Sanebimɔi Nl Jɛ Kanelɔi Adɛŋ

Beni Saul asraafoi lɛ ye kooloo kɛ la lɛ, mɛni hewɔ agbeee amɛ, akɛni no ji toigbalamɔ ni atsɔɔ yɛ Nyɔŋmɔ Mla lɛ mli lɛ?

Nɛkɛ hii nɛɛ tɔ̃ Nyɔŋmɔ mla ni kɔɔ la he lɛ nɔ, shi ana amɛ mɔbɔ ejaakɛ amɛyɛ bulɛ kɛha la, eyɛ mli moŋ akɛ kulɛ esa akɛ amɛkwɛ amɛhe nɔ jogbaŋŋ yɛ bulɛ ni amɛaajie lɛ kpo nɛɛ mli.

Susumɔ shihilɛ lɛ he okwɛ. lsraelbii ni yɔɔ Maŋtsɛ Saul kɛ ebinuu Yonatan shishi lɛ kɛ Filistibii lɛ miiwuu ta. Beni ebalɛ akɛ “Israelbii lɛ na nɔ“ yɛ ta lɛ mli lɛ, Saul kɛ oyaiyeli ka kita akɛ ehii lɛ akaye nɔ ko kɛyashi be ni aaaye henyɛlɔ lɛ nɔ kunim. (l Samuel 14:24) Etsɛɛɛ nɔŋŋ ni ekitakamɔ lɛ kɛ naagba ba.

No mli lɛ ehii lɛ miiye tawuu ni mli wa waa lɛ nɔ kunim, shi hewalɛ dɛŋdɛŋ ni amɛkɛfeɔ enɛ lɛ miiye awui babaoo. Hɔmɔ ye amɛ ni etɔ amɛ. Mɛni amɛfee yɛ shihilɛ ni mli wa nɛɛ mli? “Maŋ lɛ tsɛ kɛtee nihaa nii lɛ anɔ, ni amɛmɔmɔ tooi kɛ tsinai kɛ tsinabii ni amɛgbe amɛ yɛ shikpɔŋ; ni maŋ lɛ ye kɛ la lɛ.”—1 Samuel 14:32.

Enɛ kuɔ Nyɔŋmɔ mla ni kɔɔ la he lɛ mli taakɛ Saul webii lɛ ekomɛi kɛɛ lɛ lɛ, akɛ: “Naa, maŋ lɛ miifee esha miishi Yehowa, akɛni amɛyeɔ nii kɛ la lɛ.’ (1 Samuel 14:33) Hɛɛ, Mla lɛ kɛɛ akɛ kɛji agbe kooloi yɛ nakai be mli lɛ, esa akɛ afɔse la lɛ ashwie shi dani aye loo lɛ. Nyɔŋmɔ biii ni akɛ nifeemɔi ni yɔɔ shɛii atsu nii koni akɛfɔse la lɛ ashwie shi. Esɔɔlɔi lɛ baanyɛ ni amɛkɛ bulɛ aha nɔ ni la lɛ damɔ shi kɛha kɛtsɔ gbɛi komɛi ni sa ni aaatsɔ nɔ afɔse la lɛ ashwie shi lɛ nɔ. (5 Mose 12: 15, 16, 21-25) Abaanyɛ akɛ kooloo la atsu nii ni akɛsha afɔle yɛ afɔleshaa latɛ lɛ nɔ, shi ejeee nɔ ko ni sa akɛ aye. Kɛ aje gbɛ atɔ nɔ lɛ, gbele ji nɔ ni akɛgbalaa toi, ejaakɛ akɛɛ Nyɔŋmɔ webii lɛ akɛ: “Nyɛkayea loo ko loo ko la; ejaakɛ heloo fɛɛ heloo wala ji ela lɛ; mɔ fɛɛ mɔ ni yeɔ lɛ, aaafo lɛ ashɛ afɔ.“—3 Mose 17:10-14.

Ani Maŋtsɛ Saul asraafoi lɛ je gbɛ amɛku Mla lɛ mli? Ani amɛmiijie bulɛ ni abɛ kwraa kpo yɛ ŋwɛi mla ni kɔɔ la he lɛ he?—Okɛto 4 Mose 15:30 he.

Esaaa ni wɔmuɔ sane naa yɛ nɛkɛ gbɛ nɔ. Amaniɛbɔɔ lɛ kɛɛ akɛ ‘amɛmiigbe kooloi lɛ yɛ shikpɔŋ; ni amɛye kɛ la lɛ.’ No hewɔ lɛ ekolɛ amɛmiibɔ mɔdɛŋ ni amɛfɔse la lɛ amɛshwie shi. (5 Mose 15:23) Kɛlɛ, akɛni etɔ amɛ, ni hɔmɔ miiye amɛ hewɔ lɛ, amɛkɛ kooloi ni amɛgbe lɛ agbohii lɛ tsotsorooo shi koni amɛmɛ ni la lɛ afɔse ashwie shi taakɛ eji daa lɛ. Amɛgbe toi kɛ tsinai lɛ “yɛ shikpɔŋ,” ni ji nɔ ni haŋ la lɛ afɔse ashwie shi jogbaŋŋ lɛ. Ni amɛkɛ oyaiyeli folɔ loo lɛ kɛjɛ kooloi agbohii lɛ ahe ni ekolɛ amɛjwere la lɛ mli lolo. No hewɔ lɛ, kɛ Nyɔŋmɔ mla lɛ toiboo yɛ amɛjwɛŋmɔ mli po lɛ, amɛnyiɛɛɛ sɛɛ kɛwulaaa shi yɛ gbɛi ni hi lɛ naa ni amɛfeko nakai hu yɛ gbɛ ni yaa hiɛ saŋŋ nɔ.

Nɔ ni jɛ mli ba ji “maŋ lɛ ye kɛ la lɛ,“ ni eji esha. Saul yoo enɛ ni efa akɛ akokolo tɛ agbo ko abaha lɛ. Efa esraafoi lɛ akɛ: “Mɔ fɛɛ mɔ kɛ etsina aba ni mɔ fɛɛ mɔ kɛ etoo aba miŋɔɔ yɛ biɛ, ni nyɛbagbea amɛ yɛ biɛ ni nyɛye, ni nyɛkaye kɛ la lɛ ni nyɛkɛmiifee esha nyɛmiishi Yehowa!” (1 Samuel 14:33, 34) Asraafoi ni yeɔ fɔ lɛ bo toi, ni ‘‘Saul ma afɔleshaa latɛ eha Yehowa.’’—1 Samuel 14:35.

Ekolɛ kooloi ni agbeɔ yɛ tɛ nɔ lɛ ha lafɔsemɔ kɛ shishwiemɔ lɛ tee nɔ jogbaŋŋ. Aye loo ni ana kɛjɛ kooloi lɛ ahe lɛ yɛ he ni kɛ he ni agbe amɛ yɛ lɛ teŋ jɛkɛ. Ekolɛ Saul kɛ la ni afɔse ashwie shi lɛ eko tsu nii yɛ afɔleshaa latɛ lɛ nɔ ekɛtaoɔ Nyɔŋmɔ mɔbɔnalɛ eha mɛi ni efee esha lɛ. Yehowa jie mɔbɔnalɛ kpo etsɔɔ amɛ, ejaakɛ eyɛ faŋŋ akɛ ele mɔdɛŋ ni asraafoi lɛ ebɔ, eyɛ mli akɛ etɔ amɛ waa ni hɔmɔ miiye amɛ moŋ. Ekolɛ Nyɔŋmɔ ha ehi ejwɛŋmɔŋ hu akɛ Saul kita ni eka oyayaayai lɛ ji nɔ ni nyɛ ehii lɛ anɔ ewo nakai shihilɛ ni mli wa lɛ mli.

Sane nɛɛ tsɔɔ akɛ hiamɔ shihilɛ ni baa trukaa lɛ jeee naajiemɔ ni akɛaatsɔɔ bulɛ ni abɛ kɛha ŋwɛi mla. Esa akɛ eye ebua wɔ hu ni wɔna bɔ ni ehe hiaa ha akɛ wɔɔsusu nii ahe jogbaŋŋ dani wɔka kita ko, ejaakɛ kita ni akɛ oyaiyeli kaa lɛ baanyɛ ekɛ naagba aba wɔ diɛŋtsɛ kɛ mɛi krokomɛi anɔ.—Jajelɔ 5:4-6.