Shwɛ Sharao ni Awuŋayeli Afite Mishihilɛ

AWUŊAYELI je shishi ena minɔ hewalɛ yɛ gbɛ fɔŋ nɔ diɛŋtsɛ beni mikɛ miwu ni ji enyɔ, Mark, bote gbalashihilɛ mli lɛ.a Esa akɛ wɔkwɛ banumai pii kɛ wɔ tsutsu hefatalɔi lɛ. Shihilɛ lɛ feɔ nɔ ni minyɛɛɛ madamɔ naa yɛ bei komɛi amli. Kɛ béi ko te shi yɛ weku lɛ mli lɛ, efeɔ tamɔ nɔ ni Mark fiii misɛɛ. Mije shishi minu he akɛ esumɔɔ etsutsu ŋa lɛ lolo. Yɛ nɔ najiaŋ ni esa akɛ maye miwuŋayeli lɛ nɔ lɛ, miŋmɛ gbɛ ni ena mishihilɛ nɔ hewalɛ. Be fɛɛ be ni Mark tsutsu ŋa lɛ aaaba lɛ, minuɔ he akɛ aaawo mihe gbeyei.

Mikwɛɔ Mark jogbaŋŋ be fɛɛ be, mikwɛɔ ehiŋmɛi po koni mana he ni ekwɛɔ. Mitsɔɔ nibii ni ekwɛɔ lɛ shishi yɛ gbɛ ni bɛ mli po nɔ. Yɛ bei komɛi amli lɛ, mifolɔɔ enaa yɛ faŋŋ akɛ eyɛ etsutsu ŋa lɛ he suɔmɔ lolo. Be ko lɛ enɛ hao lɛ aahu akɛ ete shi eshi Kristofoi akpee ko shishi. Minu he akɛ miye fɔ yɛ Yehowa hiɛ. Miha miweku lɛ shihilɛ fee nɔ ni haomɔ yɔɔ mli, ejaakɛ yɛ naagbee lɛ, esa gbekɛbii lɛ hu he. Mihe tsɛ̃ mi diɛŋtsɛ mihe yɛ nɔ ni mifeɔ lɛ hewɔ, shi bɔ fɛɛ bɔ ni mibɔ mɔdɛŋ waa miha lɛ, etamɔ nɔ ni minyɛɛɛ maye miwuŋayeli lɛ nɔ.

Ni Mark aaaye abua mi moŋ lɛ, eje shishi eto najiaŋ. Kɛ mifolɔ enaa lɛ, ebolɔɔ ewoɔ mi akɛ, “Awuŋayelɔ, awuŋa kɛkɛ oyeɔ.” Etamɔ mɔ ni jeɔ gbɛ ehaa miyeɔ awuŋa. Ekolɛ esusu akɛ enɛ baatsa miwuŋayeli lɛ, shi efite sane lɛ kwraa moŋ. Ebɔi yei krokomɛi akwɛmɔ, ni ewieɔ bɔ ni amɛhe yɔɔ fɛo ha. Enɛ ha minu he akɛ mijeee fɛi, ni asumɔɔɔ mi hu. Eyashɛ he ni henumɔ kroko—hetsɛ̃—je kpo yɛ gbɛ ni ehiii nɔ. Miyiŋ futu yɛ he ni mishɛ nɛɛ akɛ, miisumɔ ni ekɛ eweku lɛ ashi mi.

Kɛ Biblia lɛ kɛɛ akɛ “awuŋayeli lɛ, wuiaŋ sharamɔ ni” lɛ, nakai pɛpɛɛpɛ eji. (Abɛi 14:30) Esa mihewalɛnamɔ he agbɛnɛ. Mina musuŋ faji ni he be kakadaŋŋ dani amɛta. Mitee nɔ miha mishihilɛ hao kɛtsɔ jwɛŋmɔ fɔŋ ni minaa yɛ nɔ fɛɛ nɔ ni Mark feɔ lɛ he lɛ nɔ. Mikwɛɔ ekotokui amli, ni kɛ mina tɛlifon nɔmbai komɛi lɛ, mitswaa mikwɛɔ mɛi ni ji. Mihiɛ gbo mihe aahu yɛ mimligbɛ tɔŋŋ, mifoɔ yɛ hiɛgbele ni Yehowa naa lɛ hewɔ. Ni kɛlɛ, minyɛɛɛ matsi mihe naa. Mi henyɛlɔ ni fe fɛɛ ji mi diɛŋtsɛ.

Eye mimumɔŋ shihilɛ awui kɛyashɛ he ni minyɛɛɛ masɔle dɔŋŋ. Misumɔɔ Yehowa ni miitao ni mafee nɔ ni ja diɛŋtsɛ. Mile ŋmalɛi fɛɛ ni kɔɔ wumɛi kɛ ŋamɛi ahe lɛ, shi minyɛɛɛ mikɛtsu nii. Biɛ ji klɛŋklɛŋ be mli ni minu he yɛ mishihilɛ mli akɛ, misumɔɔɔ ni mahi wala mli dɔŋŋ, yɛ anɔkwale ni eji akɛ miyɛ bii kpakpai lɛ fɛɛ sɛɛ.

Onukpai ni yɔɔ Kristofoi asafo lɛ mli lɛ ji hewalɛwoo kpele, ni amɛbɔ mɔdɛŋ fɛɛ ni amɛaanyɛ koni amɛye amɛbua mi. Shi beni amɛtee awuŋayeli he sane lɛ shi lɛ, mikɛɛ ebɛ mli, ejaakɛ eefee mi hiɛgbele, ni misumɔɔɔ ni mikpɛlɛɔ nɔ akɛ miyɛ naagba ni tamɔ nɛkɛ.

Yɛ naagbee lɛ mihewalɛ fite kwraa kɛyashi he ni ehe bahia ni maya helatsamɔ he ni afee mi opireshɛn. Beni miyɔɔ jɛmɛ lɛ miyoo akɛ esaaa akɛ shihilɛ lɛ kãa he eyaa nɔ nɛkɛ. Mikɛ Mark kpɛ wɔyiŋ akɛ wɔbaagbala wɔmli nyɔji etɛ, koni wɔkɛpɛi wɔshihilɛ lɛ mli ni wɔkɛ henumɔ ko akafee. Nɛkɛ be nɛɛ mli ni nɔ ko ni yɔɔ naakpɛɛ ba. Sane ko je kpo yɛ Awake! wolo tɛtrɛɛ lɛ mli ni eyitso ji, ‘Yelikɛbuamɔ Kɛha Daatɔlɔi Abii ni Amɛdara.’b

Ole, dãa ni wa numɔ ka minyɛ he. Eyɛ mli akɛ afeee mi efɔŋ ko yɛ gbɔmɔtsoŋ moŋ, shi mifɔlɔi ejieee hedɔɔ ko amɛtsɔɔɔ amɛhe loo kɛhaaa mi. Minyɛɛɛ makai be mli ni minyɛ wo mi ehiɛ edɛŋ loo ni ekɛɛ mi akɛ esumɔɔ mi. No hewɔ lɛ mida ni mileee bɔ ni mafee masumɔ mɔ ko, loo taakɛ ehe hiaa hu lɛ, bɔ ni mɔ ko aaasumɔ mi.

Minyɛ fɔɔ mi mi-tsɛ yei asɛɛnyiɛmɔ he saji kɛɛmɔ, ni ekɛɔ akɛ enyɛɛɛ ehe lɛ eye. No hewɔ lɛ, misusuɔ akɛ mida akɛ mɔ ni heee hii eyeee. Yɛ bɔ ni atsɔse mi aha hewɔ lɛ, minuɔ he be fɛɛ be akɛ mishɛɛɛ mɛi krokomɛi ahe, titri lɛ yei krokomɛi. Nakai Awake! lɛ mli sane lɛ kanemɔ ye ebua mi ni minu nɔ ni nɛkɛ nibii nɛɛ tsɔɔ lɛ shishi. No ji klɛŋklɛŋ be mli ni minu nibii ni kɛ awuŋayeli ni gbaa minaa lɛ baa lɛ shishi.

Mikɛ Awake! lɛ mli sane lɛ tsɔɔ miwu, Mark, ni eye ebua lɛ ni enu misane lɛ shishi jogbaŋŋ. Etsɛɛɛ ni ekɛ mi fɛɛ nyɛ wɔdi Biblia mli ŋaawoo kɛha gbalashihilɛ mli hefatalɔi ni taoɔ agbala mli lɛ sɛɛ. Wɔsaa wɔteŋ. (1 Korintobii 7:10, 11) Amrɔ nɛɛ wɔ gbalashihilɛ lɛ esɔ fe bei fɛɛ. Wɔfeɔ nibii pii yɛ ekomefeemɔ mli, titri lɛ kɛ ekɔɔ Kristofoi anitsumɔi ahe. Mark naa hedɔɔ ehaa mi babaoo. Etamɔ nɔ ni ekɛɔ mi bɔ ni esumɔɔ mi ha lɛ daa gbi, ni agbɛnɛ miheɔ miyeɔ diɛŋtsɛ.

Be fɛɛ be ni male akɛ wɔkɛ Mark tsutsu ŋa lɛ baakpe lɛ, misɔleɔ mihaa Yehowa kɛha hewalɛwoo, mibiɔ ni eye ebua mi ni mafee minii akɛ Kristofonyo ni eda yɛ mumɔŋ. Ni miyeɔ omanye. Esane ni misumɔɔɔ lɛ po miilaaje. Misusuuu nibii gbohii ahe dɔŋŋ loo ni mafee mɔ ni nyɛɛɛ aye esusumɔi anɔ.

Minuɔ awuŋayeli henumɔi komɛi ni ejaaa lɛ ahe lolo. Shihilɛ ni yeɔ emuu yɛ Nyɔŋmɔ jalɛ jeŋ hee lɛ mli pɛ baanyɛ ajie fɛɛ kɛjɛ mihe. Dani enɛ aaaba lɛ, mikase bɔ ni mafee maye awuŋayeli nɔ, fe ni eeeye minɔ. Hɛɛ, shwɛ sharao ni awuŋayeli afite mishihilɛ, shi shidaa aha Yehowa kɛ egbɛjianɔtoo lɛ, akɛ mitsɔ gbɔmɔ ni yɔɔ miishɛɛ pii bianɛ, ni mina gbɔmɔtsoŋ hewalɛ ekoŋŋ. Wekukpaa ni mli wa ka mikɛ mi-Nyɔŋmɔ, Yehowa, teŋ ekoŋŋ.—Aŋma aha.

[Shishigbɛ niŋmai]