Sanebimɔi Ni Jɛ Kanelɔi Adɛŋ

Kɛji Kristofonyo ko bɛ hewalɛ aloo eefa gbɛ, ni no hewɔ lɛ enyɛɛɛ eya Kaimɔ lɛ yeli shishi lɛ, ani esa akɛ eye yɛ no sɛɛ nyɔŋ kome mli?

Ayeɔ Hehoo lɛ yɛ blema Israel daa afi yɛ klɛŋklɛŋ nyɔŋ ni ji Nisan (loo Abib) lɛ nɔ gbi ni ji 14 lɛ nɔ. Shi wɔnaa gbɛjianɔtoo krɛdɛɛ ko hu ni atsɔɔ yɛ 4 Mose 9:​10, 11 akɛ: “Kɛɛmɔ lsraelbii lɛ akɛ: ‘Kɛji nyɛteŋ mɔ ko loo nyɛseshibii lɛ eko yabule ehe yɛ gbonyo ko he loo edom etee maŋsɛɛ shɔŋŋ lɛ, eye Yehowa hehoo lɛ kɛ̃. Shi amɛye yɛ nyɔŋ ni ji enyɔ [ni ji lyyar, loo Ziv] lɛ nɔ gbi ni ji gbi nyɔŋma kɛ ejwɛ lɛ gbɛkɛnaashi, akpiti kɛ shwie ni joɔ amɛkɛye.’”

Kadimɔ akɛ enɛ etooo gbii sɔrɔtoi enyɔ kɛhaaa Hehoo lɛ yeli (Nisan 14 loo Ziv 14), kɛ hegbɛ ko hu akɛ lsraelnyo fɛɛ lsraelnyo loo shia fɛɛ shia ahala emli nɔ ni esumɔɔ, yɛ bɔ ni hi kɛha lɛ lɛ naa. Naatsii yɛ gbɛjianɔ ni ato kɛha Hehoo niyenii lɛ yeli yɛ nyɔŋ ni ji enyɔ lɛ nɔ lɛ he. Ja shihilɛ ko hewɔ afeɔ nakai, tamɔ lsraelnyo ko ni he tseee yɛ kusum naa yɛ Nisan 14 gbi lɛ nɔ aloo etee he ko shɔŋŋ ni kɛ he ni ayeɔ gbijurɔ lɛ yɛ daa nɛɛ jɛkɛ.

Be kome mli ni akɛ enɛ tsu nii jogbaŋŋ ni aŋma he sane afɔ shi pɛ ji beni anɔkwafo Maŋtsɛ Hezekia saa etsĩɛ Akpiti Gbijurɔ lɛ yeli hiɛ ekoŋŋ Iɛ. Be bɛ ni amɛkɛbaasaa amɛhe kɛha klɛŋklɛŋ nyɔŋ lɛ (osɔfoi lɛ efeko klalo ni maŋbii lɛ hu buako amɛhe naa), no hewɔ lɛ aye yɛ nyɔŋ ni ji enyɔ lɛ nɔ gbi ni ji lá lɛ nɔ.​—2 Kronika 29:​17; 30:​1-5.

Yɛ nɛkɛ shihilɛi ni efɔɔɔ kaa nɛɛ asɛɛ lɛ, Yudafoi lɛ tee nɔ amɛye Hehoo lɛ yɛ gbi ni Nyɔŋmɔ to akɛ aye lɛ nɔ. (2 Mose 12:​17-20, 41, 42; 3 Mose 23:⁠5) Yesu kɛ ekaselɔi lɛ ye gbijurɔ nɛɛ taakɛ Mla lɛ biɔ lɛ, ni amɛbuuu gbi nɛɛ akɛ gbi folo ko kɛkɛ. Luka bɔ amaniɛ akɛ: “Kɛkɛ ni akpiti gbijurɔ ni sa akɛ agbeɔ Hehoo toobi lɛ yɛ nɔ lɛ bashɛ; ni [Yesu] tsu Petro kɛ Yohane ni ekɛɛ: ‘Nyɛyaa ni nyɛyasaa hehoo niyenii lɛ nyɛtoa wɔ, koni wɔbaye.’”​—Luka 22:​7, 8.

Nakai gbi lɛ nɔ Yesu to daa afi gbijurɔyeli ni Kristofoi le akɛ Nuŋtsɔ lɛ Gbɛkɛnaashi Niyenii lɛ shishi. Sɛɛnamɔ ni yɔɔ gbijurɔyeli lɛ shishi ni Kristofoi aaaya lɛ he lɛ nyɛŋ afee nɔ ni ama nɔ mi fe nine. Nifeemɔ nɛɛ ji nɔ ni he hiaa fe fɛɛ yɛ afi lɛ mli kɛha Yehowa Odasefoi. Yesu wiemɔi lɛ tsɔɔ nɔ hewɔ; ekɛɛ: ”Nyɛfea enɛ ni nyɛŋɔkai mi.” (Luka 22:19) Enɛ hewɔ lɛ, esa akɛ Yehowa Odasefoi ateŋ mɔ fɛɛ mɔ atsɔ hiɛ nyɔji abɔ, ni amɛto amɛgbɛjianɔ ni amɛkaha nɔ kroko feemɔ kɛ kaimɔ lɛ yeli miikpe yɛ nakai gbi lɛ nɔ. Abaaye Nuŋtsɔ lɛ Gbɛkɛnaashi Niyenii lɛ yɛ Jufɔ, April 6, 1993, yɛ hulu shinyɔɔ sɛɛ, yɛ he ni nyɛyɔɔ Iɛ.

Yɛ bei komekomei amli lɛ, shihilɛi komɛi ni nyɛɔ ebaa trukaa, tamɔ hela aloo gbɛfaa mli naagbai baanyɛ atsi Kristofonyo ko naa ni ekanyɛ etee taakɛ eto gbɛjianɔ ni ebaaya lɛ. Mɛni esa akɛ afee yɛ shihilɛ ni tamɔ nɛkɛ mli?

Yɛ be mli ni ayeɔ gbijurɔ lɛ, akɛ aboloo kɛ wein tsuru tsɔɔ, ni mɛi ni akɛ Nyɔŋmɔ mumɔ krɔŋkrɔŋ lɛ efɔ amɛ mu ni ahala amɛkɛha ŋwɛi wala lɛ yeɔ nibii nɛɛ eko. (Mateo 26:​26-29; Luka 22:​28-30) Kɛji mɔ ni yeɔ nibii nɛɛ eko daa afi lɛ eyaje helasaa mli yɛ shia loo helatsamɔ he afi nɛɛ Iɛ, no lɛ onukpai ni yɔɔ esafo lɛ mli lɛ baato gbɛjianɔ ni amɛteŋ mɔ kome kɛ aboloo kɛ wein lɛ eko ayaha helatsɛ lɛ, ni ekɛ lɛ asusu Biblia ŋmalɛi ni sa ni kɔɔ sane lɛ he lɛ ahe, koni no sɛɛ lɛ ekɛ okadi nibii lɛ aha lɛ. Kɛji Kristofonyo ni afɔ lɛ mu lɛ efa gbɛ kɛshi asafo ni ekɛbɔɔ lɛ, no lɛ esa akɛ eto gbɛjianɔ ni ekɛ asafo ni yɔɔ kpokpaa nɔ ni ebaahi yɛ nakai gbi lɛ nɔ lɛ aye.

Yɛ enɛ hewɔ lɛ, ja shihilɛi ni anyɛɛɛ he nɔ ko kwraa afee pɛ mli dani ebaabi ni Kristofonyo ko ni afɔ lɛ mu aye Nuŋtsɔ lɛ Gbɛkɛnaashi Niyenii lɛ gbii 30 sɛɛ (ni ji nyɔŋtsere nyɔŋ kome sɛɛ), yɛ famɔ ni yɔɔ 4 Mose 9:​10, 11 lɛ kɛ nɔkwɛmɔ nɔ ni yɔɔ 2 Kronika 30:​1-3, 15 lɛ kɛ gbeekpamɔ naa.

Mɛi ni fata Yesu “tooi krokomɛi” lɛ ahe, ni amɛyɔɔ naanɔ wala yɛ paradeiso shikpɔŋ nɔ he hiɛnɔkamɔ lɛ bɛ famɔ ko shishi akɛ amɛye aboloo lɛ ni amɛnu wein lɛ hu eko. (Yohane 10:16) Ehe miihia ni amɛya daa afi gbijurɔyeli lɛ shishi, shi amɛyeee okadi nibii lɛ eko. No hewɔ lɛ, kɛji amɛteŋ mɔ ko bɛ hewalɛ aloo efa gbɛ, ni no hewɔ lɛ ebɛ asafo ko mli nakai gbɛkɛ lɛ, nyɛminuu loo yoo nɛɛ diɛŋtsɛ baanyɛ akane ŋmalɛi ni sa (ni ŋmalɛi ni tsɔɔ bɔ ni Yesu to gbijurɔyeli nɛɛ shishi eha lɛ fata he) lɛ jogbaŋŋ, koni esɔle ebi Yehowa jɔɔmɔ yɛ nifeemɔ ni yaa nɔ yɛ je lɛŋ fɛɛ nɛɛ nɔ. Shi yɛ shihilɛ nɛɛ mli lɛ, ehe ehiaaa ni ato kpee kroko he gbɛjianɔ afata he aloo Biblia mli sanegbaa krɛdɛɛ ko ni kɔɔ he yɛ no sɛɛ nyɔŋ kome mli.