‘Okɛ Onii ni Jara Wa lɛ Awo Yehowa Hiɛ Nyam’—Yɛ Mɛɛ Gbɛ Nɔ?

“OKƐ onii ni oyɔɔ kɛ onibaa nii fɛɛ mli klɛŋklɛŋ nii awo Yehowa hiɛ nyam.” Nɔ ni yɔɔ nɛkɛ mumɔ naa wiemɔi ni nilee yɔɔ mli, ni aŋma aaafee afii 2,600 ni eho nɛ lɛ mli ji Yehowa jɔɔmɔi babaoo ni aaana lɛ naa samfele, ejaakɛ niŋmalɔ lɛ tee nɔ etsɔɔ akɛ: “No dani oboŋoi lɛ aaayimɔ obɔbɔ, ni oweinbui lɛ aaafɛlɛ kɛ wein hee.”—Abɛi 3:9, 10.

Shi, ní aaawo Nyɔŋmɔ hiɛ nyam lɛ tsɔɔ mɛni? Mɛni ji nibii ni jara wa ni esa akɛ wɔkɛwo Yehowa hiɛ nyam lɛ? Ni mɛɛ gbɛ nɔ wɔɔnyɛ wɔfee enɛ yɛ?

‘Wo Yehowa Hiɛ Nyam’

Yɛ Ŋmalɛi lɛ amli lɛ, Hebri wiemɔ titri kɛha hiɛnyamwoo, ka·vohdhʹ, shishitsɔɔmɔ diɛŋtsɛ ji “tsiimɔ.” No hewɔ lɛ, ni aaawo mɔ ko hiɛ nyam lɛ tsɔɔ akɛ ni aaabu mɔ lɛ akɛ ehiɛ tsii, esa bulɛ, loo mɔ ko ni nɔ kwɔ. Atsɔɔ Hebri wiemɔ kroko kɛha woo, yeqarʹ, shishi akɛ “nɔ ni jara wa” kɛ “nibii ni jara wa.” Nakai nɔŋŋ Hela wiemɔ ti·meʹ, ni atsɔɔ shishi yɛ Biblia lɛ mli akɛ “hiɛnyamwoo” lɛ hiɛ shishinumɔ ni tsɔɔ bulɛ ni nɔ kwɔ, jara, jarawalɛ. Enɛ hewɔ lɛ mɔ ko woɔ mɔ kroko hiɛ nyam kɛtsɔ bulɛ ni mli kwɔ ni eyɔɔ kɛha nakai mɔ lɛ nɔ.

Ni aaawo hiɛ nyam lɛ hu hiɛ shishinumɔ kroko. Susumɔ sane ni kɔɔ Yudanyo anɔkwafo Mordekai, mɔ ni yɛ be ko mli lɛ eha Maŋtsɛ Ahashwerosh ni hi shi yɛ blema Pershia lɛ na ele akɛ mɛi komɛi miikpaŋ eyinɔ ni amɛgbe lɛ lɛ he okwɛ. Sɛɛ mli beni maŋtsɛ lɛ ná ele akɛ afeko nɔ ko ni akɛwo Mordekai hiɛ nyam yɛ nakai nifeemɔ lɛ hewɔ lɛ, ebi emaŋsɔɔlɔ nukpa fe fɛɛ, Haman, gbɛ ni hi fe fɛɛ ni aaatsɔ nɔ awo mɔ ni maŋtsɛ lɛ ena ehe tsui nɛɛ hiɛ nyam. Haman susu akɛ nakai hiɛnyam lɛ bafee enɔ, shi kwɛ bɔ ni etɔ̃ kwraa eha! Shi fɛɛ mli lɛ, Haman kɛɛ akɛ esa akɛ akɛ “atade ni maŋtsɛ woɔ lɛ” awo nakai mɔ lɛ, ni eha eta “okpɔŋɔ ni maŋtsɛ taa nɔ lɛ” nɔ. Emu sane naa akɛ: “Aha eta okpɔŋɔ lɛ nɔ kɛfo maŋ lɛŋ blohu lɛŋ, ni ashiɛ kɛnyiɛ ehiɛ akɛ: Bɔ ni aaafee aha nuu ni maŋtsɛ lɛ sumɔɔ akɛ ewo ehiɛ nyam lɛ nɛ!” (Ester 6:1-9) Yɛ nɛkɛ shihilɛ nɛɛ mli lɛ, nɔ ni fata mɔ ko hiɛ nyam ni aaawo lɛ he ji ni aaawo enɔ gojoo yɛ maŋ bɔni afee ni gbɔmɛi fɛɛ abu lɛ waa.

Nɔ ni tamɔ nakai lɛ, ní aaawo Yehowa hiɛ nyam lɛ hiɛ shishinumɔi sɔrɔtoi enyɔ: ni akɛ bulɛ ni mli kwɔ aaaha lɛ diɛŋtsɛ kɛ enɔ ni aaawo gojoo yɛ faŋŋ mli kɛtsɔ gbɛfaŋnɔ ni wɔɔna kɛ sɛɛfimɔ ni wɔkɛaaha nitsumɔ ni ji egbɛi lɛ jajemɔ yɛ faŋŋ mli lɛ nɔ.

‘Onii ni Jara Wa’—Mɛni Ji Nomɛi?

Nɔ ni fata wɔ nibii ni jara wa lɛ ahe ji wɔwala, wɔbe, wɔnyɛmɔi, kɛ wɔhewalɛ. Ni wɔ heloonaa nii ni wɔyɔɔ hu? Susumɔ Yesu wiemɔi ni ewie beni ena ni yoo okulafo ohiafo ko kɛ shika bibii enyɔ wo sɔlemɔwe onia adeka lɛ mli lɛ he okwɛ. Ekɛɛ: “Nɛkɛ yoo okulafo ohiafo nɛɛ, ekɛ pii ewo mli fe mɛi lɛ fɛɛ; ejaakɛ mɛnɛɛmɛi [oniatsulɔi krokomɛi lɛ] fɛɛ, nɔ ni amɛna ni eteke nɔ lɛ eko amɛkɛbawo Nyɔŋmɔ nikeenii lɛ amli nɛɛ, shi mɔ nɛɛ lɛ, ehia mli nii ni ekɛkwɛɔ ehe nɔ lɛ fɛɛ ekɛbawo mli nɛɛ.” (Luka 21:1-4) Yesu jie yoo okulafo lɛ yi yɛ eheloonaa nibii ni eyɔɔ ni ekɛha Yehowa jamɔ tee hiɛ lɛ hewɔ.

Eyɛ faŋŋ akɛ, belɛ nɔ ni fata nibii ni jara wa ni Salomo tsĩ tã lɛ he ji heloonaa nibii lɛ amli eko fɛɛ eko ni wɔyɔɔ. Ni wiemɔ ni ji “onibaa nii fɛɛ mli klɛŋklɛŋ nii” lɛ hiɛ susumɔ akɛ, wɔkɛ wɔnibii ni jara wa lɛ amli nɔ ni hi fe fɛɛ lɛ baaha Yehowa.

Shi kɛlɛ, mɛɛ gbɛ nɔ heloonaa nibii ni akɛhaa Nyɔŋmɔ lɛ woɔ ehiɛ nyam yɛ? Ani nibii fɛɛ lɛ, jeee enɔ ni momo? (Lala 50:10; 95:3-5) Maŋtsɛ David kɛɛ Yehowa yɛ sɔlemɔ ni jɛ etsuiŋ lɛ akɛ: “Oŋɔɔ fɛɛ jɛ.” Ni David kɛɛ yɛ onia babaoo ni lɛ kɛ ewebii lɛ tsu kɛha sɔlemɔwe lɛ maa lɛ he akɛ: “Odɛŋ wɔna kɛjɛ ni wɔŋɔhao nɛɛ.” (1 Kronika 29:14) No hewɔ lɛ, kɛ wɔkɛ nikeenii miiha Yehowa lɛ, wɔmiiku sɛɛ wɔkɛ nɔ ni ejɛ etsui mli ekɛha wɔ lɛ miiha lɛ ekoŋŋ. (1 Korintobii 4:7) Shi, taakɛ wɔkadi kɛtsɔ hiɛ lɛ, nɔ ni fata Yehowa ni aaawo ehiɛ nyam lɛ he ji ni aaawo enɔ gojoo yɛ mɛi krokomɛi ahiɛ. Ni heloonaa nikeenii ni akɛhaa kɛha anɔkwa jamɔ nɔyaa lɛ woɔ Nyɔŋmɔ hiɛ nyam. Nɛkɛ gbɛ ni atsɔɔ nɔ awoɔ Yehowa hiɛ nyam nɛɛ he nɔkwɛmɔnii ni hi jogbaŋŋ yɛ Biblia lɛ mli.

Blema Nɔkwɛmɔnii

Aaafee afii 3,500 ni eho nɛ, beni be bashɛ kɛha Yehowa ni ekɛ kpee buu lɛ aha yɛ ŋa lɛ nɔ akɛ Israelbii lɛ ajamɔhe lɛ, tsũ lɛ maa he gbɛjianɔtoo ni ajɛ ŋwɛi akɛha lɛ babi ni ana nibii babaoo ni jara wa waa. Yehowa fã Mose koni eha ‘mɔ fɛɛ mɔ ni yɔɔ he tsuijurɔ lɛ, kɛ nɔwomɔ nikeenii abaha Yehowa.’ (2 Mose 35:5) Sane lɛ tee nɔ akɛ: “Amɛba, mɔ fɛɛ mɔ ni tsui mli ta lɛ, kɛ mɔ fɛɛ mɔ ni na he tsui lɛ, ni amɛkɛ Yehowa nɔwomɔ nikeenii lɛ ba ni akɛfee kpee buu lɛ kɛ ehe sɔɔmɔ nii lɛ fɛɛ kɛ atadei krɔŋkrɔŋi lɛ.” (2 Mose 35:21) Yɛ anɔkwale mli lɛ, amɛ tsuijurɔnaa nikeenii lɛ bafa kwraa fe bɔ ni he hiaa kɛha nitsumɔ lɛ aahu akɛ ebabi ni aha gbɔmɛi lɛ ‘afɔɔ kɛbaa’!—2 Mose 36:5, 6.

Susumɔ nɔkwɛmɔnɔ kroko he okwɛ. Beni kpee buu lɛ etsu eyiŋtoo he nii egbe naa ni gbɛjianɔtoo miiya nɔ kɛha sɔlemɔtsũ lɛ maa lɛ, David diɛŋtsɛ kɛ nii babaoo ha kɛha sɔlemɔtsũ lɛ ni ebi Salomo baama lɛ. Ebi hu koni mɛi krokomɛi abafata he, ni gbɔmɛi lɛ here nɔ kɛ nikeenii ni jara wa ni amɛkɛbaha Yehowa. Jwiɛtɛi kɛ shika lɛ pɛ jarawalɛ baashɛ akpekpei akpei 50, yɛ bɔ ni ejara ji amrɔ nɛɛ naa. “Ni maŋ lɛ nya yɛ ha ni amɛha yɛ tsuijurɔ naa lɛ hewɔ.”—1 Kronika 29:3-9; 2 Kronika 5:1.

‘Tsuijurɔ Naa Nihamɔi’ yɛ Wɔ Gbii Nɛɛ Amli

Mɛɛ gbɛ nɔ wɔɔtsɔ wɔna miishɛɛ ni anaa yɛ tsuijurɔ naa nihamɔ mli lɛ mli gbɛfaŋnɔ yɛ wɔgbii nɛɛ amli? Nitsumɔ ni he hiaa fe fɛɛ ni miiya nɔ amrɔ nɛɛ yɛ je lɛŋ lɛ ji Maŋtsɛyeli shiɛmɔ kɛ kaselɔ feemɔ nitsumɔ lɛ. (Mateo 24:14; 28:19, 20; Bɔfoi lɛ Asaji 1:8) Ni Yehowa ena akɛ ehi akɛ etuu shikpɔŋ lɛ nɔ nibii ni kɔɔ Maŋtsɛyeli lɛ he lɛ ewo e-Dasefoi lɛ adɛŋ.—Yesaia 43:10.

Eyɛ faŋŋ akɛ ehe miihia ni ana shika koni akɛtsu nitsumɔ ni Yehowa Odasefoi tsuɔ ŋmɛnɛ lɛ. Ebiɔ ni ana shika koni akɛma ni akɛsaa Maŋtsɛyeli Asai, Kpee Asai, nitsumɔhe niji, woji afeemɔhei, kɛ Betel shiai. Ebiɔ ni ana shika koni akɛwo Bibliai kɛ Biblia kasemɔ woji ni atsɔɔ shishi kɛyaa wiemɔi sɔrɔtoi amli lɛ afeemɔ kɛ amɛjaa he nyɔmɔ. Mɛɛ gbɛ nɔ atsɔɔ awoɔ gbɛjianɔtoo ni tamɔ nɛkɛ he nyɔmɔ? Kɛtsɔ oniatsumɔ ni jɛ tsuijurɔ naa titri nɔ!

Onia ni atsuɔ lɛ babaoo jɛɔ aŋkroaŋkroi ni—taakɛ yoo okulafo ni Yesu na lɛ ji lɛ—amɛyɔɔ nɔ ko fioo pɛ lɛ aŋɔɔ. Akɛni amɛsumɔɔɔ ni Yehowa hiɛnyamwoo yɛ nɛkɛ gbɛ nɔ lɛ aŋmɛɛ amɛ hewɔ lɛ, amɛhaa shika bibii “bɔ ni amɛaanyɛ,” ni bei komɛi po lɛ, amɛhaa nɔ ni “fe bɔ ni amɛaanyɛ tete.”—2 Korintobii 8:3, 4.

Bɔfo Paulo kɛɛ Kristofoi ni yɔɔ Korinto lɛ akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni akajɛ ŋkɔmɔyeli aloo fimɔ mli: ejaakɛ tsuijurɔ naa halɔ Nyɔŋmɔ sumɔɔ.” (2 Korintobii 9:7) Tsuijurɔ naa nihamɔ biɔ gbɛjianɔtoo kpakpa. Paulo kɛɛ Korintobii lɛ akɛ: “Daa otsi mli klɛŋklɛŋ gbi lɛ nɔ lɛ, nyɛteŋ mɔ fɛɛ mɔ atiaa nɔ ko ato, yɛ bɔ ni enaa lɛ naa, koni mikaba dani atsu onia lɛ.” (1 Korintobii 16:2) Nakai nɔŋŋ hu mɛi ni sumɔɔ ni amɛtsu onia ni amɛkɛye amɛbua Maŋtsɛyeli nitsumɔ lɛ ŋmɛnɛ lɛ baanyɛ amɛkɛ shika ni baa amɛdɛŋ lɛ eko ato aha nakai yiŋtoo lɛ yɛ teemɔŋ, yɛ amɛ diɛŋtsɛ amɛ suɔmɔ naa.

Yehowa Jɔɔ Mɛi ni Woɔ Ehiɛ Nyam Lɛ

Yɛ be mli ni heloonaa nibii babaoo diɛŋtsɛ namɔ kɛ mumɔŋ shweremɔ baaa lɛ, ni wɔɔjɛ mlihilɛ mli wɔkɛ wɔnibii ni jara wa—wɔbe, wɔhewalɛ, kɛ wɔheloonaa nibii—aaawo Yehowa hiɛ nyam lɛ kɛ jɔɔmɔi babaoo baaba. Enɛ ji anɔkwale ejaakɛ Nyɔŋmɔ, mɔ ni nibii fɛɛ ji enɔ̃ lɛ haa wɔ nɔmimaa akɛ: “Mɔ ni nine kpɔɔ lɛ, eeewo fɔ, ni mɔ ni haa mɛi tɔrɔɔ lɛ, lɛ hu eeetɔ.”—Abɛi 11:25.

Yɛ Maŋtsɛ David gbele sɛɛ lɛ, ebinuu Salomo kɛ tsuijurɔ naa onia ni etsɛ ebua naa lɛ ma sɔlemɔtsũ fɛfɛo ko, taakɛ Yehowa etsɔɔ lɛ. Ni bei abɔ fɛɛ ni Salomo tee nɔ eye anɔkwa yɛ jamɔ ni ekɛhaa Nyɔŋmɔ lɛ mli lɛ, “Yuda kɛ Israel hi shi shweshweeshwe, . . . kɛjɛ Dan kɛyashi Beersheba.” (1 Maŋtsɛmɛi 5:5) Aboŋoi yimɔ obɔbɔ, ni weinbui fɛlɛ—bei abɔ ni Israelbii lɛ ‘woɔ Yehowa hiɛ nyam kɛ amɛnibii ni jara wa lɛ.’

Sɛɛ mli lɛ, Yehowa wie kɛtsɔ gbalɔ Maleaki nɔ akɛ: “ ‘Nyɛkɛkaa mi nyɛkwɛa,’ Yehowa Zebaot kɛɛ, ‘akɛ migbeleŋ ŋwɛi samfɛji lɛ mihaŋ nyɛ ni mifɔseŋ jɔɔmɔ mihaŋ nyɛ ni ateke nɔ lo?’ ” (Maleaki 3:10) Mumɔŋ shweremɔ ni Yehowa tsuji naa mli ŋɔɔmɔ ŋmɛnɛ lɛ ji odaseyeli ni tsɔɔ akɛ Nyɔŋmɔ eye eshiwoo lɛ nɔ.

Eka shi faŋŋ akɛ, Yehowa naa miishɛɛ kɛji wɔtsu wɔ gbɛfaŋnɔ yɛ Maŋtsɛyeli lɛ he nibii ni wɔɔha eya hiɛ lɛ amli. (Hebribii 13:15, 16) Ni ewo shi akɛ ebaafi wɔsɛɛ kɛji ‘wɔtao maŋtsɛyeli lɛ kɛ ejalɛ lɛ tsutsu.’ (Mateo 6:33) Eba akɛ wɔɔjɛ tsui ni eyi obɔ kɛ miishɛɛ babaoo mli ‘wɔkɛ wɔnibii ni jara wa lɛ awo Yehowa hiɛ nyam.’

[Akrabatsa ni yɔɔ baafa 28-29]

Gbɛ̀i ni Mɛi Komɛi Tsɔɔ Nɔ Amɛyeɔ Too Kɛhaa Jeŋ Muu Fɛɛ Nitsumɔ lɛ

Mɛi pii kɛ shika ko fɔɔ shi daa ni amɛkɛwoɔ tooyeli adekai ni akadi amɛ akɛ: “Tooyeli Kɛha Asafo lɛ Jeŋ Muu Fɛɛ Nitsumɔ—Mateo 24:14” lɛ amli. Daa nyɔŋ nɔ lɛ, asafoi lɛ kɛ shika nɛɛ majeɔ kɛyaa jeŋ muu fɛɛ nitsumɔhe yitso lɛ yɛ Brooklyn, New York, aloo amɛkɛyaa nitsumɔhe nine ni yɔɔ maŋ nɔ he ni amɛyɔɔ lɛ.

Abaanyɛ akɛ shika ni ataoɔ akɛke lɛ amaje tɛ̃ɛ kɛbaha Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, aloo abaanyɛ akɛya Asafo lɛ nitsumɔhe nine ni sɔmɔɔ maŋ ni oyɔɔ mli lɛ. Abaanyɛ akɛ jwetrii kɛ nibii krokomɛi ni jara wa hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ mli akɛ amɛji nibii ni akɛmiike kwraa.

Nibii ni Akɛha Shi Akɛkeko lɛ Ahe Gbɛjianɔtoo

Abaanyɛ akɛ shika aha Buu Mɔɔ Asafo lɛ yɛ gbɛjianɔtoo krɛdɛɛ ko naa akɛ, kɛ ehe miihia mɔ ni kɛha lɛ, abaaku sɛɛ akɛ shika ni akɛha lɛ aha. Kɛji ootao saji babaoo lolo lɛ, ofainɛ ŋmaa kɛbabi yɛ Treasurer’s Office kɛtsɔ adrɛs ni atsɔɔ yɛ yiteŋgbɛ lɛ nɔ.

Nihamɔ ni Akpɛ Yiŋ yɛ He

Kɛfata shika ni akɛkeɔ kwraa kɛ shika ni akɛhaa shi akɛkeko lɛ ahe lɛ, ayɛ gbɛi krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ekomɛi ji:

Inshuɔrans: Abaanyɛ aŋma Buu Mɔɔ Asafo lɛ gbɛi akɛ mɛi ni baana inshuɔrans gbɛjianɔtoo ko he sɛɛ lɛ ateŋ mɔ ko aloo yɛ nitsumɔ hejɔɔmɔ mli gbɛjianɔtoo hu mli. Esa akɛ atswa Asafo lɛ adafi yɛ gbɛjianɔtoo ni tamɔ nakai he.

Shika ni Akɛto Shikatoohe: Abaanyɛ aha shika ni akɛto, shika nɔ woji, aloo nitsumɔ mli hejɔɔmɔ mli shika ahi shi aloo akɛha Buu Mɔɔ Asafo lɛ yɛ mɔ lɛ gbele sɛɛ, yɛ bɔ ni nyɛmaŋ lɛ shikatoohei ŋmɛɔ gbɛ ni afee lɛ naa. Esa akɛ atswa Asafo lɛ adafi yɛ gbɛjianɔtoo ni tamɔ nakai he.

Nitsumɔi Amli Gbɛfaŋnɔ kɛ Shika ni Akɛfa: Abaanyɛ akɛ nitsumɔi amli gbɛfaŋnɔ ni ayɔɔ kɛ shika ni akɛfa ni abaaku sɛɛ awo ekoŋŋ lɛ aha Buu Mɔɔ Asafo lɛ akɛ nibii ni akɛmiike kwraa aloo kɛ gbɛjianɔtoo akɛ akɛ emli sɛɛnamɔi lɛ baaha mɔ ni kɛke lɛ.

Shikpɔji kɛ Tsũi: Abaanyɛ akɛ shikpɔji kɛ tsũi ni baahi hɔɔmɔ lɛ aha Buu Mɔɔ Asafo lɛ kɛtsɔ ke kwraa ni akɛaake nɔ, aloo abaashi shikpɔŋ loo tsũ lɛ aha mɔ ni kɛke lɛ ni ekwɛ nɔ aahu kɛyashi be mli ni ebaagbo. Esa akɛ mɔ ni taoɔ ekɛ shikpɔŋ loo tsũ ko aha Asafo lɛ ana Asafo lɛ dani efee nakai.

Shamaŋsheo kɛ Nii ni Ahaa Mɔ Kroko Gbɛi Kãa Nɔ: Abaanyɛ akɛ nibii ni ayɔɔ loo shika ake Buu Mɔɔ Asafo lɛ kɛtsɔ shamaŋsheo ni aŋma yɛ mla naa nɔ, aloo abaanyɛ aha Asafo lɛ gbɛi akã shika ni akɛto lɛ nɔ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa enaa too woo mli heyelii komɛi. Esa akɛ akɛ shamaŋsheo loo shika lɛ he wolo lɛ ekome amaje Asafo lɛ.

Taakɛ gbɛi “planned giving” (nihamɔ ni akpɛ yiŋ yɛ he) tsɔɔ lɛ, nɛkɛ tooyeli henɔ nɛɛ biɔ gbɛjianɔtoo yɛ mɔ ni taoɔ eye too lɛ gbɛfaŋ. Bɔni afee ni aye abua aŋkroaŋkroi ni miisumɔ koni Asafo lɛ ana nɛkɛ nihamɔ ni akpɛ yiŋ yɛ he henɔ nɛɛ eko he sɛɛ lɛ, afee wolo bibioo ko ni yitso ji Planned Giving to Benefit Kingdom Service Worldwide. (Nihamɔ ni Akpɛ Yiŋ yɛ He Koni Ehe Aba Sɛɛnamɔ Kɛha Maŋtsɛyeli Nitsumɔ yɛ Jeŋ Fɛɛ) Aŋma wolo bibioo nɛɛ yɛ sanebimɔi babaoo ni Asafo lɛ nine eshɛ nɔ ni kɔɔ nikeenii, shamaŋsheoi, kɛ nii ni ahaa mɔ kroko gbɛi kãa nɔ lɛ nɔ heremɔ naa. Saji krokomɛi ni kɔɔ tsũi, shika gbɛjianɔtoo, kɛ tooyeli gbɛjianɔtoo he lɛ hu yɛ mli, ni afee koni eye ebua aŋkroaŋkroi ni yɔɔ United States ni miisumɔ ni amɛye amɛbua Maŋtsɛyeli lɛ he nibii ni yɔɔ jeŋ muu fɛɛ lɛ koni amɛhala nɔ ni hi fe fɛɛ ni esa kɛha amɛ ni amɛfee nakai yɛ be mli ni amɛsusuɔ amɛweku kɛ amɛshihilɛi ahe. Kɛtsɔ wolo bibioo lɛ kanemɔ nɔ kɛ Planned Giving Desk lɛ kɛ sharamɔ nɔ lɛ, mɛi babaoo enyɛ amɛye amɛbua Asafo lɛ ni yɛ nakai beaŋ nɔŋŋ lɛ amɛha sɛɛnamɔi ni anaa yɛ too woo mli yɛ nakai feemɔ mli lɛ etee hiɛ. Wolo bibioo lɛ yɛ ni abaanyɛ abi, kɛtsɔ woloŋmaa nɔ aloo kɛtsɔ tɛlifon nɔ.

Mɛi ni yɔɔ nɛkɛ nihamɔ ni akpɛ yiŋ yɛ he nɛɛ eko he miishɛɛ lɛ aŋma wolo kɛbaha Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York 12563-9204, tɛlifon (914) 878-7000, aloo amɛŋma Asafo lɛ nitsumɔhe nine ni sɔmɔɔ maŋ ni amɛyɔɔ mli lɛ.