Mɛni Hewɔ Esa akɛ Okɛha Yehowa?
BENI hulu lɛ tsoɔ waa yɛ Sidonbii amaŋ bibioo ni ji Zarefat mli lɛ, no mli lɛ yoo okulafo ko koto shi eebua lai naa. Esa akɛ eshɛre la koni ehoo niyenii bibioo ko—ekolɛ no ji naagbee niyenii ni ekɛ ebinuu fioo lɛ baaye. Ekɛ deŋmegbomɔ epele aahu koni ekɛ ebinuu lɛ ahi wala mli kɛtsɔ nu hɔmɔ be kakadaŋŋ kɛ hɔmɔ diɛŋtsɛ ni ekɛba lɛ mli, ni amrɔ nɛɛ amɛ naagbee ji jaramɔ shihilɛ ni amɛyɔɔ mli nɛɛ. Amɛmiigboi kɛ hɔmɔ.
Nuu ko banina amɛ. Egbɛi ji Elia, ni yoo okulafo lɛ na amrɔ nɔŋŋ akɛ Yehowa gbalɔ ji lɛ. Etamɔ nɔ ni yoo lɛ enu Nyɔŋmɔ nɛɛ he sane. Esoro Yehowa kwraa yɛ Baal, mɔ ni yiwalɛ kɛ jamɔ fɔŋ ehe shi waa yɛ eshikpɔŋ ni ji Sidon nɔ lɛ he. No hewɔ lɛ, beni Elia bi lɛ nu lɛ, eeshwe ni eha lɛ. Ekolɛ esusu akɛ nakai feemɔ baaha ena Yehowa hiɛ duromɔ. (Mateo 10:41, 42) Shi Elia bi nɔ kroko hu efata he—niyenii fioo. Yoo lɛ tsɔɔ mli akɛ eshwɛ niyenii fioo ni baashɛ amɛ shikome niyeli kɛkɛ. Shi kɛlɛ, Elia kã he lolo, ni eema nɔ mi kɛmiiha yoo lɛ akɛ Yehowa baatsɔ naakpɛɛ gbɛ nɔ eha lɛ niyenii aahu kɛyashi be ni nu hɔmɔ lɛ sɛɛ baafo. Mɛni yoo lɛ fee? Biblia lɛ kɛɔ akɛ: “Ni eyiŋ etee eyafee bɔ ni Elia kɛɛ lɛ.” (1 Maŋtsɛmɛi 17:10-15) Nɛkɛ wiemɔi fioo nɛɛ tsɔɔ nifeemɔ ni tsɔɔ hemɔkɛyeli kpele diɛŋtsɛ—eda aahu akɛ, yɛ anɔkwale mli lɛ, Yesu Kristo jie nakai yoo okulafo lɛ yi aaafee afii akpe sɛɛ!—Luka 4:25, 26.
Kɛ nakai po lɛ, etamɔ nɔ ni akpaŋ gbɛ akɛ Yehowa baabi nibii babaoo yɛ yoo ni bɛ nɔ ko kwraa tamɔ nɛkɛ lɛ dɛŋ. Nakai enɛ ji, titri lɛ kɛji wɔsusu sɔlemɔ ko ni nuu ko ni ehe gbɛi waa lɛ sɔle lɛ he. Nikeenii ni Maŋtsɛ David bua naa eha ebinuu Salomo koni ekɛbatsu nii ni ekɛma sɔlemɔtsu lɛ tee nihamɔ kpele diɛŋtsɛ shi. Kɛji aabu he akɔntaa yɛ ŋmɛnɛŋmɛnɛ shika mli lɛ, nikeenii ni akɛbaha lɛ naa shɛɔ dɔlai akpekpei toi akpei abɔ! Shi kɛlɛ, David kɛɛ Yehowa yɛ sɔlemɔ mli akɛ: “Shi namɔ ji mi, ni namɛi ji mimaŋbii lɛ, ni kulɛ wɔɔnyɛ wɔha tsuijurɔ naa tamɔ nɛkɛ? Ejaakɛ oŋɔɔ fɛɛ jɛ, ni odɛŋ wɔná kɛjɛ ni wɔŋɔhaao nɛɛ.” (1 Kronika 29:14) Taakɛ David kɛɛ lɛ, Yehowa nii ji nɔ fɛɛ nɔ. No hewɔ lɛ, be fɛɛ be ni wɔɔha nɔ ko ni wɔkɛha jamɔ krɔŋŋ aya hiɛ lɛ, belɛ wɔkɛ nii ni ji Yehowa nɔ̃ momo lɛ miiha lɛ kɛkɛ. (Lala 50:10) Enɛ hewɔ lɛ, sanebimɔ ni teɔ shi ji, Mɛni hewɔ kwraa Yehowa taoɔ ni wɔha lɛ nii lɛ mɔ?
Anɔkwa Jamɔ Fã ko ni He Hiaa Waa
Hetoo kuku kɛkɛ ji akɛ, Yehowa ejɛ blema beebe eha nihamɔ efee ejamɔ krɔŋŋ lɛ fã ko ni he hiaa waa. Nuu anɔkwafo Habel kɛ elɛɛ kooloi ni jara wa lɛ ekomɛi shã afɔle eha Yehowa. Blematsɛmɛi tamɔ Noa, Abraham, Isak, Yakob, kɛ Hiob hu shã afɔlei ni tamɔ nakai nɔŋŋ.—1 Mose 4:4; 8:20; 12:7; 26:25; 31:54; Hiob 1:5.
Mose Mla lɛ wo akpɔ ni eto nikeenii ni akɛbahaa Yehowa lɛ po he gbɛjianɔ. Akɛ nɔkwɛmɔ nɔ lɛ, awo Israelbii lɛ fɛɛ kita akɛ amɛbahã mlijaa nyɔŋma mli ekome, loo amɛkɛ amɛŋmɔ shi nikpamɔ nii kɛ amɛlɛɛ kooloi amlijaa nyɔŋma mli ekome abaha akɛ nikeenii. (4 Mose 18:25-28) Atooo nikeenii krokomɛi ni eshwɛ lɛ ahe gbɛjianɔ tamɔ nɛkɛ. Akɛ nɔkwɛmɔ nɔ lɛ, abiɔ ni Israelnyo fɛɛ Israelnyo kɛ elɛɛ kooloi ateŋ klɛŋklɛŋ bii kɛ eklɛŋklɛŋ nikpamɔ nii abaha Yehowa. (2 Mose 22:29, 30; 23:19) Ni kɛlɛ, Mla lɛ shĩ eha mɔ aŋkro lɛ ni lɛ diɛŋtsɛ ekpɛ eyiŋ yɛ enibaa nii lɛ klɛŋklɛŋ yibii lɛ falɛ ni ekɛbaaha lɛ he, bei abɔ ni no ji enii lɛ amli ekpakpa fe fɛɛ kɛkɛ. Mla lɛ tsɔɔ nibii hu ni esa akɛ akɛbaha akɛ shidaa kɛ shiwoo afɔlei, ni nomɛi fɛɛ jɛɔ mɔ diɛŋtsɛ suɔmɔ mli. (3 Mose 7:15, 16) Yehowa wo ewebii lɛ hewalɛ ni amɛha nii ni ekɛ bɔ ni ejɔɔ amɛ babaoo eha lɛ akpa gbee. (5 Mose 16:17) Taakɛ eba lɛ yɛ kpeebuu lɛ kɛ sɛɛ mli lɛ sɔlemɔtsu lɛ maa mli lɛ, mɔ fɛɛ mɔ ha nɔ ni etsui tsirɛ lɛ akɛ ekɛha. (2 Mose 35:21; 1 Kronika 29:9) Eka shi faŋŋ akɛ, nɛkɛ nikeenii ni jɛ suɔmɔ mli nɛɛ sa Yehowa hiɛ waa!
Yɛ “Kristo mla lɛ” shishi lɛ, esa akɛ nikeenii fɛɛ ajɛ suɔmɔ mli. (Galatabii 6:2; 2 Korintobii 9:7) No etsɔɔɔ akɛ Kristo sɛɛnyiɛlɔi lɛ kpa nihamɔ loo nɔ ni amɛkɛhaa lɛ faaa. Dabi, ejeee nakai! Beni Yesu kɛ ebɔfoi lɛ shiɛɔ yɛ Israel lɛ, yei saŋŋ nyiɛ amɛsɛɛ ni amɛjɛ amɛ diɛŋtsɛ amɛnibii ni amɛyɔɔ lɛ mli amɛsɔmɔ amɛ. (Luka 8:1-3) Nakai nɔŋŋ bɔfo Paulo hu ná nikeenii kɛfi emaŋsɛɛ sanekpakpa shiɛmɔ nitsumɔ lɛ sɛɛ, ni lɛ hu ewo asafoi komɛi hewalɛ ni amɛha ekrokomɛi ni yɔɔ hiamɔ shihilɛ mli lɛ nii. (2 Korintobii 8:14; Filipibii 1:3-5) Nɔyeli kuu ni yɔɔ Yerusalem lɛ kɛ nitsumɔ wo hii ni gbɛnaa nii kã amɛnɔ lɛ adɛŋ akɛ amɛkwɛ ni aja nikeenii ni anaa lɛ aha ohiafoi lɛ. (Bɔfoi lɛ Asaji 6:2-4) Eyɛ faŋŋ akɛ, mra be mli Kristofoi lɛ bu lɛ akɛ hegbɛ ni amɛna ni amɛkɛaafi jamɔ krɔŋŋ sɛɛ yɛ nakai gbɛi anɔ.
Shi kɛlɛ, ekolɛ wɔɔsusu nɔ hewɔ ni Yehowa kɛ nihamɔ efee ejamɔ lɛ fã lɛ he. Susumɔ yiŋtoi ejwɛ ahe okwɛ.
Nɔ Hewɔ ni Wɔhaa Nii
Klɛŋklɛŋ lɛ, Yehowa kɛ nihamɔ efee anɔkwa jamɔ fã ejaakɛ nakai feemɔ hi kɛha wɔ. Ejieɔ hiɛsɔɔ ni wɔyɔɔ kɛhaa Nyɔŋmɔ mlihilɛ lɛ kpo. Akɛ nɔkwɛmɔ nɔ lɛ, kɛji gbekɛ ko he nii loo eke efɔlɔ nɔ ko lɛ, mɛni hewɔ fɔlɔ lɛ ŋmɔɔ kɛ miishɛɛ lɛ? Ani nikeenii lɛ tsuɔ hiamɔ nii ko ni mli wa waa ni kulɛ fɔlɔ lɛ nyɛŋ atsɔ gbɛ kroko nɔ etsu he nii lɛ he nii? Ekolɛ dabi. Shi moŋ, fɔlɔ lɛ naa miishɛɛ waa akɛ eeena akɛ gbekɛ lɛ miiná hiɛsɔɔ kɛ nihamɔ mumɔ. Nakai yiŋtoi nɔŋŋ hewɔ ni Yehowa woɔ wɔ hewalɛ ni wɔha nii lɛ, ni kɛ wɔfee nakai lɛ, enaa he miishɛɛ. Nɛkɛ gbɛ nɔ wɔtsɔɔ wɔhaa enaa akɛ wɔhiɛ sɔɔ mlihilɛ babaoo ni ejieɔ lɛ kpo etsɔɔ wɔ, kɛ nii ni ehaa wɔ lɛ. Lɛ ji “duromɔ nii kpakpai fɛɛ kɛ nikeenii ni hi kɛwula shi fɛɛ lɛ” ahalɔ, no hewɔ lɛ, yiŋtoi ni wɔɔdamɔ nɔ wɔda lɛ shi lɛ etaŋ kɔkɔɔkɔ. (Yakobo 1:17) Nɔ ni fe fɛɛ lɛ, Yehowa kɛ lɛ diɛŋtsɛ e-Bi ni esumɔɔ lɛ lɛ hã, ni eŋmɛ gbɛ akɛ egbo koni wɔna naanɔ wala. (Yohane 3:16) Ani wɔbaanyɛ wɔda lɛ shi bɔ ni sa?
Nɔ ni ji enyɔ lɛ, kɛji wɔna nihamɔ su lɛ, wɔkɛ nakai feemɔ kaseɔ Yehowa kɛ e-Bi, Yesu Kristo yɛ gbɛ ko ni he hiaa fe fɛɛ nɔ. Yehowa hãa nii be fɛɛ be, ejieɔ mlihilɛ kpo daa. Taakɛ Biblia lɛ kɛɔ lɛ, “wala kɛ mumɔ kɛ nii fɛɛ” jɛɔ eŋɔɔ kɛbahaa wɔ. (Bɔfoi lɛ Asaji 17:25) Wɔbaanyɛ wɔda lɛ shi yɛ gbɛ ni ja nɔ yɛ mumɔ fɛɛ mumɔ ni wɔmuɔ, niyenii fɛɛ niyenii ni wɔyeɔ, kɛ miishɛɛ kɛ mlifilimɔ be fɛɛ be ni baa yɛ shihilɛ mli lɛ he. (Bɔfoi lɛ Asaji 14:17) Yesu jie nihamɔ mumɔ kpo, taakɛ e-Tsɛ lɛ feɔ lɛ. Ekɛ ehe hã kwraa kɛmɔ shi. Ani ole akɛ kɛ Yesu fee naakpɛɛ nii lɛ, naakpɛɛ nii lɛ haa elaajeɔ lɛ diɛŋtsɛ enibii komɛi? Ŋmalɛi lɛ kɛɔ wɔ nɔ ni fe shikome akɛ kɛji etsa mɛi ni he yeɔ lɛ, hewalɛ ‘jɛɔ emli kɛyaa.’ (Luka 6:19; 8:45, 46) Yesu jie mlihilɛ kpo aahu akɛ ekɛ lɛ diɛŋtsɛ esusuma, ni ji ewala ha kɛtee gbele mli tɔ̃ɔ.—Yesaia 53:12.
No hewɔ lɛ, kɛ wɔha nii lɛ, wɔbe, wɔhewalɛ, loo wɔnii ni wɔyɔɔ jio, wɔkaseɔ Yehowa ni wɔhaa etsui nyaa kɛ miishɛɛ. (Abɛi 27:11; Efesobii 5:1) Wɔnyiɛɔ adesa jeŋba he nɔkwɛmɔ nɔ ni eye emuu ni Yesu Kristo fee efɔ̃ shi kɛha wɔ lɛ hu sɛɛ.—1 Petro 2:21.
Nɔ ni ji etɛ lɛ, nihamɔ tsuɔ hiamɔ nii diɛŋtsɛ ni he hiaa lɛ ahe nii. Eji anɔkwale, Yehowa baanyɛ atsu Maŋtsɛyeli lɛ he hiamɔ nii ahe nii yɛ gbɛ ni yɔɔ mlɛo nɔ ni wɔyelikɛbuamɔ bɛ mli, tamɔ bɔ ni ebaanyɛ eto gbɛjianɔ ni eha tɛi abolɔ yɛ nɔ najiaŋ ni ekɛ wɔ aaatsu nii kɛshiɛ wiemɔ lɛ. (Luka 19:40) Shi ehala akɛ ekɛ hegbɛi nɛɛ baaha wɔ ni ekɛwo wɔhiɛ nyam. No hewɔ lɛ, kɛ wɔkɛ nii ni wɔyɔɔ lɛ ha kɛha Maŋtsɛyeli lɛ he nibii ahiɛyaa lɛ, wɔtsui nyɔɔ wɔmli waa ejaakɛ wɔle akɛ wɔmiiná gbɛfaŋnɔ diɛŋtsɛ yɛ nitsumɔ ni he hiaa fe fɛɛ ni yaa nɔ yɛ je nɛɛ mli lɛ mli.—Mateo 24:14.
Eyɛ faŋŋ akɛ, ehe miihia ni ana shika koni anyɛ akɛtsu Yehowa Odasefoi ajeŋ muu fɛɛ nitsumɔ lɛ he nii. Yɛ 1995 sɔɔmɔ afi lɛ mli lɛ, Asafo lɛ kɛ shika ni miihe ashɛ dɔlai akpekpei 60 tsu nii ni ekɛkwɛ gbɛgbalɔi krɛdɛɛi, maŋsɛɛ sanekpakpa shiɛlɔi, kɛ nɔkwɛlɔi gbɛfalɔi yɛ amɛshiɛmɔ nitsumɔi lɛ amli. Shi, shika bibioo pɛ nɛ, kɛ akɛto nɔ ni afiteɔ yɛ nitsumɔ he niji atsũi amaamɔ kɛ woji akalamɔ hei kɛ amɛnitsumɔi amli yɛ je lɛŋ fɛɛ lɛ he. Ni kɛlɛ, anyɛɔ anaa shika nɛɛ fɛɛ kɛtsɔɔ tooyeli ni jɛɔ suɔmɔ mli lɛ nɔ!
Yehowa webii fɛɛ ebuuu lɛ akɛ, kɛji amɛ diɛŋtsɛ amɛbɛ nii babaoo lɛ, no lɛ esa akɛ amɛshĩ jatsu lɛ amɛfɔ̃ mɛi krokomɛi anɔ ni amɛtere. Su ni tamɔ nɛkɛ baanyɛ aha wɔjamɔ lɛ fã nɛɛ aŋmɛɛ wɔ. Taakɛ bɔfo Paulo tsɔɔ mli lɛ, Kristofoi ni yɔɔ Makedonia lɛ miina amanehulu waa yɛ “amɛhia ni mli kwɔ lɛ” mli. Shi kɛlɛ, amɛ kpa fai ni aha amɛ hegbɛ kɛha nihamɔ. Ni Paulo ye odase akɛ, nɔ ni amɛha lɛ “fe bɔ ni amɛaanyɛ tete”!—2 Korintobii 8:1-4.
Nɔ ni ji ejwɛ lɛ, Yehowa kɛ nihamɔ efee anɔkwa jamɔ fã ejaakɛ nihamɔ baaye ebua wɔ ni wɔna miishɛɛ. Yesu diɛŋtsɛ wie akɛ: “Nɔhamɔ mli yɛ miishɛɛ babaoo fe ehemɔ.” (Bɔfoi lɛ Asaji 20:35, NW) Nakai ji bɔ ni Yehowa bɔ wɔ. No nɔŋŋ ji yiŋtoo kroko hu hewɔ ni ekolɛ wɔnuɔ he akɛ bɔ fɛɛ bɔ ni nii ni wɔkɛaaha lɛ fa hã lɛ, wɔnyɛŋ wɔshɛ hiɛsɔɔ ni wɔnuɔ he wɔhaa lɛ yɛ wɔtsuii amli lɛ he kɔkɔɔkɔ lɛ. Shi, miishɛɛ sane ji akɛ, Yehowa kpaaa babaoo gbɛ kɛjɛɛɛ wɔdɛŋ fe bɔ ni wɔɔnyɛ wɔhã. Wɔbaanyɛ wɔna nɔmimaa akɛ, kɛ wɔkɛ miishɛɛ hã bɔ ni wɔɔnyɛ lɛ, enaa he miishɛɛ waa!—2 Korintobii 8:12; 9:7.
Nihamɔ Mumɔ Kpojiemɔ kɛ Jɔɔmɔi Baa
Kɛji wɔɔku sɛɛ kɛya shishijee nɔkwɛmɔ nɔ lɛ nɔ lɛ, susumɔ he okwɛ, ákɛ Zarefat yoo okulafo lɛ susu eyiŋ akɛ mɔ kroko baanyɛ atsu Elia hiamɔ nii ahe nii, ni eha lɛ niyenii lɛ. Ni kulɛ kwɛ jɔɔmɔ kpele ni baaŋmɛɛ lɛ!
Ŋwanejee ko bɛ he akɛ, Yehowa jɔɔ mɛi ni jieɔ nihamɔ mumɔ kpo lɛ. (Abɛi 11:25) Ebaaa lɛ akɛ Zarefat yoo okulafo lɛ na amanehulu yɛ nɔ ni esusu akɛ no ji enaagbee niyenii ni ekɛha lɛ hewɔ. Yehowa fee naakpɛɛ nɔ ko kɛwo lɛ nyɔmɔ. Taakɛ Elia wo shi lɛ, emamu kɛ gbɛ kɛ emu kɛ tɔ lɛ etãaa aahu kɛyashi beni nu hɔmɔ lɛ sɛɛ fo. Shi ena nyɔmɔwoo kpele ni fe nakai po. Beni hela mɔ ebinuu lɛ ni egbo lɛ, Elia, anɔkwa Nyɔŋmɔ lɛ gbɔmɔ lɛ, kɛ lɛ ba wala mli eha lɛ. Kwɛ bɔ ni enɛ tswa yoo lɛ ema shi waa yɛ mumɔŋ eha!—1 Maŋtsɛmɛi 17:16-24.
Wɔkpaaa gbɛ ŋmɛnɛ akɛ, akɛ naakpɛɛ nii baajɔɔ wɔ. (1 Korintobii 13:8) Shi Yehowa maa nɔ mi kɛhaa wɔ akɛ ebaaha mɛi ni kɛ amɛsusuma muu fɛɛ sɔmɔɔ lɛ lɛ amɛhiamɔ nii. (Mateo 6:33) No hewɔ lɛ, wɔbaanyɛ wɔtamɔ Zarefat yoo okulafo lɛ yɛ enɛ gbɛfaŋ, ni wɔjɛ wɔsuɔmɔ mli wɔha nii, kɛ hekɛnɔfɔɔ akɛ Yehowa baasusu wɔhe. Nakai nɔŋŋ hu, wɔbaanyɛ wɔna mumɔŋ sɛɛnamɔi kpelei amli ŋɔɔmɔ. Kɛji wɔ nihamɔ lɛ ji wɔ daa gbi nifeemɔ fã, shi jeee nɔ ko ni wɔfeɔ, yɛ henumɔ ko ni wɔnaa trukaa hewɔ lɛ, ebaaye ebua wɔ ni wɔha wɔhiŋmɛi nɔ atse ni ema Maŋtsɛyeli lɛ he nibii anɔ, taakɛ Yesu jie yi lɛ. (Luka 11:34; okɛto 1 Korintobii 16:1, 2 he.) Ebaaye ebua wɔ hu ni wɔbɛŋkɛ Yehowa kɛ Yesu kpaakpa akɛ amɛnanemɛi nitsulɔi. (1 Korintobii 3:9) Ni ebaaha mlihilɛ, kɛ nihamɔ mumɔ ni kadiɔ Yehowa jeŋ muu fɛɛ jalɔi lɛ momo lɛ aya hiɛ babaoo.
[Akrabatsa ni yɔɔ baafa 31]
GBƐI Ni Mɛi Komɛi Tsɔɔ Nɔ Amɛhaa Nii
TOOYELI Kɛha Jeŋ Muu Fɛɛ Nitsumɔ Lɛ
Mɛi pii kɛ shika ko fɔɔ shi daa ni amɛkɛwoɔ tooyeli adekai ni akadi amɛ akɛ: “Tooyeli Kɛha Asafo lɛ Jeŋ Muu Fɛɛ Nitsumɔ—Mateo 24:14” lɛ amli. Daa nyɔŋ nɔ lɛ, asafoi lɛ kɛ shika nɛɛ majeɔ kɛyaa jeŋ muu fɛɛ nitsumɔ he yitso lɛ yɛ Brooklyn, New York, aloo amɛkɛyaa nitsumɔ he nine ni yɔɔ maŋ nɔ he ni amɛyɔɔ lɛ.
Abaanyɛ akɛ shika ni ataoɔ akɛke lɛ amaje tɛɛ kɛbaha Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, aloo abaanyɛ akɛya Asafo lɛ nitsumɔ he nine ni sɔmɔɔ maŋ ni ayɔɔ mli lɛ. Abaanyɛ akɛ jwetrii kɛ nibii krokomɛi ni jara wa hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ mli akɛ amɛji nibii ni akɛmiike kwraa.
NIBII NI AKƐHA SHI AKƐKEKO LƐ AHE GBƐJIANƆTOO
Abaanyɛ akɛ shika aha Buu Mɔɔ Asafo lɛ ni ehi edɛŋ kɛyashi mɔ ni kɛha lɛ aaagbo, kɛ gbɛjianɔtoo akɛ kɛ ehe miihia mɔ ni kɛha lɛ, abaaku sɛɛ akɛha lɛ. Kɛji ootao saji babaoo lolo lɛ, ofainɛ ŋmaa kɛbabi yɛ Treasurer’s Office kɛtsɔ adrɛs ni atsɔɔ yɛ yiteŋgbɛ lɛ nɔ.
NIHAMƆ NI AKPƐ YIŊ YƐ HE
Kɛfata shika ni akɛkeɔ kwraa kɛ shika ni akɛhaa shi akɛkeko lɛ ahe lɛ, ayɛ gbɛi krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ekomɛi ji:
Insurance: Abaanyɛ aŋma Buu Mɔɔ Asafo lɛ gbɛi akɛ mɛi ni baana insurance gbɛjianɔtoo ko he sɛɛ lɛ ateŋ mɔ ko aloo yɛ nitsumɔ hejɔɔmɔ mli gbɛjianɔtoo hu mli. Esa akɛ atswa Asafo lɛ adafi yɛ gbɛjianɔtoo ni tamɔ nakai he.
Shika ni Akɛto Bank: Abaanyɛ aha shika ni akɛto, shika nɔ woji, aloo nitsumɔ mli hejɔɔmɔ mli shika ahi shi aloo akɛha Buu Mɔɔ Asafo lɛ yɛ mɔ lɛ gbele sɛɛ, yɛ bɔ ni nyɛmaŋ lɛ shikatoo hei ŋmɛɔ gbɛ ni afee lɛ naa. Esa akɛ atswa Asafo lɛ adafi yɛ gbɛjianɔtoo ni tamɔ nakai he.
Nitsumɔi Amli Gbɛfaŋnɔ kɛ Shika ni Akɛfa: Abaanyɛ akɛ nitsumɔi amli gbɛfaŋnɔ ni ayɔɔ kɛ shika ni akɛfa ni abaaku sɛɛ awo ekoŋŋ lɛ aha Buu Mɔɔ Asafo lɛ akɛ nibii ni akɛmiike kwraa aloo kɛ gbɛjianɔtoo akɛ akɛ emli sɛɛnamɔi lɛ baaha mɔ ni kɛke lɛ.
Shikpɔji kɛ Tsũi: Abaanyɛ akɛ shikpɔji kɛ tsũi ni baahi hɔɔmɔ lɛ aha Buu Mɔɔ Asafo lɛ kɛtsɔ ke kwraa ni akɛaake nɔ, aloo ni abaashi shikpɔŋ loo tsũ lɛ yɛ mɔ ni kɛke lɛ dɛŋ, koni ehi tsũ lɛ mli aloo ekwɛ nɔ aahu kɛyashi be mli ni ebaagbo. Esa akɛ mɔ ni taoɔ ekɛ shikpɔŋ loo tsũ ko aha Asafo lɛ ana Asafo lɛ dani efee nakai.
Shamaŋsheo kɛ Nii ni Ahaa Mɔ Kroko Gbɛi Kãa Nɔ: Abaanyɛ akɛ nibii ni ayɔɔ loo shika ake Buu Mɔɔ Asafo lɛ kɛtsɔ shamaŋsheo ni aŋma yɛ mla naa nɔ, aloo abaanyɛ aha Asafo lɛ gbɛi akã shika ni akɛto lɛ nɔ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa enaa too woo mli heyelii komɛi. Esa akɛ akɛ shamaŋsheo loo shika lɛ he wolo lɛ ekome amaje Asafo lɛ.
Mɛi ni yɔɔ nɛkɛ nihamɔ ni akpɛ yiŋ yɛ he nɛɛ eko he miishɛɛ lɛ aŋma wolo kɛbaha Planned Giving Desk yɛ adrɛs ni atsɔɔ yɛ shishigbɛ lɛ loo Asafo lɛ nitsumɔ he nine ni sɔmɔɔ maŋ ni oyɔɔ mli lɛ. Esa akɛ aha Planned Giving Desk lɛ nine ashɛ ehe woji ni he hiaa yɛ gbɛjianɔtoi nɛɛ eko fɛɛ eko gbɛfaŋ lɛ nɔ.
Asafo lɛ efee wolo bibioo ko yɛ Ŋleshi Blɔfo wiemɔ mli ni yitso ji Planned Giving (Nihamɔ ni Akpɛ Yiŋ yɛ He). Nɛkɛ saji ni aŋmala nɛɛ baaye abua mɛi ni yɔɔ United States ni miito gbɛjianɔ ni amɛkɛ nɔ krɛdɛɛ ko ake Asafo lɛ bianɛ, aloo amɛshi nikeenii ko yɛ amɛgbele sɛɛ lɛ waa diɛŋtsɛ. Enɛ ji anɔkwale, titri lɛ kɛ amɛmiisumɔ ni amɛtsu amɛweku lɛ oti ko loo yiŋtoo ko ni amɛkɛma amɛhiɛ yɛ gboshinii ahe nitsumɔ gbɛfaŋ lɛ he nii, yɛ be mli ni amɛkɛ mla naa hegbɛi ni yɔɔ lɛ tsuɔ nii koni eha too ni abiɔ ni amɛwo lɛ aba shi lɛ. Onine baanyɛ ashɛ wolo bibioo nɛɛ nɔ, kɛji oŋma wolo loo otswa tɛlifon kɛbi.
PLANNED GIVING DESK
Watch Tower Bible and Tract Society of Pennsylvania
100 Watchtower Drive, Patterson, New York 12563-9204
Telephone: (914) 878-7000