Ni Wɔɔkwɛ Nibii Kɛteke “Toiŋjɔlɛ Kɛ Shweshweeshwe Shihilɛ” Ni Adesai Kɛba
Anɔkwale lɛ ji akɛ, adesai nyɛŋ amɛkɛ toiŋjɔlɛ diɛŋtsɛ ni sɛɛ tsɛɔ aba. Mɛni hewɔ? Ejaakɛ jeee adesai diɛŋtsɛ ji mɛi ni fiteɔ toiŋjɔlɛ lɛ, eyɛ mli akɛ amɛyeɔ Ia babaoo ni ekpa amɛyinɔsane mli lɛ yi sɔ. Mɔ diɛŋtsɛ ni fiteɔ toiŋjɔlɛ lɛ he wa kwraa fe gbɔmɔ. Jeee mɔ ko mɔ ko fe Satan Abonsam, mɔ ni awieɔ ehe yɛ Biblia lɛ mli akɛ “[e]shishiuɔ jeŋ muu lɛ fɛɛ lɛ.”—Kpojiemɔ 12:9.
BIBLIA lɛ kɛɔ akɛ: “Jeŋ muu lɛ fɛɛ ka mɔ fɔŋ lɛ [Satan] mli.” (1 Yohane 5:19) No hewɔ lɛ, belɛ eyɛ faŋŋ akɛ toiŋjɔlɛ diɛŋtsɛ kɛ shweshweeshwe shihilɛ ni sɛɛ tsɛɔ lɛ namɔ baabi ni ajie Satan kɛjɛ shihilɛ mli kwraa, kɛ jeŋ gbɛjianɔtoo ni etswa ema shi ni anaa faŋŋ akɛ lɛ ekudɔɔ lɛ hu. (Okɛto Yesaia 48:22; Romabii 16:20 he.) Adesai nyɛŋ enɛ amɛfee.
Belɛ, te aaafee tɛŋŋ ni nine ashɛ toiŋjɔlɛ kɛ shweshweeshwe shihilɛ nɔ? Kɛtsɔ Mɔ ni eka shi faŋŋ akɛ ehe wa kwraa fe Satan lɛ nɔ. Nyɔŋmɔ Ofe lɛ eto be ni ekɛbaafo Satan nifeemɔi yɛ adesai ateŋ lɛ sɛɛ. Kɛji nakai be ni eto lɛ shɛ lɛ, “hiɛkpatamɔ” baaba jeŋ ni yɔɔ Satan hewalɛ mli nɛɛ nɔ “trukaa.” (1 Tesalonikabii 5:3-7) Odaseyelii lɛ fɛɛ haa wɔmuɔ sane naa akɛ etsɛŋ ni enɛ baaba mli.
Toiŋjɔlɛ kɛ Shweshweeshwe Shihilɛ Bianɛ!
Shi, amrɔ nɛɛ hu? Abaanyɛ ana toiŋjɔlɛ kɛ shweshweeshwe shihilɛ ko kɛ̃ ŋmɛnɛ. Yɛ mɛɛ gbɛ nɔ? Jeee tamɔ bɔ ni jamɔ mli hiɛnyiɛlɔi pii ebɔ he mɔdɛŋ, kɛtsɔ amɛhe ni amɛkɛwoɔ je nɛŋ maŋkwramɔŋ saji amli lɛ nɔ, shi moŋ, kɛtsɔ Nyɔŋmɔ kitai kɛ eŋaawoi asɛɛnyiɛmɔ nɔ.
Ani gbɛ ni tamɔ nɛkɛ kɛ toiŋjɔlɛ baa lɛlɛŋ? Hɛɛ, ekɛbaa. Akɛ nɔkwɛmɔ nɔ lɛ, Yehowa Odasefoi eka enɛ amɛkwɛ ni amɛna akɛ anyɛɔ anaa anɔkwa toiŋjɔlɛ kɛ agbɛnɛ hu shweshweeshwe shihilɛ ni sɛɛ tsɛɔ mli ŋɔɔmɔ. Nyɔŋmɔ kitai lɛ asɛɛ nyiɛmɔ taakɛ ajie lɛ kpo yɛ Biblia lɛ mli lɛ eye ebua amɛ ni amɛfee ekome akɛ majimaji ateŋ gbɛjianɔtoo yɛ anɔkwa toiŋjɔlɛ mli, ni amɛhewolo nɔ su, maji anɔ ni amɛjɛ, kɛ amɛwiemɔ kɔɔɔ he eko.—Lala 133:1.
Yɛ toiboo ni amɛfeɔ amɛhaa ŋwɛi mla lɛ hewɔ lɛ, amɛtsɔ mfoniri-feemɔ nɔ ‘amɛkɛ amɛklantei esɔ̃ kɔii ni amɛkaseee tawuu dɔŋŋ.’ (Yesaia 2:2-4) Amɛnuɔ he akɛ amɛyɛ shweshweeshwe yɛ Nyɔŋmɔ suɔmɔ lɛ mli ni amɛyɛ hiɛnɔkamɔ akɛ amɛmumɔŋ nyɛmimɛi lɛ hu susuɔ amɛhe. (Romabii 8:28, 35-39; Filipibii 4:7) Kɛji oosumɔ ni ona kɛji enɛ ji anɔkwale lɛ, no lɛ wɔmiifɔ bo nine ni oyasara amɛ yɛ amɛ-Maŋtsɛyeli Asai lɛ ekome mli ni oyana nibii oha bo diɛŋtsɛ ohe.
Toiŋjɔlɛ kɛ Shweshweeshwe Shihilɛ yɛ Jeŋ Fɛɛ
Shi kɛlɛ, jeee enɛ ji Biblia lɛ shiwoo ni kɔɔ toiŋjɔlɛ kɛ shweshweeshwe shihilɛ he lɛ naagbee mlibaa. Dabi, jeee nakai kwraa! Eji bɔ ni je nɛɛ mli shihilɛ baatamɔ aha kɛji mɔ fɛɛ mɔ nyiɛɔ Nyɔŋmɔ mlai asɛɛ lɛ he ninaa bibioo ni ajieɔ lɛ kpo atsɔɔ. Etsɛŋ ni nɛkɛ shihilɛ ni atsɔ hiɛ ajie lɛ kpo nɛɛ baaba mli lɛlɛŋ.
Bɔfo Paulo kɛɛ: “Ejaakɛ be mli ni amɛ [mɛi ni sɔmɔɔɔ Nyɔŋmɔ lɛ] aaakɛɛ akɛ: ‘Hejɔlɛ yɛ ni wɔyɛ shweshweeshwe!’ [beni amɛsusuɔ akɛ amɛkɛ toiŋjɔlɛ kɛ shweshweeshwe shihilɛ eba yɛ amɛ diɛŋtsɛ amɛgbɛ nɔ] lɛ, no mli nɔŋŋ hiɛkpatamɔ aaabanina amɛ trukaa.” (1 Tesalonikabii 5:3) Nyɔŋmɔ baatsɔɔ akɛ be ni Satan kɛshishiu adesai lɛ efa agbɛnɛ. Agbɛnɛ be ebashɛ ni akɛbaajie lɛ kɛjɛ shihilɛ mli kwraa, kɛ jeŋ gbɛjianɔtoo ni ekpɔtɔ ni yɔɔ ehewalɛ mli lɛ fɛɛ. Nɛkɛ be nɛɛ baafee be ni akɛaaha Daniel gbalɛ lɛ aba mli: “Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni fiteŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”—Daniel 2:44.
Ani nii ni Nyɔŋmɔ baafee nɛɛ baafee nɔ ni ejaaa gbɛ? Dabida, efeŋ nakai. Hiɛkpatamɔ baaba mɛi ni nakai sa amɛ lɛ anɔ trukaa, yɛ Nyɔŋmɔ kojomɔi, Nyɔŋmɔ tɛi ni efolɔ eshwie lɛ anaa. Ani okɛ ohiɛ fɔɔ Bɔlɔ lɛ nɔ ni ekpɛ yiŋ yɛ jalɛ naa yɛ nɛkɛ sane nɛɛ mli? Eka shi faŋŋ akɛ wɔbaanyɛ wɔshi sane lɛ shweshweeshwe wɔha lɛ! Ni mɛni baajɛ ekojomɔ nitsumɔ lɛ mli aba? Abɛbua lɛ kɛɔ akɛ: “Ejaakɛ mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.” (Abɛi 2:21, 22) Ani mɔ ko werɛ baaho ehe yɛ mɛi fɔji lɛ ahiɛkpatamɔ hewɔ?
Akɛni ajie mɛi ni fiteɔ toiŋjɔlɛ lɛ kɛjɛ shikpɔŋ lɛ nɔ hewɔ lɛ, adesai baana anɔkwa toiŋjɔlɛ kɛ shweshweeshwe shihilɛ yɛ shikpɔŋ lɛ nɔ fɛɛ yɛ Nyɔŋmɔ Maŋtsɛyeli ni baaduro amɛ nibii fɛɛ lɛ shishi. “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” (Yesaia 11:9) Ani oheɔ shiwoo ni Biblia lɛ kɛhaa nɛɛ oyeɔ? Ani oyɛ hiɛnɔkamɔ akɛ etsɛŋ ni nibii nɛɛ baaba mli? Kɛji oyiŋ feɔ bo kɔshikɔshi lɛ, no lɛ wɔmiiwo bo hewalɛ ni okwɛ sane lɛ mli lolo. Yɛ anɔkwale mli lɛ, Nyɔŋmɔ gbɛ pɛ ji gbɛ ni adesai baatsɔ nɔ ni amɛnine ashɛ oti ni amɛshwe aahu ni ji toiŋjɔlɛ diɛŋtsɛ kɛ anɔkwa shweshweeshwe shihilɛ lɛ nɔ.
[Mfonirii ni yɔɔ baafa 8]
Yehowa webii naa anɔkwa toiŋjɔlɛ kɛ shweshweeshwe shihilɛ ni sɛɛ tsɛɔ mli ŋɔɔmɔ ŋmɛnɛ