Amɛfee Yehowa Suɔmɔnaa Nii

Awo Hiob Emuuyeli Mlihiɛmɔ lɛ He Nyɔmɔ

HIOB ji nuu ni yɔɔ musuŋtsɔlɛ, okulafoi, awusai kɛ mɛi ni awaa amɛyi lɛ ahefalɔ. (Hiob 29:12-17; 31:16-21) Shi, trukaa kɛkɛ ni eyabote jaramɔ shihilɛ mli, ni elaaje enii ni eyɔɔ, ebii kɛ egbɔmɔtsoŋ hewalɛ. Mɔbɔ sane ji akɛ, nɛkɛ nɔbatsɛ ní bafee akulashiŋŋ kɛha mɛi ni ahaoɔ amɛ lɛ nine shɛ yelikɛbuamɔ fioo ko pɛ nɔ yɛ be mli ni ehia lɛ lɛ. Lɛ diɛŋtsɛ eŋa po kɛɛ lɛ akɛ “kwa Nyɔŋmɔ ni ogbo!” Ni ‘enanemɛi’ ni ji Elifaz, Bilda, kɛ Zofa eshɛjeee emii. Shi yɛ no najiaŋ lɛ, amɛwie akɛ Hiob efee esha ni no hewɔ lɛ esa akɛ enaa piŋmɔ.—Hiob 2:9; 4:7, 8; 8:5, 6; 11:13-15.

Yɛ nɔnaa babaoo lɛ fɛɛ sɛɛ lɛ, Hiob hi shi anɔkwafo. Enɛ hewɔ lɛ, Yehowa jie mɔbɔnalɛ kpo etsɔɔ Hiob ni ejɔɔ lɛ. Nɔ ni aŋma afɔ̃ shi ni tsɔɔ gbɛ ni etsɔ nɔ efee enɛ lɛ kɛ nɔmimaa haa Nyɔŋmɔ tsuji fɛɛ ni hiɛɔ amɛ emuuyeli mli lɛ akɛ amɛ hu abaawo amɛ nyɔmɔ yɛ be ni sa mli.

Bembuu kɛ Saamɔ

Klɛŋklɛŋ lɛ, Yehowa kã Elifaz, Bilda, kɛ Zofa hiɛ. Beni ewieɔ etsɔɔ Elifaz ni eka shi faŋŋ akɛ lɛ ji onukpa lɛ ekɛɛ: “Mimli ewo okɛ onanemɛi enyɔ lɛ fɛɛ la, ejaakɛ nyɛwieee mihe bɔ ni ja tamɔ mitsulɔ Hiob. No hewɔ lɛ agbɛnɛ nyɛmɔmɔa tsina hii kpawo kɛ tooagboi kpawo nyɛhaa nyɛhe ni nyɛyaa mitsulɔ Hiob ŋɔɔ, ni nyɛyashã shãa afɔle nyɛhaa nyɛhe, ni mitsulɔ akpa fai aha nyɛ.” (Hiob 42:7, 8) Susumɔ nɔ ni enɛ tsɔɔ lɛ he okwɛ!

Yehowa bi afɔleshaa kɛjɛ Elifaz, Bilda, kɛ Zofa dɛŋ, ekolɛ koni ekɛma bɔ ni amɛ esha lɛ da ha lɛ nɔ mi. Eji anɔkwale akɛ, kɛ́ amɛle jio amɛleee jio lɛ, amɛbɔ musu amɛshi Nyɔŋmɔ, yɛ nɔ ni amɛkɛɛ akɛ ‘ebɛ hemɔkɛyeli yɛ etsuji lɛ amli’ ni akɛ ekɔɔɔ ehe eko kɛji Hiob yeɔ anɔkwa loo eyeee anɔkwa lɛ hewɔ. Elifaz po kɛɛ akɛ yɛ Nyɔŋmɔ hiɛ lɛ Hiob jara waaa fe omlɛgɛ! (Hiob 4:18, 19; 22:2, 3) Ebɛ naakpɛɛ akɛ Yehowa kɛɛ akɛ: “Nyɛwieee mihe bɔ ni ja”!

Shi jeee fɛɛ nɛ. Elifaz, Bilda, kɛ Zofa hu fee esha amɛshi Hiob diɛŋtsɛ akɛni amɛkɛɛ lɛ akɛ lɛ diɛŋtsɛ ekɛ naagbai eba enɔ lɛ hewɔ. Amɛ naafolɔmɔ ni bɛ nɔdaamɔ nɔ̃ kɛ mlitsɔlɛ ni amɛbɛ lɛ ha edɔ Hiob ni ehao lɛ, ni enɛ ha efo akɛ: “Mɛɛ beyinɔ nyɛaagba misusuma naa ni nyɛkɛ wiemɔi aaakumɔ mi dukuduku kɛyashi?” (Hiob 10:1; 19:2) Susumɔ hiɛgbele ni ebaafee kɛha nɛkɛ hii etɛ nɛɛ yɛ be mli ni amɛkɛ afɔleshaa nii lɛ bahaa Hiob kɛha amɛhe eshai lɛ he okwɛ!

Shi esaaa akɛ Hiob mii shɛɔ ehe yɛ shi ni aba amɛ lɛ hewɔ. Eji anɔkwale akɛ Yehowa bi koni esɔle eha enaafolɔlɔi lɛ. Hiob fee taakɛ afã lɛ lɛ, ni ajɔɔ lɛ yɛ enɛ hewɔ. Klɛŋklɛŋ lɛ, Yehowa tsá ehela ni yɔɔ gbeyei lɛ. No sɛɛ lɛ, Hiob nyɛmimɛi hii, nyɛmimɛi yei, kɛ tsutsu nanemɛi lɛ ba ni amɛbashɛje emii, “ni amɛtɛŋ mɔ fɛɛ mɔ ha lɛ jwiɛtɛi kuku kome kɛ shika ga kome.”a Agbɛnɛ hu, Hiob ‘ná tooi akpei nyɔŋma kɛ ejwɛ kɛ yomai akpei ekpaa kɛ tsinai ntatai akpe kome kɛ tejiyei akpe kome.’b Ni eka shi faŋŋ akɛ, Hiob ŋa lɛ kɛ lɛ teŋ saa ekoŋŋ. Yɛ be ni sa mli lɛ, akɛ bihii kpawo kɛ biyei etɛ jɔɔ Hiob, ni ehi shi ni ena eseshibii ayinɔ ni ji ejwɛ lɛ.—Hiob 42:10-17.

Nikasemɔi Kɛha Wɔ

Hiob fee nɔkwɛmɔnɔ ni ekaaa efɔ̃ shi eha ŋmɛnɛŋmɛnɛ beaŋ Nyɔŋmɔ tsuji. Eji mɔ ni “kpa ko bɛ ehe ni eja,” mɔ ni Yehowa nyɛ etsɛ́ lɛ akɛ “mitsulɔ” lɛ. (Hiob 1:8; 42:7, 8) Ni kɛlɛ, enɛ etsɔɔɔ akɛ Hiob yeɔ emuu. Yɛ ekaai lɛ amli be ko lɛ, esusu yɛ gbɛ ni ejaaa nɔ akɛ Nyɔŋmɔ ji mɔ ni kɛ amanehulu lɛ baa enɔ lɛ. Ewie eshi gbɛ ni Nyɔŋmɔ tsɔɔ nɔ ekɛ gbɔmɛi yeɔ lɛ po. (Hiob 27:2; 30:20, 21) Ni etsɛ́ lɛ diɛŋtsɛ ehe akɛ jalɔ moŋ fe Nyɔŋmɔ. (Hiob 32:2) Shi Hiob kpoo akɛ eeekwa e-Bɔlɔ lɛ, ni ekɛ heshibaa kpɛlɛ jajemɔ nɔ kɛjɛ Nyɔŋmɔ ŋɔɔ. Ekpɛlɛ nɔ akɛ: “Mijaje nɔ ni minaaa naa lɛ. . . . Eedɔ mi ni miishwa mihe yɛ su kɛ lamlu mli.”—Hiob 42:3, 6.

Kɛ́ wɔyaje kaa shishi lɛ, ekolɛ wɔhu wɔbaasusu nii ahe, wɔbaawie, loo wɔbaafee wɔnii yɛ gbɛ ni esaaa nɔ. (Okɛto Jajelɔ 7:7 he.) Ni kɛlɛ, kɛ́ suɔmɔ ni wɔyɔɔ kɛha Nyɔŋmɔ lɛ mli kwɔ lɛ, wɔtseŋ ehiɛ atua aloo wɔmli fuŋ lɛ yɛ shihilɛi ni mli wawai ní eŋmɛ gbɛ ni ebaa wɔnɔ lɛ hewɔ. Yɛ no najiaŋ lɛ, wɔbaahiɛ wɔ emuuyeli lɛ mli koni yɛ naagbee mli lɛ, wɔkpa jɔɔmɔi babaoo. Lalatsɛ lɛ kɛɛ yɛ Yehowa he akɛ: “Mɔ ni yeɔ anɔkwa lɛ, okɛ lɛ baaye yɛ anɔkwayeli mli.”—Lala 18:25, NW.

Dani aaaku sɛɛ akɛ Hiob aba gbɔmɔtsoŋ hewalɛ kpakpa mli ekoŋŋ lɛ, Yehowa bi koni esɔle eha mɛi ni tɔ̃ enɔ lɛ. Mɛɛ nɔkwɛmɔnɔ kpakpa kɛha wɔ nɛ! Yehowa biɔ ni wɔkɛ mɛi ni etɔ̃ wɔnɔ lɛ ahe eshai ake amɛ dani abaanyɛ akɛ wɔhe eshai ake wɔ. (Mateo 6:12; Efesobii 4:32) Kɛ́ wɔsumɔɔɔ ni wɔkɛ mɛi krokomɛi ahe eshai keɔ amɛ yɛ be mli ni yiŋtoo kpakpa ko yɛ ni wɔɔdamɔ nɔ wɔfee nakai lɛ, ani wɔbaanyɛ wɔkpa gbɛ yɛ gbɛ ni ja nɔ akɛ Yehowa baana wɔ mɔbɔ?—Mateo 18:21-35.

Wɔ fɛɛ wɔkɛ kaai kpeɔ yɛ be kɛ bei amli. (2 Timoteo 3:12) Kɛlɛ, taakɛ Hiob ji lɛ, wɔbaanyɛ wɔhiɛ emuuyeli mli. Kɛtsɔ nakai feemɔ nɔ lɛ, wɔbaakpa nyɔmɔwoo babaoo. Yakobo ŋma akɛ: “Naa, wɔjɔɔ mɛi ni ŋmɛɔ amɛtsui shi lɛ. Nyɛnu Hiob tsuishiŋmɛɛ lɛ he, ni nyɛna [Yehowa, NW] lɛ naagbee lɛ; akɛ [Yehowa, NW] mlitsɔɔ lɛ babaoo, ni emli jɔ hu.”—Yakobo 5:11.

[Shishigbɛ niŋmai]