Gbɛi Kpawo ni Obaanyɛ Otsɔ nɔ Oná Biblia Kanemɔ He Sɛɛ

“Biblia lɛ ji wolo ni ahe fe fɛɛ yɛ yinɔsane mli, ni daa afi hu lɛ no nɔŋŋ ji wolo ni aheɔ fe fɛɛ.”—TIME WOLO TƐTRƐƐ.

“Bei komɛi lɛ, mikaneɔ Biblia lɛ, shi ekanemɔ nyaraa mihiɛ waa.”—KEITH, LALAFOLƆ KO NI ALE LƐ WAA NI JƐ ENGLAND.

EYƐ naakpɛɛ akɛ mɛi babaoo yɛ Biblia lɛ eko, shi amɛnáaa ekanemɔ he sɛɛ jogbaŋŋ. Shi mɛi krokomɛi buɔ nɔ ni amɛkaneɔ yɛ Biblia lɛ mli akɛ ejara wa waa. Ákɛ nɔkwɛmɔnɔ lɛ, yoo ko ni atsɛɔ lɛ Nancy lɛ kɛɛ akɛ: “Kɛjɛ beni mibɔi Biblia lɛ kanemɔ kɛ enɔjwɛŋmɔ daa leebi lɛ, eha minuɔ he akɛ manyɛ makpee shihilɛ fɛɛ shihilɛ ni mikɛaakpe yɛ gbi lɛ mli lɛ naa. Enɛ ni mifeɔ daa lɛ eye ebua mi waa fe nɔ fɛɛ nɔ ni mika mikwɛ afii 35 ni eho nɛ lɛ ni eha minyɛ miye bɔ ni mihaoɔ waa lɛ nɔ.”

Kɛji okaneko Biblia lɛ pɛŋ po lɛ, ani bɔ ni eye ebua mɛi ni kaneɔ lɛ haaa oná he miishɛɛ? Kɛ́ oji mɔ ko ni kaneɔ Biblia lɛ momo lɛ, ani obaasumɔ ni oná nɔ ni okaneɔ lɛ he sɛɛ babaoo? Kɛ́ nakai ni lɛ, kaa gbɛi kpawo ni atsɔɔ yɛ sane nɛɛ mli lɛ okwɛ.

Gbɛ 1—Okɛ jwɛŋmɔ ni ja akane

◼ Obaanyɛ okane Biblia lɛ tamɔ wolo ko ni aŋma kɛkɛ loo akɛni aabi ni okane lɛ hewɔ loo kɛ jwɛŋmɔ akɛ ebaaye ebua bo yɛ jeŋ ni naagbai eyi mli tɔ nɛɛ mli. Shi kɛ́ okɛfee oti ni ma ohiɛ akɛ ootao ole anɔkwale ni kɔɔ Nyɔŋmɔ he lɛ, ebaaye ebua bo waa. Kɛfata he lɛ, kɛ́ okane Biblia lɛ kɛ jwɛŋmɔ akɛ ootao ona bɔ ni emli shɛɛ sane lɛ baanyɛ aye abua bo yɛ oshihilɛ mli lɛ, obaaná jɔɔmɔi babaoo kɛjɛ mli.

Ŋmalɛi lɛ kɛ Biblia lɛ toɔ ashwishwɛ he ni ekɛtsɔɔ bɔ ni ehe hiaa ni mɔ kɛ jwɛŋmɔ ni ja akane lɛ mli akɛ: “Kɛ́ mɔ ko ji wiemɔ lɛ nulɔ kɛkɛ shi ejeee enɔyelɔ hu lɛ, nɛkɛ gbɔmɔ nɛɛ tamɔ nuu ko ni kwɛɔ ehiɛ su lɛ yɛ ashwishwɛ mli; ejaakɛ ekwɛɔ ehe, ni eyaa, ni amrɔmrɔ nɔŋŋ lɛ ehiɛ kpaa bɔ ni eyɔɔ lɛ nɔ. Shi mɔ ni maa eyi shi ekwɛɔ heyeli mla ni hi kɛwula shi lɛ mli, ni ekãa he, ni ejeee mɔ ni nuɔ ni ehiɛ kpaa nɔ, shi moŋ eji nɔyelɔ ni tsuɔ he nii lɛ, nakai mɔ lɛ aaajɔɔ lɛ yɛ enɔyeli lɛ mli.”—Yakobo 1:23-25.

Nuu ni awie ehe yɛ nɔkwɛmɔnɔ nɛɛ mli lɛ kwɛ ehiɛ yɛ ashwishwɛ lɛ mli moŋ, shi esaaa nɔ ko nɔ ko. Ekolɛ ekwɛ ehiɛ shwuaa ko kɛkɛ, loo ekolɛ enuuu he akɛ esa akɛ esaa nɔ ko. Nakai nɔŋŋ kɛ́ wɔkane Biblia lɛ jabejabe loo wɔkɛ nɔ ni wɔkaneɔ lɛ tsuuu nii lɛ, wɔnáŋ he sɛɛ jogbaŋŋ. Nɔ ni tamɔɔɔ nakai lɛ, kɛ́ wɔpɛi Biblia lɛ mli kɛ jwɛŋmɔ akɛ wɔbaafee nɔ ni wɔkaneɔ lɛ “nɔyelɔ,” ni wɔŋmɛ gbɛ ni Nyɔŋmɔ susumɔi kudɔ wɔjwɛŋmɔi kɛ wɔnifeemɔi lɛ, wɔbaaná miishɛɛ diɛŋtsɛ.

Gbɛ 2—Kanemɔ Biblia shishitsɔɔmɔ ni anyɛɔ amuɔ afɔ̃ɔ nɔ

◼ Ekolɛ ayɛ Biblia shishitsɔɔmɔi srɔtoisrɔtoi yɛ owiemɔ lɛ mli. Eyɛ mli akɛ Biblia shishitsɔɔmɔi lɛ ateŋ eko fɛɛ eko baanyɛ aye abua bo moŋ, shi ekomɛi kɛ wiemɔi ni be eho loo amɛshishinumɔ wala tsu nii. (Bɔfoi lɛ Asaji 4:13) Biblia shishitsɔɔmɔi komɛi po etsake Biblia mli shɛɛ sane ni yɔɔ krɔŋŋ lɛ hiɛ yɛ amɛkusumii ahewɔ. Ákɛ nɔkwɛmɔnɔ lɛ, ekomɛi kɛ sablai ni ji “Nyɔŋmɔ” loo “Nuŋtsɔ” eye Nyɔŋmɔ gbɛ́i, Yehowa lɛ najiaŋ. No hewɔ lɛ, kɛ oohala Biblia shishitsɔɔmɔ ko lɛ, taomɔ nɔ ni eshishitsɔɔmɔ lɛ ja ni shishinumɔ waaa ni baanyɛ eha oya nɔ okane.

Mɛi akpei abɔ ni kaneɔ Biblia lɛ yɛ jeŋ fɛɛ lɛ ena akɛ New World Translation lɛ ja ni eshishinumɔ hu waaa.a Susumɔ nuu onukpa ko ni yɔɔ Bulgaria lɛ he okwɛ. Etee Yehowa Odasefoi asafoŋ kpee ko shishi ni aha lɛ New World Translation lɛ eko. No sɛɛ lɛ, ekɛɛ akɛ, “Mikane Biblia lɛ afii pii, shi mikaneko Biblia shishitsɔɔmɔ ni shishinumɔ waaa ni taa mɔ tsuiŋ nɛkɛ pɛŋ.”

Gbɛ 3—Sɔlemɔ

◼ Obaanu Biblia lɛ shishi jogbaŋŋ kɛ́ obi Mɔ ni ha aŋma Biblia lɛ yelikɛbuamɔ, taakɛ lalatsɛ lɛ fee lɛ, ekɛɛ akɛ: “Gbelemɔ mihiŋmɛii, koni mana omla lɛ mli naakpɛɛ nii lɛ!” (Lala 119:18) Be fɛɛ be ni obaakane Ŋmalɛi lɛ, sɔlemɔ obi lɛ ni eye ebua bo koni onu e-Wiemɔ lɛ shishi. Obaanyɛ oda lɛ shi hu akɛ eha wɔ Biblia lɛ, ejaakɛ jeee no kulɛ wɔnyɛŋ wɔle Nyɔŋmɔ.—Lala 119:62.

Ani Nyɔŋmɔ boɔ sɔlemɔi kɛha yelikɛbuamɔ ni tamɔ nɛkɛ lɛ atoi? Susumɔ nɔ ni ba oblayei enyɔ ni jɛ Uruguay lɛ anɔ lɛ he okwɛ. Amɛnuuu nɔ ni Biblia lɛ kɛɔ yɛ Daniel 2:44 lɛ shishi, ni amɛsɔle akɛ Nyɔŋmɔ atsu mɔ ko ni ebaye ebua amɛ ni amɛnu shishi. Beni oblayei lɛ egbele amɛ-Biblia lɛ lolo ni amɛŋako lɛ, Yehowa Odasefoi enyɔ batswa amɛshinaa lɛ, amɛkane nakai ŋmalɛ ni oblayei lɛ esɔle yɛ he lɛ nɔŋŋ amɛtsɔɔ amɛ, ni amɛgbala mli akɛ ekɔɔ adesai anɔyelii ni Nyɔŋmɔ Maŋtsɛyeli lɛ baaye amɛnajiaŋ lɛ he.b Oblayei lɛ ná nɔmimaa akɛ Nyɔŋmɔ ebo amɛsɔlemɔ kɛha yelikɛbuamɔ lɛ toi.

Gbɛ 4—Kanemɔ daa gbi

◼ Mɔ ko ni kalaa woji lɛ tsɔɔ akɛ beni ayatutua United States yɛ September 11, 2001 lɛ sɛɛ lɛ, “mɛi bɔi Biblia lɛ hemɔ waa.” Yɛ mɛi babaoo agbɛfaŋ lɛ, kɛ́ amɛyaje jaramɔ shihilɛ mli pɛ dani amɛtaoɔ Nyɔŋmɔ Wiemɔ lɛ sɛɛ gbɛ. Shi Biblia lɛ woɔ wɔ hewalɛ ni wɔkane daa, ejaakɛ ekɛɔ akɛ: “Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane, koni ojwɛŋ nɔ ni ofee tamɔ bɔ ni aŋma yɛ mli lɛ pɛpɛɛpɛ; ejaakɛ no aaaha ofee nɔbatsɛ kɛ hiɛshikalɔ.”—Yoshua 1:8.

Abaanyɛ akɛ bɔ ni Biblia lɛ ni akaneɔ daa lɛ he yɔɔ sɛɛnamɔ lɛ ato nuu ko ni miiye tsui hela ni ekpɛ eyiŋ akɛ ebaaye niyenii ni hewalɛ babaoo yɔɔ mli lɛ he. Kɛji emɛɔ kɛyashiɔ enuɔ he akɛ etsui lɛ miiwa ehe dani eyeɔ niyenii nɛɛ, ani ebaaye ebua lɛ? Dabi. Esa akɛ eye niyenii ni hewalɛ yɔɔ mli nɛɛ daa koni ená he sɛɛ. Nakai nɔŋŋ hu Biblia lɛ ni obaakane daa lɛ baaye abua bo ni “ofee nɔbatsɛ.”

Gbɛ 5—Tsakemɔ bɔ ni okaneɔ lɛ ohaa lɛ mli

◼ Ehi jogbaŋŋ akɛ obaakane Biblia lɛ kɛjɛ Mose Klɛŋklɛŋ Wolo lɛ kɛyashi Kpojiemɔ, shi kɛ́ otsake bɔ ni okaneɔ lɛ ohaa lɛ mli lɛ, obaaná he miishɛɛ jogbaŋŋ. Naa ŋaawoi fioo komɛi ni obaanyɛ okɛtsu nii.

Kanemɔ mɔ ko pɔtɛɛ he sane. Kanemɔ Biblia lɛ mli yitsei fɛɛ loo woji fɛɛ ni wieɔ Nyɔŋmɔ jálɔ pɔtɛɛ ko he lɛ he sane, tamɔ mɛi ni nyiɛ sɛɛ nɛɛ:

• Yosef: 1 Mose 37–50.

• Rut: Rut 1–3.

• Yesu: Mateo 1–28; Marko 1–16; Luka 1–24; Yohane 1–21.c

Okɛ sane pɔtɛɛ ko ama ohiɛ. Kanemɔ ŋmalɛi ni kɔɔ nakai sane lɛ he. Ákɛ nɔkwɛmɔnɔ lɛ, taomɔ nii amli yɛ sɔlemɔ he, ni no sɛɛ lɛ, kanemɔ Biblia lɛ mli ŋaawoi ni kɔɔ sɔlemɔ he kɛ agbɛnɛ hu mɛi komɛi asɔlemɔi ni yɔɔ Biblia lɛ mli lɛ.d

Kanemɔ ni anu. Kɛ́ okaneɔ Biblia lɛ ni anuɔ lɛ, obaanyɛ oná he sɛɛ jogbaŋŋ. (Kpojiemɔ 1:3) Nyɛbaanyɛ nyɛfee ekome po kɛkane akɛ weku, ni nyɛto naa nyɛkane kukuji lɛ bɔ ni abaanu loo nyɛbaanyɛ nyɛjara mɛi ni awie amɛhe sane yɛ nikanemɔ lɛ mli lɛ nyɛha nyɛhe ni nyɛkane. Mɛi komɛi sumɔɔ ni amɛbo Biblia ni arikɔdi lɛ toi. Yoo ko wie akɛ: “Ebafee nɔ ni wa kɛha mi akɛ maje Biblia lɛ kanemɔ shishi, no hewɔ lɛ mibɔi nɔ ni arikɔdi lɛ toiboo. Amrɔ nɛɛ mina akɛ Biblia lɛ kanemɔ haa mɔ náa miishɛɛ kwraa fe adesã wolo ko ni mli ŋɔɔ.”

Gbɛ 6—Jwɛŋmɔ nɔ

◼ Bɔ ni dekã bɛ shihilɛ mli ŋmɛnɛ kɛ bɔ ni shihilɛ mli nibii lɛ gbalaa mɔ jwɛŋmɔ lɛ haaa mɔ anyɛ ajwɛŋ nii anɔ. Shi, taakɛ bɔ ni ehe miihia ni wɔgbɔmɔtso lɛ agbɛlɛ niyenii ni wɔyeɔ lɛ koni wɔgbɔmɔtso lɛ aná hewalɛ lɛ, nakai nɔŋŋ esa akɛ wɔjwɛŋ nɔ ni wɔkaneɔ yɛ Biblia lɛ mli lɛ nɔ koni wɔná he sɛɛ. Wɔfeɔ nakai kɛtsɔ nɔ ni wɔkane lɛ nɔ ni wɔɔjwɛŋ kɛ sanebimɔi tamɔ enɛɛmɛi ni wɔɔbi wɔhe lɛ anɔ: ‘Mɛni mikase yɛ Yehowa Nyɔŋmɔ he? Mɛɛ gbɛ nɔ enɛ kɔɔ mihe? Te mafee tɛŋŋ mikɛtsu nii kɛye ebua mɛi krokomɛi?’

Kɛ́ wɔjwɛŋ nii anɔ yɛ gbɛ ni tamɔ nakai nɔ lɛ, ehaa Biblia lɛ mli shɛɛ sane lɛ taa wɔtsuiŋ ni ehaa wɔnáa miishɛɛ babaoo yɛ Nyɔŋmɔ Wiemɔ lɛ ni wɔkaneɔ lɛ mli. Lala 119:97 lɛ kɛɔ akɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” Lalatsɛ lɛ tsɔ niianɔjwɛŋmɔ nɔ esusu Ŋmalɛi lɛ ahe jenamɔ fɛɛ. Nakai ni efee lɛ ye ebua lɛ ni ená nɔ ni ekaseɔ lɛ he miishɛɛ waa.

Gbɛ 7—Ha aye abua bo

◼ Nyɔŋmɔ kpaaa gbɛ akɛ wɔbaanu e-Wiemɔ lɛ shishi kɛmɔ shi yɛ wɔ diɛŋtsɛ wɔnyɛmɔ naa. Biblia lɛ diɛŋtsɛ po kɛɔ akɛ nibii komɛi yɛ Biblia lɛ mli ni “amɛshishinamɔ wa.” (2 Petro 3:16, Ga Biblia hee) Bɔfoi lɛ Asaji wolo lɛ wieɔ Etiopia piafonyo ko ni nuuu Biblia lɛ fã ko ni ekane lɛ shishi lɛ he. Nyɔŋmɔ tsu E-tsuji lɛ ateŋ mɔ kome ni eyaye ebua lɛ, ni nɔ ni jɛ mli kɛba ji akɛ, Etiopianyo lɛ ‘yi gbɛ kɛ nyamɔ.’—Bɔfoi lɛ Asaji 8:26-39.

Bo hu obaanyɛ oná Biblia lɛ kanemɔ he sɛɛ jogbaŋŋ kɛ́ obi ni aye abua bo ni onu nɔ ni okaneɔ lɛ shishi. Taomɔ Yehowa Odasefoi ni yɔɔ okutso lɛ mli lɛ asɛɛ gbɛ kɛha enɛ, loo ŋmaa kɛya adrɛs ni yɔɔ wolo tɛtrɛɛ nɛɛ baafa 4 lɛ kɛha shĩa Biblia mli nikasemɔ ni aheee bo nɔ ko.—w10-E 07/1.

[Shishigbɛ niŋmaa]