛ nɔnyɛɛ kɛ naagba aba ni yɛ naagbee lɛ ebaanyɛ eye awui.
3 Ŋmɛɛ Pɛpɛɛpɛ: Gbɛ ni atsɔɔ nɔ aŋmɛɔ pɛpɛɛpɛ lɛ baa kɛ akɛ Paulo ŋaawoo akɛ “atsu nibii ni he hiaa titri lɛ ahe nii” tsu nii lɛ. (Fil. 1:10, NW) Nɔ ni no tsɔɔ kɛkɛ ji akɛ esa akɛ wɔkɛ wɔjwɛŋmɔ ama nibii ni he hiaa titri lɛ anɔ, koni kɛ be kɛ shihilɛi lɛ aaaŋmɛ gbɛ lɛ, wɔtsu nibii ni he ehiaaa tsɔ lɛ ahe nii. Eka shi faŋŋ akɛ weku mli gbɛnaa nii lɛ baa klɛŋklɛŋ kwraa yɛ nibii ni he hiaa lɛ ateŋ. Esa akɛ atsu heloonaa gbɛnaa nii komɛi ahe nii. Shi, Yesu tsɔɔ akɛ, esa akɛ nibii ni wɔkɛaaba klɛŋklɛŋ lɛ adamɔ shishitoo mla akɛ wɔtao Maŋtsɛyeli lɛ klɛŋklɛŋ lɛ nɔ. Esa akɛ klɛŋklɛŋ lɛ, wɔfee nibii ni baaha wɔtsu wɔ henɔjɔɔmɔ kɛha Yehowa lɛ he nii.—Mat. 5:3; 6:33.
4 Yɛ be mli ni enɛ yɔɔ wɔjwɛŋmɔ mli lɛ, wɔbaakwɛ ni wɔjie nibii ni wɔtiuɔ sɛɛ ni he ehiaaa, hiɛtserɛjiemɔ nifeemɔi babaoo, nitsumɔi sɔrɔtoi ni he ehiaaa ni wɔtsuɔ wɔhaa mɛi krokomɛi lɛ fɛɛ kɛjɛ gbɛjianɔ ni wɔto ni dekã bɛ mli lɛ mli. Be mli ni wɔtoɔ wɔ nitsumɔ kɛha otsi fɛɛ otsi he gbɛjianɔ lɛ, wɔbaato be wɔma shi kɛha teemɔŋ nikasemɔ ni fa, shiɛmɔ nitsumɔ ni wɔkɛ wɔhe aaawo mli saŋŋ, kpeei ni wɔɔya, kɛ nibii krokomɛi fɛɛ ni kɔɔ wɔ jamɔ lɛ he waa diɛŋtsɛ lɛ. Abaanyɛ ajara be ni eshwɛ lɛ mli aha nibii krokomɛi ni wɔtiuɔ sɛɛ lɛ, yɛ bɔ ni eyeɔ ebuaa koni wɔnine ashɛ oti titri ni ma wɔhiɛ, akɛ wɔfee Kristofoi ni ŋmɛɔ pɛpɛɛpɛ, ni kɛ Maŋtsɛyeli lɛ yeɔ klɛŋklɛŋ gbɛhe lɛ nɔ lɛ.
5 No po diɛŋtsɛ lɛ, ekolɛ wɔbaanu he akɛ wɔjatsu lɛ tsii lolo. Kɛ nakai lɛ, esa akɛ wɔkpɛlɛ Yesu ninefɔɔ lɛ nɔ, akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ.” (Mat. 11:28) Agbɛnɛ hu, okɛ ohiɛ afɔ Yehowa, ni “daa nɛɛ etereɔ wɔjatsui lɛ ehaa wɔ” ni kɛ hewalɛ haa mɔ ni etɔ lɛ lɛ nɔ. Ewoɔ shi akɛ ehaŋ jalɔ adidã kɔkɔɔkɔ. (Lala 55:23; 68:20; Yes. 40:29) Wɔbaanyɛ wɔna hekɛnɔfɔɔ akɛ abaabo wɔ sɔlemɔi atoi, koni eha wɔnyɛ wɔfi shi yɛ shihilɛ ni teokrase nitsumɔ fa yɛ mli lɛ mli.
6 Yɛ be mli ni wɔyɔɔ nɔmimaa akɛ wɔkɛ ekãa baatsu nii kɛtiu Maŋtsɛyeli nitsumɔi ni he baa sɛɛnamɔ lɛ asɛɛ lɛ, wɔmli baanyɛ afili wɔ yɛ le ni wɔle akɛ wɔnitsumɔ lɛ efeee yaka yɛ Nuntsɔ lɛ mli lɛ hewɔ.—1 Kor. 15:58.